1, 2. Die yen Sọl guọnọ ruẹ vwẹ Damaskọs?

 IHWO evo rẹ opharo rayen muoshọ yan kpo Damaskọs, rọ dia asan rẹ ayen da guọnọ ru erọnvwọn ebrabra evo. Ayen cha vwọ tua idibo ri Jesu vwo nẹ uwevwin rayen, mu ayen, phọphọ ayen, ji kpono ayen kpo Jerusalẹm rere Sanhẹdrin na vwo gboja kẹ ayen.

² Onini rẹ ẹko na re se Sọl, vwobọ vwẹ ughwu rẹ ohwo ọvo jovwo re. a O kri nọ-ọ na, o nẹ inogbozighi rẹ ihwo ri Ju re dia irivẹ rọyen ọke ayen vwo phi Stivin rọ dia odibo ri Jesu rọ fuevun hwe. (Iru 7:57–8:1) Idibo ri Jesu ri Sọl muẹkpahan vwẹ Jerusalẹm te vwọ kẹ-ẹ, o ji muegbe ro vwo kpo irere efa re mukpahen idibo efa. Ọ guọnọ si ẹko rẹ ihwo nana re se “Idjerhe Na” vwo nẹ otọrakpọ na.​—Iru 9:​1, 2; ni ekpeti na “ Uturhi ri Sọl Vwori Vwẹ Damaskọs.”

3, 4. (a) Die yen phia kẹ Sọl? (b) Enọ vọ yen a cha fuẹrẹn?

³ Siẹvuọvo na, urhukpẹ ọvo de lo mu Sọl riariẹ phiyọ. Ihwo re vẹ ọyen gbe kpo oyan na vwọ mrẹ urhukpẹ na ayen de ghwu mudia. Sọl de rhuẹro, o de she teyen otọ. Ọ gbe mrẹ orẹ-ẹ, ẹkẹvuọvo o de nyo urhuru ọvo ro nẹ odjuvwu rhe rọ ta kẹ nẹ: “Sọl, Sọl, diesorọ wo vwo muẹkpahan ovwẹ?” Vẹ ẹwẹn rẹ oshọ, Sọl da nọ nẹ: “Ono yen owẹ, Ọrovwori?” O muẹro nẹ ẹkpahọnphiyọ ri Sọl nyori gbe re unu dẹn: “Mẹvwẹ Jesu, ohwo ru wo muẹkpahan na.”​—Iru 9:​3-5; 22:9.

⁴ Die yen avwanre se yono vwo nẹ eta ri Jesu ka ta kẹ Sọl na? Erere vọ yen a sa mrẹ siẹrẹ a da fuẹrẹn obo re phiare ọke ri Sọl vwo kurhẹriẹ? Die yen avwanre se yono vwo nẹ oborẹ iniọvo na reyọ ọke rẹ ufuoma na vwo ruiruo vọnvọn ri Sọl vwo kurhẹriẹ nu?

5, 6. Die yen avwanre se yono vwo nẹ eta ri Jesu ta kẹ Sọl na?

⁵ Ọke ri Jesu vwọ dobọ ri Sọl ji vwẹ idjerhe ro vwo kpo Damaskọs, ọ  dia Jesu nọrọ: “Diesorọ wo vwo muẹkpahen idibo mẹ-ẹ?” Kirobo rọ tare vwẹ obenu, ọ nọrọ: “Diesorọ wo vwo muẹkpahan ovwẹ?” (Iru 9:4) Vwọrẹ uyota, ọ da Jesu mamọ rọ vwọ mrẹ oja ra vwọ re idibo rọyen na.​—Mt 25:​34-40, 45.

⁶ Ọ da dianẹ e muẹkpahan owẹ kidie nẹ wo vwo esegbuyota kpahen Kristi, jẹ o muwẹro nẹ Jihova vẹ Jesu riẹn obo wo hirharokuẹ na. (Mt 10:​22, 28-31) Ọ sa dianẹ Jihova che ghwe siẹ ebẹnbẹn na no ugege yena-a. Karophiyọ nẹ Jesu mrẹ Sọl ọke rọ vwọ vwomaba ihwo vwo hwe Stivin, Jesu je mrẹ Sọl ọke ro vwo kpono idibo re fuevun vwo nẹ iwevwin rayen vwẹ Jerusalẹm. (Iru 8:3) Dedena, Jesu chochọn rayen vwẹ ọke yena-a. Dede nẹ enana eje phiare, jẹ Jihova womarẹ Kristi vwọ vwẹ ogangan ri Stivin vẹ idibo efa na guọnọre vwọ kẹ ayen rere ayen sa vwọ fuevun.

7. Die yen wo che ru vwo chirakon rẹ omukpahen?

⁷ Wo ji se chirakon rẹ omukaphen siẹrẹ wo de ru enana: (1) Muegbe wọ vwọ fuevun ọkieje, o toro obo re phiare-e. (2) Yare ukẹcha ri Jihova. (Fil 4:​6, 7) (3) Yanjẹ orukeri vwo vwọ kẹ Jihova. (Ro 12:​17-21) (4) Vwẹroso Jihova nẹ ọ cha kẹ wẹ ogangan rẹ wọ guọnọre wo se vwo chirakon re te ọke ro vwo siẹ ebẹnbẹn na no.​—Fil 4:​12, 13.

8, 9. Ẹwẹn vọ yen Ananayas se vwo kpahen owian ra vwọ kẹ na?

