1. Die yen phia kẹ Inenikristi rẹ ẹgbukpe ujorin rẹsosuọ rọ je phia kẹ Iseri ri Jihova nonẹna?

 AYEN ghwoghwo ota na vẹ oruru. Ubiudu rayen mu ayen vwo rhiabọreyọ ukẹcha vẹ odjekẹ rẹ ẹwẹn ọfuanfon na. Omukpahen cha sa dobọ rẹ iruo aghwoghwo na ji-i. Ọghẹnẹ bruba kẹ ayen gbidiki. Ọnana yen obo re phia kẹ Inenikristi rẹ ẹgbukpe ujorin rẹsosuọ, ọtiọyen ọ je hepha kẹ Iseri ri Jihova nonẹna.

2, 3. Ọrọnvwọn ọghanghanre vọ yen a sa jokaphiyọ vwẹ ọbe rẹ Iruo rẹ Iyinkọn Na?

² Aphro herọ-ọ nẹ ọbe rẹ Iruo rẹ Iyinkọn Na rọ vọnre vẹ ikuegbe rẹ ihwo ri dje esegbuyota phia na ghene bọn wẹ gan dẹn! Ọnana ọbe rẹ oghẹresan kidie ọyen ọbe vuọvo rẹ ẹwẹn ọfuanfon na mu ihwo vwo si kpahen ikuegbe rẹ Inenikristi rẹ ẹgbukpe ujorin rẹsosuọ.

³ Ọbe rẹ Iruo rẹ Iyinkọn Na djunute edẹ rẹ ihwo 95 ri nẹ ẹkuotọ 32, irere 54 kugbe etọ rẹ ame riariẹ phiyọ 9 rhe. Ọnana ikuegbe ọghanghanre ro shekpahen ihwo sansan kerẹ ihwo ghevweghe, ihwo ri kpo ẹga rẹ efian re kparoma, ihwo rehẹ ẹdia rẹ usuon ri phuoma kugbe ihwo re vwọsua re djoma. Ẹkẹvuọvo, obo re ma vwerhoma vwọ yen, ọnana ikuegbe rẹ iniọvo wẹn rẹ ẹgbukpe ujorin rẹsosuọ. Ọ dia ayen di hirharoku ebẹnbẹn rẹ akpeyeren ọvo-o, ayen ji ghwoghwo iyẹnrẹn esiri na vẹ oruru.

4. Diesorọ avwanre vwo vwo oyerinkugbe rẹ oghẹresan vẹ ihwo kerẹ Pọl, Tabita kugbe iseri efa re fuevun vwẹ ọke awanre?

⁴ Omarẹ ẹgbukpe 2,000 yen wanre vwo nẹ ọke rẹ ọyinkọn Pita kugbe Pọl re dia ihwo ri vwo oruru vwo yerin, ọtiọyen ji te ihwo kerẹ, Luk rọ dia ọbo re vwo ẹguọnọ rọyen mamọ na, Banabas ro ruẹse mamọ, Stivin ro vwo uduoyivwin, Tabita ro vwo omamọ rẹ ẹwẹn, Lidia rọ ghọ erhorha mamọ, kugbe iseri efa buebun ri fuevun. Dede nẹ ayen yerin ọke grongron re, jẹ avwanre vẹ ayen vwo oyerinkugbe rẹ oghẹresan. Diesorọ? Kidie ọkpọ rẹ iruo vuọvo rẹ ayen ruru rọ dia iruo rẹ odibo egbe na yen avwanre ji ruẹ. (Mt 28:​19, 20) Ọyen okpuphẹn rẹ avwanre vwo vwobọ vwẹ iruo nana!

5. Tivọ yen idibo ri Jesu rẹ ọke awanre da tuẹn iruo aghwoghwo rayen phiyọ?

⁵ Roro kpahen iruo ri Jesu vwọ kẹ idibo rọyen. “Ovwan che vwo ogangan  ọke rẹ ẹwẹn ọfuanfon na de bru ovwan rhe, kẹ ovwan cha dia iseri mẹ vwẹ Jerusalẹm, vwẹ Judia kugbe Sameria ejobi, rhirin re te asan ro me sheri vwẹ akpọ na.” (Iru 1:8) Ẹsosuọ, ẹwẹn ọfuanfon na vwẹ ẹgba kẹ idibo na rẹ ayen vwo soseri “vwẹ Jerusalẹm.” (Iru 1:1–8:3) Ọyena vwọ wan nu, womarẹ odjekẹ rẹ ẹwẹn ọfuanfon na, ayen de soseri “vwẹ Judia kugbe Sameria ejobi.” (Iru 8:4–13:3) Ọke vwọ yanran na, ayen de ghwoghwo iyẹnrẹn esiri na “re te asan ro me sheri vwẹ akpọ na.”​—Iru 13:4–28:31.

