1. Diesorọ ihwo buebun vwo vwerhe uvweri vwẹ Shilo?

SAMUẸL mrẹvughe nẹ orere ri Shilo yanghan ku. Ọ ghwa họhọ nẹ ihwo na eje muomaphiyọ. Bro iwevwin yen e de nyo edo rẹ eya vẹ emọ re viẹ fikirẹ esẹ, eshare, emeshare, yẹrẹ iniọvo rayen ri ghwuru vwẹ ofovwin? A ghwa riẹ-ẹn. Ẹkẹvuọvo, avwanre riẹnre nẹ o ji kri rẹ isodje rẹ Izrẹl ri te omarẹ 4,000 vwo ghwu vwẹ ofovwi-in, tavwen ihwo ri Filistia ke rhoma hwe efa ri te omarẹ 30,000 na.—1 Sam. 4:1, 2, 10.

2, 3. Ukpokpogho vọ yen ghwa omavovwẹ rhe, je nẹrhẹ Shilo kpare urinrin rọyen kufia?

² Ọnana ọvo usun rẹ ukpokpogho ri te ayen oma. Eli rọ dia orherẹn rode na vwo emọ ivẹ re pha brabra, edẹ rayen Hofini kugbe Finihas; ayen ivẹ na mu okọ rẹ ọphọ ri Jihova nẹ orere ri Shilo. Asan rọ ma fon vwevunrẹ uwevwin rẹ ẹga na rọ dia utughẹ ra da ga Ọghẹnẹ yen okọ rẹ ọphọ na dia. Okọ rẹ ọphọ na, ọyen ekpeti oghẹresan rọ dia oka ro djerephia nẹ Jihova vẹ ihwo rọyen herọ. Ihwo na mu Okọ rẹ ọphọ na nene oma kpo ofovwin vẹ ẹwẹn nẹ ọ cha nẹrhẹ Jihova chọn ayen uko vwo phi ivwighrẹn rayen kparobọ. Ihwo ri Filistia de mu Okọ na mie ayen, ayen de ji hwe Hofini vẹ Finihas.—1 Sam. 4:3-11.

³ Okọ rẹ ọphọ na dia evunrẹ uwevwin rẹ ẹga rọhẹ Shilo vwẹ ikpe ujorin buebun re. Jẹ enẹna, ọ rha hẹ etiyi-in. Eli rọhẹ ẹgbukpe 98 vwo nyo kpahọn, o de she kpo obuko nẹ agbara ro chidia, o de ghwu. Aye rẹ ọmọ rọyen ro hirhephiyọ ayeuku vwẹ ẹdẹ yena de ji ghwu rọ vwọ chuẹ uvwiẹ. Ọke ro vwo ghwẹ, ọ da ta: “Urinrin na vrẹn nẹ Izrẹl nure!” Aphro herọ-ọ, Shilo ghene yanghan re.—1 Sam. 4:12-22.

4. Die yen e che yono vwẹ uyovwinrota nana?

⁴ Die yen Samuẹl che ru kpahen ebẹnbẹn nana eje? Esegbuyota rọyen gan te ẹdia rọ da sa chọn ihwo na uko vwọ rhoma rhivwin bru Jihova rhe? Nonẹna, avwanre eje rhiẹromrẹ ebẹnbẹn re davwan esegbuyota avwanre nẹ ọke evo. Ọtiọyena, e jẹ a mrẹ emu ọfa re se yono mie Samuẹl.

5, 6. Die yen ikuegbe na tẹnrovi vwẹ uvwre rẹ ikpe 20, kẹ die yen Samuẹl ruru vwẹ ikpe yena eje?

⁵ Ikuegbe ri Baibol na de nẹ ẹbẹre ri Samuẹl, ọ da tẹnrovi Okọ rẹ ọphọ na, ji dje oborẹ ihwo ri Filistia rioja te tavwen ayen ki brokpakpa mu okọ na rhivwin. Ẹgbukpe 20 wanvrẹ tavwen ikuegbe na ke rhoma kpo ẹbẹre ri Samuẹl. (1 Sam. 7:2) Die yen Samuẹl ruru vwẹ ikpe yena eje? Baibol na vuẹ avwanre.

