1, 2. Diesorọ a vwọ bọn esegbuyota avwanre gan enẹna? Djudje rọyen.

ESEGBUYOTA. Ubiota nana pha yoyovwin, ọtiọyen o ji si ihwo kẹrẹ ohwohwo. Ẹkẹvuọvo, a da mrẹ ubiota na, o ji fo nẹ e roro kpahen ubiota ọfa: “Okpakpa!” Vwọrẹ uyota, e rhe vwo esegbuyota-a, kẹ ofori nẹ e brokpakpa vwo. E de rhe vwo esegbuyota, kẹ ofori nẹ e brokpakpa sẹro rọyen ji ruo ganphiyọ. Diesorọ?

² Vwẹ ẹwẹn roro nẹ wọ hẹ evunrẹ aton. Urhuru rẹ ame si we. Wọ da mrẹ ame na nu, o muẹro nẹ wo che rhurho nẹ uvo na rere o vwo jẹ kpọ. O ji fo nẹ wo re kuẹ ba rere ọ sa vwọ tọn te ọke wo vwo te asan wọ ra. Nonẹna, avwanre dia evunrẹ akpọ rẹ ihwo de jẹ Ọghẹnẹ ẹga, akpọ rẹ uvi rẹ esegbuyota kanre kerẹ ame rọ bẹn ẹmrẹ, rọ fobọ kpọ vwẹ aton jokpanẹ ke rhurhiro, ji kuẹ ba. Ota nana guọnọ okpakpa, kidie kirobo ra cha sa dia ababọ rẹ ame-e, a je cha sa ga Jihova ababọ rẹ esegbuyota-a.—Rom. 1:17.

3. Die yen Jihova ruru rọ sa nẹrhẹ esegbuyota avwanre ganphiyọ, kẹ erọnvwọn ivẹ vọ yen ofori nẹ a karophiyọ?

³ Nonẹna, Jihova riẹnre nẹ avwanre guọnọ esegbuyota, ọ je riẹn obo rọ bẹn te a vwọ bọn gan je sẹro rọyen. Ọnana yen sorọ Jihova vwọ kẹ avwanre idje ra sa vwẹrokere. Jihova de mu ọyinkọn Pọl vwo si: “Vwẹ ẹro keri otu re wan oma rẹ esegbuyota kugbe erhiori reuku rẹ ive na.” (Hib. 6:12) Ọnana yen sorọ ukoko ri Jihova vwo bru avwanre uche nẹ a davwẹngba vwọ vwẹrokere udje rẹ eshare vẹ eya ri fuevun kerẹ i re djunute vwevunrẹ ọbe nana. Ọtiọyena, die yen ofori nẹ e ru asaọkiephana? Karophiyọ erọnvwọn ivẹ nana: (1) Ofori nẹ a bọn esegbuyota rẹ avwanre gan; (2) ofori nẹ e vwo imuẹro ọgangan kpahen iphiẹrophiyọ avwanre.

4. Idjerhe vọ yen Eshu vwọ dia ọvweghrẹn rẹ esegbuyota, kẹ diesorọ oshọ vwo jẹ avwanre emuo?

⁴ Bọn esegbuyota wẹn gan ọkieje. Eshu ọyen ọvweghrẹn rẹ esegbuyota. Osun rẹ akpọ na ru eyeren nana phiyọ aton rere ọ sa vwọ bẹn ra vwọ sẹro rẹ esegbuyota avwanre. Eshu gan nẹ avwanre shesheri. Kẹ, ofori nẹ oshọ mu avwanre nẹ a cha sa bọn esegbuyota rẹ avwanre ga-an? Kakaka! Jihova ọyen Ugbeyan rẹ ihwo re guọnọ vwo obọdẹn rẹ esegbuyota. Ọ vwẹ imuẹro kẹ avwanre nẹ ọ hẹ ẹbẹre rẹ avwanre. E se hirharoku Idẹbono rere ọ mrẹ avwanre djẹ! (Jems 4:7) E se ru ọtiọyen siẹrẹ a da bọn  esegbuyota avwanre gan kẹdẹ kẹdẹ. Vwẹ idjerhe vọ?

