1, 2. Owian vọ yen Noa vẹ orua rọyen wianre, kẹ egbabọse vọ yen ayen hirharoku?

NOA riẹn oma rọyen, kidie oma na rhọ. Vwẹro roro nẹ wọ mrẹ Noa ro chidia ibẹnji rovwoma, jẹ o ni oborẹ okọ na rho te. Ọnrhe ikota ra vwọ rhare okọ na gbon nene asan eje, e ji nyo edo rẹ irhe ra teyan. Vwo nẹ asan ro chidia na, Noa nabọ mrẹ owian ọgangan rẹ emọ rọyen wian, rẹ ayen vwo muẹ irhe ride kẹ ohwohwo. Vwẹ ikpe buebun re, yen Noa vẹ aye rọyen, emọ rọyen kugbe eya rẹ emọ na, vwọ wiowian rẹ ebanbọn rẹ okọ nana re. Dede nẹ ayen ru ẹbẹre evo re, jẹ owian buebun je vọn otọ!

² Ihwo rẹ ubrakpọ yena reyọ Noa vẹ orua rọyen phiyọ ẹkpa ri riẹn oborẹ ayen ruẹ-ẹ. Noa vẹ emọ rọyen vwọ bọn okọ na yanran, jẹ ihwo na hwẹ ayen kidie ayen niro nẹ oghwe vuọvo cha sa ghwọrọ akpọ na-a. Oghwọrọ rẹ Noa si ayen orhọ kpahan na họhọ emu evwerhẹn. Ayen se vwo ẹruọ rẹ oboresorọ omiragua soso nana vwọ ghwọrọ akpọ rọyen vẹ ọ rẹ orua rọyen phiyọ emu rẹ ẹkpa ọtiọye-en. Ẹkẹvuọvo, Jihova rọ dia Ọghẹnẹ ri Noa na, mrẹ Noa kerẹ ẹkpa-a.

3. Idjerhe vọ yen Noa vwo nene Ọghẹnẹ yan kugbe?

³ Baibol na da ta: “Noa da yan kpahọ Ọghẹnẹ” rẹ uyota na. (Se Jẹnẹsis 6:9.) Die yen ọyena mudiaphiyọ? Ọ dianẹ Ọghẹnẹ rhe otọrakpọ na rhi nene Noa ya-an, yẹrẹ kẹ Noa bru Ọghẹnẹ ra vwẹ obo odjuvwu-u. Ẹkẹvuọvo, o mudiaphiyọ nẹ Noa nabọ nyupho rẹ Ọghẹnẹ, o ji vwo ẹguọnọ rọyen mamọ te ẹdia ra sa vwọ tanẹ ọ vẹ Jihova yan kugbe kerẹ igbeyan. Ikpe buebun vwọ wan nu, Baibol na da tanẹ Noa vwẹ oma rẹ esegbuyota rọyen “vwo brorhiẹn hwe akpọ na.” (Hib. 11:7) Mavọ yen Noa ruro wan? Die yen avwanre se yono norhe?

4, 5. Mavọ yen umiovwo rhe vwọ ganphiyọ vwẹ akpọ rẹ ọke ri Noa?

⁴ E vwiẹ Noa vwẹ ọke rẹ akpọ na vwo miovwin mamọ. Vwo  nẹ ọke rẹ Inọk rọ dia ohwo ro vwiẹ ọsẹ rode rẹ Noa yen akpọ na vwo miovwin. Inọk yan nene Ọghẹnẹ. Ọ mraro jovwo nẹ ẹdẹ rẹ ẹdjọeguo cha vwọ kẹ akpọ rẹ umwemwu yena. Umiovwo rẹ ọke ri Noa na gan vrẹ ọ rẹ ọke rẹ Inọk mamọ. Vwọrẹ uyota, vwọ kẹ Jihova, akpọ na miovwirin mamọ fikirẹ ozighi vẹ ohwekufia re vọnrọ. (Jẹn. 5:22; 6:11; Jud 14, 15) Die yen ghwa nẹrhẹ erọnvwọn miovwin ọtiọna?

