ỌGHẸNẸ ma emekashe buebun ọke grongron tavwen ọ ke ma ohworakpọ. Vwẹ ogba rẹ Idẹn, orharhe rẹ amakashe ọvo, ra rhe riẹn phiyọ Idẹbono yẹrẹ Eshu na, da riẹriẹ Ivi vwọ re omamọ rẹ Ọghẹnẹ vuẹ ayen nẹ ayen ria-a.

Womarẹ ọrọdekọ, Eshu da tanẹ, Ọghẹnẹ si erọnvwọn iyoyovwin nu vwọ kẹ aye na vẹ ọshare rọyen. Amakashe na vuẹ Ivi nẹ, ayen da re omamọ na, ayen che ghwu-u. Ota rẹ Eshu na mudiaphiyọ nẹ Ọghẹnẹ gun efian kẹ ihworakpọ. Eshu de ruo rọvwọ họhọ nẹ, revwo jẹ upho rẹ Ọghẹnẹ enyo sa nẹrhẹ ohwo vwo erianriẹn kugbe ọmuvwiẹ. Ẹkẹvuọvo, ọyena ofian, vwọrẹ uyota ọnana yen ofian rẹsosuọ re tu gun vwẹ otọrakpọ na. Ota rọhẹ otọ na shekpahen Usuon rẹ Ọghẹnẹ, sẹ o fo ohwo ro se sun, sẹ o se sun vwẹ idjerhe ro shephiyọ, kugbe idjerhe rọ sa ghwa erere rhẹ ihworakpọ.

Ivi de se Eshu gbuyota. Urhuru rẹ omamọ na de sio, ọ da riọ. Ọ da je kẹ ọshare rọyen, ọshare na da je riọ. Ọtiọyena kẹ ayen rhe dia irumwemwu. Ọyen uruemu rẹ egbevwọsuọ dẹn. Kidie nẹ, ayen vwẹ arogba vwọ churhi Ọghẹnẹ, Adam vẹ Ivi da sen usuon rẹ Ohwo rọ ma ayen, rọ je kẹ ayen kemu kemu rẹ ayen vwori, kugbe arhọ ọgbagba.

Ọghẹnẹ de brorhiẹn hwe ayen. Ọ da vwẹ aroẹmrẹ phia kpahen Ọmọ yẹrẹ Osivwin re veri na, rọ dia ohwo rọ cha ghwọrọ Eshu rọ tota womarẹ ọrọdekọ na. Ọghẹnẹ dje arodọnvwẹ kẹ emọ rayen, kọyen sorọ o rhe hwe Adam vẹ Ivi ugege yena-a. Emọ rẹ ayen che vwiẹ na che vwo iphiẹrophiyọ kidie Ohwo rẹ Ọghẹnẹ che ji rhe na, che si umiovwo rẹ ayen soro vwẹ ogba rẹ Idẹn no. Oborẹ ọhọre rẹ Ọghẹnẹ kpahen Osivwin yena che rugba wan vẹ ohwo rọ cha dia Osivwin na, e djerephia rẹ isiesi ri Baibol na vwọ yan obaro na.

Ọghẹnẹ da djẹ Adam vẹ Ivi nẹ Iparadaisi na. Kọ riọja tavwen ọ ke mrẹ emu re vwẹ otafe rẹ ogba rẹ Idẹn na. Ivi da rhe mrevun, o de vwiẹ Ken, ọmọkpako rayen. Adam vẹ Ivi ji vwiẹ emeshare vẹ emetẹ efa, evo usun rayen yen, Ebẹl vẹ Sẹt rọ dia ọsẹ rode ri Noa.

​—E muro kpahen Jẹnẹsis uyovwin 3 re te 5; Ẹvwọphia 12:9.