ẸBẸRE 5

Rhivwin Bru “Osuigegede Kugbe Ọrhẹrotọ rẹ Ẹnwẹn rẹ Ovwan”

HWORO

Wo ji hirharoku oka rẹ ebẹnbẹn re djunute vwẹ ibroshọ nana jovwo re? Ọ da dia ọtiọyen, gba riẹn nẹ ọ diẹ owẹ ọvo yehẹ ẹdia nana-a. Idibo rẹ Ọghẹnẹ buebun vwẹ ọke awanre vẹ ọke nana ji hirharoku ebẹnbẹn tiọyena. Kirobo ri Jihova chọn ayen uko vwo phi ebẹnbẹn na kparobọ na, ọtiọyen ọ je cha chọn wẹ uko.

Wo che vwo rhivwin bru Jihova na, o che rhiabọdede uwe

WO CHE vwo rhivwin bru Jihova na, vwo imuẹro nẹ ọ cha chọn wẹ uko. Ọ cha vwẹ ukẹcha kẹ wẹ vwo yerin ghene ẹnwan, si ophu nẹ evun, ji vwo ufuoma fikirẹ ẹwẹn obrorhiẹn rọ fonro. Ọke yena, ku wọ sa rhoma kuomakugbe idibo ri Jihova vwọ ga. Ẹdia wẹn kọ cha dia kerẹ ọrẹ Inene-ri-Kristi rẹ ẹgbukpe ujorin ẹsosuọ, rẹ ọyinkọn Pita si rhe nẹ: “Ovwan ghwrẹ jovwo kerẹ igegede, ẹkẹvuọvo asaọkiephana ovwan rhivwin bru Osuigegede kugbe Ọrhẹrotọ rẹ ẹnwẹn rẹ ovwan re.”—1 Pita 2:25.

Obo ri me yovwin wo se ru ọyehẹ, wo vwo rhivwin bru Jihova. Diesorọ? Wo che ru ubiudu ri Jihova ghọghọ. (Isẹ 27:11) Uruemu avwanre sa nẹrhẹ oma vwerhen Jihova yẹrẹ ivun miovwo. Jihova gba avwanre nẹ avwanre ga ọyen yẹrẹ vwo ẹguọnọ kpahọ-ọn. (Urhi Rivẹ 30:19, 20) Ọshare ọvo ro yono Baibol kodo da ta: “Ohwo vuọvo che se rhie ubiudu wẹ-ẹn. Wẹwẹ ọvo yin se rhie.” Avwanre rhie ubiudu rẹ avwanre siẹrẹ avwanre da ga Jihova vwọrẹ ẹguọnọ. Avwanre de ru ọtiọyen, jẹ avwanre kẹ Jihova okẹ rọ ma ghanre rọ dia ọyọnregan avwanre, ọnana nẹrhẹ oma vwerhọn. Vwọrẹ uyota, o vwo emu vuọvo rọ sa kẹ avwanre omavwerhovwẹn vrẹ ravwọ ga Jihova vwẹ idjerhe rọ guọnọre-e.—Iruo 20:35; Ẹvwọphia 4:11.

Wọ da rhoma ton uyono ẹra phiyọ, kẹ wọ cha mrẹ omavwerhovwẹn vwo nẹ Ota rẹ Ọghẹnẹ rhe. (Matiu 5:3) Vwẹ idjerhe vọ? Nonẹna, ihwo buebun nọ nẹ, ‘Diesorọ a vwọ ma avwanre?’ Ayen guọnọ riẹn ẹkpahọnphiyọ rẹ enọ ri shekpahen akpeyeren. Ihworakpọ vwo ọdavwẹ nana keridie, ọtiọyen yen Ọghẹnẹ ma ayen. Ọ guọnọre nẹ oma vwerhen avwanre siẹrẹ avwanre da ga. O vwo omavwerhovwẹn rọ vrẹ ravwọ riẹn nẹ avwanre ga Jihova vwọrẹ ẹguọnọ-ọ.—Une Rẹ Ejiro 63:1-5.

Vwo imuẹro nẹ Jihova guọnọre nẹ wo rhivwin bro rhe. Die yen sa kẹ wẹ imuẹro yena? Karophiyọ nẹ a nẹrhovwo mamọ, e ki muegbe rẹ ibroshọ nana. Ọ sa dianẹ ọkpako ọvo yẹrẹ oniọvo ọvo yen reyọ ibroshọ nana vwo rhe we. Wo vwo se, obo wo seri na de te we ẹwẹn. Enana eje djerephia nẹ Jihova kpairoro vrẹ wẹ-ẹ. Ukperẹ ọtiọyen, o si we te oma.—Jọn 6:44.