⁶ Tavwen ẹgbukpe 20 yena ke tonphiyọ, Baibol na tare nẹ “Ota ri Samuẹl de bru Izrẹl ejobi rhe.” (1 Sam. 4:1) Baibol na tare nẹ ẹgbukpe 20 yena vwọ wan nu, Samuẹl de rhi vwo ẹkuruemu rọ vwọ kọn kpo irere erha vwẹ ẹkuotọ rẹ Izrẹl kukpe kukpe, rere o se vwo guẹdjọ rẹ ihwo na je kpahenphiyọ enọ rayen. O de ru nu, o mi rhivwin kpo orere rọyen re se Ramah. (1 Sam. 7:15-17) Kọyen Samuẹl nabọ wian gangan vwẹ ikpe yena eje.

7, 8. (a) Die yen Samuẹl vuẹ ihwo na ọke rọ vwọ wian gangan vwẹ ẹgbukpe 20 nu? (b) Die yen ota rọyen mu ihwo na vwo ru?

⁷ Uruemu rẹ ọfanrhiẹn vẹ oshenyẹ rẹ emọ rẹ Eli guọghọ esegbuyota rẹ ihwo na. Ọ họhọre nẹ buebun rayen ke ga edjọ. Samuẹl vwọ wian gangan vwẹ ẹgbukpe 20 yena nu, ọ da ta: “Wa da vwẹ udu rẹ ovwan ejobi kurhẹriẹ bru vwe rhe, we gbe ku edjọ erhorha na kufia kugbe Ashera na nẹ ohri rẹ ovwan, re we hirhe udu rẹ ovwan ku Ọrovwohwo, re wa ga ọye ọvo, ko sivwi ovwan nẹ obọ rẹ ihwo ri Filistia.”—1 Sam. 7:3.

⁸ “Obọ rẹ ihwo ri Filistia” rhe gan mamọ vwẹ enu rẹ ihwo na re. Ayen vwo phi isodje rẹ ihwo rẹ Izrẹl kparobọ nu, kẹ ayen roro nẹ ayen se shenyẹ ihwo rẹ Ọghẹnẹ odedede. Ẹkẹvuọvo, Samuẹl vwẹ imuẹro kẹ ihwo rẹ Izrẹl nẹ ẹdia na che wene siẹrẹ ayen de rhivwin bru Jihova rhe. Ayen se ghini ru ọtiọyen? Oma da vwerhen Samuẹl mamọ rọ vwọ mrẹ nẹ ihwo na ku edjọ rayen kufia, “ayen da ga Ọrovwohwo ọvo.” Samuẹl de se ihwo na koko vwẹ orere ri Mizpah rọhẹ enu rẹ ugbenu vwẹ ẹbẹre obohwẹre ọnre na vwẹ Jerusalẹm. Ihwo ri siomakoko na de chirin owẹnvwe, ayen de ji kurhẹriẹ nẹ imwemwu buebun rẹ ayen ruru fikirẹ edjọẹgọ rayen.—Se 1 Samuẹl 7:4-6.

9. Uphẹn vọ yen ihwo ri Filistia rorori nẹ o rhiephiyọ kẹ ayen, kẹ die yen ihwo rẹ Ọghẹnẹ ruru?

 ⁹ Ihwo ri Filistia vwo nyo kpahen osikoko na, kẹ ayen roro nẹ uphẹn rhiephiyọ kẹ ayen re. Ayen de ji isodje rayen kpo Mizpah ra ghwọrọ ihwo rẹ Ọghẹnẹ. Ihwo rẹ Izrẹl vwo nyo nẹ ofovwin cha, oshọ de mu ayen, ayen da vuẹ Samuẹl nẹ ọ nẹrhovwo kẹ ayen. Samuẹl da nẹrhovwo kẹ ihwo na, o de ji ze izobo kẹ Ọghẹnẹ. Ọke ro vwo ze izobo na, isodje ri Filistia da ro Mizpah. Jihova da kpahenphiyọ ẹrhovwo ri Samuẹl. O de phi ozighi phiyọ ohri ivwighrẹn na. Ọ “da van ovan ọgangan ku ihwo ri Filistia.”—1 Sam. 7:7-10.

10, 11. (a) Diesorọ agbrara rẹ Jihova ji bru isodje ri Filistia vwọ dia emu rẹ oghẹresan? (b) Die yen nẹ obuko rẹ ofovwin re phiri vwẹ Mizpah rhe?

