Oghwọrọ da phia, Iseri ri Jihova vwo ọrhuẹrẹphiyotọ rẹ ayen vwọ vwẹ ukẹcha kẹ iniọvo rayen rẹ oghwọrọ na te oma. Ọnana djerephia nẹ ayen ghini vwo ẹguọnọ rẹ ohwohwo. (Jọn 13:34, 35; 1 Jọn 3:17, 18) Idjerhe vọ yen avwanre vwọ chọn iniọvo na uko?

Avwanre toro igho. Owẹvwen ọgangan vwo fi vwẹ Judia, Inene-ri-Kristi rehẹ Antiọk de toro igho vwo rhe iniọvo rehẹ oboyin. (Iruo 11:27-30) Nonẹna, avwanre ji toro itetoro vwo rhe iniọvo avwanre rẹ emu phia kẹ.​—2 Kọrẹnt 8:13-15.

Avwanre vwẹ ukẹcha kẹ ayen. Ekpako rehẹ ekogho rẹ oghwọrọ na da phia ke guọnọ asan rẹ iniọvo na hepha sẹ oghwọrọ na te ayen oma. Umẹ rẹ ukẹcha re vwo mu, yen vwẹrote emu, ame, emwa, omaesivwo vẹ asan rẹ iniọvo na cha dia. Iseri ri Jihova buebun re dia ewena, vwoma vwọ kpahotọ vwọ rhuẹrẹ iwevwin vẹ Eguan Ruvie re guọghọre. Rọvwọ dianẹ avwanre vwo omamọ oyerinkugbe, avwanre je wian kuẹgbe ọkeneje na, kọ nẹrhẹ a sa vwẹ ukẹcha phia kpakpata. Dede nẹ avwanre vwẹ ukẹcha kẹ “otu re hẹ evwruwevwin rẹ esegbuyota na,” avwanre je vwẹ ukẹcha kẹ ihwo rẹ ẹga efa siẹrẹ uphẹn na de rhiephiyọ.​—Galesha 6:10.

Avwanre vwẹ eta ri Baibol na vwo bru ayen uche. Ihwo rẹ emu phia kẹ guọnọ uchebro mamọ. Vwẹ ọke tiọyena, Jihova rọ dia “Ọghẹnẹ rẹ uchebro” yen kẹ avwanre ẹgba. (2 Kọrẹnt 1:3, 4) Avwanre vwẹ ive ri Baibol na vwo bru ayen uche, avwanre je kẹ ayen imuẹro nẹ Uvie rẹ Ọghẹnẹ che si ebẹnbẹn vẹ ojaẹriọ eje no.​—Ẹvwọphia 21:4.

• Die yen nẹrhẹ Iseri ri Jihova sa vwẹ ukẹcha phia kpakpata siẹrẹ oghwọrọ da phia?

• Ukẹcha vọ yen avwanre sa vwọ kẹ ihwo rẹ emu phia kẹ?