1, 2. Diesorọ omukpahen ri Pọl rhiẹromrẹ vwẹ Jerusalẹm rhe gbe unu-u?

 E VWO sivwin Pọl vwo nẹ obọ rẹ otu rẹ ophu muẹ vwẹ Jerusalẹm nu, a da rhoma muo phiyọ uwodi. Omukpahen rẹ ọyinkọn nana rọ vọnre vẹ oruru na hirharokuẹ vwẹ Jerusalẹm na gbere unu-u. A vuẹrẹ jovwo nẹ o rhẹro rẹ “uwodi vẹ ukpokpogho” vwẹ orere nana. (Iru 20:​22, 23) Dede nẹ Pọl ghwa riẹn obo re cha phia kẹ vwẹ obaro-o, jẹ ọ riẹnre nẹ ọyen cha rha rioja fikirẹ odẹ ri Jesu.​—Iru 9:16.

² Emraro re dia Inenikristi dede ji si Pọl orhọn nẹ e che muo ji “phio phiyọ obọ rẹ ihwo rẹ ẹgborho na.” (Iru 21:​4, 10, 11) O krinọ-ọ na, otu rẹ ihwo ri Ju evo davwẹngba vwo hwe, jẹ ọmọke vwọ wan nu, ọ da họhọ nẹ Sanhẹdrin na guọnọ “vwẹ abọ sha” Pọl kidie ayen phraphro kpahen obo rọ tare. Asaọkiephana, e mu ọyinkọn nana phiyọ uwodi rẹ isodje ri Rom vwẹrote, o ji che hirharoku edavwini kugbe efian re che mu barọ ọke vwọ yanran na. (Iru 21:31; 23:10) Vwọrẹ uyota, ọyinkọn Pọl ghene guọnọ uduephiophiyawọ dẹn!

3. Tivọ yen a da sa mrẹ ọbọngan e se vwo ruiruo rẹ aghwoghwo na kpobarophiyọ?

³ Vwẹ oba rẹ ẹdẹ re de yerẹn na, avwanre riẹnre nẹ “ihwo eje re guọnọ yeren akpọ rẹ omaẹvwọkpahotọ kẹ Ọghẹnẹ kerẹ ihwo ri nene Kristi Jesu, e ji che mukpahen ayen.” (2Ti 3:12) Avwanre je guọnọ uduephiophiyawọ nọke ra ruọke vwẹ iruo rẹ aghwoghwo na. Mavọ yen ọ vwerhen oma te nẹ avwanre se se eta rẹ ọbọngan ra vwọphia vwẹ ẹbe rẹ ukoko na kugbe ọrhuẹrẹphiyotọ rẹ emẹvwa rẹ “odibo rọ fuevun rọ je ghwanre na” ruẹ! (Mt 24:45) Jihova kẹ avwanre imuẹro nẹ o vwo ọvweghrẹn rẹ iyẹnrẹn esiri na vuọvo ro che phikparobọ-ọ. Ayen cha sa ghwọrọ idibo rọyen kerẹ ẹko yẹrẹ dobọ rẹ iruo rẹ aghwoghwo na ji-i. (Aiz 54:17; Jer 1:19) Kẹ ọyinkọn Pọl vwo? Ọ mrẹ ọbọngan rọ guọnọre o se vwo soseri ro fiotọ dede nẹ e muẹkpahọn? Ọ da dia ọtiọyen, ono yen bọn Pọl gan, mavọ yen o ruro wan, kẹ die yen Pọl ruru?

4, 5. Ota rẹ ọbọngan vọ yen a vuẹ Pọl, kẹ diesorọ o vwo fo aruọke?

