1-3. Die yen Pita rhiẹromrẹ vwẹ ẹdẹ yena tavwẹn ọke ki she, kẹ die yen phia kẹ vwẹ ason?

PITA vwẹ ẹgba rọyen eje vwo bi okọ na. Ọ vwọ kpaẹro vwo ni ẹbẹre rẹ ọnre va nẹcha, ọ da mrẹ nẹ asan eje rhie cha re. Ugbuko vẹ igabọ rọyen miavwọ fikirẹ okọ rẹ ayen biẹ cha vwẹ ọke grongron re. Odju ro djuẹ ẹto rọyen na yen ji so ọkẹre vwẹ Abadi ri Galili. Ame kọ muavwan ro evunrẹ okọ rẹ ayen vwo hwe iyerin na, ame rọ ro okọ na da nẹrhẹ oma rọyen kpọrhọ jẹ ekpahen muo. Dedena, o ji bio okọ na yanran.

² Pita kugbe idibo ri chekọ na yanjẹ Jesu vwo vwẹ orhoma rẹ abadi na. Vwẹ ẹdẹ yena, ayen mrẹ Jesu rọ reyọ imibrẹdi vẹ imiyerin vwọ ghẹrẹ ihwo uriorin buebun rẹ owẹnvwe hwe. Ihwo na ke guọnọ vwẹ Jesu vwo mu ovie, ẹkẹvuọvo Jesu guọnọ vwobọ vwẹ oseghe rẹ usuo-on. Ọ je guọnọ nẹ idibo rọyen kẹnoma kẹ oseghe rẹ usuon. Jesu se vwo siomanu otu na, ọ da vuẹ idibo rọyen nẹ ayen bi okọ vwo kpo ẹbẹre ro chekọ rẹ abadi na, o de kpo enu rẹ ugbenu ra nẹrhovwo—Mak 6:35-45; se Jọn 6:14-17.

³ Emeranvwe na nabọ lo cha re ọke rẹ idibo na vwọ tuẹn oyan na phiyọ, enẹna emeranvwe na she divwẹ vwẹ ẹbẹre ọnre shera re, ọke ji rhie cha re. Dedena, ayen se bi okọ na sheri-i. Odju ọgangan vẹ ọkẹre na rha nẹrhẹ ayen se nyo ota rẹ ohwohwo-o. Ọ sa dianẹ iroro ri Pita kọn vwẹ ọke yena.

4. Diesorọ Pita vwọ dia uvi rẹ udje ra sa vwẹrokere?

⁴ O vwo emu buebun ro roro kpahan! Pita rhiẹromrẹ erọnvwọn sansan re vwẹ ẹgbukpe ivẹ ro vwo vughe Jesu ri Nazarẹt. O  yono erọnvwọn buebun mie Jesu, ẹkẹvuọvo o ji vwo erọnvwọn buebun efa ro ji che yono. Owenvwe ro vwo phi egbabọse kerẹ ẹwẹn ivivẹ vẹ oshọ kparobọ nẹrhẹ ọ dia uvi rẹ udje ra sa vwẹrokere. E jẹ a mrẹ obo rọ vwọ dia ọtiọyen.

5, 6. Oka rẹ akpọ vọ yen Pita yerẹn jovwo?

⁵ Ẹdẹ rẹ Pita mrẹ Jesu cha sa chọrọ ẹro-o. Oniọvo rọyen Andru yen ghwa iyẹnrẹn omavwerhovwẹn na rhe, rọ vwọ ta: “Avwanre mrẹ Mesaya na re.” Eta yena da nẹrhẹ akpeyeren ri Pita wene. O de ghini wene kakare.—Jọn 1:41.