5. Mavọ yen eya vẹ eshare ri fuevun rehẹ Baibol na se vwo vwo esegbuyota? Djekpahọn.

⁵ Kirobo ra mrẹre vwẹ ọbe nana, e vwiẹ eya vẹ eshare ri fuevun rehẹ Baibol na vẹ esegbuyota-a. Ayen djerephia nẹ esegbuyota ọyen omamọ rẹ ẹwẹn ọfuanfon na. (Gal. 5:22, 23) Ayen yare ukẹcha ri Jihova, ọ da chọn ayen uko vwo ru esegbuyota rayen ganphiyọ. E ja vwẹrokere ayen vẹ imuẹro nẹ Jihova siobọnẹ ẹwẹn ọfuanfon rọyen kẹ ihwo ri nokpẹn rọyen, ri ji yeren akpọ nene oyare rayen. (Luk 11:13) O ji vwo erọnvwọn efa re se ji yono?

6. Mavọ yen a sa vwọ mrẹ erere nẹ isese ri Baibol avwanre?

⁶ Vwẹ ọbe nana, a fuẹrẹn idje rẹ ihwo evo ri vwo uvi rẹ esegbuyota. Ihwo efa buebun je herọ! (Se Hibru 11:32.) E de muomaphiyọ ẹrhovwo, ji yono ayen vwo nẹ  ubiudu rhe, a cha mrẹ emu buebun efa yono. E de brokpakpa se ikuegbe rẹ ihwo ri vwo esegbuyota rehẹ Baibol na, esegbuyota avwanre cha sa ghwotọ-ọ. A sa vwọ mrẹ erere nẹ isese rẹ avwanre, kẹ ofori nẹ a ghwọrọ ọke vwọ hiẹ guọnọ obo re riariẹ asan re se na phiyọ vẹ oka rẹ akpọ ayen yerin. A da karophiyọ nẹ ayen gbare-e, ayen ihwo “kirobo rẹ avwanre epha,” udje rayen ko che te ẹwẹn avwanre. (Jems 5:17) Erorokẹ cha nẹrhẹ e roro kpahen oborẹ oma ru ayen ọke rẹ ayen vwo hirharoku egbabọse vẹ ebẹnbẹn re họhọ e rẹ avwanre.

7-9. (a) Mavọ yen oma che ru eya vẹ eshare evo ri fuevun vwẹ Baibol na mane kẹ ayen sa ga Jihova kirobo rẹ avwanre ga nonẹna? (b) Diesorọ a vwọ vwẹ iruo vwọ bọn esegbuyota avwanre ganphiyọ?

⁷ A sa je vwẹ iruo vwo ru esegbuyota avwanre ganphiyọ kidie “esegbuyota ro vwo iruo-o ji ghwu rhe.” (Jems 2:26) Di roro oborẹ eshare vẹ eya re yono kpahen na cha ghọghọ te ọ da dianẹ ayen vwo ọka rẹ iruo rẹ Jihova vwọ kẹ avwanre nonẹna!

⁸ Kerẹ udje, mavọ yen oma che ru Ebraham mane kẹ Jihova vuẹrẹ nẹ ọ ga ọyen vwẹ uvwre rẹ iniọvo na vwẹ Ọguan Ruvie kugbe ọghwẹkoko, rọ dia asan re de yono ihwo kpahen ive rọ mrẹre “vwẹ ogboko,” ukperẹ agbada rẹ oragha ro vwo vi vwevunrẹ aton? (Se Hibru 11:13.) Kẹ, mavọ yen oma che ru Ilaija mane kẹ Jihova vuẹrẹ nẹ owian rọyen churobọ si o vwo ghwoghwo ovuẹ rẹ uchebro vẹ iphiẹrophiyọ kẹ ihwo vwọrẹ ufuoma, ukperẹ ọ vwọ ghwọrọ emraro ri Baal jẹ ọ je ga vwẹ otọ rẹ usuon rẹ ovie umwemwu ọvo? Aphro herọ-ọ, eshare vẹ eya rẹ ọke yena che brokpakpa rhiabọreyọ iruo avwanre ruẹ vwẹ ẹga ri Jihova nonẹna.

