Siẹrẹ ihwo re rọvwọnre de vwiẹ ọmọ, oma vwerhẹn ayen, dedena, egbabọse je he evun rọyen. Ovwan vwo kpẹ emiọvwọ re na, ovwan cha mrẹvughe nẹ, ẹroevwote rẹ ọmọ na cha reyọ ọke ovwan mamọ. Ewene sansan cha vwomaphia, ọtiọyen ji te erọnvwọn re sa djẹ ovwan ovwerhẹn, enana se djobọte oyerinkugbe ovwan. Ovwan ihwo-ivẹ na che ru ewene evo re sa nẹrhẹ ovwan nabọ vwẹrote ọmọ na, je sẹro rẹ orọnvwe ovwan. Mavọ yen uchebro ri Baibol na sa vwọ chọn ovwan uko vwo yerin ghene egbabọse nana eje?

OBO RI BAIBOL NA TARE: “Ẹguọnọ vwo odirin kugbe aruẹdọn.” Vwọba, “ẹguọnọ ghwe churu obọ muẹ ọrọyen ọvo-o; ophu fobọ muo-o.” (1 Kọrẹnt 13:4, 5) Wọ vwọ dia oni nure na, ọmọ wẹn kọyen cha ma reyẹ ọke wẹn. Ọtiọyena, ọshare wẹn se no nẹ wọ kpairoro vrẹ ọyen; ẹkẹvuọvo, karophiyọ nẹ ofori nẹ wo ji nene ọshare wẹn ghwọrọ ọke kugbe. Jẹ ọshare wẹn riẹn nẹ wọ guọnọ ukẹcha rọyen vwẹ ẹroevwote rẹ ọmọ na, ẹkevuọvo ru ọtiọyen vwọrẹ ẹguọnọ vẹ odirin.

“Ovwan eshare ri vwo eya, wa vwẹ iroro nene eya rẹ ovwan yerin.” (1 Pita 3:7) Riẹn nẹ ọmọ na cha reyọ ọke rẹ aye wẹn mamọ. Oghwa kpokpọ vwọba iruo rẹ aye wẹn asaọkiephana, ọnana sa nẹrhẹ oma ghwọrọ yẹrẹ ofu sa tobọ dje. Ọkiọvo, ivun wẹn se miovwo, ẹkẹvuọvo wo jẹ ophu mu we-e, kidie “ohwo rọ fobọ muẹ ophu-u yovwin nọ ọgba.” (Isẹ 16:32) Vwo oniso rẹ ẹdia rọyen, wọ vwẹ ukẹcha rọ guọnọre vwọ kẹ.—Isẹ 14:29.

OBO WO SE RU:

• Ọsẹ: Vwẹ ukẹcha kẹ aye wẹn vwọ vwẹrote ọmọ na, tobọ vwẹ ason dede. Siobọ rẹ erọnvwọn evo re ghwọrọ ọke wẹn kpotọ, wọ sa vwọ mrẹ uphẹn vwọ vwẹrote aye wẹn vẹ ọmọ wẹn

• Oni: Siẹrẹ ọshare wẹn da guọnọ chọnwuko vwọ vwẹrote ọmọ na, rhiabọreyẹ ukẹcha rọyen. Ọ rha riẹn ru dede-e, wọ van kuo-o, vwẹ ẹwẹn kpotọ wo dje obo ro ru vwọ kẹ

OBO RI BAIBOL NA TARE: “Ayen ke dia oma ọvo.” (Jẹnẹsis 2:24) Dede nẹ, ohwo kpokpọ vwomaba uwevwin na asaọkiephana, je karophiyọ nẹ wẹ vẹ ọrivẹ wẹn “oma ọvo.” Davwẹngba wẹn eje wọ vwọ bọn oyerinkugbe ovwan gan.

Eya, ovwan dje ọdavwaro kpahen ukẹcha rẹ eshare ovwan vwọ phia. Uruemu re vwo dje ọdavwaro phia, pha kerẹ orọnvwọn ro “sivwẹ ohwo.” (Isẹ 12:18) Eshare, ovwan vuẹ eya ovwan obo rẹ ovwan vwo ẹguọnọ rayen te. Ovwan nabọ kpẹvwẹn ayen vwọkẹ ẹroevwote rẹ uwevwin na.—Isẹ 31:10, 28.

“E jẹ ohwo ọvuọvo guọnọ erhuvwu rẹ oma rọye-en, ẹkẹvuọvo erhuvwu rẹ ọrivẹ rọyen.” (1 Kọrẹnt 10:24) Vwẹ ọkieje vwo ru obo rọ vwerhen ọrivẹ wẹn oma. Ovwan tota kugbe, ovwan jiri ohwohwo je kerhọ rẹ ohwohwo. Ovwan sen ovwerhẹn kẹ ohwohwo-o. Roro kpahen ọdavwẹ rẹ ọrivẹ wẹn. Baibol na tare nẹ: “Wa vwẹ ovwerhẹ vwọrọn ohwohwo ahare-e jokpa nẹ ovwan rhọvwe kugbe.” (1 Kọrẹnt 7:3-5) Ovwan ihwo-ivẹ nabọ tota nana kugbe. Ovwan sa bọn oyerinkugbe rẹ ovwan gan womarẹ odirin vẹ erorokẹ.

OBO WO SE RU:

• Ovwan ihwo-ivẹ na ghwọrọ ọke kugbe

• Ru erọnvwọn ri djerephia nẹ wo vwo ẹguọnọ rẹ ọrivẹ wẹn, kerẹ udje wo se si ọmọbe vwo rhe yẹrẹ ruẹse kẹ

OBO RI BAIBOL NA TARE: “Nẹ ọke emọ wẹn rhe ọyen wọ vwọ riẹn ọbe ọfuanfon na rọ sa kẹ aghwanre vẹ esivwo.” (2 Timoti 3:15) Ovwan vwo ọrhuẹrẹphiyotọ rẹ obo ovwan che yono ọmọ na wan. Ovwan se yono ọmọ na vwo nẹ ọke rẹ ọmọ na je vwọ hẹ evun rẹ oni rọyen. Ọke rẹ ọmọ na je vwọ hẹ evun, o se vughe upho ovwan, ọ je sa riẹn nẹ oni na mwomaphiyọ yẹrẹ oma vwerhọn. Ovwan se ẹbe kẹ ọke rọ je vwọ hẹ ọmọboba. Ọ rha tobọ vwo ẹruọ rẹ obo ovwan se kẹ dede-e, ọnana sa vwẹ ukẹcha kẹ vwo vwo omavwerhovwẹn kpahen ẹbe-ese.

O toro obo rẹ ọmọ na hanvwe te-e, tota rẹ Ọghẹnẹ kẹ. Jẹ ọmọ na nyo we ọke wọ da nẹrhovwo rhe Jihova. (Urhi Rivẹ 11:19) Wọ da tobọ nene heha, tota kpahen erọnvwọn rẹ Ọghẹnẹ mare. (Une Rẹ Ejiro 78:3, 4) Ọmọ na vwọ ghwanran na, kọ cha mrẹ nẹ ovwan vwo ẹguọnọ ri Jihova, ko ji che vwo ẹguọnọ kpahọn.

OBO WO SE RU:

• Nẹrhovwo rhe Jihova nẹ ọ kẹ wẹ aghwanre wo vwo yono ọmọ wẹn

• Vwanriẹn eta evo vwọ kẹ, ọ vwọ fobọ riẹn ayen ọke rọ vwọ hẹ ọmọboba na