1, 2. Emu rẹ igbevwunu vọ yen Pita vẹ Jọn ruru vwẹ anurhoro rẹ uwevwin rẹ ẹga na?

 VWẸ oghẹruvo rẹ ẹdẹ yena, uvo na re lo muẹ otu na. Ihwo ri Ju ri vwo oruru rẹ ẹga vẹ idibo ri Kristi rhe tue ruẹ uwevwin rẹ ẹga na. O rhe che kri-i, “ọke rẹ ẹrhovwo” ko che te. a (Iru 2:46; 3:1) Pita vẹ Jọn da wan uvwre rẹ ihwo buebun na kpo anurhoro rẹ uwevwin rẹ ẹga na re se Erhuvwu. Ihwo buebun vwọ ta ota, re ji vwo nyo edo rẹ ichiyin rayen na, jẹ ọshare ọvo rọhẹ uvwre rẹ ẹgbukpe 45 fiẹ 65 rọ yare igho rọ je dia ukpono nẹ evun rhe kperẹ phia gorigori.​—Iru 3:2; 4:22.

² Pita vẹ Jọn vwo siẹkẹrẹ re, ọshare rọ yare igho na da tuẹn eta rọ ta vwọ yare igho phiyọ. Iyinkọn na da domaji, ọshare na da tẹnrovi ayen vẹ iphiẹrophiyọ. Pita da ta: “Mi vwo idọnọ ọfuanfon kugbe oro-o, jẹ obo ri mi vwori yen me cha vwọ kẹ wẹ. Vwẹ odẹ ri Jesu Kristi ohwo ri Nazarẹt, yan!” Vwẹ ẹwẹn roro obo ro gbe otu na unu te ọke ri Pita vwọ yọnre obọ rẹ ukpono na kidie ọna yen obọ rẹsosuọ ọshare nana vwọ vwẹ awọ rọyen ivẹ mudia. (Iru 3:​6, 7) Wọ sa vwẹ ẹwẹn roro ọke ọshare na vwo nẹ awọ rọyen, je davwẹngba rọ vwọ jẹ owọ rẹ oyan vwẹ obọ rẹsosuọ? A gbe ta ro vwo pho kpenu pho kpotọ je kpẹvwẹ Ọghẹnẹ gangan!

3. Okẹ ọghanghanre vọ yen a vwọ kẹ otu na vẹ ọshare na rọ dia ukpono jovwo na?

³ Otu nana rẹ oma vwerhan na da djẹ bru Pita vẹ Jọn ra vwẹ ugana ri Solomọn. Vwẹ etiyin, Pita de dje ọghanrovwẹ rẹ obo re ghwa phia na phephẹn vwọ kẹ otu na. Jesu ji ke mudia yono ihwo vwẹ etinẹ na vwẹ ọke rọ wanre. (Jọ 10:23) Ọ vwẹ obo re vrẹ idọnọ vẹ oro vwọ kẹ otu na vẹ ọshare na rọ dia ukpono jovwo na. Okẹ nana rọ vwọ kẹ ayen na tobọ ghanre vrẹ omakpokpọ. Ọ kẹ ayen uphẹn rẹ ayen vwo kurhẹriẹ, a vwọ vwẹ imwemwu rayen vwo ghovwo ayen, kugbe ayen je vwọ dia ihwo ri che nene ọ ri Jihova vwo mu “Onotu rẹ arhọ na,” rọ dia Jesu Kristi.​—Iru 3:15.

4. (a) Aphro vọ yen emu rẹ igbevwunu na soro? (b) Enọ ivẹ vọ yen a cha kpahenphiyọ?

