Orọnvwe nẹrhẹ ohwo vwo orua kpokpọ. Dede nẹ ofori wo vwo dje ẹguọnọ vẹ ọghọ kẹ ọsẹ vẹ oni wẹn ọkeneje, jẹ ohwo rọ ma ghanre kẹ wẹ vwẹ akpọ na asaọkiephana, ọyen ohwo ru wọ rọvwọnre. Ọ sa bẹn vwọ kẹ ihwo rẹ orua wẹn evo rẹ ayen vwọ mrẹ ọnana vughe. Ẹkẹvuọvo, iji ri Baibol na sa chọnwuko vwo ru erọnvwọn vwẹ idjerhe abavo, rere wẹ vẹ ihwo rẹ orua wẹn se vwo yerin kugbe, wọ me je bọn oyerinkugbe wẹn vẹ ọrivẹ wẹn gan.

OBO RI BAIBOL NA TARE: “Mu ọghọ kẹ ọsẹ wẹn vẹ oni wẹn.” (Ẹfesọs 6:2) Otoro obo wọ ghwanre te re-e, ofori nẹ wo muọghọ kẹ ọsẹ vẹ oni wẹn ọkeneje. Karophiyọ nẹ, o ji fo nẹ ọrivẹ wẹn vwẹrote ọsẹ vẹ oni rọyen. “Ẹguọnọ rioma-a,” ọtiọyena wọ rioma kpahen oyerinkugbe rẹ ọrivẹ wẹn vẹ orua rọye-en.—1 Kọrẹnt 13:4; Galesha 5:26.

OBO WO SE RU:

• Kẹnoma kẹ eta re gbaegbae kerẹ, “ọkeneje yen ihwo wẹn vwọ phọphọ ovwẹ” yẹrẹ “o vwo emu vuọvo mi ruẹ ro je oni wẹn kakaka-a”

• Phioma wẹn phiyọ ẹdia rẹ ọrivẹ wẹn

OBO RI BAIBOL NA TARE: “Ọshare [kọ] yan jẹ ọsẹ rọyen vẹ oni rọyen vwo kọ rhe gbanọ aye rọyen, ayen ke dia oma ọvo.” (Jẹnẹsis 2:24) Wọ da tobọ rọvwọn nu, ọsẹ vẹ oni wẹn ji se roro nẹ o ji fo nẹ ayen vwẹrote we, ọtiọyena, ayen se phioma phiyẹ orọnvwe wẹn vwọ vrẹ obo ro fori.

Wẹ vẹ ọrivẹ wẹn yin che brorhiẹn rẹ ẹdia ro fori nẹ ayen ru te, ovwan me je vuẹ ayen vwẹ idjerhe rẹ ẹguọnọ. Ovwan sa ta ẹwẹn ovwan kẹ ayen, jẹ ọ diẹ ọrẹ aroeyivwo-o. (Isẹ 15:1) Omaevwokpotọ, ufuefu kugbe odirin cha chọnwuko vwo nene ihwo orua wẹn yerin kugbe, rẹ ovwan vwo “chirakon rẹ ohwohwo vwẹ evun rẹ ẹguọnọ.”—Ẹfesọs 4:2.

OBO WO SE RU:

• Ọ da dianẹ obo rẹ ihwo orua wẹn phioma phiyẹ orọnvwe ovwan ghwe je we-e, gba vuẹ ọrivẹ wẹn kpahọn vwẹ ọke ro fori

• Ovwan ihwo-ivẹ na jiroro kpahen obo ovwan che ruo wan