¹⁰ A sa vwẹ ihwo ri Filistia na vwo dje imitete rẹ oshọ rẹ agbrara muẹ ri siomanẹ vwẹ obuko rẹ ini rayen? Ẹjo, ayen isodje ri tẹn ona rẹ ofovwin. Ọtiọyena, o muẹro nẹ ayen ji nyo oka rẹ agbrara tiọyen dẹvo-o. Edo rẹ agbrara na yen gan nọ? Uvo herọ ọke re vwo nyo umri rọyen, gbanẹ obuko rẹ igbenu na yen edo na nurhe? Obo rọ wanre eje, avwanre riẹnre nẹ ọ nẹrhẹ oshọ mu ihwo ri Filistia na. Uguegue vwọ ro ayen oma re, kẹ ayen guọnọ asan rẹ ayen de siomanu. Ihwo rẹ Izrẹl da họrhọ nẹ Mizpah rhe, ayen de phi ihwo ri Filistia kparobọ, ayen da vwọ tua ayen shesheri kpo asan rọ kẹrẹ Jerusalẹm.—1 Sam. 7:11.

¹¹ Ofovwin yena ghwa uvi rẹ ewene rhe ihwo rẹ Ọghẹnẹ. Ihwo ri Filistia rhe se kpokpo ayen vwẹ ọke rẹ Samuẹl vwọ ga kerẹ oguẹdjọ vwẹ Izrẹl ọfa-a. Ayen da rhoma reyọ etọ na eje re mie ayen jovwo.—1 Sam. 7:13, 14.

12. Diesorọ a vwọ tanẹ Samuẹl “brorhiẹ rẹ ọsoso,” kẹ iruemu vọ yen chọn rọ uko vwọ dia uvi rẹ oguẹdjọ?

¹² Ikpe buebun vwọ wan nu, ọyinkọn Pọl de si odẹ ri Samuẹl ba iguẹdjọ vẹ emraro ri fuevun “brorhiẹ rẹ ọsoso.” (Hib. 11:32, 33) Samuẹl davwẹngba vwo ru obo ri yovwirin vwẹ ẹro rẹ Ọghẹnẹ, ọ je vwẹ uchebro kẹ ihwo efa nẹ ayen ru ọtiọyen. Ọ gare kerẹ uvi rẹ oguẹdjọ vwẹ Izrẹl kidie o chirakon je fuevun ga Ọghẹnẹ dede nẹ erharhe rẹ ihwo riarierẹ phiyọ. O ji dje ọdavwaro phia kpahen oborẹ ihwo efa ruru. E vwo phi ofovwin ri Mizpah nu, Samuẹl da reyọ oragha vwo vi rere ihwo na sa vwọ karophiyọ oborẹ Jihova chọn ayen uko wan.—1 Sam. 7:12.

13. (a) Uruemu vọ yen ofori nẹ e vwo siẹrẹ avwanre da guọnọ dia kerẹ Samuẹl? (b) Ọke vọ yen o me vwo fo nẹ e vwo oka rẹ iruemu rẹ Samuẹl vwori?

 ¹³ Wọ guọnọ dia ohwo ro “brorhiẹ rẹ ọsoso”? Ọ da dia ọtiọyen, gba davwẹngba vwọ vwẹrokere Samuẹl vwo vwo edirin kugbe omaevwokpotọ, wo mi ji dje ọdavwaro phia. (Se 1 Pita 5:6.) O muẹro dẹn nẹ avwanre eje guọnọ vwo iruemu tiọyena. Ọ vwerhoma nẹ Samuẹl se vwo iruemu nana je vwẹ ayen vwo ruiruo ọke rọ vwọ ghwanra cha, kidie o rhiẹromrẹ erọnvwọn re so ofudjevwe kẹ vwẹ ọke ọghwo rọyen.

14, 15. (a) Die yen so ofudjevwe kẹ Samuẹl vwẹ ọke rọ vwọ “ghwore”? (b) A sa tanẹ Samuẹl orharhe ọsẹ kerẹ Eli? Djekpahọn.

