Ọ da dianẹ wẹ vẹ Oseri ri Jihova yono Baibol na, ọkiọvo wọ davwẹngba vwo muegbe rẹ asan rẹ ovwan che yono phiyotọ. O ji fo nẹ wo muegbe phiyotọ vwọkẹ emẹvwa avwanre. Wọ cha mrẹ erere no rhe gbidiki siẹrẹ wo de muegbe vwọkẹ emẹvwa ọkeneje.

Brorhiẹn rẹ ọke vẹ asan wo de che yono. Ọke vọ yen wọ sa vwọ nabọ mu ẹwẹn wẹn phiyọ uyono na? Vwẹ urhiọke tavwen wo ki kpẹ iruo, gbanẹ vwẹ ason rẹ emọ wẹn da vwerhẹn nu? Ọ da tobọ dia ọmọke krẹn wo vwo yono, ọke na de te, wo jẹ emuvuọvo gbowọphiyọ-ọ. Guọnọ asan rọ fọre riẹin, wo mi ji fun tv, iredio vẹ ifonu wẹn. Nẹrhovwo tavwen wọ ke tuọnphiyọ, ọnana cha chọn wẹ uko vwo si ẹwẹn nẹ ẹnwan rẹ ẹdẹ yena rere wo se vwo mu ẹwẹn wẹn kpahen Ota rẹ Ọghẹnẹ.​—Filipae 4:6, 7.

Jokaphiyọ ẹkpo sansan, wo mi ji muegbe wọ vwọ kpahen phiyọ enọ. Ke ni asan re che yono na wọ vwọ riẹn obo ro shekpahen. Roro kpahen uyovwinrota rẹ uyono na, vẹ oborẹ iyovwinreta itete na churobọ sio, wo mi ji ni ihoho vẹ enọ ra vwọ rhoma fuẹrẹn uyono na. Wo de ru ọyena nu, gbe se ẹkoreta ọvuọvo, wọ me je guọnọ ẹkpahọnphiyọ rẹ enọ na. Se ẹkpo ri Baibol sansan ra rionbọra rere wo roro kpahen oborẹ ayen churobọ si uyono na. (Iruo 17:11) Wọ da mrẹ ẹkpahọnphiyọ rẹ enọ na nu, jokaphiyọ asan na wọ sa vwọ karophiyọ. Vwevunrẹ omẹvwa na, wọ sa rionbọ, wọ vwẹ eta omobọ wẹn vwọ kpahen phiyọ onọ na.

Siẹrẹ wo de muegbe rẹ obo re che yono vwevunrẹ emẹvwa na kudughwrẹn kudughwrẹn, ku wo se phiba “ighẹn” rẹ erianriẹn ri Baibol wẹn.​—Matiu 13:51, 52.

• Ọrhuẹrẹphiyotọ vọ yen cha chọn wẹ uko vwo muegbe vwọkẹ emẹvwa?

• Mavọ wo se vwo muegbe wọ vwọ kpahen phiyọ enọ vwẹ omẹvwa na?