⁴ A mrẹ vwo dje ẹdẹ yena-a! E sivwin ọshare ọvo rọ dia ukpono, enẹna  ọ yanre. A vwẹ uphẹn kẹ ihwo buebun ayen vwo vwo erianriẹn ọgbagba rẹ Ọghẹnẹ rere ayen vwọ yan vwẹ idjerhe ro shephiyọ vwẹ ẹro rẹ Ọghẹnẹ. (Kọl 1:​9, 10) Vwọba, obo re phiare vwẹ ẹdẹ yena so aphro vwẹ uvwre rẹ idibo ri Kristi re fuevun vẹ ihwo ri suẹn re davwẹngba ayen vwọ dobọ rẹ idibo na ji rere ayen vwo jẹ ovuẹ rẹ Uvie na eghwoghwo. (Iru 1:8) Die yen e se yono nẹ ona vẹ uruemu ri Pita vẹ Jọn re dia “ihwo re yonori-i kugbe ihwo ghevweghe” na djephia ọke rẹ ayen vwo ghwoghwo ota vwọ kẹ otu na? b (Iru 4:13) Mavọ yen a sa vwọ vwẹrokere oborẹ ayen vẹ idibo ichekọ na ruru ọke ayen vwo hirharoku ẹvwọsuọ?

5. Die yen avwanre yono mie Pita kpahen obo rọ ta ota kẹ otu na wan?

⁵ Pita vẹ Jọn riẹnre nẹ evo usun rẹ ihwo rẹ ayen mudia obaro rayen na yen tare nẹ e hwe Jesu. (Mk 15:​8-15; Iru 3:​13-15) Roro kpahen uduoyivwin ri Pita djephia ọke ro vwo fiudugberi ta phia gorigori nẹ odẹ ri Jesu yen ọyen vwo sivwin ukpono na. Pita rhurhu uyota na-a. Ọ nabọ dje phiọngun nẹ otu na vwobọ vwẹ ughwu ri Kristi. Ẹkẹvuọvo, Pita vwẹ ọke vuọvo vwo phi oborẹ ihwo na ruru phiyọ evu-un, kidie ayen ruro vwọrẹ “jẹriẹn.” (Iru 3:17) Pita ta ota kẹ ayen kerẹ oniọvo rayen, ọ je tẹnrovi erhuvwu rẹ ovuẹ rẹ Uvie na cha ghwa rhe. Ayen de kurhẹriẹ ji se Kristi gbuyota, kẹ ayen sa mrẹ “ọke rẹ ufuoma” nẹ obọ ri Jihova rhe. (Iru 3:19) Ọke re de ghwoghwo ẹcha rẹ ẹdjọeguo rẹ Ọghẹnẹ na, o ji fo nẹ avwanre ta phiọngun vẹ uduoyivwin. E je ruẹ ọnana vẹ aroeyinvwo yẹrẹ reyọ ihwo efa vwo guẹdjọ-ọ. Ukperẹ ọtiọyen, e je nẹ ihwo re ghwoghwo kẹ na kerẹ ihwo re sa rhe dia iniọvo avwanre vwẹ obaro na, a me je tẹnrovi erhuvwu rẹ Uvie na cha ghwa rhe kirobo ri Pita ruru.

6. Idjerhe vọ yen Pita vẹ Jọn vwo dje omaevwokpotọ phia?

⁶ Iyinkọn na vwomakpotọ. Ayen rhiabọreyọ ujiri fikirẹ emu rẹ igbevwunu rẹ ayen ruru na-a. Pita da ta kẹ otu na: “Diesorọ ovwan vwo nẹ avwanre kerẹsiẹ ra da mrẹ nẹ ogangan romobọ rẹ avwanre yẹrẹ evun-ẹfuọn kẹ Ọghẹnẹ yen avwanre vwọ nẹrhẹ ọ yan?” (Iru 3:12) Pita vẹ iyinkọn ichekọ na riẹnre nẹ ẹgba rẹ Ọghẹnẹ yen sa nẹrhẹ ayen ru kemu kemu wiẹn vwẹ iruo rẹ aghwoghwo na ukperẹ ogangan romobọ rayen. Ọnana yensorọ ayen vwọ vwomakpotọ vwẹ ujiri na ejobi vwo rhe Jihova vẹ Jesu.