Oma vwerhen avwanre ravwọ riẹn nẹ Jihova cha sa kpairoro vrẹ idibo rọyen ri bo ghwru-u. Ọna yen obo rẹ oniọvo aye re se Donna rhe mrẹvughe. Ọ da ta: “Mi bo ghwru nẹ ukoko na, ẹkevuọvo me karophiyọ Une Rẹ Ejiro 139:23, 24 ọkeneje, rọ tare nẹ: ‘Hiẹn vwẹ, E Ọghẹnẹ, re wọ riẹn udu mẹ! Daovwẹ ni re wọ riẹn iroro mẹ! Re wọ mrẹ se emu umwemwu hẹ idjerhe mẹ, rere wo sun vwe vwẹ idjerhe ri bẹdẹ.’ Me riẹnre nẹ oma che se fun vwe vwevunrẹ akpọ nana-a, jokpanẹ ke me rhoma rhivwin rhe ukoko na. Me rhe mrẹvughe nẹ Jihova yanjuvwe vwo kakaka-a; ofori nẹ mi rhivwin bro ra. Oma vwerhen ovwẹ dẹn nẹ me ru ọtiọyen!”

“Me rhe mrẹvughe re nẹ Jihova yanjuvwe vwo kakaka-a; ofori nẹ mi rhivwin bro ra”

Avwanre nẹrhovwo nẹ wọ rhoma mrẹ “aghọghọ rẹ Ọrovwohwo.” (Nehemaya 8:10) Siẹrẹ wo de rhivwin bru Jihova, wọ cha sa viẹ idiekpọvwẹ-ẹ.

Ẹkpahọnphiyọ Vwọkẹ Enọ ri Shekpahen Obo re se Vwo Rhivwin Bru Jihova

TIVỌ ME DA TUỌNPHIYỌ?

Ohwo rọ mwọga guọnọ ọke ọ ke sa rhoma ru obo ro ruẹ jovwo. Ọtiọyen ọ je hepha, o ji fo nẹ wo yono Ota Ọghẹnẹ kẹdẹ kẹdẹ wọ ke sa rhoma gan vwevunrẹ iruo rẹ ẹga na. Wo roro nẹ wo se ghwe ru erọnvwọn eje siẹvuọvo-o. Ọkiọvo wọ sa ghwọrọ ọmọke vwo se yẹrẹ kerhọ rẹ uhworo rẹ isese ri Baibol na, wo ji se yono ọbe ukoko na ọvo, yẹrẹ hiẹ jw.org. Vwọba, davwẹngba wọ fobọ ton uyono ẹra phiyọ. Ma rho, nẹrhovwo rhe Jihova nẹ ọ chọn wẹ uko. “Vwẹ ẹnwan wẹn ejobi vwọ ya, kidie ọyen re vwẹ ẹro te we.”—1 Pita 5:7.

“Me vwọ dobọ rẹ uyono ji nu, oma kọ vo ovwẹ me vwọ nẹrhovwo. Ki mi rhi fiudugbere vwọ nẹrhovwo, ọkpako ọvo de bru vwe rhe. Ọ da chọn vwẹ uko vwọ mrẹvughe nẹ Jihova je kpairoro vrẹ vwẹ-ẹ. Ọkpako na da vuẹ vwẹ nẹ mi rhe se Baibol na kẹdẹ kẹdẹ. Mi vwo ru ọtiọyen, ki mi rhi vwo ẹgba vwọ rhoma ton uyono ẹra phiyọ. Ọke vwọ yanran na, ke me rhe ton iruo aghwoghwo na phiyọ. Oma vwerhen ovwẹ nẹ Jihova kpairoro vrẹ vwẹ-ẹ.”—Eeva.

IHWO UKOKO NA CHE RHIABỌDEDE UVWE?

Vwo imuẹro nẹ ihwo ukoko na che rhiabọdede uwe. Ayen che gu we ẹdjọ-ọ, ukperẹ ọtiọyen, ayen che dje ẹguọnọ kẹ wẹ ji phiuduphiyọ owẹ awọ.—Hibru 10:24, 25.