⁶ Kepanọm yen Pita dia, orere na hẹ ẹbẹre obohwẹre ọnre rẹ ẹtẹrhe rẹ ame re se Abadi ri Galili. Te ọyen te Andru vẹ Jems kugbe Jọn re dia emọ rẹ Zẹbidi yen gbe ruiruo rẹ iyerin ehwe. Ọ dia Pita vẹ aye rọyen ọvo yen gba dia uwevwi-in, oniọvo ri Pita re se Andru vẹ oni rẹ aye rọyen ji nene ayen dia. O muẹro nẹ ọ guọnọ owian ọgangan, ẹgba vẹ ona ọ ke sa vwẹ iruo rẹ iyerin ehwe na vwọ vwẹrote ayen. Vwẹ ẹwẹn roro ason buebun rẹ ayen vwọ wian, eshare na vwọ vwẹ ekọ ivẹ vwo do ibriki phiyame, ji kpono koka koka rẹ erin ayen hweri phiyọ okọ na. Avwanre je sa vwẹro roro owian ọgangan ayen ruẹ vwẹ oghẹruvo, ayen vwọ sane erin na, shẹ ayen, rhuẹrẹ ibriki na ji fọnrhọ ayen.

7. Die yen Pita nyo kpahen Jesu, kẹ diesorọ iyẹnrẹn nana vwọ vwerhoma?

⁷ Baibol na tare nẹ Andru ọyen odibo ri Jọn ro bru ihwo phiyame. O muẹro nẹ Pita nabọ kerhọ rẹ eta rẹ oniọvo rọyen vuẹrẹ kpahen Jọn ro bru ihwo phiyame. Ẹdẹ ọvo, Jọn de dje Jesu rẹ Nazarẹt vwọ kẹ Andru, rọ vwọ ta: “Nighe, Omogegede rẹ Ọghẹnẹ.” Ugege yena, Andru da rhe dia odibo ri Jesu, ọ da je vuẹ Pita ovuẹ omavwerhovwẹn nana: Mesaya na rhire! (Jọn 1:35-40) Omarẹ ikpe 4,000 vwo nẹ ọke rẹ ẹvwọsua rẹ Idẹn, Jihova veri nẹ ohwo oghẹresan ọvo cha rhe vwẹ uvi rẹ iphiẹrophiyọ vwọ kẹ ihworakpọ. (Jẹn. 3:15) Andru mrẹ Osivwin nana re, ọ re se Mesaya na! Pita da je djẹ kpakpata ra mrẹ.

8. Die yen odẹ rẹ Jesu mu vwọ kẹ Pita na mudiaphiyọ, kẹ die yen ihwo evo ta kpahen odẹ na?

⁸ Saimọn, yẹrẹ Simiọn yen odẹ re vwo se Pita jovwo. Ẹkẹvuọvo, Jesu vwọ nọ, ọ da ta: “Wẹ hẹ Saimọn na ọmọ ri Jọn? E che se we Kifas (otọ rọye oragha).” (Jọn 1:42) Pita yen a fan vwo kpo “Kifas” ro mudiaphiyọ “oragha.” O muẹro nẹ eta ri Jesu na eyen eta rẹ aroẹmrẹ. Ọ mraro rọyen nẹ Pita cha họhọ oragha, ọ cha dia uchivwo vẹ ohwo rọ cha chọn idibo rọyen uko. Ẹro yena  yen Pita vwo ni oma rọyen? O muẹro-o. Ihwo evo ri se ikuegbe nana nonẹna tobọ ni Pita kerẹ ohwo rọ họhọ oragha-a. Ihwo evo tare nẹ iruemu rọyen ra mrẹ se vwẹ Baibol na djerephia nẹ ọ dia ohwo ra sa vwẹroso-o, oshọ fobọ muo, o ji vwo iroro abavo-o.

9. Die yen Jihova vẹ Ọmọ rọyen nẹ vwẹ oma avwanre, kẹ diesorọ o vwo fo nẹ a vwẹroso ayen?

⁹ Pita vwo echobọ romobọ rọyen. Jesu je mrẹ ayen vughe. Ẹkẹvuọvo, kerẹ Jihova rọ dia Ọsẹ rọyen, erhuvwu rọhẹ oma rẹ ihwo yen Jesu tẹnroviẹ. Jesu mrẹ erhuvwu vwẹ oma ri Pita, ọ je guọnọ chọn uko vwo dje iruemu iyoyovwin nana phia. Jihova vẹ Ọmọ rọyen je guọnọ erhuvwu vwẹ oma rẹ avwanre nonẹna. Ọkiọvo, ọ sa bẹn avwanre vwo roro nẹ ayen mrẹ erhuvwu vwẹ oma rẹ avwanre. Ẹkẹvuọvo, ofori nẹ a vwẹroso ayen ji djephia nẹ avwanre ihwo re sa nuẹ, re guọnọ yono kerẹ Pita.—Se 1 Jọn 3:19, 20.