⁵ Erọnvwọn ra ghẹmrẹ phiare vwẹ ohri rẹ emekashe na vwẹ obo odjuvwu. Ọvo usun rayen ra rhe riẹn phiyọ Eshu vwọso Jihova. O gun efian kpahen Ọghẹnẹ vwọ riẹriẹ Adam vẹ Ivi vwo ru umwemwu. Vwẹ ọke ri Noa, emekashe efa da vwomaba vwọso usuon rẹ Ọghẹnẹ. Emekashe na yanjẹ ẹdia rayen vwo vwẹ obo odjuvwu, ayen de wene oma phiyọ ihworakpọ, ayen da rọvwọn eya ri vwo erhuvwu. Emekashe ebrabra nana da rhe so okpetu rode vwẹ akpọ na, ihwo buebun da je vwẹrokere ayen.—Jẹn. 6:1, 2; Jud 6, 7.

6. Umiovwo vọ yen erhuaran na soro vwẹ akpọ na, orhiẹn vọ kọyen Jihova bruru?

⁶ Eya ri nene emekashe na gbe ọfanrhiẹn, de rhi vwiẹ erhuaran vọn akpọ na. Baibol na de se emọ na Nẹfilim ro mudiaphiyọ “I ri gere ihwo she.” Ayen yanghan akpọ na totọ, umiovwo rẹ ọke yena da rhe vrẹka. Ọnana yen sorọ Ọghẹnẹ vwo no nẹ “evun umwemwu rẹ ohwo rhoro gangan vwevunrẹ akpọ na, ọ da je mrẹ nẹ iroro rẹ udu rọyen pha brabra vwẹ ọke ejobi.” Jihova de brorhiẹn nẹ ọyen cha ghwọrọ akpọ umwemwu yena ẹgbukpe 120 da wan nu.—Se Jẹnẹsis 6:3-5.

7. Die nẹrhẹ ọ bẹn kẹ Noa vẹ aye rọyen rẹ ayen vwọ sẹro rẹ emọ rayen vwọ vrabọ rẹ ogbiru rẹ ọke yena?

 ⁷ Di roro obo rọ bẹn te ra vwọ yọnrọn emọ vwẹ akpọ tiọyena! Dedena, Noa ru ọtiọyen. Ọ je rọvwọn omamọ aye. Noa vwo te ẹgbukpe 500, aye rọyen de vwiẹ emeshare erha kẹ. Edẹ rayen Shem, Ham, kugbe Jafet. * Noa vẹ aye rọyen nabọ davwẹngba vwọ vwẹrote emọ na rere ayen vwo jẹ iruemu ebrabra rẹ ihwo rẹ ọke yena evwo. Oma vwerhen emọ siẹrẹ ayen da mrẹ ihwo ri vwo “ẹgba” ri ji “kperi usi.” Ọtiọyena, oma rẹ erhuaran na vwerhen emọ rẹ ọke yena mamọ. Ọ cha ghwa lọhọ kẹ Noa vẹ aye rọyen ayen vwọ sẹro rẹ emọ rayen vrabọ rẹ ughe rẹ erọnvwọn ebrabra rẹ erhuaran na ruẹ-ẹ, jẹ ayen se yono ayen nẹ Jihova vwo utuoma kpahen koka koka rẹ ozighi. Ayen je nẹrhẹ emọ na riẹn obo rọ da Jihova te, rọ vwọ mrẹ ohwekufia vẹ erọnvwọn ebrabra efa re phia vwẹ akpọ na.—Jẹn. 6:6.

