JIHOVA cha chọn ihwo uko vwo vughe Mesaya na? E. Roro kpahen oborẹ Ọghẹnẹ ruru. E si ẹbẹre ri Baibol ra vwẹ Hibru vwo si na nure. Omarẹ ẹgbukpe ujorin ẹne vwọ wan nu, ọrhorha ọvo de won Meri vwevunrẹ orere re se Nazarẹt rọhẹ ubrakpọ ri Galili. Amakashe ọvo re se Gabrẹl yen vwomaphia kẹ, ọ da vuẹ nẹ, womarẹ ẹwẹn ọfuanfon rẹ Ọghẹnẹ ọ cha mrevun, ji vwiẹ, dede nẹ ọmọtobẹ ọyen o ruẹ. Ọmọ nana yen Ovie re vuve rọyen phiyotọ na, ọ ro che sun bẹdẹ na! Ọghẹnẹ che wene arhọ rẹ ọmọ na phiyọ evun rẹ Meri, ọtiọyena, ọnana cha dia Ọmọ Ọghẹnẹ dẹn.

Vwọrẹ omaevwokpotọ, Meri rhiabọreyọ owian ọghanghanre nana. Ọkarirhe ọvo re se Josẹf rọ kọn phiyọ jovwo, da rọvwọn ọke rẹ amakashe rẹ Ọghẹnẹ vwọ vuẹ nẹ Ọghẹnẹ yen wene arhọ rẹ Ọmọ ri Meri muru na, phiyọ evun rọyen. Kẹ aroẹmrẹ rọ tare nẹ e che vwiẹ Mesaya na vwẹ Bẹtlẹhẹm vwo? (Maika 5:2) Orere otete nana vwẹ omarẹ iroko 140 vwo sheri kẹ Nazarẹt!

Osun ọvo vwẹ Rom de ji urhi nẹ e che kere ihwo. Dohwo dorere re de vwiẹ yen cha ra. Ọhọhọre nẹ orere ri Bẹtlẹhẹm yen Josẹf vẹ Meri nurhe, ọtiọyena, Josẹf de mu aye rọyen vẹ evun na kpo Bẹtlẹhẹm. (Luk 2:3) Meri de rhi vwiẹ vwẹ asan re de churu eranvwe. Ọghẹnẹ de ji emekashe buebun nẹ ayen ra vuẹ isuigegede evo nẹ ọmọ re ghwe vwiẹ na yen Mesaya, yẹrẹ Kristi na.

Ọke vwọ yanran na, ihwo efa je cha mrẹvughe nẹ Jesu yen Mesaya na. Ọmraro Aizaya tare nẹ ọshare ọvo cha rhuẹrẹ idjerhe na phiyọ vwọ kẹ owian ọghanghanre rẹ Mesaya na cha wian na. (Aizaya 40:3) Ọshare yena yen Jọn ro bru ihwo phiyame na. Ọke rọ vwọ mrẹ Jesu, o de kperi: “Nighe, Omogegede rẹ Ọghẹnẹ, rọ ghwa imwemwu rẹ akpọ na nu!” Idibo ri Jọn evo de ghwe nene Jesu, ọke yena. Ọvo usun rayen da ta: “Avwanre mrẹ Mesaya na re.”—Jọn 1:29, 36, 41.

Orọnvwọn ọfa je phia rọ rhọnvwephiyọ ọnana. Ọke rẹ Jọn vwo bru Jesu phiyame nu, Jihova komobọ da tota nẹ odjuvwu rhe. Womarẹ ẹwẹn ọfuanfon na, Jihova da vwẹ Jesu mu kerẹ Mesaya na, rọ vwọ tanẹ: “Ọnana hẹ ọmọ mẹ ro je vwe, rẹ evun rọye vwerhe ovwẹ.” (Matiu 3:16, 17) Mesaya re veri na, rhire!

Ọke vọ yen ọnana vwọphia? Ukpe ri 29 C.E., ọyen ẹgbukpe 483 ri Daniẹl mraro rọyen na ghwa vwọ gba. Uyota dẹn, ọnana ọvo usun rẹ erọnvwọn ri djerephia nẹ Jesu yen Mesaya, yẹrẹ Kristi na. Kẹ ovuẹ vọ yen o che ghwoghwo vwẹ ọke rọ cha vwọ dia akpọ na?

​—E muro kpahen Matiu uyovwin 1 re te 3; Mak uyovwin 1; Luk uyovwin 2; Jọn uyovwin 1.