PỌL ghwe vwo kurhẹriẹ nu, ọ da ton iruo aghwoghwo na phiyọ vẹ oruru ọgangan ro vwo ghwoghwo kpahen Uvie Ọghẹnẹ, ọnana da nẹrhẹ o hirharoku omukpahen ọgangan kirobo ro ruẹ kẹ ihwo efa jovwo. Jẹ o sioma uko-o, ọ yan iroko buebun ro vwo ghwoghwo iyẹnrẹn esiri rẹ Uvie na, rẹ Ọghẹnẹ che vwo ru orugba rẹ ọhọre rọyen vwọ kẹ ihworakpọ na.

Vwẹ oyan ẹsosuọ rọyen, Pọl de sivwin ọshare ọvo re vwiẹre kerẹ ukpono vwẹ Listra. Ihwo rẹ orere na ki se Pọl vẹ ọrivẹ rọyen Banabas nẹ ayen eghẹnẹ. Ihwo na ke guọnọ ze izobo kẹ ayen, ẹkẹvuọvo ọ bẹn kẹ Pọl vẹ Banabas rẹ ayen vwọ dobọ rẹ ihwo na ji. Jẹ, vwo nene oborẹ ivwighrẹn ri Pọl vuẹ ayen, ihwo nana vuọvo na de phi Pọl te ẹdia rẹ ughwu. Pọl ghwuru-u, ọ tobọ rhoma rhivwin kpo orere na ra bọn iniọvo na gan.

Inene-ri-Kristi ri Ju evo tare nẹ Inene-ri-Kristi rẹ ẹkuotọ efa yọnrọn evo usun rẹ Urhi ri Mosis na. Pọl de mu ota na vwo rhe iyinkọn na vẹ ekpako rehẹ Jerusalẹm. Ọke rẹ ayen vwọ fuẹrẹn ota nana womarẹ Isiẹsi Ọfuanfon na vẹ ukẹcha rẹ ẹwẹn ọfuanfon na, ayen de si rhe ikoko na nẹ ayen kẹnoma kẹ edjọẹgọ, ẹriọ rẹ ọbara vẹ eranvwe ro churughwu kugbe ọfanrhiẹn. “Imu nana” pha eghanghanre, ẹkẹvuọvo ọ diẹ o mudiaphiyọ nẹ ohwo ro ruẹ ayen yan nene Urhi ri Mosis na-a.—Iruo Rẹ Iyinkọn Na 15:28, 29.

Vwẹ oyan rivẹ rọyen, Pọl de kpo Biria, ra riẹn phiyọ Greece nonẹna. Ihwo ri Ju re dia oboyin nabọ rhiabọreyọ ota na, ayen da fuẹrẹn Isiesi Ọfuanfon na kẹdẹ kẹdẹ sẹ uyono rọyen ghini uyota. Abọ ọfa, Pọl de nẹ orere yena kpo Atẹns fikirẹ omukpahen. Pọl da tota rọ vọnre vẹ ẹgba vwẹ irharo rẹ egbaerianriẹn ride rehẹ Atẹns, rọ dia udje rẹ obo ra savwọ tota vẹ aghẹnghẹn, oniso, kugbe imuẹro.

Ro vwo nẹ oyan rerha rọyen rhe nu, Pọl de kpo Jerusalẹm. Ro vwo te uwevwin ẹga na, ihwo ri Ju evo da ton ozighi-egbe phiyọ kidie ayen guọnọ hwe Pọl. Isodje ri Rom de gbowọphiyọ, ayen de muo phiyọ ogba. Rọ vwọ dia ọmotọ ri Rom na, Pọl de gun ẹkẹn unu rọyen vwẹ obaro rẹ Osun ri Rom re se Fẹliks. Ihwo ri Ju na sa mrẹ emu vuọvo vwọ yọnrọ-ọn. Pọl guọnọre nẹ Osun ri Rom ọfa phi ọyen phiyọ abọ rẹ ihwo ri Ju-u, ọtiọyena ọ da ta: “Mi mu ẹdjọ mẹ rhe Siza,” Fẹstọs da kpahen kẹ nẹ: “Obo ri Siza kọye wọ cha ra.”—Iruo Rẹ Iyinkọn Na 25:11, 12.

A da vwẹ okọ vwo mu Pọl kpo aguare rọhẹ Itali. Ayen vwọ yanran, okọ na de shu, ayen da dia ubrotọ re se Mọlta vwẹ ọke rẹ ekpahen yena. Ayen vwo te Rom, ọ da dia etiyin ẹgbukpe ivẹ. Dede nẹ isodje rhẹrẹ ọkieje, o ji fiudugberi ruiruo rẹ aghwoghwo na vẹ oruru ro vwo ghwoghwo Uvie Ọghẹnẹ vwọ kẹ kohwo kohwo rọ kọn bro rhe.

​—E muro kpahen ọbe rẹ Iruo Rẹ Iyinkọn Na 11:22–28:31.