8. Mavọ yen emiọvwọn sa vwọ vwẹrokere Noa vẹ aye rọyen nonẹna?

⁸ Emiọvwọn nabọ riẹn nẹ ọ lọhọre kẹ Noa vẹ aye rọyen ayen sa vwọ sẹro rẹ emọ rayen vwẹ ọke yena-a. Nonẹna, akpọ na je vọn vẹ ozighi kugbe ohwekufia. Ighene gbozighi vwẹ asan eje. Ifimu vẹ ividio gemu re vọnre vẹ ohwekufia keyen e ruẹ kẹ emọ nonẹna. Ofori nẹ emiọvwọn davwẹngba vwo yono emọ rayen kpahen Jihova, rọ dia Ọghẹnẹ rẹ ufuoma rọ cha ghwọrọ ihwo ejobi ri gbozighi. (Une 11:5; 37:10, 11) Kirobo rẹ Noa vẹ aye rọyen se yono emọ rayen vwọ dia emamọ rẹ ihwo, emiọvwọn ji se ru ọtiọyen nonẹna. Eya rẹ emọ ri Noa ji phi ẹga ri Jihova phiyọ ẹdia rẹsosuọ vwẹ akpeyeren rayen.

9, 10. (a) Die yen Jihova vuẹ Noa ro wene akpọ rọyen? (b) Diesorọ Jihova vwọ vuẹ Noa nẹ ọ kare okọ, kẹ mavọ yen ọ vuẹrẹ nẹ ọ karọ wan?

⁹ Ẹdẹ ọvo, Jihova da vuẹ Noa ota ọvo ro wene akpeyeren rọyen. Ọ vuẹrẹ nẹ ọyen cha ghwọrọ akpọ rẹ ọke yena. Ọ da ta kẹ Noa: “Vwẹ urhe ri gofa kare okọ.”—Jẹn. 6:14.

¹⁰ Okọ nana dia okuna yẹrẹ okọ vẹ uvi kirobo rẹ ihwo evo rorori-i. Ọ họhọ ekpeti rode. Jihova vuẹ Noa obo rọ cha kare okọ na wan, te obevun te otafe rọyen, ọ je vuẹ oboresorọ ọ vwọ kare okọ na: “Kidie nighe, me cha vwẹ ame ku akpọ na . . . Kemu kemu ri enu rẹ akpọ na ejobi ko ghwu re.” Tavwen Jihova ke ghwọrọ akpọ na, ọ da ta kẹ Noa: “Wọ cha ro evun rẹ okọ na, te owẹ te emọ wẹn, aye wẹn te eya rẹ emọ wẹn.” Jihova je vuẹ nẹ ọ reyọ koka koka rẹ  eranvwe ro evun rẹ okọ na. Ihwo rehẹ evun rẹ okọ na ọvo yen cha vrabọ rẹ Oghwe na!—Jẹn. 6:17-20.

11, 12. Owian ọgangan vọ yen Ọghẹnẹ vwọ kẹ Noa, kẹ die yen o ruru?

¹¹ Iruo ọgangan yen Noa che ru na. Okọ na cha dia rhuarho gidigba, o che gron te ichiyin 473, kọ hẹre te ichiyin 73, o mi ji kpenu te ichiyin 44. Rhi te ọke nana, a je rhe mrẹ okuna rọ rho te okọ ri Noa na-a. Kẹ, Noa hworo ona ro vwo jẹ iruo na eruo? O brenu kpahen egbabọse ro che hirharoku yẹrẹ wene ona rẹ Ọghẹnẹ vuẹrẹ nẹ ọ vwọ bọn okọ na rere iruo na vwọ lọhọ kẹ? Baibol na tare nẹ Noa “ru emu ejobi rẹ Ọghẹnẹ dje kẹ nẹ o ru.”—Jẹn. 6:22.

¹² Owian na reyọ omarẹ ikpe 40 fiẹ 50. Ayen she irhe, fa ayen kpo asan ra da bọn okọ na, ji bru ena sansan phiyọ ayen. A bọn okọ na kerẹ egenege rẹ ubruwevwin erha, ro vwo ivun kugbe ẹchẹ ra wan ruọ. E ji phi evakpo sansan phiyọ, je kanre obenu rọyen vwẹ idjerhe rẹ ame da sa djẹ no.—Jẹn. 6:14-16.