10. Die yen Pita rhiẹromrẹ, kẹ die yen o rhivwin re ru?

¹⁰ O muẹro nẹ Pita nene Jesu kpo asan evo ọke ro vwo ruiruo rẹ aghwoghwo rọyen. Ọ sa dianẹ ọ mrẹ Jesu ọke ro vwo ru emu rẹ igbevwunu rẹsosuọ rọyen; ọyen o vwo hirhe ame phiyọ udi vwẹ irueru rẹ orọnvwe ọvo vwẹ Kana. Ma rho kparobọ, o nyo Jesu ọke ro vwo ghwoghwo kpahen Uvie rẹ Ọghẹnẹ rọ cha vwẹ iphiẹrophiyọ vwọ kẹ ihworakpọ. Dedena, Pita da yanjẹ Jesu vwo, o de rhivwin kpo iruo rẹ iyerin ehwe rọyen. Emeranvwe evo vwọ wan nu, Pita da rhoma mrẹ Jesu. Udje nana, Jesu da vuẹ Pita nẹ o nene ọyen ruiruo rẹ aghwoghwo na ọkieje.

11, 12. (a) Owian vọ yen Pita wian kọkirhie? (b) Die yen Pita se roro kpahen ọke rọ vwọ kerhọ ri Jesu?

¹¹ Ofu dje Pita fikirẹ iruo rẹ ayen ruru vwẹ ason na. Ihwiyerin na do ibriki rayen phiyọ ame abọ buebun, ẹkẹvuọvo ayen mu erin vuọvo-o. Pita hworo ona eje rere ayen se vwo hwe iyerin, ayen tobọ do ibriki rayen phiyọ asan eje rẹ ayen rorori nẹ iyerin na da riemu. Aphro herọ-ọ, kerẹ ihwiyerin buebun o vwo ọke evo Pita wo roro nẹ mane kẹ ọyen sa mrẹ asan rẹ iyerin buebun hepha, yẹrẹ ruo rere iyerin na sa vwọ ro evunrẹ obriki na. Vwọrẹ uyota, iroro tiọyena cha nẹrhẹ ofu dje phiyọ. Ọ dia o hwe iyerin fikirẹ akpọẹriọ-ọ; iyerin na yen ọ vwọ ghẹrẹ orua rọyen. Ukuotọ rọyen, abọ diodi kọyen o vwo te ugbenu. Dedena ọ je cha hworhẹ obriki na. Iruo nana yen o ruẹ ọke rẹ Jesu vwo bro rhe.

¹² Otu buebun gba riariẹ Jesu phiyọ, jẹ ayen kerhọ rẹ eta  rọyen. Ọ vwọ dianẹ ihwo na pha buebun, Jesu da ro okọ ri Pita je vuẹ nẹ o bio ro abadi na emerha. Kidie nẹ ọ hẹ evunrẹ okọ, upho rọyen da nabọ mra ro vwo yono ihwo na. Pita nabọ kerhọ kerẹ ihwo rehẹ orhoma rẹ abadi na. Ofu djere ọke rọ vwọ kerhọ rẹ aghwoghwo ri Jesu ro shekpahen Uvie rẹ Ọghẹnẹ-ẹ. Ọnana okpuphẹn rode rẹ Pita vwọ chọn Jesu uko vwo ghwoghwo ovuẹ rẹ iphiẹrophiyọ nana vwo nene akpọneje! Kẹ, o se ghini ruo? Mavọ yen Pita sa vwọ ghẹrẹ orua rọyen? Ọkiọvo, Pita roro kpahen owian ọgangan ayen wianre vwẹ ason rẹ ayen vwo jẹ iyerin ehwe na.—Luk 5:1-3.

13, 14. Emu igbevwunu vọ yen Jesu ru kẹ Pita, kẹ mavọ yen oma ru Pita?