⁹ Ọtiọyena, e ja vwẹ iruo vwọ bọn esegbuyota avwanre ganphiyọ. E de ru ọtiọyen, ka sa vwẹrokere omamọ udje rẹ eya vẹ  eshare rehẹ Baibol na. Kirobo re djunute vwẹ ọtonphiyọ rẹ ọbe nana, avwanre ki che sikẹrẹ ayen kerẹ igbeyan. Oyerinkugbe avwanre vẹ ayen kọ cha kpẹkpẹ phiyọ vrẹ obo ri jovwo.

10. Mavọ yen akpọ kpokpọ na cha vwerhoma te?

¹⁰ Sẹro rẹ iphiẹrophiyọ wẹn. Ọkieje yen iphiẹrophiyọ rẹ Ọghẹnẹ vwọ kẹ eshare vẹ eya ri fuevun vwọ kẹ ayen ẹgba. Kẹ, owẹ vwo? Kerẹ udje, di roro obo rọ cha vwerhoma te ọke ra da cha mrẹ “evrẹnushi . . . ihwo ọsoso” re dia idibo rẹ Ọghẹnẹ ri fuevun. (Se Iruo Rẹ Iyinkọn Na 24:15.) Erhọ yen enọ evo wọ guọnọ nọ ayen?

11, 12. Enọ vọ yen wọ sa nọ ihwo nana vwẹ akpọ kpokpọ na (a) Ebẹl? (b) Noa? (c) Ebraham? (d) Rutu? (e) Abigail? (f) Ẹsta?

¹¹ Ọke wọ da mrẹ Ebẹl, wọ guọnọ nọ kpahen oka rẹ ohwo rẹ ọsẹ vẹ oni rọyen hepha? Gbanẹ wọ cha nọ nẹ, “Wo nene Chẹrobim re rhẹrẹ ogba rẹ Idẹn na ta ota? Ayen kpahen ota kẹ wẹ?” Kẹ, Noa vwo? Wọ sa nọ: “Oshọ rẹ erhuaran na mu we? Mavọ yen wọ sa vwọ vwẹrote eranvwe na eje wo mu phiyọ okọ na?” Wọ da mrẹ Ebraham, wọ sa nọ: “Wẹ vẹ Shem mrẹ ohwohwo? Ono yen yono uwe kpahen Jihova? Ọ bẹn kẹ wẹ wo vwo vrẹn nẹ Ur?”

¹² Di roro kpahen enọ evo wọ sa nọ eya ri fuevun ra rhọvwọn nẹ ushi. “Rutu, die yen mu we vwọ ga Jihova?” “Abigail, oshọ mu we wọ vwọ vuẹ Nabal kpahen ukẹcha wọ vwọ kẹ Devid?” “Ẹsta, die yen phia kẹ wẹ vẹ Modekai vwo nẹ asan rẹ ikuegbe rẹ Baibol na da dobọji?”

13. (a) Enọ vọ yen ihwo ra cha rhọvwọn nẹ ushi rhe sa nọ wẹ? (b) Mavọ yen oma ru we kpahen uphẹn wọ vwọ mrẹ eya vẹ eshare ri fuevun vwẹ ọke awanre?

¹³ O muẹro nẹ eya vẹ eshare yena ri fuevun ji che vwo enọ rẹ ayen guọnọ nọ wẹ. Oma cha vwerhen owẹ wọ vwọ vuẹ ayen kpahen ọke rẹ oba na kugbe oborẹ Jihova vwo bruba kẹ ihwo rọyen vwẹ ọke ọgangan! Aphro herọ-ọ, ayen cha ghọghọ siẹrẹ ayen da mrẹ oborẹ ive ri Jihova eje vwo rugba. Vwẹ akpọ kpokpọ na, a rha cha vwẹ ẹwẹn roro ikuegbe rẹ idibo rẹ Ọghẹnẹ ri fuevun vwẹ ọke awanre-e, kidie a vẹ ayen yen gba cha dia evunrẹ Iparadaisi! Ọtiọyena, gba davwẹngba wẹn eje vwo ni ayen kerẹ obọdẹn rẹ ihwo. Vwẹrokere esegbuyota rayen ọkieje. Ọyen ẹrhovwo avwanre nẹ ayen cha dia igbeyan wẹn ru wo che nene ga Jihova bẹdẹ bẹdẹ!