6, 7. Die yen avwanre vwori re vwo ruiruo rẹ aghwoghwo na nonẹna rẹ Inenikristi rẹ ẹgbukpe ujorin rẹsosuọ vwori-i?

⁶ Ọsoso ri Baibol na je rhe dia ọke rẹ iniọvo avwanre rẹ ẹgbukpe ujorin rẹsosuọ vwo ruiruo rẹ aghwoghwo na-a. Ọ da phẹre mamọ, omarẹ 41 C.E. yen Ikuegbe rẹ Akpeyeren ri Jesu ri Matiu siri rhe vwọ dia. Pọl si evo vwẹ usun rẹ ileta ro siri re tavwen e ki si ọbe rẹ Iruo rẹ Iyinkọn Na re vwẹ omarẹ 61 C.E. Ẹkẹvuọvo, Inenikristi rẹ ẹgbukpe ujorin rẹsosuọ vwo ọsoso rẹ Isiesi Ọfuanfon na komobọ yẹrẹ ẹbe ukoko na rẹ ayen sa yan jovwo kẹ ohwo ro dje omavwerhovwẹn phia-a. Tavwen ayen ke rhe dia idibo ri Kristi, ihwo ri Ju re dia Inenikristi nyo ọke re de se Ẹbẹre ra Vwẹ Hibru si Vwẹ Isiesi Ọfuanfon Na vwẹ Sinagọg. (2Kọ 3:​14-16) Ẹkẹvuọvo, o ji fo nẹ ihwo nana muomaphiyọ eyono rẹ Isiesi Ọfuanfon na kidie ọ họhọre nẹ afọnrhe yen ayen se ẹkpo sansan rẹ isiesi na nẹ cha.

⁷ Nonẹna, buebun rẹ avwanre vwo Baibol romobọ vẹ ẹbe sansan ra fan nẹ Baibol na rhe. Avwanre gbe idibo womarẹ avwanre vwo ghwoghwo iyẹnrẹn esiri na vwẹ ẹkuotọ 240 vwẹ ejajẹ buebun.

8, 9. (a) Die yen ẹwẹn ọfuanfon na vwẹ ukẹcha vwọ kẹ idibo ri Jesu vwo ru? (b) Die yen odibo rọ fuevun na teyanphia womarẹ ukẹcha rẹ ẹwẹn ọfuanfon rẹ Ọghẹnẹ?

⁸ Ọke ri Jesu vwọ vwẹ owian vwọ kẹ idibo rọyen nẹ ayen dia iseri, ọ da vuẹ ayen nẹ: “Ovwan che vwo ogangan ọke rẹ ẹwẹn ọfuanfon na de bru ovwan rhe.” Womarẹ odjekẹ rẹ ẹwẹn ọfuanfon na, idibo ri Jesu ki se soseri vwo nene akpọneje. Womarẹ ukẹcha rẹ ẹwẹn ọfuanfon na, Pita vẹ Pọl sivwin ihwo, djẹ ẹwẹn rẹ Idẹbono phia, je tobọ rhọvwọn ihwo ri ghwuru! Ẹkẹvuọvo, o vwo orọnvwọn ọghanghanre ọfa rẹ ẹwẹn ọfuanfon na ji mu ayen vwo ru. Ọ chọn iyinkọn na vẹ idibo efa uko, ayen se vwo yono ihwo efa vwo vwo erianriẹn ọgbagba rọ nẹrhẹ ohwo vwo arhọ ri bẹdẹ.​—Jọ 17:3.