¹³ Jesu vwo ku ota rọyen phiyọ nu, ọ da vuẹ Pita: “Bi okọ wẹn na phihọ odo re wọ fa ariri wẹn họ ro mu eri.” Pita de vwo ẹwẹn ivivẹ. Ọ da ta: “Onini, avwanre lagha oma vwẹ ason na ejobi yi me hwe emuọvo-o! Ẹkẹvuọvo vwẹ ota wẹn na me fa phihọ.” Pita ghwa hworhẹ obriki na nu obọ. Ọhọhọre nẹ Pita guọnọ rhoma do obriki na phiyọ abadi jovwo-o, ma rho ọ vwọ dianẹ ọnana dia ọke rẹ erin vwọ riemu-u! Dedena, o de ru ọtiọyen, ọ da je vwẹ obọ se irivẹ rọyen nẹ ayen bi okọ ọfa vwọ kpahọn.—Luk 5:4, 5.

¹⁴ Ọke rẹ Pita vwo kpono obriki na, o de ri noso nẹ ọ pha họhọhọ. Eriyina, ọ da rhoma vwẹ ẹgba rọyen vwo kpono. Siẹvuọvo na, ọ da mrẹ iyerin buebun rẹ obriki na muru. Ọtiọyena, ọ da vwẹ obọ se eshare rehẹ evunrẹ okọ ro chekọ na nẹ ayen bi rhe. Ayen vwo te etiyin, ayen da mrẹvughe nẹ okọ ọvuọvo che se mu iyerin na eje-e. Ayen da ghwẹ iyerin vọn evunrẹ ekọ ivẹ na. Kidie nẹ iyerin na pha buebun, okọ na ko shue. Obo re phiare na gbe Pita unu mamọ. Ọ mrẹ Jesu ro ru emu igbevwunu jovwo re, jẹ ọnana djobọte komobọ. Jesu vwo ẹgba rọ sa vwọ tobọ nẹrhẹ iyerin ro evunrẹ obriki na! Oshọ de mu Pita. O de she diguẹ vwẹ obaro ri Jesu, ọ da ta: “Bi nẹ uvwe oma, kidie mẹvwẹ oruimwemwu, E, Ọrovwohwo.” O ghini muwan ro vwo nene ọshare nana rọ vwẹ ẹgba rẹ Ọghẹnẹ vwo ruiruo?—Se Luk 5:6-9.

15. Idjerhe vọ yen Jesu vwọ chọn Pita uko vwo si oshọ vẹ ẹwẹn ivivẹ nẹ evun?

¹⁵ Jesu da ta kẹ: “Wọ djẹ oshọ-ọ; kẹ etinẹ yanran ku wo hwe iyeri rẹ ihwo.” (Luk 5:10, 11) Ọnana dia ọke rẹ oshọ vwo muo yẹrẹ o vwo vwo ẹwẹn ivivẹ-ẹ. Ofori nẹ Pita tẹnrovi iruo  ọghanghanre nana ukperẹ o vwo vwo ẹwẹn ivivẹ sẹ ọ sa vwẹrote orua rọyen, yẹrẹ sẹ o muwan ro vwo ruiruo rẹ aghwoghwo na. Jesu vwo iruo rode ro che ru, iruo nana che wene akpeyeren rẹ ihwo. Ọghẹnẹ rẹ “evwoghovwo rhere buebu” yen ọ ga. (Aiz. 55:7) Jihova cha chọn uko vwọ vwẹrote orua rọyen, ji ruiruo rẹ aghwoghwo na.—Mat. 6:33.

16. Die yen Pita, Jems kugbe Jọn ruru ọke rẹ Jesu vwo durhie ayen, kẹ diesorọ ọnana vwọ dia orhiẹn ro me yovwin?

¹⁶ Kpakpata, Pita de nene, eriyin ji te Jems vẹ Jọn. “Ọke rẹ ayen rhi vwo bi te otọ, ayen da yan jẹ emu na ejobi vwo, ayen de nene.” (Luk 5:11) Pita vwo esegbuyota kpahen Jesu kugbe Ọ ro jiro rhe otọrakpọ na. Ọnana yen orhiẹn ro me yovwin ro bruru. Nonẹna, Inenikristi ri phi oshọ vẹ ẹwẹn ivivẹ kparobọ rere  ayen sa vwọ ga Jihova djephia nẹ ayen vwo esegbuyota. Ọkieje yen Jihova cha vwọ vwẹrote ihwo re vwẹrosuọ.—Une 22:4, 5.