7, 8. (a) Okẹ vọ yen avwanre sa vwọ kẹ ihwo efa? (b) Idjerhe vọ yen ive re vwo ru “erọnvwọn eje phiyọ ọkpokpọ” vwo ruẹgba nonẹna?

⁷ O ji fo nẹ avwanre dje oka rẹ omaevwokpotọ tiọyena phia ọke ra da hẹ iruo rẹ aghwoghwo na. Vwọrẹ uyota, ẹwẹn ọfuanfon rẹ Ọghẹnẹ vwẹ ẹgba kẹ Inenikristi ri nonẹna ayen vwo sivwin ihwo vwẹ idjerhe rẹ igbevwunu-u. Dedena, avwanre sa chọn ihwo uko vwo vwo esegbuyota kpahen Ọghẹnẹ vẹ Kristi je nẹrhẹ okẹ ri Pita vwọ kẹ ihwo na ji te ayen obọ rọ dia ra vwọ vwẹ imwemwu  rayen vwo ghovwo ayen je mrẹ ufuoma vwo nẹ obọ ri Jihova rhe. Kukpe kukpe yen ihwo buebun vwo rhiabọreyọ okẹ nana ji bromaphiyame kerẹ idibo ri Kristi.

⁸ Vwọrẹ uyota, avwanre yerẹn vwẹ ọke re de che ru “erọnvwọn eje phiyọ ọkpokpọ” ri Pita ji djunute. Vwo nene orugba rẹ oborẹ “Ọghẹnẹ tare womarẹ emraro efuanfon rọyen rẹ awanre” na, a vwẹ Uvie na vwo mu vwẹ odjuvwu vwẹ ukpe ri 1914. (Iru 3:21; Un 110:​1-3; Da 4:​16, 17) Ọmọke krẹn rẹ ọyena vwọ wan nu, Kristi da tuẹn ẹroevwote rẹ ẹrhomavwomuẹ rẹ ẹga rẹ uyota phiyọ. Ukuotọ rọyen, iduduru rẹ ihwo da rhe ro ukoko ri Jihova rọ dia iparadaisi rẹ ẹwẹn na je dia emotọ rẹ Uvie rẹ Ọghẹnẹ. Ayen gbobọnyẹ iruemu rẹ awanre na ji “ku uruemu ọkpokpọ na phiyọ, ra mare vwo nene ọhọre rẹ Ọghẹnẹ.” (Ẹf 4:​22-24) Kirobo rẹ ẹwẹn ọfuanfon rẹ Ọghẹnẹ nẹrhẹ e se sivwin ukpono rọ yare igho ye, eriyin ọ je chọn avwanre uko vwo ruiruo rẹ aghwoghwo na fiotọ nonẹna, ọ dia ẹgba avwanre-e. Kerẹ Pita, ofori nẹ avwanre ji fiudugberi je nabọ reyọ Ota rẹ Ọghẹnẹ vwo yono ihwo efa. Ẹgba rẹ Ọghẹnẹ yen vwẹ ukẹcha kẹ avwanre vwọ chọn ihwo efa uko vwọ dia idibo ri Kristi, ọ dia ẹgba avwanre-e.

9-11. (a) Die yen isun rẹ ihwo ri Ju ruru kpahen ovuẹ ri Pita vẹ Jọn? (b) Die yen iyinkọn na brorhiẹn rọyen nẹ ayen che ru?

