Jihova * Ọghẹnẹ yen vwẹ ọrhuẹrẹphiyotọ rẹ orọnvwe na vwo mu. Baibol na vuẹ avwanre nẹ ọ ma aye ẹsosuọ, “ọ da reyọ vwọ kẹ ọshare na.” Oma vwerhen Adam mamọ, ọ da ta nẹ: “Ọnana ubeku mẹ kugbe uvwo rẹ uvwo mẹ.” (Jẹnẹsis 2:22, 23) Jihova je guọnọ nẹ oma vwerhen ihwo re rọvwọnre.

Siẹrẹ wọ da rọvwọn nu, wo se roro nẹ erọnvwọn eje che shephiyọ abavo. Jẹ, vwọrẹ uyota, ọ da tobọ dianẹ ọshare vẹ aye vwo ẹguọnọ rẹ ohwohwo mamọ, ebẹnbẹn je cha kanre orọnvwe na-a. (1 Kọrẹnt 7:28) Vwevunrẹ ibroshọ nana, wọ cha mrẹ iji ri Baibol sansan re sa nẹrhẹ omavwerhovwẹn dia evunrẹ orọnvwe wẹn, siẹrẹ wọ da vwẹ ayen vwo ruiruo.—Une Rẹ Ejiro 19:8-11.

OBO RI BAIBOL NA TARE: Ọshare na yen ọgbuyovwin rẹ orua na.—Ẹfesọs 5:23.

Wọ da dia ọshare, Jihova guọnọre nẹ wọ vwẹrote aye wẹn mamọ. (1 Pita 3:7) Ọ ma aye na, ọ vwọ dia ọrivẹ wẹn, ọ je guọnọ nẹ wo dje ẹguọnọ vẹ ọghọ vwọ kẹ. (Jẹnẹsis 2:18) Ofori nẹ wo vwo ẹguọnọ rẹ aye wẹn mamọ, wo mi ji phi ọdavwẹ rọyen phiyẹ ẹdia ẹsosuọ.—Ẹfesọs 5:25-29.

Wọ da dia aye, Jihova guọnọre nẹ wọ nabọ muọghọ kẹ ọshare wẹn, wọ je vwẹ ukẹcha vwọ kẹ vwo mu oghwa ro te re. (1 Kọrẹnt 11:3; Ẹfesọs 5:33) Rhọnvwe phiyọ orhiẹnbro rọyen, wo ji nene wian kugbe ọkeneje. (Kọlose 3:18) Wo de ru ọtiọyen, Jihova che ni we ghanghanre, ọtiọyen ji te ọshare wẹn.—1 Pita 3:1-6.

OBO WO SE RU:

• Nọ ọshare wẹn yẹrẹ aye wẹn kpahen obo wo ru rere oma sa vwọ vwerhọn. Nabọ kerhọ, wọ wian kpahen obo rọ guọnọre na

• Vwo odirin. Ọ cha reyọ ọke ovwan ke sa riẹn obo ri je ohwohwo

OBO RI BAIBOL NA TARE: Guọnọ erhuvwu rẹ ọshare wẹn yẹrẹ aye wẹn. (Filipae 2:3, 4) Ni ọrivẹ wẹn ghanghanre, karophiyọ nẹ Jihova guọnọre nẹ idibo rọyen ‘nene ihwoneje yerin dẹndẹn.’ (2 Timoti 2:24) ‘Eta rẹ ẹkpa pha kerẹ adjara ro duvwẹ ohwo, ẹkẹvuọvo ẹrẹnvwe rẹ ọvwiroro sivwẹ ohwo.’ Ọtiọyena, nabọ roro tavwen wọ ke ta. (Isẹ 12:18) Ẹwẹn ọfuanfon ri Jihova cha chọnwuko vwọ tota esiri vẹ ẹguọnọ.—Galesha 5:22, 23; Kọlose 4:6.

OBO WO SE RU:

• Nẹrhovwo nẹ Jihova chọnwuko rere wọ sa vwẹ ẹwẹn kpotọ, ji rhievun vwo nene ọrivẹ wẹn tota

• Nabọ roro kpahen obo wọ guọnọ ta vẹ obo wọ cha ta wan

OBO RI BAIBOL NA TARE: Wọ da rọvwọn nu, wẹ vẹ ọrivẹ wẹn ke cha dia “oma ọvo.” (Matiu 19:5) Dede nẹ, ovwan vwo uruemu re fẹnẹ ohwohwo. Ọtiọyena, ofori nẹ ovwan ru obo ri se ku iroro ovwan kugbe vwọ dia ọvo. (Filipae 2:2) A guọnọ oyerinkugbe e ki se bru omamọ orhiẹn. Baibol na tare nẹ: “Iroro e vwo ru obo re gbare.” (Isẹ 20:18) E jẹ iji ri Baibol na chọn ovwan uko vwo ku evun kugbe bru omamọ orhiẹn.—Isẹ 8:32, 33.

OBO WO SE RU:

• Ta ọdavwẹ wẹn vwọ kẹ ọrivẹ wẹn, ọ diẹ takpẹ a tota-a

• Kemu kemu wọ guọnọ ru eje, nọ mie ọrivẹ wẹn tavwen wo ki ruo