17. Erọnvwọn vọ yen Pita se rhe roro kpahan rhanvwẹ ẹgbukpe ivẹ ro vwo vughe Jesu re?

¹⁷ Kirobo re djunute vwẹ ọtonphiyọ rẹ uyovwinrota na, ọke rẹ Pita vwo bi okọ vwẹ ason vwevunrẹ Abadi ri Galili, jẹ o te omarẹ ẹgbukpe ivẹ ro vwo vughe Jesu re. Vwọrẹ uyota, a cha sa riẹn obo ro roro-o. Erọnvwọn buebun herọ ro se rhe roro kpahan. Jesu sivwin oni rẹ aye ri Pita rọ muọga. Ọ je ta Ota vwẹ enu rẹ Ugbenu. Womarẹ iyono vẹ igbevwunu ro ruru, Jesu djerephia vwẹ abọ buebun nẹ ọyehẹ Ọ ra Jẹreyọ Na rọ dia Mesaya na. Ọke vwọ yanran na, echobọ ri Pita kerẹ oshọ vẹ ẹwẹn ivivẹ ro vwori kpotọ re. Jesu tobọ sane Pita nẹ ọ dia usun rẹ iyinkọn 12 rọyen! Dedena, Pita mrẹvughe nẹ oshọ vẹ ẹwẹn ivivẹ ji rhe ọyen.

18, 19. (a) Djisẹ rẹ oborẹ Pita mrẹre vwẹ Abadi ri Galili. (b) Die yen Jesu ta kẹ Pita?

¹⁸ Vwẹ ẹrhẹrẹ rẹne rẹ ason rẹ ẹdẹ yena, omarẹ ugọjọ erha rẹ urhiọke, Pita da dobọ rẹ okọ ebio na ji, ọ da nabọ chidia evunrẹ okọ na. Siẹvuọvo na, ọ da mrẹ emu ọvo rọ yan vwẹ ẹbẹre ro chekọ rẹ ọkẹre na! Urhukpẹ ro nẹ emeranvwe na cha ro lo muẹ ọkẹre na yen sorọ? Ọ cha sa dia ọtiọye-en kidie orọnvwọn na nabọ mudia gogorogo. Ọshare yen o ruẹ! Ọshare nana yan vwẹ enu rẹ abadi na! Ọshare na vwo siẹkẹrẹ ayen, kẹ ọ họhọ nẹ ọ cha wanvrẹ okọ na. Kidie nẹ oshọ mu idibo na, kẹ ayen roro nẹ ọyen ohwo erivwin. Ọshare na da ta: “Udu rẹ ovwan fọ, Mẹvwẹ e jẹn udu bru ovwa-an.” Jesu yen ọshare na!—Mat. 14:25-28.

¹⁹ Pita da kpahen: “Ọrovwohwo, ọ da dia owẹ, gbe jẹn uvwe yan bru we rhe vwẹ enu rẹ ame na.” Ota rẹsosuọ rọ tare na vọnre vẹ uduefiogbere. Kidie nẹ oma vwerhen Pita kpahen igbevwunu oghẹresan nana, kẹ ọ guọnọ riẹn sẹ ọyen ji vwo oka rẹ esegbuyota ọgangan tiọyen. Ọ guọnọ yan vwẹ enu ame rere esegbuyota rọyen vwọ ganphiyọ. Fikirẹ ọtiọyena, Jesu da vuẹ nẹ ọ yanrhe. Pita de yerin akọkọ rẹ okọ na ji mudia enu rẹ abadi na. Vwẹro roro oborẹ oma ru Pita ọke ro vwo mudia enu rẹ abadi na jẹ o divwẹ-ẹn. O muẹro nẹ o che gbe unu rọ vwọ yan bru Jesu ra vwẹ enu rẹ ame na. Ẹkẹvuọvo, iroro ọfa da ghwa dje ro ẹwẹn rọyen.—Se Matiu 14:29.

20. (a) Diesorọ Pita vwo vwo ẹwẹn ivivẹ, kẹ die yen nuro rhe? (b) Uyono vọ yen Jesu yono Pita?

