Ọmọ rẹ Isikuru Ọvo Hirharoku Ẹdia Ọgangan
Udu bru Peter enẹna fikirẹ uyovwinrota rẹ oyono rọyen vwọphia na. Oyono rọyen rọ dia aye ro muọghọ kẹ, ghwe djunute oborẹ Charles Darwin vwọ reyọ uyono rẹ erọnvwọn mamarhe rẹ egbaerianriẹn titẹ vwo si ihwo nẹ ẹdia ọviẹn vwọ kẹ iyono efian rẹ ihworakpọ. Asaọkiephana, oyono na nọ ayen oborẹ ayen riẹn kpahen uyovwinrota nana.
Peter vwo orhiẹn ọgangan ro che bru. Ọsẹ vẹ oni rọyen yoniro nẹ Ọghẹnẹ yen ma akpọ na kugbe arhọ rehẹ evun rọyen. Ayen tare nẹ ofori nẹ a vwẹroso ikuegbe ri Baibol na ro shekpahen emama. Ẹkẹvuọvo, uyono rẹ erọnvwọn mamarhe ọyen eta ghevweghe, o vwo obo re muro kpahe-en. Obo ri me yovwin yen oyono ri Peter vẹ emiọvwọn rọyen guọnọ vwọ kẹ. Ẹkẹvuọvo, uyono vọ yen Peter che segbuyota?
Kukpe kukpe yen ẹdia tiọyena vwọ vwomaphia vwẹ isikuru buebun vwẹ akpọneje. Die yen ofori nẹ Peter kugbe emọ efa ri kpo isikuru ru? O rhe fo nẹ ayen fuẹrẹn iyono na fiotọ ji brorhiẹn romobọ tavwen ayen ki se obo re yono ayen na gbuyota? Ofori nẹ ayen fuẹrẹn obo re mu uyono rẹ erọnvwọn mamarhe vẹ ọ rẹ emama na kpahen rere ayen brorhiẹn rẹ oborẹ ayen che segbuyota.
Vwọrẹ uyota, Baibol na vuẹ avwanre nẹ e brokpakpa se kuyono kuyono gbuyota-a. Ohwo ọvo ro si ẹbẹre evo ri Baibol na da ta: “Ogbori se kemu kemu ejobi gbuyota, ẹkẹvuọvo ohwo ro vwo iroro obọ rọ ra ọye o nẹ.” (Isẹ 14:15) Baibol na vwẹ uchebro kẹ Inenikristi nẹ ayen reyọ ẹgba rẹ iroro rayen vwọ fuẹrẹn obo re yono fiotọ.—Rom 12:1, 2.
Ọ dia e ru ibroshọ nana rere o vwo bicha ẹgbaẹdavwọn rẹ ihwo ẹga evo vwo yono ihwo kpahen emama vwẹ isikuru-u. Ọdavwẹ rẹ ibroshọ nana ọyen a vwọ fuẹrẹn iyono iyorin rẹ ihwo vwọ tanẹ arhọ vwomaphia siẹvuọvo, kugbe uyono rọ tare nẹ ikuegbe rẹ emama rehẹ Baibol na esia.
A cha tẹnrovi ikẹn na kidie etiyin yen arhọ nurhe. Wọ cha mrẹ oborẹ ikẹn rehẹ ugboma na vwomaphia wan. A je cha vuẹ wẹ nẹ wọ fuẹrẹn iroro rẹ oboresorọ ihwo vwo bicha uyono rẹ erọnvwọn mamarhe na.
O rhe che kri-i, buebun avwanre cha kpahenphiyọ onọ nana, A ma arhọ, gbanẹ ọ mamarhe? O muẹro nẹ wọ nabọ roro kpahen uyovwinrota na re. Vwẹ ibroshọ nana, a cha fuẹrẹn erọnvwọn evo re nẹrhẹ ihwo buebun vwo imuẹro nẹ a ma arhọ.
