Diesorọ oma vwọ vwerhen ihwo nana? Ayen hẹ ọghwẹkoko. Kirobo rẹ Ọghẹnẹ vwẹ iji kẹ idibo rọyen vwẹ ọke awanre nẹ ayen siomakoko abọ erha kukpe kukpe, ọtiọyen avwanre ji siomakoko vwo ruẹ eghwẹkoko nonẹna. (Urhi Rivẹ 16:16) Avwanre ruẹ eghwẹkoko abọ erha kukpe kukpe: osikoko rẹ okinriariẹ rẹ ẹdọke re ruẹ abọ ivẹ, kugbe ọghwẹkoko rẹ ubrotọ rẹ ẹdẹ erha. Erere vọ yen avwanre mrẹ vwo nẹ eghwẹkoko nana cha?

E nẹrhẹ oyerinkugbe avwanre ganphiyọ. Kirobo rẹ oma vwerhen ihwo rẹ Izrẹl ọke rẹ ayen vwo jiri Jihova vwevunrẹ “ọghwẹgbe rode” rayen, ọtiọyen oma je vwerhen avwanre vwẹ eghwẹkoko avwanre. (Une Rẹ Ejiro 26:12; 111:1) Emẹvwa nana nẹrhẹ avwanre se kuomakugbe iniọvo avwanre rehẹ ikoko efa yẹrẹ ri nẹ ẹkuotọ efa rhe. Vwẹ ọke omaerovwon, avwanre riemu kuẹgbe; ọnana toroba uvi oyerinkugbe vẹ omavwerhovwẹn rẹ avwanre. (Iruo 2:42) Vwẹ eghwẹkoko nana, avwanre rhiẹromrẹ ẹguọnọ ro ku “imoni” avwanre rẹ akpọeje kugbe.​—1 Pita 2:17.

E nẹrhẹ oyerinkugbe avwanre vẹ Ọghẹnẹ ganphiyọ. Oma vwerhen ihwo rẹ Izrẹl mamọ, keridie ayen nabọ “riẹn isese” rẹ Ọbe ọfuanfon na re dje fiotọ kẹ ayen. (Nehemaya 8:8, 12) Avwanre ji vwo ọdavwaro kpahen obo re yono avwanre vwẹ eghwẹkoko. E muẹ uyovwinreta rẹ eghwẹkoko vẹ isikoko avwanre kpahen Baibol na. Avwanre yono obo re se vwo ru ọhọre Ọghẹnẹ womarẹ eta kugbe ẹvwanriẹnruo ravwọ phia. Ọ kẹ avwanre uduephiophiyawọ rẹ avwanre vwo nyo oborẹ iniọvo avwanre evo se vwo phi egbabọse rẹ akpeyeren sansan kparobọ. Vwẹ eghwẹkoko rẹ ubrotọ, e ruẹ eha rudje; eha rudje na nẹrhẹ a sa nabọ vwo ẹruọ rẹ iyono eghanghanre rehẹ Baibol na. Vwẹ eghwẹkoko ride vẹ iritete, ihwo re guọnọ dje omaẹvwọkpahotọ rayen phia kẹ Ọghẹnẹ, e bru ayen phiyame.

• Diesorọ eghwẹkoko vwọ kẹ avwanre omavwerhovwẹn?

• Erere vọ yen wọ sa mrẹ vwo nẹ eghwẹkoko rhe?