²⁰ Ofori nẹ Pita tẹnrovi Jesu. Jesu reyọ ẹgba rẹ Ọghẹnẹ vwọ  nẹrhẹ Pita sa yan vwẹ enu rẹ ame na. Esegbuyota ri Pita vwo kpahen Jesu yen sorọ ọ vwọ vuẹ nẹ ọ yanrhe. Ẹkẹvuọvo, Pita de rhi vwo ẹwẹn ivivẹ. Baibol na da ta: “Ọke rọ vwọ mrẹ abadi rọ họnra kugbe odju ro djuẹ, oshọ de muo.” Ọkẹre na rọ fẹrẹ ame ruo okọ na vẹ ọgbogho rẹ Pita mrẹre na, da nẹrhẹ oshọ muo. Ọ sa dianẹ o roro nẹ ọyen divwẹn vwevunrẹ abadi na re. Oshọ nana vwọ ganphiyọ ye, jẹ esegbuyota rọyen kpotọ phiyọ. Kidie nẹ esegbuyota rọyen phiegheri, Pita re se Oragha fikirẹ emudiagan rọyen ko divwẹn kerẹ oragha re do phiyọ ame. Pita riẹn obo ra rhẹrhẹ ame, ẹkẹvuọvo ọ vwẹroso ẹgba romobọ rọye-en. O de bunu: “Ọrovwohwo sivwi uvwe.” Jesu da yọnrọn obọ rọyen ji sio phia. Ọke rọ je vwọ hẹ enu rẹ ame na, Jesu de yono Pita uyono ọvo: “Esegbuyota wẹn hanvwe nọ, die nẹrhẹ owẹ vwo iroro ivẹ?”—Mat. 14:30, 31.

21. Diesorọ ẹwẹn ivivẹ vwọ bra, kẹ mavọ yen e se vwo phio kparobọ?

²¹ Ota nana, “Die nẹrhẹ owẹ vwo iroro ivẹ?” ọyen okpota. Ẹwẹn ivivẹ vwo ẹgba rọ sa so oghwọrọ. A da vwẹ uphẹn kẹ, ọ sa nẹrhẹ esegbuyota avwanre shekpotọ, ukuotọ rọyen o mi rhi ghwu. Ofori nẹ a họnre vwọso ẹwẹn ivivẹ! Vwẹ idjerhe vọ? Womarẹ a vwọ tẹnrovi obo ri yovwirin. A da tẹnrovi obo re nẹrhẹ oshọ mu avwanre, obo re nẹrhẹ ofu dje avwanre, kugbe obo ri se si avwanre nẹ ẹbẹre ri Jihova vẹ Ọmọ rọyen, ẹwẹn ivivẹ rẹ avwanre vwori na kọ cha rha ganphiyọ. Ẹkẹvuọvo, a da tẹnrovi Jihova vẹ Ọmọ rọyen, oborẹ ayen rure, oborẹ ayen ruẹ, kugbe oborẹ ayen che ru kẹ ihwo ri vwo ẹguọnọ rayen, ke se si ẹwẹn ivivẹ nẹ oma avwanre.

22. Diesorọ esegbuyota ri Pita vwo fo obo ra vwẹrokere?

²² Pita vẹ Jesu vwọ ro evunrẹ okọ na, ogiribo na de rhi kpotọ. Abadi na da rhe fọ riẹn. Pita vẹ idibo ri chekọ na da ta: “Uyota, ọmọ rẹ Ọghẹnẹ wo ghine ruẹ.” (Mat. 14:33) Ọke vwo rhie ayen vwẹ abadi na, ẹwẹn ri Pita da mwavwe hwẹ vẹ aghọghọ. O phi ẹwẹn ivivẹ vẹ oshọ kparobọ re. Vwọrẹ uyota, o che ru ewene buebun ọ ke sa dia Onenikristi rọ họhọ oragha rẹ Jesu mraro rọyen na. O brorhiẹn nẹ o che ru ewene na, ọ cha rha yan obaro. Wo ji brorhiẹn tiọyen? Ọ da ọtiọyen, wọ cha mrẹ nẹ esegbuyota ri Pita fo obo ra vwẹrokere.