OMARẸ ẹgbukpe 350 wanre rẹ Oghwe rẹ ọke ri Noa vwo ku. Ebraham dia orere rẹ Ur rọ pha yoyovwin, rọhẹ ẹkuotọ re se Iraq nonẹna. Ebraham vwo esegbuyota rẹ oghẹresan. Asaọkiephana, o de rhi hirharoku ọdavwini ọvo.

Jihova vuẹ Ebraham nẹ o vrẹn nẹ orere re de vwiẹ na kpo orere ọrhorha, re se Kenan. Ebraham nyupho rẹ Ọghẹnẹ. Ọ da reyọ aye rọyen Sera, ọmọ-oniọvo rọyen Lọt kugbe idibo rọyen ejobi vwo kpo Kenan, utughẹ kọyen ọ dia. Vwẹ ọphọ rẹ Jihova vẹ Ebraham rere, o ve kẹ nẹ o che ruo phiyọ ẹgborho rode, womarẹ Ebraham kọyen ihworakpọ na ejobi cha vwọ mrẹ ebruphiyọ, uvwiẹ rọyen ke cha vwẹ otọ rẹ Kenan vwọ riuku.

Akpọ de rhi yovwẹn Ebraham vẹ Lọt, ayen de vwo uchuru buebun. Ebraham da vwẹ uphẹn kẹ Lọt nẹ ọ jẹ ubrotọ ro jere. Lọt da jẹ ubrotọ oyoyovwin rẹ Urhie ri Jọdan, ọ da kua kpo asan rọ kẹrẹ orere ri Sodọm. Ẹkẹvuọvo ihwo ri Sodọm evwọfanrhiẹn ride, ri ruẹ umwemwu vwọso Jihova.

Ọke vwọ yanran na, Jihova Ọghẹnẹ de ve kẹ Ebraham nẹ emọ rọyen cha dia buebun kerẹ isio rẹ odjuvwu na. Ebraham vwo esegbuyota kpahen uve na. Dedena, Sera rọ dia aye ro vwo ẹguọnọ kpahen na, ji rhi vwiẹ-ẹ. Ọke rẹ Ebraham vwo te ẹgbukpe 99, jẹ aye rọyen siẹkẹrẹ ẹgbukpe 90 re, Ọghẹnẹ da vuẹ Ebraham nẹ ayen che vwiẹ ọmọshare. Kirobo Ọghẹnẹ tare, Sera de vwiẹ Aizik. Ebraham ji vwiẹ emọ efa, ẹkẹvuọvo womarẹ Aizik ọyen Osivwin re vuve rọyen vwẹ Idẹn na che nurhe.

Asaọkiephana, Lọt vẹ orua rọyen dia Sodọm, ẹkẹvuọvo Lọt vwẹrokere uruemu ọfanrhiẹn rẹ ihwo orere na ruẹ-ẹ. Ọke ri Jihova vwo brorhiẹn nẹ ọ cha ghwọrọ Sodọm, o de ji emekashe nẹ ayen ra kẹ Lọt orhọ-esio kpahen oghwọrọ rọ cha na. Emekashe na da vuẹ Lọt vẹ orua rọyen nẹ ayen brokpakpa djẹ nẹ Sodọm, ayen ji nẹ obuko-o. Ọghẹnẹ da vwẹ osio rẹ ibieragha vẹ erhanre vwọ ghwọrọ ihwo re dia orere ri Sodọm vẹ Gomora. Lọt vẹ emetẹ rọyen ivẹ yen sivwinrhọ. Ẹkẹvuọvo aye ri Lọt ni obuko, ọ sa dianẹ o vwo urhurusivwe kpahen ekuakua rọ yan jovwo. Kidie nẹ o nyẹme-e, o de ghwu.

​—E muro kpahen Jẹnẹsis 11:10–19:38.