DANIẸL, ọyen eghene ro vwo uvi ọyọnregan, e muro kpo eviẹn vwẹ Babilọn tavwen a ke ghwọrọ Jerusalẹm. Ọke ra vwọ ghwọrọ Juda, Daniẹl vẹ ihwo ri Ju efa re mu kpo eviẹn vwo ọmuvwiẹ vwẹ ẹdia evo. Ọke grongron rẹ Daniẹl dia Babilọn na, Jihova bruba kẹ mamọ, ọ tobọ sivwon ọke re vwo do phiyọ unu rẹ ikpohrokpo, ọ je mrẹ emramrẹ buebun kpahen obaro na. Aroẹmrẹ ri Daniẹl rọ ma ghanre kparobọ shekpahen Mesaya na vẹ usuon Rọyen.

Daniẹl riẹn kpahen ọke ri Mesaya na cha vwọ rhe. A vuẹ Daniẹl kpahen ọke rẹ “Ọ ra vwẹ ori te na, Osun” na, cha vwọ vwomaphia vwọkẹ ihwo rẹ Ọghẹnẹ; vwo nẹ ọke ra vwọ vwẹ iji na phia nẹ a ra rhoma bọn igbẹhẹ ri Jerusalẹm a cha mrẹ udughwrẹn 69 rẹ ikpe. Ẹdẹ ighwrẹn yehẹ udughwrẹn ọvo; udughwrẹn rẹ ikpe ke rha hẹ ẹgbukpe ighwrẹn. A vwẹ iji yena vwọphia ọke grongron ravwọ mrẹ ọke rẹ Daniẹl nu, ọyen ukpe ri 455 B.C.E. E de kere nẹ ọke yena rhe, “ẹdidjana” 69 rọ dia ikpe 483, vwoba vwẹ 29 C.E. Avwanre cha mrẹ obo re phiare vwẹ ukpe yena vwevunrẹ uyovwinrota rọvwọ kpahen ọnana. Daniẹl je mraro kpahen Mesaya na nẹ, “ka cha nyavwọ kufia,” yẹrẹ e che hwe, ro vwo si imwemwu no.—Daniẹl 9:24-26.

Mesaya na cha dia Ovie vwẹ odjuvwu. Vwẹ emramrẹ rẹ oghẹresan, Daniẹl da mrẹ odjuvwu ro rhiephiyọ, ọ da mrẹ Mesaya na, re seri nẹ “ọmọ rẹ ohwo,” ro bru Jihova ra vwẹ ekete rọyen. Jihova da “vwẹ isuesun kẹ, kugbe urinrin vẹ uvie.” Uvie yena cha dia bẹdẹ. Daniẹl je riẹn emu ọfa rọ vwerhoma kpahen Uvie ri Mesaya na, ọyehẹ, ihwo efa che nene Ovie na sun, e se ayen nẹ, “ihwo efuanfon rẹ Ọ ro Me kpenu ejobi.”—Daniẹl 7:13, 14, 27.

Uvie na cha ghwọrọ isuesun rẹ akpọ nana. Ọghẹnẹ vwẹ ẹgba vwọkẹ Daniẹl rọvwọ fan otọ rẹ evwerhẹn ọvo ro tighi ẹwẹn rẹ Nẹbukadreza rọ dia ovie ri Babilọn. Ovie na mrẹ oma rode ọvo ro vwo uyovwin rẹ oro, udu vẹ abọ rọyen idọnọ ọfuanfon, evun vẹ ekpoghowọ rọyen ẹrovwo, igbawọ rọyen utehru, awọ rọyen asan evo utehru asan evo ọphiẹn. Oragha ọvo de bru nẹ ugbenu ọvo, o de she teyẹ awọ rẹ oma na, ọ da guọghọ ibribro. Daniẹl djere fiotọ nẹ ẹbẹre sansan rẹ oma na mudiaphiyọ ẹgba rẹ usuon rẹ akpọ na re cha vwọ kpahen ohwohwo, Babilọn yen cha tuọnphiyọ rọ dia uyovwin rẹ oro na. Ọ je mraro nẹ ọke rẹ ẹgba rẹ usuon rọ koba de suẹn, ọyen Uvie rẹ Ọghẹnẹ cha vwọ rhe. Ọ cha ghwọrọ isuesun rẹ akpọ na ejobi. Ko che sun bẹdẹ bẹdẹ.—Daniẹl, uyovwin 2.

Daniẹl mrẹ oghwọrọ ri Babilọn, ọke yena jẹ ọ ghwore. Ovie Sairọs ghwọrọ Babilọn kirobo ra mraro rọyen jovwo. Vwo nene aroẹmrẹ na, ẹgbukpe 70, ọyen Jerusalẹm dia ẹdia rẹ oghwọrọ, ọ ghwa vwọ gba nu, ayen de vrẹn nẹ otọ ri Babilọn kerẹ eviẹn rhivwin kpo, kidie ọke yena yen a je vwọ ghwọrọ Babilọn. Ihwo ri Ju na da bọn Jerusalẹm vẹ uwevwin ẹga rọyen womarẹ ukẹcha rẹ isun, irherẹn, vẹ emraro re fuevun. Kẹ die yen cha phia vwẹ oba rẹ ikpe 483 na?

​—E muro kpahen ọbe rẹ Daniẹl.