JEMS vẹ Jud, ayen emọ-esẹ ri Jesu. Pita vẹ Jọn, ayen usun rẹ idibo 12 ri Jesu. Eshare ẹne nana siẹ ileta ighwrẹn rehẹ ẹbẹre ri Baibol na ra vwẹ Grik vwo si na. Odẹ rayen yen e vwo se ọbe na ọvuọvo. E si uchebro rehẹ ẹbe nana rere e vwọ chọn Inene-ri-Kristi uko vwọ sẹro rẹ ọyọnregan rayen vwọ kẹ Jihova, ayen me je tẹnrovi Uvie na.

Dje esegbuyota phia. Ohwo vwọ tanẹ ọyen vwo esegbuyota, ọyena ọvo teri-i. Uvi rẹ esegbuyota, mu ohwo vwo ruiruo. Jems siri nẹ, “Esegbuyota ro vwo iruo-o ji ghwu rhe.” (Jems 2:26) E de dje esegbuyota phia vwẹ ọke rẹ ọdavwini, ọnana nẹrhẹ ohwo vwo edirin ọgangan. Onene-ri-Kristi se vwo phikparobọ, ofori nẹ ọ yare aghwanre mie Ọghẹnẹ vẹ imuẹro nẹ ọ cha kpahen phiyọ ẹrhovwo rọyen na. Edirin nẹrhẹ a mrẹ ebruba rẹ Ọghẹnẹ. (Jems 1:2-6, 12) Odibo rẹ Ọghẹnẹ da sẹro ọyọnregan rọyen, Jihova cha chọn uko. Jems tare nẹ, “Si kẹrẹ Ọghẹnẹ, rere o si kẹre owẹ.”—Jems 4:8.

Ofori nẹ esegbuyota avwanre nabọ gan rere a sa vwọ kẹnoma kẹ edavwini vẹ oriẹriẹvwe rẹ ọfanrhiẹn. Fikirẹ akpọ rọ vọnre vẹ ọfanrhiẹn vwẹ ọke ri Jud, o de si rhe iniọvo na nẹ ayen “họnre chochọ rẹ esegbuyota” rayen.—Jude 3.

Sẹro rẹ omamọ uruemu. Jihova guọnọre nẹ idibo rọyen dia ihwo re fonro vwẹ kẹdia kẹdia eje. Pita de si nẹ: “Ovwan gba fon vwẹ oma rẹ ovwan vwẹ uruemu rẹ ovwan ejobi; Kidie e siro nẹ, Ovwan ke fon, kidie mẹ [Jihova] fonro.” (1 Pita 1:15, 16) Inene-ri-Kristi vwo oniru rẹ ayen sa vwẹrokere. Pita tare nẹ, “Fikiridie Kristi re-oja kẹ ovwan, re ovwan vwo no ru, rere ovwan vwẹ ẹro kere.” (1 Pita 2:21) Dede nẹ idibo rẹ Ọghẹnẹ rioja kidie ayen nene irhi rẹ Ọghẹnẹ, ọnana kẹ ayen “evun” yẹrẹ ẹwẹn obrorhiẹn rọ fonro. (1 Pita 3:16, 17) Pita durhie avwanre nẹ e dje uruemu ọfuanfon phia ọkieje, ji dje omaẹvwọkpahotọ phia ra vwọ hẹrhẹ ẹdẹ rẹ ẹdjọeguo rẹ Ọghẹnẹ, vẹ uve rẹ akpọ kpokpọ rẹ “ọvwata cha dia” na.—2 Pita 3:11-13.

Dje ẹguọnọ phia. “Ọghẹnẹ hẹ ẹguọnọ,” ọtiọyen Jọn tare. Ọyinkọn Jọn djerephia nẹ Ọghẹnẹ dje ẹguọnọ rọyen vwọ kẹ avwanre womarẹ Ọmọ rọyen Jesu ro ji rhe “rhe rhuẹrẹ arhuẹrẹ fiki rẹ imwemwu rẹ avwanre.” Ẹro vọ avwanre vwo ni ọnana? Jọn da ta: “Imoni re ghare; ọ da dianẹ Ọghẹnẹ guọnọ avwanre te ọtiọye, avwanre ke je guọnọ ohwohwo rhe.” (1 Jọn 4:8-11) Idjerhe ọvo re se vwo dje ẹguọnọ nana phia, ọyen ra vwọ dia ihwo re ghọ ọrhorha.—3 Jọn 5-8.

Ọtiọyena, mavọ idibo ri Jihova se vwo dje ẹguọnọ rayen vwọ kẹ? Jọn da kpahenphiyọ onọ yena nẹ: “Kidie ọnana hẹ ẹguọnọ rẹ Ọghẹnẹ na nẹ, avwanre yọnrọn irhi rọye. Yẹ irhi rọye na ghwa họhọ-ọ.” (1 Jọn 5:3; 2 Jọn 6) Ihwo ri nyupho rẹ Ọghẹnẹ vwo imuẹro nẹ ayen cha mrẹ ẹguọnọ rẹ Ọghẹnẹ, ohwo rọ kẹ ayen uve rẹ “arhọ rọye ri bẹdẹ na.”—Jude 21.

​—E muro kpahen ẹbe rẹ Jems; 1 Pita; 2 Pita; 1 Jọn; 2 Jọn; 3 Jọn; Jude.