13. Ẹbẹre vọ vwevunrẹ owian na yen ma dia egbabọse kẹ Noa vrẹ ebanbọn rẹ okọ na, kẹ uruemu vọ yen ihwo rẹ ọke yena djephia?

¹³ Ọke vwọ yanran na, rẹ Noa vwo nẹ okọ na, oma cha nabọ vwerhọn nẹ orua rọyen nabọ bicha ọyen mamọ! Jẹ, o vwo ẹbẹre ọfa rẹ owian na rọ dia egbabọse vrẹ ẹbọn rẹ okọ na. Baibol na vuẹ avwanre nẹ Noa “[“oghwoghwota,” NW ] rẹ ọvwata.” (Se 2 Pita 2:5.) Noa fiudugberi ghwoghwo ota kẹ ihwo ri jẹ Ọghẹnẹ ẹriẹn, ro vwo si ayen orhọ kpahen oghwọrọ rọ cha na. Kẹ, die yen ayen ruru ọke rẹ ayen vwo nyo orhọ-esio na? Jesu da ta obo re phiare: “Ayen gbe riẹn ọke rẹ oghwe na rhi vwo ku-u.” Ọ tare nẹ ayen mu ẹwẹn rayen eje kpahen irueru ri kẹdẹ kẹdẹ, kerẹ ọre vẹ udi, kugbe orọnvwe, ọtiọyena ayen rha davwerhọ ri Noa-a. (Mat. 24:37-39) Aphro herọ-ọ, ihwo buebun reyọ Noa vwọ jehwẹ, ọkiọvo evo tobọ djẹ uguegue muo, ayen je vwọsuọ. Ọ sa dianẹ ayen davwẹngba vwo gbowọphiyọ owian na.

14. Die yen erua rẹ Inenikristi nonẹna se yono mie Noa vẹ orua rọyen?

¹⁴ Dedena, Noa vẹ orua rọyen kpairoro vrẹ owian rẹ ebanbọn na-a. Ayen muomaphiyọ owian na vọnvọn dede nẹ ihwo rẹ ọke yena ni ayen kerẹ ẹkpa ri vwo iruo-o. Erua rẹ Inenikristi se yono erọnvwọn buebun nẹ esegbuyota ri Noa vẹ orua rọyen rhe, ma rho ọ vwọ dianẹ avwanre yerẹn vwẹ “oba” rẹ akpọ nana kirobo rẹ Baibol na tare. (2 Tim. 3:1) Jesu tare nẹ ọke rẹ avwanre nana cha họhọ ọke ri Noa. Ihwo da vwọso ovuẹ rẹ Uvie rẹ avwanre ghwoghwo na, e jẹ avwanre karophiyọ Noa. Ọ dia avwanre yen tu hirharoku egbabọse tiọyena-a.

15. Ihwo rẹ orua ri Noa vọ yen ghwuru ọke ro vwo te ẹgbukpe 600?

¹⁵ Ikpe buebun vwọ wan nu, Noa vẹ orua rọyen da bọn okọ na re. Ro vwo siẹkẹrẹ ẹgbukpe 600 re, ihwo rẹ orua ri Noa evo de ghwu. Ọsẹ ri Noa re se Lamek ghwuru, * ẹgbukpe iyorin vwọ wan nu, ọsẹ rode rọyen re se Metusela de rhe ghwu. Metusela diarọ te ikpe 969 o ki ghwu. Ọyen ohwo rọ ma tọn kparobọ rẹ Baibol na niyẹnrẹn rọyen. (Jẹn. 5:27) Metusela vẹ Lamek rhiẹromrẹ Adam.