⁴ Ọyinkọn Pọl mrẹ ọbọngan rọ guọnọre vwẹ ason yena tavwen e ki  sivwon nẹ aguare ri Sanhẹdrin na vwẹ ẹdẹ rọ vwọ kpahọn. Baibol na da ta: “Ọrovwori na de mudia kẹrẹ, ọ da tanẹ: ‘Fiudugberi! Kidie kirobo ru wo soseri ro fiotọ kpahen ovwẹ vwẹ Jerusalẹm na, ọtiọyen wo ji che soseri vwẹ Rom.’ ” (Iru 23:11) Eta rẹ uduephiophiyawọ ri Jesu ta vwọ kẹ Pọl na kẹrẹ imuẹro nẹ ọ cha mrẹ usivwin. Ọ riẹnre nẹ o che te Rom gbẹrhẹnẹdẹ ji vwo uphẹn ro vwo soseri kpahen Jesu vwẹ oboyin.

⁵ Ota rẹ ọbọngan ra vuẹ Pọl na nabọ fo aruọke dẹn! Vwẹ ẹdẹ rọ vwọ kpahọn, eshare ri Ju re vrẹ 40 “da jiroro, ayen de duvwun iyorin kẹ oma rayen nẹ, kpẹsiẹ rẹ ayen hwe Pọl nu-u, ayen cha riemu yẹrẹ da ame-e.” “Iyorin nana” rẹ ayen duvwunru na djerephia nẹ ihwo ri Ju na vwo owenvwe ọgangan ayen vwọ teyen ọyinkọn na hwe. Ayen vwo imuẹro nẹ ayen rhe se ru oborẹ ayen guọnọ ruẹ na-a, ọ cha dia emu rẹ ekan vwọ kẹ ayen. (Iru 23:​12-15) Iroro rẹ ayen jẹre rẹ irherẹn ride vẹ ekpako na ghwobọphiyọ na, ọyen ayen vwo se Pọl rhivwin rhe aguare ri Sanhẹdrin na kerẹsiẹ a da mrẹ nẹ ayen guọnọ nabọ vughe phiyọ. Ẹkẹvuọvo, iroro rẹ ayen ọyen ayen vwọ fiọnko hẹrhẹ vwẹ idjerhe rere ayen teyọn hwe.

6. Mavọ yen Pọl se vwo nyo kpahen iroro ra jẹre ra vwọ teyọn hwe, kẹ die yen ighene se yono vwo nẹ udje rẹ Ọmọ rẹ oniọvo ri Pọl rhe?

⁶ Ọmọ rẹ oniọvo ri Pọl nyo kpahen iroro nana, ọ da yanran ra vuẹ Pọl. Pọl vwo nyo, ọ da vuẹ nẹ ọ yanran ra vuẹ onotu rẹ isodje ri Rom na re se Klọdiọs Laisias. (Iru 23:​16-22) Vwọrẹ uyota, Jihova vwo ẹguọnọ rẹ ighene kerẹ ọmọ rẹ oniọvo ri Pọl re se odẹ rọye-en na ri fiudugberẹ vwẹ ọdavwẹ rẹ ihwo rẹ Ọghẹnẹ vwọ kobaro kẹ ọ rayen, ji fuevun ruẹ kemu kemu rẹ ayen se ru vwo toroba ẹyan-obaro rẹ iruo rẹ Uvie na.

7, 8. Die yen Klọdiọs Laisias ruru rere e vwo jẹ Pọl ẹteyọn hwe?

⁷ Ugege ri Klọdiọs Laisias vwo nyo kpahen iroro ra jẹ kpahen Pọl na, ọ da vwẹ iji phia nẹ e muegbe rẹ eshare 1,000 kugbe isodje 470 re cha rhẹrẹ, kọyen isodje, eshare re yọnrọn oshuẹ kugbe iguiyesi nẹ ayen sun Pọl vwo nẹ Jerusalẹm kpo Sizaria vwẹ ason yena gbẹrhẹnẹdẹ. Ayen de ghwe te etiyin, kẹ ayen cha reyọ vwo rhe Osun Fẹliks. a Dede nẹ Sizaria rọ dia otorere ri Judia rẹ osun ri Rom hepha na vwo ihwo ri Ju buebun re dia etiyin, jẹ Ihwo rẹ Ikeferi yen me buon. Uruemu ri dẹndẹn rẹ ayen djephia vwẹ oboyin na fẹnẹ ọ re djephia vwẹ Jerusalẹm rọ dia asan rẹ ihwo buebun da fẹnẹ oma fikirẹ ẹga, rẹ ayen de ji gbozighi mamọ na. Sizaria yen jehẹ esiri rẹ asan kiriguo rẹ isodje ri Rom rehẹ Judia de siomakoko.