⁹ Ota ri Pita kugbe ukperi rẹ ukpono re sivwinri ro pho kpenu pho kpotọ na da rhe so oyanghan. Eriyina, ọrọvwẹrote erhẹrotọ rẹ uwevwin rẹ ẹga na vẹ irherẹn na de brokpakpa re nẹ obo re phia. Ọ sa dianẹ eshare nana ihwo ri Sadiusi, ayen ihwo ri feri ri vwo ogangan vwẹ enu rẹ isuesun rẹ ọke yena re je davwẹngba ayen vẹ ihwo ri Rom vwo vwo omamọ rẹ oyerinkugbe. Ayen sen urhi re se kuẹ afọnrhe rẹ ihwo ri Farisi vwo ẹguọnọ kpahen mamọ na, ayen je vwẹ uyono rẹ evrẹnushi na vwo ruẹ ehwẹjẹ. c Ivun miovwo ayen mamọ ayen vwọ mrẹ Pita vẹ Jọn ri fiudugberi yono vwẹ uwevwin rẹ ẹga na nẹ a kpare Jesu nẹ ushi re.

¹⁰ Ihwo nana rẹ ivun miovwẹ na de mu Pita vẹ Jọn phiyọ uwodi, ayen de ji mu ayen kpo aguare rode rẹ ihwo ri Ju na vwẹ ẹdẹ rọ vwọ kpahọn. Isun ri nẹ oma rayen gegerege na ni Pita vẹ Jọn kerẹ “ihwo re yonori-i kugbe ihwo ghevweghe,” ri vwo uturhi rẹ ayen vwo yono vwẹ uwevwin rẹ ẹga na-a. Ayen kpo isikuru rẹ ẹga vuọvo-o. Oborẹ ayen gbaudu ta ota vẹ imuẹro wan gbe ihwo rehẹ aguare na unu. Die yen nẹrhẹ eta ri Pita vẹ Jọn se te ẹwẹn rẹ ihwo na? Iroro ọvo yen “ayen vẹ Jesu yen gba herọ jovwo.” (Iru 4:13) Onini rayen yonori kerẹ ohwo ro vwo ogangan, ọ dia kerẹ isiẹbe na-a.​—Mt 7:​28, 29.

¹¹ Ihwo rehẹ aguare na de jurhi kẹ iyinkọn na nẹ ayen rhe ghwoghwo ota ọfa-a. Vwẹ ọke yena, ihwo nẹ orhiẹn rẹ aguare na bruru kerẹ urhi. Udughwrẹn evo re wanre na ri Jesu vwọ vwomaphia vwẹ obaro rẹ aguare nana, ihwo rẹ aguare na da tanẹ, “O fo ughwu.” (Mt 26:​59-66) Dedena, oshọ mu Pita vẹ Jọni-i.  Vwẹ idjerhe rẹ ọghọ, Pita vẹ Jọn de fiudugberi vuẹ eshare nana ri feri, ri yono ẹbe kodo ri ji titi na eta nana: “Ovwan brorhiẹn na komobọ sẹ o shephiyọ vwẹ ẹro rẹ Ọghẹnẹ, rẹ avwanre vwọ kerhọ rẹ ovwan ukperẹ Ọghẹnẹ. Ẹkẹvuọvo vwọ kẹ avwanre, avwanre che jẹ oborẹ avwanre mrẹre vẹ oborẹ avwanre nyori ẹta-a.”​—Iru 4:​19, 20.