16, 17. (a) Owian vọ yen Ọghẹnẹ vwọ kẹ Noa ọke ro vwo te ẹgbukpe 600? (b) Gbikun rẹ oborẹ Noa vẹ orua rọyen rhiẹromrẹ rọ cha sa chọrọ ayen ẹro-o.

¹⁶ Ọke rẹ Noa vwo te ẹgbukpe 600, Ọghẹnẹ da ta kẹ: “Gba ro evun rẹ okọ na, wẹ kugbe evwruwevwin wẹn ejobi.” Ọghẹnẹ da je vuẹ nẹ o sun koka koka rẹ eranvwe ro evun rẹ okọ na, ighwrẹn ri fonro re se vwo ze izobo, kugbe ivivẹ rẹ eranvwe ri chekọ ejobi.—Jẹn. 7:1-3.

¹⁷ Owian nana cha sa chọrọ Noa ẹro-o. Eranvwe buebun yen rhurhie ro okọ na, te e re yan, vẹ e re rhan; te i ri vwo evun kpono otọ, vẹ efa tiọyena; te i ri djoma, vẹ e re pha fuefu. Wọ nama roro ọke rọ reyọre tavwen Noa ki se sun eranvwe na eje ro evun  rẹ okọ na-a. Kidie Baibol na tare nẹ ayen vẹ “Noa da ro evun rẹ okọ na.”—Jẹn. 7:9.

18, 19. (a) Mavọ yen a sa vwọ kpahenphiyọ enọ rẹ egbaphro nọre kpahen ikuegbe ri Noa? (b) Mavọ yen idjerhe rẹ Jihova sivwin eranvwe na wan vwo dje aghwanre rọyen phia?

¹⁸ Egbaphro evo sa nọ: ‘Mavọ yen orọnvwọn tiọyena sa vwọ phia? Mavọ yen eranvwe na eje sa vwọ dia kugbe vwọrẹ ufuoma?’ Di roro: Ọ bẹnre rẹ Ọmemama rẹ idjuvwu vẹ akpọ na vwo sun eranvwe rọ mare yẹrẹ tobọ ru ayen rere ayen vwo jẹ ihwo oma ẹwan? Karophiyọ nẹ Jihova yen ma eranvwe na eje. O vwo ọke ọvo rọ vwọ hẹriẹ Abadi Ọvwavware na, kugbe ọke ọvo ro vwo ruo rere ọnre na vwo mudia asan ọvo. O rhe se ru erọnvwọn eje re djisẹ rọyen vwẹ ikuegbe ri Noa na? E, o se ru ayen. O ru ayen eje kpai!

¹⁹ Vwọrẹ uyota, Ọghẹnẹ sa vwẹ idjerhe ọfa vwo sivwin eranvwe na. Ẹkẹvuọvo, o sivwin ayen vwẹ idjerhe rọ nẹrhẹ avwanre karophiyọ ogangan rọ vwọ kẹ ihworakpọ vwẹ ọke rẹsosuọ, rẹ ayen vwọ vwẹrote erọnvwọn eje ri vwo arhọ vwẹ otọrakpọ na. (Jẹn. 1:28) Nonẹna, emiọvwọn buebun vwẹ ikuegbe ri Noa vwo yono emọ rayen nẹ Jihova ni ihworakpọ vẹ eranvwe ghanghanre.

20. Owian vọ yen Noa vẹ orua rọyen wianre vwẹ udughwrẹn rọ koba tavwen Oghwe na ki ku?

²⁰ Omarẹ udughwrẹn ọvo Oghwe na ki rhi ku, Jihova da vuẹ Noa kpahọn. Owian buebun vọn otọ rẹ orua na che ru. Vwẹro roro owian rẹ ayen wianre vwo koko eranvwe na eje, rhuẹrẹ emu  rẹ ayen vẹ eranvwe na cha re phiyọ ẹdia, ji mu ekuakua rẹ uwevwin rayen phiyọ okọ na. Ọ sa dianẹ aye ri Noa vẹ eya rẹ emọ rọyen tẹnrovi ẹrhuẹrẹ rẹ okọ na, ro vwo jẹ ayen dia.

