Baibol na tare nẹ, “ekpako kugbe idibo rowian” yen vwẹrote iruo rẹ ukoko na. (Filipae 1:1, NW ) Iniọvo tiọyena herọ vwẹ ukoko ọvuọvo. Iruo vọ yen idibo rowian na ruẹ vwọ chọn avwanre uko?

Ayen vwẹ ukẹcha kẹ ekpako na. Iniọvo nana vwo omamọ oyerinkugbe vẹ Jihova, ayen ihwo ra sa vwẹroso, re je wian gangan vwevunrẹ ukoko na; evo rayen ighene, efa kpakore. Ayen vwẹrote ewian sansan vwevunrẹ ukoko na. Ọtiọyena, ekpako na ke sa tẹnrovi uyono vẹ ẹroevwote rẹ ukoko na.

Ayen vwẹ ukẹcha kẹ ukoko na. Evo vwẹrote echidiotọ na, ayen yeren ihwoeje re cha Ọguan Ruvie na. Efa vwẹrote ẹbe, ekuakua rẹ uhworo, igho rẹ ukoko na, yẹrẹ ẹkuotọ rẹ iniọvo na de ghwoghwo. Ayen ji vwobọ vwẹ orufon rẹ Ọguan Ruvie na. Ekpako na sa vuẹ ayen nẹ ayen vwẹ ukẹcha kẹ iniọvo re kpakore. Keridie nẹ idibo rowian vwo owenvwe rẹ ayen vwo ru koka koka rẹ iruo ra vwọ kẹ ayen, ọ nẹrhẹ iniọvo na muọghọ kẹ ayen.​—1 Timoti 3:13.

Ayen omamọ rẹ udje vwevunrẹ ukoko na. Iniọvo ri dje uruemu rẹ Inene-ri-Kristi phia, eyen e vwo muẹ idibo rowian. Eta rẹ ayen vwọ phia vwevunrẹ ukoko na bọn esegbuyota avwanre gan. Siẹrẹ ayen da kobaro rẹ iruo aghwoghwo na, oruru avwanre kọ ganphiyọ. Ayen de nene ekpako na wian kuẹgbe, aghọghọ vẹ omamọ oyerinkugbe kọ dia ukoko na. (Ẹfesọs 4:16) Vwẹ obaro obọ, ayen mi ji rhi muwan rẹ ayen vwọ ga kerẹ ekpako.

• Oka rẹ ihwo vọ yen ga kerẹ idibo rowian?

• Ukẹcha vọ yen idibo rowian na vwọ kẹ ukoko na?