⁸ Laisias ru nene urhi ri Rom womarẹ o vwo si obo re phiare na phiyọ ileta vwo rhe Fẹliks. Laisias si phiyọ nẹ ọyen vwọ riẹn nẹ Pọl ọmotọ ri Rom, ọyen da chochọn rọyen rere ihwo ri Ju na vwo jẹ “teyọn hwe.” Laisias tare nẹ ọ mrẹ abe vuọvo vwẹ obọ ri Pọl “rọ cha nẹrhẹ e hwe yẹrẹ muo phiyọ uwodi-i,” jẹ fikirẹ iroro rẹ ayen jẹ kpahen Pọl kọyen nẹrhẹ o muo rhe Fẹliks rere osun na  se vwo nyo ẹkẹn rẹ unu rẹ ihwo ri muẹkpahọn na ji brorhiẹn rẹ ota na.​—Iru 23:​25-30.

9. (a) Idjerhe vọ yen e vwo gbe uturhi ri Pọl vwori kerẹ ọmotọ ri Rom ẹgua? (b) Diesorọ o vwo fo ra vwọ reyọ uturhi re vwori vwẹ ẹkuotọ ra hepha vwo ruiruo?

⁹ Uyota hẹ oborẹ Laisias siri na? Ọ ghwa dia uyota na eje yen ọ tare-e. Ọ họhọre nẹ ọ davwẹngba vwo guomariase ro vwo djephia kẹ osun na nẹ ọyen omamọ rẹ ohwo. Ọ dia Laisias ghini sivwin Pọl kidie nẹ ọ rhe mrẹvughe re nẹ ọmotọ ri Romu-u. Vwọba, Laisias nama djunute vwẹ ileta na nẹ ọyen yen jurhi nẹ “a vwẹ ejọnrọn ivẹ vwọ kanrọ” je tanẹ “a fa je nọ” enọ-ọ. (Iru 21:​30-34; 22:​24-29) Laisias womarẹ obo ro ruru na vwo gbe uturhi ri Pọl vwori kerẹ ọmotọ ri Rom ẹgua. Nonẹna, Eshu reyọ ihwo ri kpo ẹga re vwọsua vwo koko erhanre phiyọ omukpahen, ọkiọvo ayen tobọ gbowọphiyọ ọmuvwiẹ rẹ avwanre vwori ra vwọ ga Ọghẹnẹ. Ẹkẹvuọvo, kerẹ Pọl, ọkieje yen ihwo rẹ Ọghẹnẹ sa vwọ reyọ uturhi rẹ ayen vwori kerẹ emotọ rẹ ẹkuotọ na vwọ chochọn rẹ oma rayen je guọnọ ochọnvwe vwẹ obọ rẹ urhi na.