21, 22. (a) Diesorọ o rhe gbe avwanre unu nẹ ihwo rẹ ọke rẹ Noa davwerhọ rẹ obo re phia-a? (b) Ọke vọ yen ehwẹjẹ rayen na vwo vwoba?

²¹ Die yen ihwo re riariẹ ayen phiyọ na ruẹ vwẹ ọke yena? Ayen “riẹn ọke rẹ oghwe na rhi vwo ku-u,” dede nẹ ayen mrẹ ẹyan-obaro rẹ iruo na vẹ ebruphiyọ rẹ Jihova ku kuẹ Noa. Dede nẹ ayen mrẹ eranvwe re ro evunrẹ okọ na, jẹ ayen davwerhọ-ọ. Ọyena gbe avwanre unu-u, kidie dede nẹ erọnvwọn buebun phia ri djerephia nẹ avwanre yerẹn vwẹ ẹdẹ re koba na, ihwo je davwerhọ rẹ avwanre nonẹna-a. Kirobo rẹ ọyinkọn Pita mraro rọyen, otu re vwẹ ihwo jehwẹ cha rhe vẹ ehwẹjẹ rayen, kẹ ayen cha vwẹ ihwo re kerhọ rẹ orhọ-esio rẹ Ọghẹnẹ vwọ jehwẹ. (Se 2 Pita 3:3-6.) Noa vẹ ihwo rẹ orua rọyen rhiẹromrẹ ehwẹjẹ tiọyena.

²² Ọke vọ yen ehwẹjẹ na vwo vwoba? Baibol na vuẹ avwanre nẹ ọke rẹ Noa vẹ orua rọyen kugbe eranvwe na vwọ ro okọ na nu, “Ọrovwohwo de huho gbe.” Ọ da dianẹ evo usun rẹ ihwo re vwẹ ayen vwọ jehwẹ hẹ etiyin ọke rẹ Ọghẹnẹ vwo bi ẹchẹ na gbe, ọyena sa nẹrhẹ ayen dobọ rẹ ehwẹjẹ rayen ji, ọ rha dia ọtiọye-en, oghwe na kọyen rhuru unu rayen! Oghwe na de ku, ame na jo dje-ebuebuon, ame na de reghe akpọneje kirobo rẹ Jihova tare.—Jẹn. 7:16-21.

23. (a) Mavọ yen avwanre ru riẹn nẹ Jihova vwo omavwerhovwẹn kpahen ughwu rẹ irumwemwu rẹ ọke ri Noa na-a? (b) Diesorọ ọ vwọ dia emu rẹ aghwanre ra vwọ vwẹrokere esegbuyota ri Noa?

²³ Jihova vwo omavwerhovwẹn kpahen ughwu rẹ irumwemwu yena? Ẹjo! (Izi. 33:11) Vwọrẹ uyota, ọ kẹ ayen ọke rẹ ayen vwo kurhẹriẹ, ji ru obo ri yoma. Kẹ, ayen se ru ọtiọyen? Akpeyeren ri Noa kpahenphiyọ onọ yena. Uruemu rẹ ọvwata vẹ ẹmienyo rọyen djerephia nẹ ihwo efa rhe se vwo usivwin, ọ da dianẹ ayen kurhẹriẹ. Ọtiọyena, esegbuyota rọyen brorhiẹn hwe akpọ rẹ ọke yena, kidie ọ nẹrhẹ a mrẹ oborẹ ihwo na bra te. Esegbuyota rọyen sivwinro vẹ orua rọyen. Wọ da vwẹrokere esegbuyota ri Noa, ku wo ji se sivwin oma wẹn vẹ ihwo ru wo vwo ẹguọnọ kpahen. Kerẹ Noa, wọ sa dia Ugbeyan rẹ Ọghẹnẹ. Oyerinkugbe yena sa dia bẹdẹ!