Iniọvo Eghanghanre:

Uyovwinrota ọvwevwerhen kpokpọ ọvo rọ cha okpokpahọn re se “Imitate Their Faith” vwomaphia vwẹ Uwevwin Orhẹrẹ ẹsosuọ re phiẹ phiyọ ada, ọ ra teyenphia vwẹ January 1, 2008. Rhanvwẹ ọke yena rhe, emeranvwe erherha kọyen uyovwinrota yena vwọ vwomaphia. O muẹro dẹn nẹ ọyena vwerhen avwanre oma!

Die yen ihwo ta kpahen uyovwinrota yena? Aye ọvo vwo se uyovwinrota ro shekpahen Mata nu, o de si: “Me hwẹre ọke mi vwo se, kidie ọ ghwa họhọ ovwẹ, ọkieje yen me vwọ guọnọ dia ohwo rọ nabọ ghọ erhorha, ọke evo me tobọ karophiyọ nẹ ofori me vwọ domaji rere mi nene erhorha mẹ gbiku-un.” Ọnana oborẹ emeghene ọvo tare ọke ro vwo se ikuegbe rẹ Ẹsta nu: “Me riẹnre nẹ ọke evo ohwo se mu ẹwẹn rọyen eje kpahen iwun vẹ osẹnvwe ri she rhe. Ofori nẹ a sẹn omamọ osẹnvwe, ẹkẹvuọvo, e ruo vrẹka-a.” Ọ da je ta: “Jihova vwo oniso rẹ oka rẹ ohwo rẹ avwanre hepha vwẹ obevun.” Uyovwinrota ọvo ro shekpahen ọyinkọn Pita mu oniọvo aye ọvo vwọ ta: “Ikuegbe na ro ovwẹ oma chidia ọke mi vwo se. Ọ ghwa họhọ nẹ me hẹ etiyin! Me nabọ vwẹ ẹwẹn nene ikuegbe na.”

Ihwo nana vẹ efa re che se keri-i ri si ẹbe vwo dje ọdavwaro phia kpahen iyovwinrota nana ghwa kanrunumu eta nana rẹ ọyinkọn Pọl siri vwẹ ọke grongron rọ wanre: “Kemu kemu re siri phihọ otọ rhabae rhe, e si ayen phihọ otọ kẹ eyono rẹ avwanre.” (Rom 15:4) Jihova vwo imuẹro nẹ e si ikuegbe yena vwẹ Baibol na rere o se vwo yono avwanre iyono eghanghanre sansan. O toro ikpe rẹ avwanre hẹ ukoko na re-e, avwanre eje se yono vwo nẹ ikuegbe na.

Avwanre guọnọre nẹ ovwan se ọbe nana. Reyọ vwọba ru Ẹga Orua, o che je emọ na! Ọke re de che yono vwẹ Uyono ri Baibol Rukoko, wo jẹ ọ rẹ udughwrẹn ọvo dede gbọ wẹ-ẹ! Jomaotọ se ọbe nana, wo brokpakpa-a. Vwẹ ẹwẹn roro ikuegbe na. Phi oma wẹn phiyọ ẹdia rẹ ihwo rehẹ ikuegbe na. Vwẹ oborẹ ayen ruru vwẹ ẹdia sansan vwọ vwanvwe oborẹ wo rhe ru.

Oma vwerhen avwanre re vwo siobọnu ọbe nana kẹ ovwan. E jẹ ọ dia ebruphiyọ kẹ wẹ vẹ orua wẹn. E jẹ ẹguọnọ vẹ ẹrhovwo rẹ avwanre nene ovwan dia,

Ẹko Rọvwẹrote Iruo rẹ Iseri ri Jihova