¹⁴ Ọke rẹ avwanre vwọ rhoma se ikuegbe ri Samuẹl jẹ ọ “ghwore.” Joẹl kugbe Abijah, eyen emeshare ri Samuẹl ri te imiragua re. Ọ vwẹ ayen mu kerẹ iguẹdjọ rere ayen chọn uko vwo ruiruo na. Ẹkẹvuọvo, kẹ ayen vwẹ ẹdia rayen na vwo shenyẹ ihwo je reyọ udi, ayen sa dia emamọ rẹ iguẹdjọ re ta uyota ji brorhiẹn ọsoso kerẹ ọsẹ raye-en.—1 Sam. 8:1-3.

¹⁵ Ẹdẹ ọvo, ekpako rẹ Izrẹl de bru ọmraro Samuẹl rhe. Ayen da ta kẹ: “Emọ wẹn yan nene idjerhe wẹ-ẹn.” (1 Sam. 8:4, 5)  Samuẹl riẹn kpahen ogbiru rẹ emọ rọyen na? Baibol na vuẹ avwanre-e. Ẹkẹvuọvo, vwọ fẹnẹ Eli, o vwo asan vuọvo ra sa vwọ hanrhe Samuẹl nẹ ọyen orharhe ọsẹ-ẹ. Jihova ghwọku Eli ji gboja kẹ, kidie o brọghọ phiyọ emọ rọyen oma vwọ vrẹ Ọghẹnẹ, ukperẹ ọ vwọ kpọ ayen vi. (1 Sam. 2:27-29) Jihova mrẹ oruchọ tiọyen vwẹ oma ri Samuẹl vwẹ ọke yena-a.

16. Ọmiaovwẹ vọ yen emiọvwọn ri vwo emọ ri jẹ ẹmienyo hirharokuẹ, kẹ idjerhe vọ yen ayen sa vwọ mrẹ uchebro vẹ odjekẹ vwo nẹ udje ri Samuẹl?

¹⁶ Baibol na vuẹ avwanre sẹ Samuẹl ro ẹnwan, sẹ o muomaphiyọ, yẹrẹ sẹ oma vo rọ ọke o vwo nyo kpahen ogbiru rẹ emọ rọye-en. Nonẹna, buebun rẹ emiọvwọn se vwo ẹruọ rẹ oborẹ Samuẹl hirharoku. Vwevunrẹ akpọ umwemwu nana, emọ buebun vwọsua esẹ vẹ ini rayen, ayen rhiabọreyọ ọghwọku-u. (Se 2 Timoti 3:1-5.) Emiọvwọn re rhiẹromrẹ ọmiaovwẹ tiọyena sa mrẹ ọbọngan vẹ odjekẹ vwo nẹ udje ri Samuẹl. Samuẹl nabọ yeren akpọ rẹ evun-ẹfuọn dede nẹ emọ rọyen fuevu-un. Karophiyọ nẹ omamọ rẹ udje rẹ esẹ vẹ ini yen se te ubiudu rẹ emọ ri ruẹ uyovwin gangan je vwẹ abọ fa erhọ kẹ eta vẹ ọghwọku. Vwọba, emiọvwọn vwo uphẹn rẹ ayen vwo ru ubiudu rẹ Ọsẹ rayen rọ dia Jihova ghọghọ kirobo rẹ Samuẹl ruru.

17. Die yen ekpako rẹ Izrẹl vuẹ Samuẹl nẹ o ru kẹ ayen, kẹ die yen o ruru?

¹⁷ Emọ ri Samuẹl riẹn okpetu rode rẹ urhuru evwo rayen cha so kẹ ihwo efa-a. Ekpako rẹ Izrẹl da ta kẹ Samuẹl: “Vwẹ ovie mu kẹ avwanre ro sun avwanre kerẹ ẹgborho ri chekọ na ejobi.” Kẹ, ọnana mudiaphiyọ nẹ ayen sen Samuẹl rẹ Jihova vwo mu nẹ o guẹdjọ rayen vwẹ ikpe buebun rhire na? Enẹna, ayen rha guọnọ ọmraro kerẹ Samuẹl ọfa-a, ayen guọnọ ovie ro che sun ayen. Ẹgborho re riariẹ ayen phiyọ vwo ivie, kọyensorọ ayen je vwọ guọnọ ovie! Kẹ, die yen Samuẹl ruru? Baibol na vuẹ avwanre nẹ “ota na je Samuẹlu-u.”—1 Sam. 8:5, 6.