12. Die yen sa chọn avwanre uko vwo fiudugberi ji vwo imuẹro rọ ghwotọ?

¹² Wo ji se fiudugberi kirobo ayen fiudugberi na? Mavọ yen oma ru uwe ọke wo de vwo uphẹn wo vwo ghwoghwo ota kẹ ihwo ri feri, ri yono ẹbe kodo yẹrẹ ihwo ri titiri vwẹ ekogho wọ dia? Kẹ ọ da dianẹ ihwo rẹ orua wẹn, emọ isikuru yẹrẹ ihwo owẹ vẹ ayen gbe ruiruo vwọso wẹ fikirẹ esegbuyota wẹn vwo? Oshọ mu we? Ọ da dia ọtiọyen, wo se phikparobọ. Ọke ri Jesu vwọ hẹ otọrakpọ na, o yono iyinkọn na kpahen oborẹ ayen se vwo fiudugberi chochọn rẹ esegbuyota rayen vwẹ idjerhe rẹ ọghọ. (Mt 10:​11-18) Jesu vwo vrẹn nẹ ushi nu, o de ve kẹ idibo rọyen nẹ ọyen che nene ayen dia “vwẹ ẹdẹ na eje rhirin re te okuphiyọ rẹ eyeren na.” (Mt 28:20) Vwo nene odjekẹ ri Jesu, “odibo rọ fuevun rọ je ghwanre na” yono avwanre obo ra sa vwọ chochọn rẹ esegbuyota rẹ avwanre. (Mt 24:​45-47; 1Pi 3:15) A vwẹ odjekẹ nana phia womarẹ emẹvwa kerẹ ọ rẹ Akpeyeren Avwanre vẹ Iruo Ruvie Na kugbe ẹbe ra fan nẹ Baibol na rhe kerẹ uyovwinrota rẹ “Ẹkpahọnphiyọ rẹ Enọ rẹ Baibol Na” rọhẹ jw.org/urh. Wo kpo emẹvwa je reyọ ẹbe yẹrẹ iyovwinreta tiọyena vwo ruiruo? Wo de ru ọtiọyen, uduefiogbere vẹ imuẹro wẹn kọ cha ganphiyọ. Kerẹ iyinkọn na, wọ vwẹ uphẹn kẹ emu vuọvo nẹ ọ dobọ wẹ ji wo vwo jẹ ota ẹta kpahen uyota eghanghanre ru wo yonori vwẹ Baibol na-a.

13, 14. E de hirharoku ẹvwọsuọ, die yen ofori nẹ e ru, kẹ diesorọ?

¹³ Ugege re ghwe vwo siobọnẹ Pita vẹ Jọn vwo nẹ uwodi nu, ayen da ra vwomaba iniọvo ichekọ na. Ayen ejobi da “kpare urhuru kpenu se Ọghẹnẹ” je nẹrhovwo vwọ yare uduefiogbere ayen se vwo ghwoghwo. (Iru 4:24) Pita riẹnre dẹn nẹ ọyen emu rẹ ẹkpa ra vwọ vwẹroso ẹgba romobọ ọke ra da guọnọ ru ọhọre rẹ Ọghẹnẹ. Udughwrẹn evo re wanre na, Pita fiudugberi vuẹ Jesu nẹ, “ọ  da tobọ dianẹ ihwo ri chekọ na eje kprowọ fikirẹ obo re cha phia kẹ wẹ, me cha kprowọ bẹdẹ-ẹ!” Ẹkẹvuọvo, kirobo ri Jesu tare, Pita fobọ she fikirẹ oshọ rẹ ohworakpọ, ọ da sen ugbeyan rọyen rọ dia oyono na. Dedena, Pita yono vwo nẹ echobọ rọyen na rhe.​—Mt 26:​33, 34, 69-75.

¹⁴ Owenvwe wo vwori ọvo cha sa chọn wẹ uko vwo ruiruo ru wo vwo soseri kẹ Kristi na gba-a. Ọke rẹ ihwo re vwọsua da guọnọ dobọ rẹ iruo aghwoghwo wẹn ji, je nẹrhẹ esegbuyota wẹn dogho, gbe nene udje ri Pita vẹ Jọn. Nẹrhovwo rhe Jihova nẹ ọ kẹ wẹ ẹgba. Guọnọ ukẹcha mie iniọvo rẹ ukoko na. Vuẹ ekpako na vẹ iniọvo efa ri tedje ebẹnbẹn ru wo hirharokuẹ. Ẹrhovwo rẹ ihwo efa sa kẹ wẹ ẹgba vwo yerin ghene ẹdia na.​—Ẹf 6:18; Jem 5:16.

