IHWO ejobi yen ro ẹnwan, ji te idibo ri Jihova dede. Ọbuine na de si, “Ẹnwan rẹ udu mẹ de rhi bunphiyọ.” (Une Rẹ Ejiro 94:19) Jesu da rha tanẹ, vwẹ ọke rẹ oba na, “ẹnwan rẹ akpọ nana” sa nẹrhẹ ọ dia bẹnbẹn ra vwọ ga Jihova. (Luk 21:34) Kẹ owẹ vwo? Ofu dje we fikirẹ ebẹnbẹn rẹ igho, orua yẹrẹ ọga? Mavọ yen Jihova sa vwọ chọn wẹ uko vwo yerin ghene ayen?

Avwanre guọnọ ukẹcha e ki se yerin ghene ẹnwan. Ọyinkọn Pọl de si, “A lagha avwanre vwẹ kidjerhe kidjerhe.” “Ofu dje avwanre. . . ; a ghwiẹ avwanre she.” Dedena, Pọl da je tanẹ, “yẹ a pẹtiẹ avwanre-e,” “ye siẹro nu-u,” “a ghwọrọ avwanre-e.” Die yen chọn avwanre uko? “Ọrho rọ basa-an [ẹgba rọ vrẹ ẹgba, NW ],” rọ dia ẹgba ro nẹ obọ rẹ Jihova Ọghẹnẹ cha.—2 Kọrẹnt 4:7-9.

Karophiyọ ọke ra vwọ kẹ wẹ “ọrho rọ basa-an [ẹgba rọ vrẹ ẹgba, NW ].” Wọ karophiyọ ota ọvo wo nyori rọ nẹrhẹ ọdavwaro wẹn kodophiyọ kpahen ẹguọnọ ri Jihova ro jẹ rhẹriẹ? Ọke wo vwo yono ihwoefa kpahen iphiẹrophiyọ rẹ iparadaisi ye, esegbuyota wẹn kpahen ive ri Jihova ganphiyọ? Uyono ẹra vẹ iruo aghwoghwo na chọn avwanre uko vwo yerẹn ghene ebẹnbẹn rẹ akpeyeren, e je nẹrhẹ avwanre vwo ufuoma rere avwanre sa vwọ ga Jihova vẹ aghọghọ.

Vwọrẹ uyota, ọ sa dianẹ ifi buebun si we. Kerẹ udje, Jihova tare nẹ a guọnọ Uvie na ẹsosuọ, e mi ji vwo uvi rẹ ọrhuẹrẹphiyotọ vwọkẹ iruo rẹ ẹga na. (Matiu 6:33; Luk 13:24) Ọ da rha dianẹ omukpahen, ọga, yẹrẹ ebẹnbẹn rẹ orua nẹrhẹ wọ vwiẹrẹ vwo? Kẹ iruo wẹn da reyọ ọke wo vwo kpẹ uyono vwo? Ofu se dje we, kidie o vwo erọnvwọn buebun wọ guọnọ ru, jẹ ọke herọ wo vwo ru ayen eje-e. Ọkiọvo wọ sa tobọ roro nẹ obo rẹ Jihova rhẹro rọyen mie we bun nọ.

Jihova riẹn obo avwanre hirharokuẹ. Ọ riẹn obo rẹ ẹgba avwanre muru. Ọ je riẹn nẹ ọ reyọ ọke e ki se phi ebẹnbẹn vẹ ẹnwan kparobọ.—Une Rẹ Ejiro 103:13, 14.

Roro kpahen obo rẹ Jihova vwẹrote ọmraro Ilaija wan. Ọke rẹ Ilaija vwọ djẹ kpẹ aton fikirẹ ofudjevwe vẹ oshọ, Jihova ghwọkuo nẹ o rhivwin kpẹ iruo rọyen? Ẹjo. Abọ ivẹ yen Jihova ji amakashe rọyen ra rhọvwọn Ilaija, ọ da vwẹ emu kẹ re. Dede nẹ ẹdẹ 40 wan re, jẹ oshọ ji muẹ Ilaija. Die ọfa yen Jihova ruru vwọ chọn Ilaija uko? Ẹsosuọ, Jihova vwẹ imuẹro vwọ kẹ nẹ ọ sa sẹro rọyen.  Ọrivẹ, Jihova phiuduphiyọ Ilaija awọ vẹ upho “bọrọ bọrọ.” Ọrọkoba, Jihova vuẹrẹ nẹ ihwoefa buebun je herọ ri fuevun ga. O rhe kri-i, Ilaija da rhoma ton iruo rẹ ọmraro rọyen phiyọ vẹ oruru. (1 Ivie 19:1-19) Die yen ọnana yono avwanre? Ọke rẹ ofu vwo dje Ilaija, Jihova dje erorokẹ vẹ odirin vwọ kẹ. Jihova ji rhi wene-e. Ọ je vwẹrote avwanre.

Ru obo rẹ ẹgba wẹn muru vwẹ ẹga ri Jihova. Wọ vwẹ obo wo ruẹ asaọkiephana vwọ vwanvwan obo ru wo ruẹ jovwo-o. Kerẹ udje: Ohwo rọ djonẹ da dobọ rẹ onẹ-ẹdjẹ ji vwẹ emeranwe yẹrẹ ikpe evo, ọ cha ghwa sa tuọnphiyọ ọ me djẹ kirobo ri jovwo-o. Ukperẹ ọtiọyen, ọ cha tuọnphiyọ ememerha bẹsiẹ o vwo vwo oka rẹ ẹgba ro rhere jovwo. Inene-ri-Kristi họhọ ihwo re djonẹ. Ayen muẹ djẹ-ẹ. (1 Kọrẹnt 9:24-27) Diesorọ wo rhe bru ẹkẹn rẹ obo wọ sa yanmu kẹ oma wẹn asaọkiephana vwevunrẹ ẹga ri Jihova-a? Kerẹ udje, wo se bru ẹkẹn kẹ oma wẹn rẹ wo vwo kpẹ uyono ọkieje. Nẹrhovwo vwọkẹ ukẹcha ri Jihova. Ọke wọ da rhoma gan vwevunrẹ ukoko na re, ku wọ sa “davwe re wọ mrẹ nẹ Ọrovwohwo yoma.” (Une Rẹ Ejiro 34:8) Karophiyọ nẹ, kemu kemu wo ruru vwo dje ẹguọnọ wẹn vwọ kẹ Jihova, pha ghanghanre kẹ.—Luk 21:1-4.

Mavọ yen Jihova chọn June uko se vwo rhivwin bro rhe? June da ta: “Ke me nẹrhọvwo rhe Jihova nẹ ọ chọn vwẹ uko. Aye rẹ ọmọ mẹ da vuẹ vwẹ kpahen osikoko re che ru vwẹ orere mẹ. Mi de kpẹ ẹdẹ ọvo rẹ osikoko na. Oma vwerhen ovwẹ gangan nẹ me rhoma kuomakugbe ihwo ri Jihova! Omẹvwa yena yen obo me hẹrhẹ rhabae. Me ga Jihova vẹ aghọghọ asaọkiephana. Mi yeren omamọ akpọ. Me rhe riẹn re nẹ me guọnọ ukẹcha rẹ iniọvọ na. Me kpẹvwẹ Ọghẹnẹ nẹ me je mrẹ ọke vwo rhivwin bro rhe.”