VWẸ enu rẹ Ugbenu rẹ Oliv, a sa mrẹ erhuvwu ri Jerusalẹm vẹ uwevwin rẹ ẹga na, vwẹ etiyin iyinkọn ri Jesu ẹne de bro rhe rẹ ayen vwọ nọ kpahen obo rọ tare jovwo. Jesu tare nẹ a cha ghwọrọ uwevwin rẹ ẹga rọhẹ Jerusalẹm na. Ọ je vuẹ ayen kpahen “oba rẹ akpọ na.” (Matiu 13:40, 49) Ọtiọyena, iyinkọn na ke nọrọ nẹ: “Kọrhọ re cha dia oka rẹ ẹcha rẹ ọmọ rẹ ohwo, kugbe oba rẹ akpọ na?”​—Matiu 24:3.

Jesu da vuẹ ayen kpahen erọnvwọn re cha phia tavwen a ke ghwọrọ Jerusalẹm. Ẹkẹvuọvo, eta rọyen na je rionbọ kpo ọke rọ cha obaro na. Aroẹmrẹ rọyen na ji che djobọte akpọneje. Oka rẹ Jesu mraro kpahen na churobọ si erọnvwọn re cha phia vẹ oborẹ akpọ na cha dia vwẹ ọke yena. Oka yena cha nẹrhẹ ihwo rehẹ otọrakpọ na riẹn nẹ, Jesu rhire kerẹ Ovie vwẹ odjuvwu. Kọyen oka na che djephia nẹ Jihova Ọghẹnẹ vwẹ Jesu mu Ovie rẹ Usuon ri Mesaya na re. O ji che mudiaphiyọ nẹ Uvie na che si orukuruku no kẹrẹkpẹ, ọ me rha hwarhiẹ ufuoma vwọ kẹ ihworakpọ. Erọnvwọn ri Jesu mraro rọyen na yen a cha vwọ riẹn nẹ avwanre hẹ ọke oba na re, kugbe oka ravwọ riẹn nẹ akpọ kpokpọ na sikẹre re.

Jesu djunute erọnvwọn re cha phia vwẹ akpọ na ọke rọ da ton usuon phiyọ nu vwẹ obo odjuvwu, erọnvwọn kerẹ ifovwin, owẹnvwe, etọ re cha bẹre, vẹ ega sansan. Ihwo rha cha yọnrọn urhi-i. Idibo ri Jesu che ghwoghwo iyẹnrẹn esiri rẹ Uvie Ọghẹnẹ vwẹ akpọneje. Enana eje che kuphiyọ vwevunrẹ “ukpokpogho” rode ra je mrẹ oghẹre rọyen dẹvo-o na.​—Matiu 24:21.

Mavọ yen idibo na cha vwọ riẹn nẹ ukpokpogho na siẹkẹrẹ re? Jesu da tanẹ, “Ovwan gba karohọ rẹ itẹ rẹ owe na.” (Matiu 24:32) Eghọn rẹ urhe owe na da djẹ ẹbe re, kọyen ọke rẹ uvo tere. Vwẹ idjerhe vuọvo na, erọnvwọn na eje ri Jesu tare na da phia vwẹ uvwre rẹ ọke vuọvo, ayen gba riẹn nẹ ọke oba na sikẹrẹ re. Ọsẹ na ọvo yen riẹn ẹdẹ vẹ unọke rẹ ukpokpogho rode na cha vwọ tonphiyọ. Ọtiọyena, Jesu da vuẹ idibo rọyen: Ovwan “rhẹrẹ ra nẹ ẹrhovwo: kidie ovwan riẹn ọke ro vwo te-e.”—Mak 13:33.

​—E muro kpahen ẹbe rẹ Matiu uyovwin 24 vẹ 25; Mak uyovwin 13; Luk uyovwin 21.