18. Mavọ yen Jihova vwọ nẹrhẹ ẹwẹn ri Samuẹl totọ, ji dje oborẹ umwemwu rẹ ihwo rọyen bra te?

¹⁸ Ni oborẹ Jihova tare ọke rẹ Samuẹl vwo mu ota na bro ra vwọrẹ ẹrhovwo: “Nyo obo rẹ ihwo na ta kẹ wẹ ejobi; kidie ọ dia owẹ ayen senre-e, ẹkẹvuọvo mẹvwẹ ayen sẹnre nẹ ọ dia ovie kẹ aye-en.” Eta yena nẹrhẹ ẹwẹn ri Samuẹl totọ, ẹkẹvuọvo ihwo rẹ Izrẹl yinvwaro kpahen Jihova gangan! Jihova da vuẹ ọmraro rọyen nẹ o si ihwo na orhọ kpahen oborẹ ovie rẹ ayen che vwo na cha vwẹ ẹro rayen mrẹ. Samuẹl vwọ vuẹ ayen, ihwo na davwerhọ-ọ, ayen da ta: “Ẹjo, ẹkẹvuọvo avwanre guọnọ ovie ro sun avwanre.” Kerẹ ohwo ro nyupho rẹ Ọghẹnẹ ọkieje, Samuẹl de ru  oborẹ Jihova vuẹrẹ na, ọ da reyọ ovie rẹ Jihova jẹreyọ vwo mu.—1 Sam. 8:7-19.

19, 20. (a) Mavọ yen Samuẹl vwo nene odjekẹ rẹ Jihova vwọ kẹ nẹ ọ reyọ Sọl vwo mu ovie vwẹ Izrẹl? (b) Mavọ yen Samuẹl chọn ihwo rẹ Ọghẹnẹ uko wan?

¹⁹ Mavọ yen Samuẹl nyupho rẹ Ọghẹnẹ wan? Ophu yen o vwo ru oborẹ Jihova vuẹrẹ? Ọ vwẹ uphẹn kẹ uruemu rẹ ọjẹfia rẹ ihwo na nẹ o miovwo ẹwẹn rọyen rere o vwo jẹ erhuvwu eruo ọfa? Ọyen oborẹ ihwo buebun rhe ru siẹrẹ ayen dahẹ ẹdia ri Samuẹl. Ọ vwẹ Sọl vwo mu ovie, ọ da je ta gbonozẹ nẹ Sọl yen ohwo rẹ Jihova jẹre kerẹ ovie. Ọ fiọnfiọn Sọl unu, ro vwo djephia nẹ o dedire reyọ ji vwomakpotọ kẹ kerẹ ovie kpokpọ re vwo mu. Samuẹl da je ta kẹ ihwo na: “Ovwan mrẹ ohwo rẹ Ọrovwohwo jẹre-e? O vwo ọvuọvo rọ họhere vwẹ ohri rẹ ihwo na ejobi-i.”—1 Sam. 10:1, 24.

²⁰ Samuẹl tẹnrovi erhuvwu rẹ ohwo rẹ Jihova jẹreyọ na, ọ dia echobọ rọye-en. Ọ je tẹnrovi ọyọnregan rọyen vwẹ ikpe yena eje, ukperẹ ujiri ro che nẹ obọ rẹ ihworakpọ rhe. (1 Sam. 12:1-4) O muomaphiyọ iruo rọyen, rọ vwọ chọn ihwo rẹ Ọghẹnẹ uko vwo vwo oniso rẹ erọnvwọn ri se gbowọphiyọ oyerinkugbe rayen vẹ Ọghẹnẹ, ji bru ayen uche nẹ ayen fuevun ga Jihova. Uchebro rọyen te ubiudu rẹ ihwo na, ayen de yovwunu kẹ nẹ ọ rẹ Jihova kẹ ayen. Ọ da vwẹ uvi rẹ ẹkpahọnphiyọ nana kẹ ayen: “Mi che ru umwemwu kpahe Ọrovwohwo re mi se jẹ ẹrhovwo ẹnẹ kẹ Ọrovwohwo fiki rẹ ovwa-an; ki mi yono ovwan phihọ idjerhe rẹ esiri vẹ ọsoso.”—1 Sam. 12:21-24.

