Ọ sa dianẹ ovwan davwẹngba mamọ rere omavwerhovwẹn sa vwọ dia orọnvwe vẹ orua ovwan, dede na, erọnvwọn evo sa phia kpregede re sa nẹrhẹ ọ bẹn rẹ ovwan vwo vwo omavwerhovwẹn. (Aghwoghwo 9:11) Ọghẹnẹ vwẹ ukẹcha vwọ kẹ avwanre siẹrẹ avwanre de hirharoku ebẹnbẹn. Ovwan de ru nene eta ri Baibol na, ovwan se chirakon rẹ ebẹnbẹn na, o toro obo re gan te-e.

OBO RI BAIBOL NA TARE: “Vwẹ ẹnwan wẹn ejobi vwọ ya, kidie ọyen re vwẹ ẹro te we.” (1 Pita 5:7) Karophiyọ nẹ ọ diẹ Ọghẹnẹ yen so ebẹnbẹn wẹ-ẹn. (Jems 1:13) Wo de sikẹrẹ, ọ cha chọnwuko mamọ. (Aizaya 41:10) “Ku udu wẹn ejobi phihọ otọ vwẹ obaro rọyen.”—Une Rẹ Ejiro 62:8.

Siẹrẹ wo de se Baibol na ji yono kẹdẹ kẹdẹ, udu wẹn kọ cha gan. Ọke yena, kẹ wọ cha riẹn nẹ Jihova, ọyen Ọghẹnẹ “ro bru avwanre uche vwẹ evun rẹ ukpokpogho ejobi.” (2 Kọrẹnt 1:3, 4; Rom 15:4) O veri nẹ wo che vwo “ufuoma rẹ Ọghẹnẹ rọ nọ ẹruọ ejobi.”—Filipae 4:6, 7, 13.

OBO WO SE RU:

• Nẹrhovwo rhe Jihova nẹ ọ chọnwuko vwọ vwẹ ẹwẹn kpotọ, wo ji vwo iroro abavo

• Fuẹrẹn iroroẹjẹ na eje, wọ reyẹ ọ ro me yovwin

OBO RI BAIBOL NA TARE: “Udu rọ ọvwiroro ko vwo erianriẹn, erhọn rẹ ọvwẹghwanre guọnọ erianriẹn.” (Isẹ 18:15) Nabọ vwo ẹruọ rẹ eta na eje. Riẹn obo rẹ ihwo orua na eje guọnọre. Nene ayen tota. Kerhọ rẹ ayen.—Isẹ 20:5.

Kẹ ohwo wo vwo ẹguọnọ kpahen de ghwu vwo? Wọ sa viẹ. Karophiyọ nẹ ‘Jesu viẹre.’ (Jọn 11:35; Aghwoghwo 3:4) Ofori nẹ wo rovwonma, o ji fo nẹ wọ vwerhẹn. (Aghwoghwo 4:6) Ọnana cha nẹrhẹ wo se yerin ghene obẹnbẹn yena.

OBO WO SE RU:

• Vwo ẹkuruemu rẹ wẹ vẹ orua wẹn vwọ tota kuẹgbe kọke kọke, tavwen emu ọbrabra ke phia. Ọke yena, siẹrẹ emu ọbrabra da phia, kẹ ayen se nene uwe tota ghwologhwolo

• Tota kẹ ihwo ri ji hirharoku ẹdia nana jovwo re

OBO RI BAIBOL NA TARE: “Igbeyan vwo ẹguọnọ kpahen ohwo kọke kọke, ọ họhọ oniọvo rọ vwẹ ukẹcha vwọ kẹ ohwo vwẹ ọke rẹ ebẹnbẹn.” (Isẹ 17:17) Igbeyan wẹn sa guọnọ chọnwuko, ẹkẹvuọvo ọ sa dianẹ ayen ghwa riẹn obo rẹ ayen che ruo wa-an. Vuẹ ayen obo rẹ wọ guọnọre. (Isẹ 12:25) Guọnọ ukẹcha mie ihwo re riẹn Baibol na, wọ sa vwọ mrẹ ọbọngan. Uchebro ri Baibol rẹ ayen cha vwọ kẹ wẹ sa chọnwuko.—Jems 5:14.

Wọ cha mrẹ ọbọngan siẹrẹ wo de kuomakugbe ihwo ri se Ọghẹnẹ gbuyota, re je vwẹroso ive rọyen. Wọ je cha mrẹ uduephiophiyawọ siẹrẹ wọ da vwẹ ukẹcha vwọ kẹ ihwo re guọnọ uchebro. Vuẹ ayen kpahen esegbuyota wo vwori kpahen Jihova kugbe ive rọyen. Ghwọrọ ọke vwọ chọn ihwoefa uko, wo sioma nẹ uvwre rẹ ihwo ri vwo ẹguọnọ wẹ-ẹn.—Isẹ 18:1; 1 Kọrẹnt 15:58.

OBO WO SE RU:

• Tota kẹ ugbeyan rọ kẹrẹ owẹ rere ọ chọnwuko

• Rhievun kẹ, wọ vuẹ ọdavwẹ wẹn