10. Ofian vọ yen e gun nyẹ Pọl?

¹⁰ E mu Pọl “phiyọ uwodi vwẹ ọguan rẹ ovie Hẹrọd” vwẹ Sizaria re te ọke rẹ ihwo re vwọsuọ na che vwo nẹ Jerusalẹm rhe. (Iru 23:35) Ẹdẹ iyorin vwọ wan nu, Ananayas orherẹn rode na vẹ ekpako na evo kugbe ọtota rẹ azagba ọvo re se Tẹtulọs da rhe. Ẹsosuọ, Tẹtulọs de jiri Fẹliks vwọ kẹ obo ro ruẹ kẹ ihwo ri Ju na. O muẹro nẹ ọ ta ota nana rere ọ vwọ mrẹ ẹroesiri rẹ osun na. b Ọyena vwọ wan nu, Tẹtulọs vwọ ta ẹkẹn rẹ unu rọyen kpahen ota re mu rhe aguare na, ọ da tanẹ Pọl “ọguọnota, ọ riẹriẹ ihwo ri Ju rehẹ akpọ na ejobi vwọsua usuon, ọyen jehẹ ọkobaro rẹ ẹko rẹ ihwo ri Nazarẹt na. Ọ je guọnọ gbe uwevwin rẹ ẹga na ẹgua, ọtiọyena avwanre de muo.” Ihwo ri Ju ichekọ na “da je vwọsuọ, rẹ ayen vwọ tanẹ erọnvwọn nana ghene uyota.” (Iru 24:​5, 6, 9) Ra vwọ riẹriẹ ihwo vwo gbevwọsua usuon, kobaro rẹ ẹko rẹ ihwo ri gbozighi, ji gbe uwevwin rẹ ẹga na ẹgua sa nẹrhẹ e brorhiẹn rẹ ughwu hwe ohwo.

11, 12. Die yen Pọl tare vwọ sen efian re mu barọ na?

¹¹ A da vwẹ uphẹn kẹ Pọl nẹ ọ ta ẹkẹn unu rọyen. Ọ da tonphiyọ rọ vwọ ta: “Me choma mi vwo gun ẹkẹn unu mẹ.” Pọl senre nẹ obo ra ta kpahọn na dia uyota kakaka-a. Ọyinkọn na gbe uwevwin rẹ ẹga na ẹgua yẹrẹ riẹriẹ ihwo vwọ reyọ vwọso usuo-on. Pọl tare nẹ o vrẹn nẹ Jerusalẹm “ikpe buebun,” ẹkẹvuọvo ọ da rhe vẹ “okẹ rẹ arodọnvwẹ” rọ dia itetoro re toro vwọ kẹ Inenikristi ri hirharoku uweren ọgangan, ọkiọvo fikirẹ owẹnvwe ro firi vẹ omukpahen rọ vwomaphia.  Pọl nabọ dje nẹ bẹsiẹ ọ ke ro uwevwin rẹ ẹga na, ọyen ru oma rọyen “fon,” ọ je tanẹ ọyen davwẹngba vwọ “sẹro rẹ ẹwẹn obrorhiẹn rọ fonro vwẹ obaro rẹ Ọghẹnẹ kugbe ihworakpọ.”​—Iru 24:​10-13, 16-18.

¹² Ẹkẹvuọvo, Pọl rhọnvwere nẹ ọyen vwẹ ẹga kẹ Ọghẹnẹ rẹ esẹ rọyen ride vwo nene “idjerhe rẹ ayen se ẹko na.” Jẹ, ọ tare nẹ ọyen “se erọnvwọn eje rehẹ evunrẹ Urhi na kugbe obo re si phiyọ ọbe rẹ Emraro na gbuyota.” O ji vwo ọkpọ rẹ iphiẹrophiyọ rẹ ihwo re vwọsuọ na vwori nẹ “evrẹnushi cha dia vwọ kẹ evwata kugbe ihwo ri jẹ evwata ẹdia.” Pọl da ta kẹ ihwo re vwọsuọ na nẹ ayen dje oboresorọ ayen vwọ reyọ vwọsuọ na: “E jẹ eshare rehẹ etinẹ na ta oruchọ rẹ ayen komobọ mrẹre ọke mi vwo mudia obaro ri Sanhẹdrin na, jokparẹ orọnvwọn ọvuọvo nana ri mi kperi phia ọke mi vwo mudia ohri rayen nẹ: ‘Fikirẹ iphiẹrophiyọ rẹ evrẹnushi rẹ ihwo ri ghwuru na yen a vwọ reyọ ovwẹ vwo guẹdjọ vwẹ obaro rẹ ovwan nonẹna!’ ”​—Iru 24:​14, 15, 20, 21.