⁹ Vwẹ ẹdẹ ri Pẹntikost 33 C.E., idibo ri Jesu ke “jẹ ejajẹ sansan kirobo rẹ ẹwẹn na mu ayen vwọ jẹ.” Ọtiọyena, kẹ ayen soseri kpahen “iruo rẹ igbunu rẹ Ọghẹnẹ.” (Iru 2:​1-4, 11) Nonẹna, avwanre jẹ ejajẹ vwẹ idjerhe rẹ igbevwunu-u. Ẹkẹvuọvo, womarẹ ukẹcha rẹ ẹwẹn ọfuanfon rẹ Ọghẹnẹ, odibo rọ fuevun na teyen ẹbe ra fan nẹ Baibol na rhe vwẹ ejajẹ buebun re. Kerẹ udje, iduduru rẹ Uwevwin Orhẹrẹ vẹ Awake! yen a teyanphia kemeranvwe kemeranvwe, avwanre ji vwo ẹbe vẹ ividio ra fan nẹ Baibol rhe vwẹ ejajẹ re vrẹ 1,000 vwẹ wẹbsaiti rẹ avwanre jw.org. Enana eje yen chọn avwanre uko vwo ghwoghwo “iruo rẹ igbunu rẹ Ọghẹnẹ” vwọ kẹ ihwo ri nẹ ẹgborho, uvwiẹ kugbe ejajẹ sansan rhe.​—Ẹvw 7:9.

10. Die yen e ru wiẹn kpahen efanfan ri Baibol na rhanvwẹ 1989 rhire?

 ¹⁰ Rhanvwẹ 1989 yen odibo rọ fuevun na vwo muomaphiyọ ẹfan rẹ Efanfan rẹ Akpọ Kpokpọ rẹ Isiesi Ọfuanfon Na rere a sa vwọ fan kpo ejajẹ buebun. A fan Baibol nana kpo ejajẹ re vrẹ 200 re, a je ghare iduduru buebun rayen ra teyenphia re, a je teyen efa rhi te ọke nana. Ukẹcha rẹ Ọghẹnẹ womarẹ ẹwẹn ọfuanfon rọyen yen sa nẹrhẹ e ruẹ ọnana wiẹn.

11. Die yen e rure kpahen efanfan rẹ ẹbe rẹ Iseri ri Jihova re?

¹¹ Inenikristi uriorin buebun yen vwomakpahotọ vwọ kẹ iruo rẹ efanfan vwẹ ẹkuotọ vẹ ibrotọ re vrẹ 150. Ofori nẹ o gbe avwanre unu-u, kidie o vwo ukoko ọfa vwẹ akpọ na rẹ ẹwẹn ọfuanfon na vwẹ ukẹcha kẹ vwo “soseri ro fiotọ” vwẹ akpọneje kpahen Jihova Ọghẹnẹ, Ovie rẹ Uvie rọyen kugbe Uvie re vwo mu vwẹ odjuvwu re na-a!​—Iru 28:23.

12. Mavọ yen Pọl kugbe Inenikristi efa se vwo ruiruo rẹ aghwoghwo na?

¹² Ọke ri Pọl vwo soseri kẹ ihwo ri Ju vẹ Ihwo rẹ Ikeferi vwẹ Antiọk vwẹ Pisidia, “ihwo . . . ri vwo omamọ ẹwẹn rẹ ayen vwọ dia idjerhe ro suẹn kpo arhọ ri bẹdi bẹdẹ de rhi segbuyota.” (Iru 13:48) Luk ku ọbe rẹ Iruo rẹ Iyinkọn Na phiyọ rọ vwọ tanẹ Pọl, “ghwoghwo Uvie rẹ Ọghẹnẹ na . . . vẹ ugbomọphẹ rẹ ota rode, emu vuọvo dobọ rọyen ji-i.” (Iru 28:31) Tivọ yen ọyinkọn na de ghwoghwo? Rom rọ dia otorere rẹ ẹgba rẹ usuon rẹ akpọneje vwẹ ọke yena! Te ọ dianẹ womarẹ eta yẹrẹ ena efa, idibo ri Jesu rẹsosuọ ruiruo rẹ aghwoghwo rayen womarẹ ukẹcha vẹ odjekẹ rẹ ẹwẹn ọfuanfon na.