21. Mavọ yen udje ri Samuẹl sa vwọ chọn wẹ uko siẹrẹ uphẹn rẹ ẹga wo rhẹro rọyen de te ohwo ọfa obọ?

²¹ O vwo ọkiọvo ofu vwo dje we kidie nẹ a kẹ ohwo ọfa uphẹn rẹ ẹga wo rhẹro rọyen? Udje ri Samuẹl yono avwanre nẹ ọ chọre ra vwọ vwẹ uphẹn kẹ omaẹriọ nẹ ọ vwẹ owọ muotọ vwẹ ubiudu rẹ avwanre. (Se Isẹ 14:30.) Ọghẹnẹ vwo iruo buebun re vọnre vẹ erere rọ cha vwọ kẹ idibo rọyen eje re fuevun ga.

22. Diesorọ a vwọ tanẹ Samuẹl ta chọ ọke rọ vwọ tanẹ a mrẹ ohwo vuọvo rọ họhọ Sọl vwẹ Izrẹl ejobi-i?

²² Samuẹl ta chọ ọke rọ vwọ tanẹ a mrẹ ohwo vuọvo rọ họhọ Sọl vwẹ Izrẹl ejobi-i. Sọl pha gogorogo, o ki ji vwo erhuvwu, o vwo uduoyivwin kugbe aghẹnghẹn, dedena, ọ vwomakpotọ je  vwẹ ẹro abavo vwo ni oma rọyen. (1 Sam. 10:22, 23, 27) Vwọba, Sọl ji vwo okẹ ọghanghanre ọfa, o vwo ugbomọphẹ ro vwo yeren akpọ ji brorhiẹn ro jere. (Urhi 30:19) Kẹ, Sọl reyọ okẹ yena vwo ruiruo vwẹ idjerhe ro fori?

23. Uruemu ọghanghanre vọ yen va Sọl abọ, kẹ mavọ yen o dje uruemu rẹ omaẹkparọ phia wan?

²³ Ọ da ohwo mamọ nẹ e de phi ihwo evo phiyọ ẹdia rode vwẹ akpọ na, omaevwokpotọ me va ayen abọ. O kriri-i, Sọl de hirhephiyọ oka rẹ ohwo tiọyen. Ọ rha davwerhọ rẹ iji ri Jihova rẹ Samuẹl vwọphia kẹ-ẹ. O vwo ọke ọvo rẹ Sọl vwo brokpakpa ze izobo rẹ Samuẹl rhe ze jovwo. Samuẹl da ghwọkuo mamọ, ọ da je vuẹ nẹ uvie na rha cha sa dia evunrẹ orua rọyen ọfa-a. Ukperẹ o vwo yono nẹ ọghwọku na, Sọl de ru imwemwu re brare mamọ.—1 Sam. 13:8, 9, 13, 14

24. (a) Mavọ yen Sọl vwọ churhi Ọghẹnẹ vwẹ ofovwin rọ vẹ ihwo rẹ Amalẹk phiri? (b) Uruemu vọ yen Sọl djephia ọke ra vwọ ghwọkuo, kẹ orhiẹn vọ yen Jihova bruru?

²⁴ Jihova vuẹ Samuẹl nẹ ọ vuẹ Sọl nẹ o re nene ihwo rẹ Amalẹk phi ofovwin. Ọ je vuẹ nẹ o hwe Agag rọ dia orharhe ovie rayen na. Ẹkẹvuọvo Sọl hwere-e, ọ da je reyọ i ri me yovwin usun rẹ ekuakua rẹ ayen gborho mie ihwo na, ukperẹ ọ vwọ ghwọrọ ayen kufia. Sọl sa rhọnvwe oruchọ rọyen ọke rẹ ọmraro Samuẹl vwọ ghwọkuo-o. Ukperẹ ọ vwọ vwomakpotọ rhọnvwe nẹ ọyen ru chọ, ọ da vwẹ ẹro kueku vwo ni obo ro ruru, je davwẹngba vwo dje nẹ ihwo na yen sorọ. Kidie nẹ Sọl guọnọ guẹn oma riase, ọ da tanẹ ayen guọnọ vwẹ evo usun rẹ ekuakua na vwo ze izobo kẹ Jihova. Ọtiọyena, Samuẹl da vuẹ eta nana ra nabọ riẹn: “Nighe, ọghọ emuo o yovwi nọ izobo.” Samuẹl fiudugberi ghwọku Sọl, ọ da je vuẹ kpahen orhiẹn rẹ Jihova bruru: E che mie Sọl uvie na, a me vwọ kẹ ohwo ọfa ro yovwin nọ. *—1 Sam. 15:1-33.