13-15. Diesorọ a sa vwọ vwẹrokere Pọl kerẹ ohwo ro fiudugberi soseri vwẹ obaro rẹ ihwo ri suẹn?

¹³ Pọl phi omamọ udje phiyotọ kẹ avwanre siẹrẹ ọ da dianẹ a vwẹ avwanre vwo mudia vwẹ obaro rẹ ihwo ri suẹn fikirẹ ẹga avwanre yẹrẹ kidie nẹ e gun efian nyẹ avwanre nẹ avwanre ihwo ri so oyanghan, ihwo re riẹriẹ ihwo efa vwọsua usuon yẹrẹ “ẹko rẹ ihwo ri gbozighi.” Pọl vwẹ ujiri rẹ omeru vwọ kẹ osun na rere ọ sa vwọ mrẹ ẹroesiri rọyen kirobo ri Tẹtulọs ruru-u. Pọl hwomamu je ta ota vwẹ idjerhe ọghọ. Pọl nabọ ta uyota rọ vwọ reyọ ona vwọ ta obo re phiare dẹn. Ọ je tanẹ “ihwo ri Ju evo ri nẹ ubrakpọ rẹ Esha rhe,” ri gun nyẹ nẹ ọyen gbe uwevwin rẹ ẹga na ẹgua na hẹ etinẹ-ẹ, ẹkẹvuọvo vwo nene urhi ofori nẹ ayen vwomaphia rere o nyo ẹkẹn unu rayen.​—Iru 24:​18, 19.

 ¹⁴ Ọ rọ ma rho, Pọl siomauko ọ vwọ ta ota kpahen obo ro segbuyota-a. Ọyinkọn na rhoma ta ota kpahen imuẹro ro vwori kpahen evrẹnushi na vẹ uduefiogbere rọ dia ota rọ so ohra ọke ro vwo mudia obaro rẹ aguare ri Sanhẹdrin na. (Iru 23:​6-10) Pọl nabọ kanrunumu iphiẹrophiyọ rẹ evrẹnushi ro vwori ọke rọ vwọ chochọn rẹ oma rọyen. Diesorọ? Kidie Pọl soseri kpahen Jesu kugbe evrẹnushi rọyen rọ dia oborẹ ihwo re vwọsuọ na cha rhọnvwe rhiabọreyọ-ọ. (Iru 26:​6-8, 22, 23) Vwọrẹ uyota, uyono rẹ evrẹnushi na ma rho kẹ imuẹro kpahen Jesu kugbe evrẹnushi rọyen yen esiri rẹ aphro rọhẹ otọ na.

¹⁵ Kerẹ Pọl, avwanre se fiudugberi soseri je mrẹ ọbọngan vwo nẹ oborẹ Jesu vuẹ idibo rọyen: “Ihwo eje che vwo utuoma kpahen ovwan fikirẹ odẹ mẹ. Ẹkẹvuọvo ohwo ro chirakon toba yen che vwo usivwin.” Kẹ ofori nẹ avwanre ro ẹnwan kpahen obo ra cha ta? Ẹjo, kidie Jesu kẹ avwanre imuẹro nana: “Ọke rẹ ayen de mu ovwan rẹ ayen da cha vwẹ ovwan vwọ kpahotọ, ovwan rua ẹnwan phiyotọ kpahen oborẹ ovwan cha ta-a; ẹkẹvuọvo kemu kemu ra vwọ kẹ ovwan vwẹ unọke yena, ovwan ta, kidie ọ dia ovwan yen ta ota-a, ẹkẹvuọvo ẹwẹn ọfuanfon na.”​—Mk 13:​9-13.

16, 17. (a) Die yen Fẹliks tare ji ru vwẹ uvwre ọke re vwo guẹdjọ ri Pọl na? (b) Die yen sa nẹrhẹ oshọ mu Fẹliks, kẹ die yen je nẹrhẹ ọ mrẹ Pọl abọ buebun?