13. Diesorọ o vwo fo nẹ a nẹrhovwo ọke re de muẹkpahan avwanre?

¹³ Ọke rẹ idibo ri Jesu rẹsosuọ vwo rhiẹromrẹ omukpahen, ayen rẹ Jihova vwọ kẹ uduoyivwin. Die kọyen phiare? Ayen da vọn vẹ ẹwẹn ọfuanfon na ji vwo ẹgba ayen vwọ ta ota rẹ Ọghẹne vẹ uduoyivwin. (Iru 4:​18-31) Avwanre je yare ukẹcha mie Ọghẹnẹ nẹ ọ kẹ avwanre ẹgba vẹ aghwanre e se vwo soseri dede nẹ e muẹkpahan avwanre. (Jem 1:​2-8) Kidie nẹ Ọghẹnẹ brẹba kẹ avwanre je chọn avwanre uko womarẹ ẹwẹn ọfuanfon rọyen, kọ nẹrhẹ e se muomaphiyọ iruo aghwoghwo na. O vwo emu vuọvo rọ sa dobọ rẹ iruo rẹ aghwoghwo na ji-i, te ọ dia ẹvwọsuọ yẹrẹ omukpahen ọgangan. Ọke re de muẹkpahan avwanre, ofori nẹ a nẹrhovwo vwọ yare ẹwẹn ọfuanfon rẹ Ọghẹnẹ kugbe aghwanre vẹ uduefiogbere e se vwo ghwoghwo iyẹnrẹn esiri na.​—Lu 11:13.

14, 15. (a) Die yen phiare “fikirẹ ukpokpogho rọ vwomaphia fikirẹ Stivin”? (b) Mavọ yen ihwo buebun vwẹ Siberia rhe vwọ mrẹ uyota na vughe vwẹ ọke rẹ avwanre na?

¹⁴ Stivin nabọ fiudugberi soseri tavwen ivwighrẹn rọyen ke teyọn hwe. (Iru 6:5; 7:​54-60) Ọke rẹ “omukpahen rode” vwọ vwomaphia vwẹ ọke yena, idibo na eje da hrabọ nene Judia vẹ Sameria jokparẹ iyinkọn na ọvo. Ẹkẹvuọvo, ọyena dobọ rẹ iruo rẹ aghwoghwo na ji-i. Filip de kpo Sameria re “ghwoghwo Kristi na,” iruo rẹ aghwoghwo rọyen na ghwa erhuvwu rhe. (Iru 8:​1-8, 14, 15, 25) Vwọba, Baibol na da niyẹnrẹn rọyen nẹ: “Ihwo re hrabọ fikirẹ ukpokpogho rọ vwomaphia fikirẹ Stivin  da djẹ shesheri kpo Fonisha, Saiprọs, kugbe Antiọk, jẹ ihwo ri Ju ọvo yen ayen ta ota na kẹ. Ẹkẹvuọvo, evo vwẹ usun rẹ ihwo na ri nẹ Saiprọs kugbe Sairini rhe da rhe Antiọk, kẹ ayen ta ota kẹ ihwo re jẹ Grik, jẹ ayen ghwoghwo iyẹnrẹn esiri rẹ Ọrovwori na Jesu.” (Iru 11:​19, 20) Ọke yena, omukpahen da nẹrhẹ ovuẹ rẹ Uvie na hẹrephiyọ.

¹⁵ Vwẹ ọke rẹ avwanre na, emu tiọyen je phia vwẹ Soviet Union rẹ awanre. Ma rho vwẹ ikpe re kpahen 1950, Iseri ri Jihova uriorin buebun yen e mu kpo ighuvwu vwẹ Siberia. Kidie nẹ ayen hrabọ ro asan sansan, ọkieje kọyen e vwo ghwoghwo iyẹnrẹn esiri na ro ẹkuotọ ọrhuarho yena. O vwo idjerhe vuọvo rẹ Iseri buebun tiọyena rha sa vwọ mrẹ igho foma kpo imaili 6,000 re ghwoghwo iyẹnrẹn esiri na-a! Ẹkẹvuọvo, igọmẹti na komobọ kọyen mu ayen kpo ẹkuotọ yena. Oniọvo ọshare ọvo da ta: “Kirobo rọ phiare, usuon na komobọ kọyen nẹrhẹ ihwo ri vwo ẹwẹn esiri rehẹ Siberia rhe mrẹ uyota na vughe.”

16, 17. Imuẹro vọ yen ọbe rẹ Iruo rẹ Iyinkọn na kẹ avwanre kpahen ebruba ri Jihova vwẹ iruo rẹ aghwoghwo na?