15. Udje vọ yen sa chọn wẹ uko ọ da dianẹ wọ dobọ rẹ iruo aghwoghwo na ji vwẹ ọmọke jovwo re?

¹⁵ Ọ da dianẹ ukeke nẹrhẹ oshọ mu we vwọ dobọ rẹ iruo aghwoghwo na ji vwẹ ọmọke jovwo re, wo jẹ ofu dje we-e. Karophiyọ nẹ iyinkọn na eje dobọ rẹ iruo aghwoghwo na ji vwẹ ọmọke ri Jesu vwo ghwu nu, ẹkẹvuọvo, o kriri-i ayen da rhoma tuẹn aghwoghwo phiyọ. (Mt 26:56; 28:​10, 16-20) Ukperẹ ofu vwo dje we fikirẹ echobọ ru wo ru wanre, wo se yono vwo nẹ obo re phia kẹ wẹ na je reyọ vwọ bọn ihwo efa gan?

16, 17. Die yen e se yono vwo nẹ ẹrhovwo rẹ idibo na nẹre vwẹ Jerusalẹm?

¹⁶ Die yen ofori nẹ a nẹrhovwo kpahen ọke ihwo ri vwo ogangan usuon da vwọsuọ avwanre? Jokaphiyọ nẹ ọ dia iyinkọn na yare nẹ e jẹ edavwini jẹ ayen oma ete-e. Ayen nabọ karophiyọ ota ri Jesu: “Ọ da dianẹ ayen mukpahen ovwẹ, ayen ji che mukpahen ovwan.” (Jọ 15:20) Ukperẹ ọtiọyen, idibo nana re fuevun na yare Jihova nẹ o “ni uguegue” rẹ ihwo re vwọsua na so. (Iru 4:29) Idibo na nabọ riẹn obo ri che nẹ obuko rọyen rhe, ayen mrẹvughe nẹ ẹvwọsuọ rẹ ayen hirharokuẹ na ọyen orugba rẹ aroẹmrẹ. Ayen riẹn ọnana vwo nene oborẹ Jesu yono ayen kpahen oborẹ ayen nẹrhovwo wan, nẹ e che ru ọhọre rẹ Ọghẹnẹ vwẹ akpọ na, o toro oborẹ isun rẹ akpọ nana tare-e.​—Mt 6:​9, 10.

¹⁷ Ayen se vwo ru ọhọre rẹ Ọghẹnẹ, idibo na da nẹrhovwo rhe Jihova: “Kẹ idibo wẹn uduoyivwin rẹ ayen vwọ ta ota wẹn ọkieje.” Kẹ die yen ẹkpahọnphiyọ ri Jihova ugege yena? “Asan rẹ ayen da ghwẹ oma koko na de kpogho, ayen ejobi da vọn vẹ ẹwẹn ọfuanfon na, kẹ ayen ta ota rẹ Ọghẹnẹ vẹ uduoyivwin.” (Iru 4:​29-31) O vwo emu  vuọvo rọ sa dobọ rẹ eruo rẹ ọhọre ri Jihova ji-i. (Aiz 55:11) O toro obo rọ gan te yẹrẹ oborẹ ihwo re vwọsua na vwo ẹgba te-e, avwanre da nẹrhovwo rhe Ọghẹnẹ, o muẹro nẹ ọ cha kẹ avwanre ẹgba a sa vwọ ta ota rọyen vẹ uduoyivwin.

