Baibol na tarọ nẹ Jesu de ghwu nu, iyono efian cha vwomaphia vwẹ uvwre rẹ Inene-ri-Kristi. (Iruo 20:29, 30) Ọyena ghene phia. Ayen da vwẹ iyono rẹ ẹga efian vwọ gua erẹ Jesu; ọtiọyena, Inene-ri-Kristi efian da vwomaphia. (2 Timoti 4:3, 4) Mavọ yen o se vwo mu avwanre ẹro nẹ avwanre nabọ vwo ẹruọ rẹ obo ri Baibol na ghini yono?

Ọke ri Jihova cha vwọ vwẹ uyota na phia de rhi te. Ọ tarọ nẹ, vwẹ “ọke rẹ oba na . . .erianriẹn che bun phiyọ.” (Daniẹl 12:4) Vwẹ ukpe ri 1870, ẹmẹko rẹ ihwo re guọnọ uyota na da rhe mrẹvughe nẹ iyono rẹ ishọshi buebun nẹ Baibol rhe-e. Ọtiọyena, kẹ ayen hiẹ guọnọ obo ri Baibol na ghini yono, Jihova de bruphiyọ kẹ ayen, rọ vwọ nẹrhẹ ayen vwo ẹruọ rẹ uyota na.

Ihwo ri fuevun frẹkotọ yono Baibol na. Nonẹna, avwanre vwẹrokere ona rẹ Emọ-uyono ri Baibol na vwo ruiruo ọke yena. Ayen da fuẹrẹn uyono ri Baibol ọvo nu, kẹ ayen kpẹ ọfa. Ayen da mrẹ ẹkpo ri Baibol rọ ghwa ro ayen te-e, kẹ ayen guọnọ ẹkpo ri Baibol efa ri dje kpahọn. Ayen de rhi vwo ẹruọ rẹ ẹkpo na re, ji brorhiẹn rọ rhọnvwephiyọ ẹkpo rẹ Baibol efa, kẹ ayen sio phiyotọ. Womarẹ Baibol na, kẹ ayen rhoma rhe mrẹ uyota ri shekpahen odẹ rẹ Ọghẹnẹ vẹ Uvie rọyen, ọhọre rọyen vwọkẹ ihworakpọ kugbe akpọ na, ẹdia rẹ ihwo ri ghwuru hepha, kugbe iphiẹrophiyọ rẹ evrẹnushi na. Ehiahiẹ rayen kọ rhe nẹrhẹ ayen vrabọ rẹ uyono efian buebun.​—Jọn 8:31, 32.

Vwẹ ukpe ri 1879, Emọ-uyono ri Baibol na da rhe mrẹvughe nẹ o te ọke ayen vwo ghwoghwo uyota na kẹ ihwo re. Ukpe yena yen ayen vwọ ton ẹteyọn rẹ The Watchtower Announcing Jehovah’s Kingdom phiyọ, rọ dia ọbe rẹ avwanre je teyan nonẹna. Enẹna, avwanre ghwoghwo uyota na kẹ ihwo rehẹ ẹkuotọ 240, vwẹ ejajẹ re vrẹ 750. Erianriẹn rẹ uyota na ji rhi bun te ọtiọna dẹvo-o!

• Die yen phia kẹ uyota ri Baibol na ọke rẹ Kristi vwo ghwu nu?

• Die yen chọn avwanre uko vwọ rhoma mrẹ uyota ri Baibol na vughe?