¹⁶ Jihova ghini bruba kẹ Inenikristi rẹ ẹgbukpe ujorin rẹsosuọ. Pọl vẹ ihwo efa kọnre ji ku ame ku “ẹkẹvuọvo Ọghẹnẹ kọyen nẹrhẹ ọ djẹ.” (1Kọ 3:​5, 6) Iyẹnrẹn rehẹ ọbe rẹ Iruo rẹ Iyinkọn Na djerephia nẹ iruo rẹ aghwoghwo na hẹrephiyọ kidie Jihova bruba kẹ ayen. Kerẹ udje, “ota rẹ Ọghẹnẹ kọ hẹrẹphiyọ, idibo na ki buẹnphiyọ vwẹ Jerusalẹm.” (Iru 6:7) Iruo rẹ aghwoghwo na vwọ hẹrẹphiyọ na, “ikoko na eje rehẹ Judia, Galili kugbe Sameria da ro ọke rẹ ufuoma, jẹ a bọn ayen gan; rọ vwọ dianẹ ayen yan vwẹ oshọẹdjẹ ri Jihova kugbe uchebro rẹ ẹwẹn ọfuanfon na, kẹ ayen buẹnphiyọ.”​—Iru 9:31.

¹⁷ Iseri ri fiudugberi yen ghwoghwo ota na vwọ kẹ ihwo ri Ju vẹ ihwo re jẹ ejajẹ ri Grik vwẹ Antiọk ri Siria. Iyẹnrẹn na da ta, “vwọba, obọ ri Jihova vẹ ayen herọ, ihwo buebun de rhi segbuyota, ayen de kurhẹriẹ bru Ọrovwori na ra.” (Iru 11:21) Ẹyan-obaro efa ra je mrẹ vwẹ orere na yen: “Ota ri Jihova kọ hẹrẹphiyọ, ihwo buebun ki ji segbuyota.” (Iru 12:24) Aghwoghwo ri Pọl vẹ ihwo efa vwẹ ohri rẹ Ihwo rẹ Ikeferi na ghwoghwori da nẹrhẹ “ota ri Jihova” rhophiyọ je hẹrephiyọ vwẹ idjerhe rode.​—Iru 19:20.

18, 19. (a) Mavọ yen avwanre vwọ riẹn nẹ “obọ ri Jihova” vẹ avwanre herọ? (b) Djudje ọvo ro djerephia nẹ Jihova biẹcha ihwo rọyen.

¹⁸ Aphro herọ-ọ, “obọ ri Jihova” vẹ avwanre je herọ nonẹna. Ọnana yen sorọ ihwo buebun vwo se ota na gbuyota, vwomakpahotọ kẹ Ọghẹnẹ ji bromaphiyame. Vwọba, womarẹ ukẹcha ri Jihova vẹ ebruba rọyen yen e se vwo chirakon rẹ ẹvwọsuọ ọgangan; ọkiọvo womarẹ omukpahen ọgangan; e ji se ruiruo rẹ aghwoghwo rẹ avwanre fiotọ kirobo ri Pọl vẹ Inenikristi efa vwẹ ẹgbukpe ujorin rẹsosuọ ruru. (Iru 14:​19-21) Jihova vẹ avwanre herọ ọkieje. “Abọ ri bẹdẹ” rọyen na biẹcha avwanre vwevunrẹ ebẹnbẹn rẹ avwanre eje. (Urh 33:27) E jẹ a karophiyọ nẹ o vwo ọke vuọvo ri Jihova cha vwọ kpairoro vrẹ ihwo rọyen fikirẹ odẹ rọye-en.​—1Sa 12:22; Un 94:14.

 ¹⁹ E vwo dje udje rọyen: Kidie nẹ Oniọvo Harald Abt muomaphiyọ iruo rẹ aghwoghwo na, usuon ri Nazi de muo kpo ọko rẹ oja vwẹ Sachsenhausen vwẹ Ofovwin rẹ Akpọeje II. Vwẹ May 1942, isodje ri Nazi de kpo uwevwin rẹ aye rọyen re se Elsa, ayen de mu ọmọtẹ rayen otete ji mu Elsa. E muro kpo ọko rẹ oja sansan. Oniọvo aye Abt da ta: “Ikpe buebun re me ghwọrọre vwẹ ọko rẹ oja sansan vwẹ Germany yono uvwe uyono ọghanghanre ọvo. Me rhe mrẹvughe nẹ ẹwẹn ọfuanfon ri Jihova sa bọn ohwo gan vwẹ ẹdia ọdavwini ọgangan! Tavwen e ki mu uvwe, mi se ileta rẹ oniọvo aye ọvo siri rọ tare nẹ ọke ohwo de hirharoku ọdavwini ọgangan, ẹwẹn ọfuanfon ri Jihova sa nẹrhẹ ohwo vwo ẹwẹn ri dọe. Mi rorori nẹ o djere vrẹka emerha. Ẹkẹvuọvo, ọke ro vwo te vwe oma re, me da mrẹ nẹ obo rọ tare na uyota. Ọtiọyen ọ ghene phia wan. Wọ cha sa vwẹ ẹwẹn roro-o, jokpanẹ kọ phia kẹ wẹ. Ọnana dẹn yen obo re ghene phia kẹ vwẹ.”