18. Die yen iniọvo rehẹ ukoko ri Jerusalẹm ru vwọ kẹ ohwohwo?

¹⁸ O kriri-i, ukoko kpokpọ re vwo mu vwẹ Jerusalẹm de rhi vwo ihwo ri yerin tedje ri bun vrẹ 5,000. d Dede nẹ asan sansan yen idibo na nurhe, jẹ ayen eje vwo “ẹwẹn ọvo kugbe iroro ọvo.” (Iru 4:32; 1Kọ 1:10) Ọ dia idibo na nẹrhovwo rhe Jihova nẹ o bruba ẹgbaẹdavwọn rayen ọvo-o, ayen ji ru erọnvwọn efa. Ayen bicha ohwohwo womarẹ ayen vwọ bọn esegbuyota rẹ ohwohwo gan, je vwẹ ukẹcha rẹ emuọre vẹ erọnvwọn efa vwọphia vwẹ ọke ra vwọ guọnọ. (1Jọ 3:​16-18) Kerẹ udje, odibo re se Josẹf Banabas shẹ otọ rọyen, ọ da vwẹ igho na eje kpahotọ rere a sa vwọ vwẹ ukẹcha vwọ kẹ ihwo ri nẹ ẹkuotọ efa ri sherabọ rhe, rhe dia Jerusalẹm ọke grongron ayen se vwo yono kpobarophiyọ kpahen ẹga kpokpọ rayen.

19. Diesorọ Jihova vwọ teyen Ananayas kugbe Safira hwe?

¹⁹ Aye gbe ọshare ọvo re se Ananayas kugbe Safira je shẹ otọ, ayen da reyọ nẹ igho na vwọ kpahotọ. Ayen de me ru kerẹsiẹ a da mrẹ nẹ igho ayen vwọ shẹ otọ na eje yen ayen phi phiyotọ, ẹkẹvuọvo ayen “bẹbẹ si igho evo nu vwọ.” (Iru 5:2) Jihova da teyen aye gbe ọshare nana hwe, ọ dia o hwe ayen kidie nẹ uchunu rẹ igho na hanvwere-e, ẹkẹvuọvo ẹwẹn ọkon vẹ ophiẹnvwe yen ayen vwo ruo. Ayen “gun efian kẹ Ọghẹnẹ, ọ dia ihworakpọ-ọ.” (Iru 5:4) Kerẹ ihwo rẹ omeru ri Jesu brorhiẹn hwe, Ananayas kugbe Safira guọnọ ujiri rẹ ihworakpọ vwọ vrẹ ẹroesiri rẹ Ọghẹnẹ.​—Mt 6:​1-3.

20. Die yen avwanre yono kpahen okẹ ra vwọ kẹ Jihova?

²⁰ Kerẹ ẹwẹn ra vwọ kokẹ ro rhe idibo re fuevun vwẹ ẹgbukpe ujorin rẹsosuọ vwẹ Jerusalẹm ye, ọtiọyen iduduru rẹ Iseri ri Jihova rẹ ọke nana ji biẹcha iruo aghwoghwo rẹ akpọeje na womarẹ itetoro ro wonhwo. A gba ohwo vuọvo vwọ reyọ ọke yẹrẹ igho rọyen vwo biẹcha iruo nana-a. Vwọrẹ uyota, Jihova guọnọre nẹ a ga ọyen vẹ enuebro yẹrẹ kerẹ ihwo ra gba vwo ruẹ emu-u. (2Kọ 9:7) Ọ dia uchunu rẹ igho avwanre vwọ chọn ihwo efa uko yen kẹ Jihova omavwerhovwẹ-ẹn, ẹkẹvuọvo ẹwẹn ro muẹ avwanre vwo ruo. (Mk 12:​41-44) Avwanre guọnọre nẹ urhuru vẹ ujiri romobọ sun avwanre vwẹ ẹga avwanre vwọ kẹ Ọghẹnẹ kerẹ uruemu rẹ Ananayas kugbe Safira djephia-a. Ukperẹ ọtiọyen, kerẹ Pita, Jọn kugbe Banabas, e jẹ uvi rẹ ẹguọnọ re vwo kpahen Ọghẹnẹ vẹ irivẹ avwanre dia obo ri suẹn avwanre vwẹ ẹga avwanre vwọ kẹ Jihova.​—Mt 22:​37-40.