ỌGHẸNẸ vwẹ ẹgba vwọ kẹ Jesu vwo ru erọnvwọn rẹ ihworakpọ che se ru-u. Jesu ru emu igbevwunu buebun, ọke buebun o ruo vwẹ irharo rẹ ihwo buebun. Igbevwunu nana djerephia nẹ Jesu vwo ẹgba ro vwo phi oba phiyọ ebẹnbẹn rẹ ihworakpọ se si no-o. Roro kpahen idje evo.

Jesu kẹ ihwo omamọ emu vẹ udi. Igbunu rẹsosuọ rẹ Jesu ke ru, ọyen o vwo wene ame phiyọ omamọ udi. Vwẹ abọ ivẹ ọfa, ọ da vwẹ ikara vẹ erin tutuno vwọ ghẹrẹ otu gbidi gbidi. Vwẹ ẹdia ivẹ nana ihwo na mrẹ emu buebun re, o de ji chekọ dede.

Jesu sivwin ega. Jesu sivwin ihwo ri vwo “dohwo doghẹre rẹ emiavwe rọye.” (Matiu 4:23) O sivwin irhuẹro, idin, ehọnvwoti, ihwo ri she ewẹnwẹn, ikpono, tobọ te ihwo ri krun abọ vẹ awọ. O vwo ọga vuọvo rọ bẹnrẹ e sivwo-on.

Jesu fuen ọgbọghọ rẹ abadi. Ọke rẹ Jesu vẹ idibo rọyen vwọ hẹ okọ vwẹ Urhie rẹ Galili, siẹvuọvo na odju rode da tonphiyọ. Oshọ ko mu idibo na. Jesu vwo ni ọgbọghọ na, ọ da tanẹ: “Fọ, wọ dia riei. Aphopho na da fọ, ẹfọ ri riei rode da rhe.” (Mak 4:37-39) Vwẹ ọke ọfa, ọ yan vwẹ enu ame na vwẹ ọke rẹ ọgbọghọ rode je vwọ herọ.—Matiu 14:24-33.

Emekashe rẹ idẹbono. Emekashe nana vwo ẹgba nọ avwanre shesheri. Ihwo buebun se sioma rayen nẹ abọ rẹ emekashe nana re dia evweghrẹn rẹ Ọghẹnẹ na-a. Jẹ ọke buebun Jesu da djẹ ayen nẹ oma rẹ ihwo, ayen rhe se sun ihwo na ọfa-a. Jesu djoshọ raye-en. Ukperẹ ọtiọyen, oshọ ri Jesu yen mu ayen kidie ayen riẹn ogangan ro rhere.

Ughwu. Kirobo rọ hepha dẹn, ughwu ọyen “ọvweghrẹ rọ ka uko,” rẹ ohworakpọ se phi kparobọ-ọ. (1 Kọrẹnt 15:26) Ẹkẹvuọvo, Jesu rhọvwọn ihwo ri ghwuru kerẹ ọmọshare rẹ ayeuku na vẹ ọmọtẹ ro ghwu jẹ ọsẹ vẹ oni rọyen vwo. Vwẹ ọke ọfa, Jesu rhọvwọn ugbeyan ọghanghanre rọyen Lazarọs nẹ ushi vwẹ irharo rẹ ihwo buebun ri vwere uvweri, dede nẹ ọshare nana ghwuru ẹdẹ ẹne re! Ivwighrẹn ri Jesu dede tobọ vwo ọmrẹvughe rẹ igbevwunu nana.—Jọn 11:38-48; 12:9-11.

Diesorọ Jesu vwo ru igbevwunu nana eje? Ihwo rọ rhọvwọnre na je rhoma ghwu? E, ẹkẹvuọvo, igbevwunu rẹ Jesu ruru na, ghwa erere rhe. E nẹrhẹ avwanre vwo imuẹro nẹ aroẹmrẹ na eje ri shekpahen Usuon ri Mesaya na che rugba. Ofori nẹ e vwo ẹwẹn ivivẹ kpahen Ovie rẹ Ọghẹnẹ vwo mu na-a, kidie a riẹnre ne o se si owẹnvwe, ọga, imuoshọ kerẹ e rẹ ọgbọghọ abadi, emekashe rẹ Idẹbono, yẹrẹ ughwu komobọ, vwo no. O djerephia nẹ Ọghẹnẹ kẹrẹ ẹgba ro vwo ru erọnvwọn tiọyena.

​—E muro kpahen ẹbe rẹ Matiu, Mak, Luk, vẹ Jọn.