20. Die yen Pọl ruru ọke ra vwọ kanrọ vwẹ uwevwin romobọ rọyen, kẹ idjerhe vọ yen ọnana sa vwọ dia ọbọngan vwọ kẹ iniọvo rẹ avwanre evo?

²⁰ Ọbe rẹ Iruo rẹ Iyinkọn Na kuphiyọ rọ vwọ tanẹ Pọl “ghwoghwo Uvie rẹ Ọghẹnẹ na” vẹ oruru. (Iru 28:31) Pọl vwo ugbomọphẹ ro se vwo ghwoghwo vwo nẹ uwevwin kpo uwevwin vwẹ Romu-u, kidie nẹ a kanrerọ phiyọ uwevwin romobọ rọyen. Dedena, o ji soseri kẹ ihwo eje ri bruro rhe. Nonẹna, iniọvo avwanre evo se vrẹn nẹ uwevwi-in, ọ sa dianẹ ayen se vrẹn nẹ ehwa-a, yẹrẹ vwẹ ẹkuotọ evo ayen hẹ asan ra da vwẹrote ihwo fikirẹ ọghwo, ọga yẹrẹ jẹ omakpokpọ evwo. Ẹkẹvuọvo, ẹguọnọ rayen kpahen Ọghẹnẹ vẹ owenvwe rẹ ayen vwo soseri rhoma ganphiyọ. Avwanre sa nẹrhovwo kẹ ayen je vuẹ Ọsẹ rẹ avwanre rọhẹ obodjuvwu nẹ e jẹ ayen mrẹ ihwo ri vwo owenvwe ri vwo yono kpahọn vẹ ọhọre rọyen.

21. Diesorọ avwanre vwo soseri vẹ ẹwẹn rẹ okpakpa?

²¹ Buebun rẹ avwanre se vwobọ vwẹ iruo rẹ nẹ uwevwin kpo uwevwin vẹ ena efa re vwo ruiruo rẹ odibo egbe na. Ọtiọyena, e jẹ avwanre ohwo ọvuọvo ru obo re se ru eje e se vwo ruiruo rẹ avwanre gba kerẹ ighwoghwota rẹ Uvie na, womarẹ e vwo soseri “re te asan ro me sheri vwẹ akpọ na.” Ofori nẹ avwanre ruiruo nana vẹ ẹwẹn rẹ okpakpa, kidie “oka” rẹ ọrhire ri Kristi na ghini muẹro. (Mt 24:​3-14) O vwo ọke ehwe-e. Enẹna, avwanre vwo “iruo buebun . . . [re] che rhe ruẹ vwevunrẹ Ọrovwori na.”​—1Kọ 15:58.

22. Die yen avwanre brorhiẹn rọyen ra vwọ hẹrhẹ ẹcha rẹ ẹdẹ ri Jihova na?

²² Avwanre vwọ hẹrhẹ ẹcha rẹ “ẹdẹ rode ro mu oshọ rẹ Ọrovwohwo na,” e jẹ avwanre brorhiẹn re vwo soseri ro fiotọ kpobarophiyọ vẹ uduoyivwin. (Joẹ 2:31) O ji vwo ihwo buebun rẹ avwanre je cha yan mrẹ re pha kerẹ ihwo ri Biria ri “rhiabọreyọ ota na vẹ owenvwe ọgangan.” (Iru 17:​10, 11) Ọtiọyena, e jẹ avwanre muomaphiyọ iruo rẹ oseri ese na rhi te ọke rẹ avwanre che vwo nyo eta nana: “Wo ruru, odibo esiri rọ je fuevun!” (Mt 25:23) Nonẹna, avwanre de ruiruo rẹ odibo egbe na vẹ oruru je fuevun kẹ Jihova ọkieje, o muẹro nẹ avwanre cha ghọghọ rhirin bẹdẹ, kidie avwanre vwo uphẹn re vwo “soseri ro fiotọ kpahen Uvie rẹ Ọghẹnẹ”!