“Oma kọ vo ovwẹ mi vwo rhivwin kpẹ Ọguan Ruvie. Me ghwa riẹn obo rẹ iniọvo na che ni vwe wa-an. Mama ọvo rọhẹ ukoko yena omarẹ ẹgbukpe 30 re, da vuẹ vwẹ nẹ, ‘Wẹ kobẹcha, Ọmọ mẹ!’ Ota yena te vwe ẹwẹn mamọ. Mi ghini te uwevwin re.”—Javier.

“Mi vwo kpe Ọguan Ruvie, mi de chidia obuko rere ohwo vuọvo vwo juvwe ẹmrẹ. Ẹkẹvuọvo, iniọvo na buebun je karophiyọ ovwẹ ọke me vwọ hẹ omotete mi vwo kpẹ uyono ọke yena. Ayen nabọ dede uvwe, ẹwẹn mẹ de rhi totọ. Kọ ghwa họhọ nẹ mi rhivwin rhe uwevwin re.”—Marco.

MAVỌ YEN EKPAKO NA SA VWỌ CHỌN VWẸ UKO?

Ekpako na cha vwẹ ukẹcha kẹ wẹ. Ayen che jiri uwe fikirẹ owenvwe wo vwori wọ vwọ rhoma ru “ẹguọnọ wẹn rẹsosuọ” ganphiyọ. (Ẹvwọphia 2:4) Ayen che dje arodọnvwẹ kẹ wẹ, je kpọ wẹ vi vẹ ẹwẹn rẹ “dẹndẹn.” (Galesha 6:1; Isẹ 28:13) Ekpako na se ru ọrhuẹrẹphiyotọ rẹ oniọvo ọvo vwọ vwẹ Draw Close to Jehovah yẹrẹ “Keep Yourselves in God’s Love” vwo yono uwe. Vwo imuẹro nẹ ekpako na cha kẹ wẹ uchebro, ji bicha wẹ, vwẹ kidjerhe kidjerhe.—Aizaya 32:1, 2.

“Mi vrẹ nẹ ukoko na omarẹ ẹgbukpe ẹrenren, dedena, ekpako na je nokpẹ mẹ kọke kọke. Ẹdẹ ọvo, ọkpako ọvo de dje ifoto rẹ me vẹ ọyen reyọre kẹ vwẹ. Ọnana da nẹrhẹ me karophiyọ aghọghọ ro rhe vwẹ ọke me vwọ ga Jihova. Ekpako na ghene chọn vwẹ uko vwọ rhoma ton iruo rẹ ẹga na phiyọ.”—Victor.

“Ọ Cha Bọn Wẹ Gan”

Ọbeune rẹ avwanre, re se Sing to Jehovah, vwo ine ivwevwerhe buebun re sa bọn wẹ gan ji chọn wẹ uko vwọ rhoma ton iruo rẹ ẹga na phiyọ. Kerẹ udje, roro kpahen eta rẹ une 60. E muro kpahen 1 Pita 5:10, uyovwinrota rẹ une na yen, “O Cha Bọn Wẹ Gan.”

O vw’oboresorọ Ọghẹnẹ vwọ jẹ wẹ

O si we n’ebri vwọ rhi’urhukpẹ na.

Vw’ubiudu wẹn, ọ mrẹ ọdavwẹ wo vwori

Wọ vwọ guọnọ ru’obo ri yovwirin.

Wo ve kẹ nẹ wo ru’ọhọre rọyen;

Ọ cha vw’ukẹcha kẹ w’ọkeneje.
Ọghẹnẹ ji ọmọ rọyen n’o ghwu kẹ wẹ;

Ọna djephia n’ọ guọn’erhuvwu wẹn.

Ọ da sa rhọnvwe n’ọmọ rọyen ghwu kẹ wẹ,

J’omuwẹro n’ọ je cha bọn wẹ gan.

Ọ karophiy’ẹguọnọ wo djephia;

Ọ cha vwẹrot’ihwo rọy’ejobi.

(EKUO)

Ọghẹnẹ dẹ wẹ reyọ v’ọbara ri Jesu.

Ọ cha kẹ w’ogangan, ọ je cha bọn wẹ gan.

Ọ cha vwẹrote we kirobo ro ruẹ jovwo.

Ọ cha kẹ w’ogangan, ọ je cha bọn wẹ gan.