ONỌ 5
Ọhọ Herọ re Vwo Se Oborẹ Baibol na Tare Gbuyota?
A ta orharhe rẹ ota kpahen ohwo ọfa kẹ wẹ re? Ọkiọvo, wo nyo ihwo efa re ta ota kpahọn. Iruemu rẹ ohwo na rhe je we-e, re te ọke wọ vwọ mrẹvughe nẹ efian yen e gun nyẹ. Ihwo buebun vwo oka rẹ ẹwẹn tiọyen kpahen Baibol na.
Imihwo vwẹ usun rẹ ihwo ri yono ọbe kodo yen vwẹ ẹro ọghanghanre vwo ni Baibol na. Wọ riẹn oboresorọ? Eta rẹ ayen ta kpahen Baibol na vẹ oborẹ ayen reyọ vwo ruiruo wan nẹrhẹ ọ họhọ ọbe rẹ ọhọ hepha-a, rọ rhọnvwephiyọ iyono ri isayẹnsi-i, yẹrẹ rọ chọre. Kẹ, a sa tanẹ a vwẹ ẹro ọchọchọ vwo ni Baibol na re?
Wo vwo se ibroshọ nana, o gbewunu wọ vwọ mrẹvughe nẹ oborẹ Baibol na tare rhọnvwephiyọ iyono rẹ isayẹnsi? O ghini gbe ihwo buebun unu. O ji gbe ayen unu rẹ ayen vwo yono nẹ evo usun rẹ oborẹ ẹga buebun tare nẹ Baibol na yonori ọyen efian. Kerẹ udje, ihwo evo tare nẹ Baibol na yonori nẹ Ọghẹnẹ ma akpọ vẹ odjuvwu kugbe arhọ eje rehẹ evun rọyen vwẹ ẹdẹ esan ro vwo unọke 24 vwẹ ẹdẹ ọvuọvo. Vwọrẹ uyota, o vwo orọnvwọn vuọvo vwẹ Baibol na rọ fẹnẹ oborẹ egbaerianriẹn ta kpahen uchọke rẹ akpọ vẹ odjuvwu vwọ herọ re-e. a
Vwọba, oborẹ Baibol na ta kpahen oborẹ Ọghẹnẹ wan ma arhọ phiyọ otọrakpọ na nẹrhẹ egbaerianriẹn se ru ehiahiẹ. Baibol na tare nẹ Ọghẹnẹ yen ma arhọ eje, ọ je tanẹ a ma erọnvwọn ri vwo arhọ eje “dohwo doka rọyen.” (Jẹnẹsis 1:11, 21, 24) Ota nana sa vwọso iyono rẹ isayẹnsi evo, ẹkẹvuọvo e rhọnvwephiyọ iyono rẹ isayẹnsi ri muẹro. Ikuegbe rẹ isayẹnsi djerephia nẹ iyono kpokpọ sa rhe je yanran; ẹkẹvuọvo i ri muẹro na yen dia.
Dedena, ihwo buebun herọ re guọnọ fuẹrẹn oborẹ Baibol na tare-e kidie iyono rẹ ẹga ku ayen phiyotọ re. Ayen de ni ẹga ro vwo ọrhuẹrẹphiyotọ, oborẹ ayen mrẹ kẹ ihwo re vwọrọ efian, i ri phi iwayo vẹ i ri mu ihwo vwo phi ofovwin. Kẹ, ofori nẹ a reyọ iruemu rẹ ihwo evo re tanẹ ayen yan nene Baibol na vwo brorhiẹn hwe Baibol na? Ivun miovwo ihwo buebun ji te egbaerianriẹn kpahen oborẹ inogbozighi evo vwọ reyọ uyono rẹ erọnvwọn mamarhe vwo titi ọdavwẹ romobọ rayen. O che yovwin a da vwẹ emu tiọyen vwo brorhiẹn hwe uyono rẹ erọnvwọn mamarhe na? O ghini fo nẹ a fuẹrẹn iyono na je vwọ vwanvwe obo ra mrẹre ri muẹro.
Avwanre jiriro kẹ ovwan nẹ we ji ru ọtiọyen kpahen Baibol na. O che gbewunu wọ vwọ mrẹvughe nẹ iyono rọyen fẹnẹ oborẹ ẹga buebun ri titiri yono. Vwọ fẹnẹ etito rẹ ifovwin vẹ ozighi re gbe fikirẹ ẹkuotọ re nurhe, Baibol na yonori nẹ idibo rẹ Ọghẹnẹ kẹnoma kẹ ofovwin vẹ utuoma rọ so ozighi tiọyena. (Aizaya 2:2-4; Matiu 5:43, 44; 26:52) Ukperẹ o vwo titi iyono ri vwo otọ-ọ, Baibol na tare nẹ obo re rhiẹromrẹ ghanre e ki se vwo uvi rẹ esegbuyota; ẹgba iroro je ghanre vwẹ ẹga rẹ Ọghẹnẹ. (Rom 12:1; Hibru 11:1) Ukperẹ ọ vwọ reyọ vwọso ẹwẹn ivivẹ, Baibol na jiriro kẹ avwanre nẹ a guọnọ otọ rẹ enọ egangan ri me je avwanre rẹ ihworakpọ nọre.
Kerẹ udje, wo roro kpahen onọ nana jovwo re, ‘Ọghẹnẹ da herọ, diesorọ ọ vwọ vwẹ uphẹn kẹ ojaẹriọ?’ Baibol na kpahenphiyọ onọ yena, eriyin ji te enọ efa vwẹ idjerhe ro che te avwanre ẹwẹn. b E jiriro nẹ ovwan guọnọ uyota na. Wọ sa mrẹ ẹkpahọnphiyọ rọ cha vwerhen owẹ oma, ro che je we, rẹ ọhọ hepha, re ji mu kpahen obo ri muẹro. Ẹkpahọnphiyọ na ghini herọ.
a Wọ da guọnọ evuẹ efa, ni ibroshọ na Was Life Created? rẹ Iseri ri Jihova teyenphia.
b Ni uyovwinrota 11 rẹ ọbe na What Does the Bible Really Teach? rẹ Iseri ri Jihova teyenphia.
Wọ je sa Fuẹrẹn
Ẹkpahọnphiyọ rẹ Enọ rẹ Baibol Na
Isayẹnsi Rhọvwenphiyọ Oborẹ Baibol na Tare?
O vwo asan ri Baibol na de shechọ vwẹ eta rẹ isayẹnsi?