¹⁶ Ọnana dia obọ rẹsosuọ rẹ Osun Feliks vwo nyo kpahen oborẹ Inenikristi segbuyota-a. Baibol na da ta: “Rọ vwọ dianẹ Fẹliks nabọ riẹn uyota ro shekpahen Idjerhe nana na [ota re vwo djisẹ Inenikristi rẹ ẹgbukpe ujorin rẹsosuọ], ọ da kpare ota na, ọ da tanẹ: ‘Ọke ri Laisias onotu rode na vwọ rhe eje, ki mi brorhiẹn rẹ eta nana ri shekpahen owẹ na.’ O de jurhi kẹ onotu rẹ isodje na nẹ o mu ọshare na phiyọ uwodi ẹkẹvuọvo a vwẹ ugbomọphẹ evo kẹ, kugbe nẹ a vwẹ uphẹn kẹ ihwo rọyen rẹ ayen vwọ vwẹrote edavwẹ rọyen.”​—Iru 24:​22, 23.

¹⁷ Ẹdẹ evo vwọ wan nu, Fẹliks vẹ aye rọyen Drusila rọ dia ohwo ri Ju da tanẹ e se Pọl rhe je “kerhọ rọyen rọ vwọ ta ota kpahen esegbuyota ro shekpahen Kristi Jesu.” (Iru 24:24) Ẹkẹvuọvo, Pọl vwọ ta ota kpahen “ophiọnphiọn, omaẹriẹnsuon kugbe ẹdjọeguo rọ cha na, oshọ de mu Fẹliks,” ọkiọvo oshọ muro fikirẹ erọnvwọn ebrabra ro ruru vwẹ akpeyeren rọyen. Eriyina, ọ da vuẹ Pọl nẹ ọ yanran rọ vwọ ta: “Yanran tavwen, ẹkẹvuọvo me cha rhoma se we ọke mi de vwo uphẹn.” Ọnana vwọ wan nu, Fẹliks je mrẹ Pọl abọ buebun, ẹkẹvuọvo o ru ọnana ọ dia kidie nẹ ọ guọnọ uyota na riẹ-ẹn, ukperẹ ọtiọyen, o ruro vẹ ẹwẹn nẹ Pọl cha jẹ udi kẹ.​—Iru 24:​25, 26.

18. Diesorọ Pọl vwọ ta ota kẹ Fẹliks vẹ aye rọyen kpahen “ophiọnphiọn, omaẹriẹnsuon kugbe ẹdjọeguo rọ cha na”?

¹⁸ Diesorọ Pọl vwọ ta ota kẹ Fẹliks vẹ aye rọyen kpahen “ophiọnphiọn, omaẹriẹnsuon kugbe ẹdjọeguo rọ cha na”? Karophiyọ nẹ ayen guọnọ riẹn  kpahen oborẹ “esegbuyota ro shekpahen Kristi Jesu” churobọ si. Pọl riẹnre nẹ ayen yerẹn akpọ rẹ ọfanrhiẹn, ọkon kugbe ọ rẹ oshenyẹ. Ọtiọyena, o dje kẹ ayen obo ra guọnọ mie ihwo re guọnọ dia idibo ri Jesu. Oborẹ Pọl tare dje ofẹnẹ rode rọ herọ vwẹ uvwre rẹ iwan rẹ ọvwata rẹ Ọghẹnẹ kugbe oka rẹ akpọ ri Fẹliks vẹ aye rọyen yerẹn. Ofori nẹ ọnana chọn ayen uko vwọ riẹn nẹ Ọghẹnẹ cha nọ ihworakpọ orhiẹn kpahen oborẹ ayen roro, ta, kugbe uruemu rẹ ayen djephia. Ayen je riẹn nẹ oborẹ Ọghẹnẹ che gun ayen edjọ wan yen ma ghanre vrẹ oborẹ Fẹliks che gun ẹdjo ri Pọl wan. A gbe ta rẹ “oshọ” vwo mu Fẹliks!