25, 26. (a) Diesorọ Samuẹl vwo vwerhi Sọl, kẹ mavọ yen Jihova vwọ kpọ iroro rọyen vi vwẹ idjerhe rẹ ẹguọnọ? (b) Die yen Samuẹl yonori ọke ro vwo kpo uwevwin ri Jesse?

²⁵ Uruemu rẹ Sọl da nẹrhẹ ọphu mu Samuẹl mamọ. Ọ da viẹ  ji kperi se Jihova kọkirhie fikirẹ Sọl. Ọ tobọ vwerhi kẹ Sọl. Samuẹl mrẹ erhuvwu buebun vwẹ oma rẹ Sọl vwẹ ẹsosuọ, jẹ enẹna o kuro phiyotọ re. Sọl wene re, omamọ rẹ iruemu ri rhere jovwo na varọ abọ, ọ da vwọso Jihova. Samuẹl rha rhọnvwe mrẹ Sọl ọfa-a. Ẹkẹvuọvo, Jihova da kpọ iroro ri Samuẹl vi vwẹ idjerhe rẹ ẹguọnọ rọ vwọ ta: “Mavọ wo vwerhi Sọl kri te, yu wọ mrẹre nẹ me senrọ nọ dia ovie vwẹ Izrẹli-i? Ku evwri phihọ ukoko wẹn, wọ yanran; mi ji we bru Jesse ohwo ri Bẹtlẹhẹm, kidie me sanọ ovie kẹ oma mẹ vwẹ ohri rẹ emọ rọye nure.”—1 Sam. 15:34, 35; 16:1.

²⁶ Ọ dia ihworakpọ ri jẹgba ri se wene yen Jihova mu orugba rẹ ọhọre rọyen kpahe-en. Siẹrẹ ohwo ọvo rha fuevu-un, Jihova kọ reyọ ohwo ọfa wo wene. Ọtiọyena, Samuẹl rhe vwerhi Sọl ọfa-a. O de kpo Bẹtlẹhẹm kirobo rẹ Jihova vuẹrẹ nẹ o ru, ọ da mrẹ emeshare ri Jesse ri vwo erhuvwu mamọ. Samuẹl vwọ mrẹ ọmọshare rẹsosuọ na, Jihova da vuẹ nẹ o ni ekroma rọye-en. (Se 1 Samuẹl 16:7.) Ukuotọ rọyen, Samuẹl de rhi noso nẹ Devid rọ dia ubrevwiẹ ri Jesse yen Jihova jẹreyọ!

27. (a) Die yen nẹrhẹ esegbuyota ri Samuẹl ganphiyọ? (b) Ẹro vọ yen wo vwo ni udje rẹ Samuẹl phi phiyotọ?

²⁷ Vwẹ ukpe rọ koba tavwen Samuẹl ki rhi ghwu, ọ da rhe mrẹvughe nẹ orhiẹn rẹ Jihova bruru ro vwo phi Devid phiyọ ẹdia ri Sọl nabọ gba dẹn. Sọl kọ rioma kpahen Devid gangan, ọ da jẹ iroro ro vwo hwe. Ọ da je vwọso ẹga rẹ uyota. Ẹkẹvuọvo, Devid dje emamọ iruemu phia kerẹ uduefiogbere, ọyọnregan, esegbuyota, kugbe evun-ẹfuọn. Samuẹl vwo siẹkẹrẹ ẹdẹ rẹ ughwu rọyen na, jẹ esegbuyota rọyen ganphiyọ. Ọ mrẹvughe nẹ o vwo emu vuọvo rọ bẹn Jihova eruo-o, ọ sa tobọ nẹrhẹ obo re sua ofudjevwe hirhephiyọ ebruphiyọ. Ukuotọ rọyen, Samuẹl de ghwu; o phi omamọ udje phiyotọ kẹ ihwo vwẹ ikpe re joma te ujorin rọ diarọ. O muẹro nẹ ọnana yen sorọ rẹ Izrẹl ejobi vwo vwerhi ughwu rẹ ọshare nana rọ fuevun na! Ofori nẹ idibo ri Jihova re herọ nonẹna nọ oma rayen, ‘Me sa vwẹrokere esegbuyota ri Samuẹl?