JIHOVA Osun ro vwo aghwanre? Idjerhe ọvo avwanre savwọ mrẹ ẹkpahọnphiyọ rẹ onọ yena, ọyen re vwo roro kpahen odjekẹ rọ vwọ kẹ avwanre. Odjekẹ na se fi erere kẹ avwanre? A da reyọ vwọ wian, ọ sa nẹrhẹ akpeyeren avwanre yovwinphiyọ? Solomọn rọ dia Ovie ro vwo aghwanre si Isẹ ujorin buebun. Enana djobọte kẹdia kẹdia rẹ akpeyeren. Roro kpahen idje evo.

Ofori nẹ avwanre vwẹroso Ọghẹnẹ. E ki se vwo omamọ oyerinkugbe vẹ Jihova, ofori nẹ a vwẹrosuọ. Solomọn de si: “Vwẹ udu wẹn ejobi vwọ kpahe Ọrovwohwo, wọ vwẹ ẹro suọ oma obọ wẹ-ẹn. Vwẹ idjerhe wẹn ejobi rhọvwọ; kọ cha kpọ idjerhe wẹn ejobi vi.” (Isẹ 3:5, 6) Avwanre che yerin omamọ rẹ akpọ siẹrẹ a da vwẹroso Ọghẹnẹ womarẹ re vwo nyupho rọyen, ji nene odjekẹ rọyen. Oka rẹ akpeyeren yena sa nẹrhẹ ubiudu rẹ Ọghẹnẹ ghọghọ, je nẹrhẹ Jihova mrẹ ota kpahen kẹ ọvweghwrẹn Rọyen rọ dia Eshu na.—Isẹ 27:11.

Vwẹ aghwanre nene ihwo efa yerin. Uchebro rẹ Ọghẹnẹ vwọ kẹ eshare, eya vẹ emọ pha ghanghanre nonẹna vrẹ obo ri jovwo. “Ghọghọ vwẹ oma rẹ aye rẹ ọke emọ wẹn,” Ọghẹnẹ bru ọshare uche nẹ ọ fuevun kẹ aye rọyen. (Isẹ 5:18-20) Eya re rọvwọnre, mrẹ oborẹ ọbe rẹ Isẹ djisẹ rẹ omamọ aye rẹ ọshare kugbe emọ rọyen vwo ẹguọnọ kpahen. (Isẹ, uyovwin 31) A vwẹ odjekẹ vwọ kẹ emọ nẹ ayen nyupho rẹ esẹ vẹ ini rayen. (Isẹ 6:20) Ọbe na ji djephia nẹ e vwo mu ugbeyan yovwin vrẹ re vwo sioma nẹ otu, ọnana sa nẹrhẹ e vwo ọdavwẹ romobọ ọvo. (Isẹ 18:1) Igbeyan sa nẹrhẹ avwanre ru obo ri yovwirin yẹrẹ obo ri miovwirin, ọtiọyena gba vwẹ aghwanre vwọ sane igbeyan wẹn.—Isẹ 13:20; 17:17.

Vwẹ aghwanre sun oma. Ọbe rẹ Isẹ vọnre vẹ uchebro rẹ oborẹ avwanre se vwo vwo iroro rọ kẹ ohwo omakpokpọ, obo ra savwọ dia ọgbowian, a me je kẹnoma kẹ erharhe rẹ iroro vẹ udi-ẹda vrẹ oma. (Isẹ 6:6; 14:30; 20:1) O si avwanre orhọ nẹ siẹrẹ a da vwẹroso uchebro rẹ ohworakpọ jẹ ọrẹ Ọghẹnẹ vwo, ọnana sa so okpetu. (Isẹ 14:12) O bru avwanre uche nẹ a sẹro rẹ ubiudu avwanre vwo nẹ erọnvwọn ri se miovwo, ọ je karophiyọ avwanre nẹ “evun rọye [ubuidu na] ogbugbu rẹ arhọ va nẹ cha.”—Isẹ 4:23.

Iduduru rẹ ihwo vwẹ akpọ na rhe riẹnre nẹ a vwọ vwẹ uchebro yena vwọba akpọ yerin sa nẹrhẹ ohwo yerin obọdẹn rẹ akpeyeren. Ọtiọyena, kẹ ayen rhi vwo omamọ rẹ iroro rẹ ayen vwo rhiabọreyọ Jihova kerẹ Osun rayen.

​—E muro kpahen ọbe rẹ Isẹ.