19, 20. (a) Die yen ofori nẹ avwanre ru vwẹ iruo rẹ aghwoghwo na kpahen ihwo ri me ruẹ nẹ ayen guọnọ yono kpahen uyota na jẹ ayen guọnọ wene oborẹ ayen yeren akpọ wa-an? (b) Mavọ yen avwanre ru riẹn nẹ Fẹliks dia ugbeyan ri Pọl kakaka-a?

¹⁹ Vwẹ iruo rẹ aghwoghwo na, avwanre sa yan kanre ihwo re họhọ Fẹliks. Ẹsosuọ, ọ sa họhọ nẹ ayen guọnọ yono kpahen uyota na, jẹ ayen guọnọ wene oborẹ ayen yerẹn akpọ wan ọke vwọ yanran na-a. Ofori nẹ a jomaotọ siẹrẹ a da vwẹ ukẹcha kẹ ihwo ọtiọyena. Ẹkẹvuọvo, kerẹ Pọl, avwanre sa vwẹ ona vwọ vuẹ ayen kpahen iwan rẹ ọvwata rẹ Ọghẹnẹ. Ọkiọvo, ọnana me rhe nẹrhẹ ayen rhiabọreyọ uyota na. Jẹ, a da rhe mrẹvughe nẹ ayen vwo ẹwẹn ayen vwọ kẹnoma kẹ oka rẹ akpọ rẹ ayen yerẹn na-a, kẹ ofori nẹ a yanjẹ ayen vwo ra hiẹ guọnọ ihwo ri vwo ẹwẹn ayen vwo yono kpahen uyota na.

²⁰ A mrẹ obo rehẹ evunrẹ ẹwẹn ri Fẹliks womarẹ eta nana: “Ẹgbukpe ivẹ vwọ wan nu, Pọkiọs Fẹstọs da reyọ ẹdia ri Fẹliks; kidie nẹ Fẹliks guọnọre nẹ oma rọyen vwerhen ihwo ri Ju na, ọ da yanjẹ Pọl vwo vwẹ uwodi.” (Iru 24:27) Fẹliks dia uvi rẹ ugbeyan vwọ kẹ Pọl kakaka-a. Fẹliks riẹnre nẹ ihwo ri nene “Idjerhe Na” dia ihwo re riẹriẹ ihwo efa vwọ reyọ vwọsua usuon yẹrẹ ihwo ri wene usuo-on. (Iru 19:23) Ọ je riẹn nẹ Pọl churhi ri Rom vuọvo-o. Dedena, Fẹliks yanjẹ Pọl vwo vwẹ uwodi rere “oma rọyen vwerhen ihwo ri Ju na.”

21. Die yen phia kẹ Pọl ọke ri Pọkiọs Fẹstọs vwọ dia osun, kẹ die yen kẹ Pọl ẹgba?

²¹ Kirobo re djere vwẹ owọrota rọ koba vwẹ Iruo rẹ Iyinkọn Na uyovwin 24, Pọl jehẹ uwodi ọke ri Pọkiọs Fẹstọs vwọ reyọ ẹdia rẹ osun Fẹliks. Vwẹ ọke yena, Pọl kpo aguare abọ buebun je vwomaphia vwẹ obaro rẹ ihwo sansan ri vwo ogangan rẹ usuon. Vwọrẹ uyota, a vwẹ ọyinkọn nana ro fiudugberi na vwo mudia vwẹ “obaro rẹ ivie kugbe isun.” (Lu 21:12) Kirobo rẹ avwanre cha mrẹ, o ji che soseri kẹ osun ro me vwo ogangan vwẹ ọke yena. Vwẹ ọke nana eje na, esegbuyota ri Pọl phiegheri kakaka-a. Aphro herọ-ọ nẹ Pọl mrẹ ẹgba womarẹ ota ri Jesu nana: “Fiudugberi!”