⁸ Ọ vwọ kpahenphiyọ onọ ri Sọl “Ono yen owẹ, Ọrovwori?” nu, Jesu da vuẹ: “Vrẹn wọ ro evunrẹ orere na, ka cha vuẹ wẹ obo wo che ru.” (Iru 9:6) E sun Sọl rẹ ẹro rọyen rhuru na kpo asan ro che wonphiyọ vwẹ Damaskọs rọ dia asan ro de chiri owẹnvwe je nẹrhovwo ẹdẹ erha. Ọ vwọ hẹ etiyin na, Jesu da vuẹ odibo ọvo vwẹ orere na re se Ananayas kpahen Sọl. Damaskọs yen ọshare nana dia, ọyen ohwo “rẹ ihwo ri Ju eje re dia etiyin nẹ omamọ iyẹnrẹn kpahan.”​—Iru 22:12.

⁹ Vwẹ ẹwẹn roro oborẹ oma ru Ananayas kpahen owian nana! Asaọkiephana, Jesu Kristi rọ dia Ọgbuyovwin rẹ ukoko na ta ota kẹ, ọ da vwẹ owian rẹ oghẹresan  vwọ kẹ. Ọghọ rode yen e bruphiyọ oma na, jẹ ọnana okpowian dẹn! Jesu vwọ vuẹ nẹ ọyen cha ta ota kẹ Sọl, Ananayas da kpahen: “Ọrovwori, mi nyo mie ihwo buebun kpahen ọshare nana re, vwọ kpahen omaẹwan eje rọ so kẹ ihwo efuanfon wẹn vwẹ Jerusalẹm. Ọ rhe etinẹ vẹ uturhi rẹ irherẹn ride na vwọ kẹ ro vwo mu ihwo eje ri se odẹ wẹn.”​—Iru 9:​13, 14.

10. Die yen avwanre yono mie Jesu kpahen obo rọ ta ota vwọ kẹ Ananayas wan?

¹⁰ Jesu ghwọku Ananayas kidie nẹ ọ ta ẹwẹn rọyen phia-a. Ẹkẹvuọvo, Jesu vwẹ odjekẹ vwọ kẹ. Jesu brọghọ phiyọ oma rọ vwọ vuẹ oboresorọ o che vwo ruiruo nana. Jesu da ta kpahen Sọl: “Ọshare nana ochẹ re me sanere kẹ oma mẹ, ro che ghwoghwo odẹ mẹ kẹ ẹgborho na, ọtiọyen ji te ivie kugbe ihwo rẹ Izrẹl. Kidie me cha nabọ dje erọnvwọn buebun rọ cha rioja rọyen fikirẹ odẹ  mẹ kẹ phephẹn.” (Iru 9:​15, 16) Ananayas rha ghwọrọ ọke-e, o de ru nene oborẹ Jesu vuẹrẹ na. Ọ guọnọ Sọl ro muẹkpahen ihwo na mrẹ, ọ da ta kẹ: “Sọl, oniọvo, Ọrovwori Jesu rọ vwomaphia kẹ wẹ wọ vwọ hẹ idjerhe cha na, ji vwe bru we rhe rere wọ vwọ mrorẹ, wọ je vwọ vọn vẹ ẹwẹn ọfuanfon na.”​—Iru 9:17.

11, 12. Die yen avwanre se yono vwo nẹ obo re phiare vwẹ uvwre ri Jesu, Ananayas kugbe Sọl?

¹¹ Avwanre rhi vwo ẹruọ rẹ erọnvwọn evo vwo nẹ obo re phiare vwẹ uvwre ri Jesu, Ananayas kugbe Sọl. Kerẹ udje, Jesu yen vwẹrote iruo rẹ aghwoghwo na kirobo ro veri. (Mt 28:20) Dede nẹ Jesu ta ota kẹ ohwo ọvuọvo phiọngun nonẹna-a, jẹ ọ vwẹrote iruo rẹ aghwoghwo na womarẹ odibo rọ fuevun ro vwo mu nẹ ọ vwẹrote evwruwevwin rọyen na. (Mt 24:​45-47) Womarẹ odjekẹ rẹ Ẹko Rọvwẹrote na, ke se jẹ ighwoghwota kugbe ekobaro ra guọnọ ihwo ri vwo ẹwẹn esiri re vwọ riẹn kpahen Kristi. Kirobo re djunute vwẹ uyovwinrota rọ wanre na, buebun rẹ ihwo nana vwọ nẹrhovwo vwọ yare ukẹcha rẹ Ọghẹnẹ nu, Iseri ri Jihova de ghwoghwo ota na vwọ kẹ ayen.​—Iru 9:11.

¹² Ananayas vwomakpotọ rhiabọreyọ owian ra vwọ kẹ je mrẹ ebruphiyọ. Wọ yan nene iji re vwo soseri ro fiotọ na, ọ da tobọ dianẹ iruo nana cha nẹrhẹ wọ ro ẹnwan? Vwọ kẹ ihwo evo, e vwo nẹ uwevwin kpo uwevwin je mrẹ erhorha sa so ẹnwan kẹ ayen. Ihwo efa mrẹ bẹnbẹn ayen vwo ghwoghwo ota kẹ ihwo vwẹ asan rẹ ayen da chueki, irhuvwu, vwẹ ifonu yẹrẹ womarẹ ileta. Ananayas phi oshọ ro muo na kparobọ, o ji vwo uphẹn rọ vwọ chọn Sọl uko vwo rhiabọreyọ ẹwẹn ọfuanfon na. b Ananayas phikparobọ kidie ọ vwẹroso Jesu ji nẹ Sọl kerẹ oniọvo rọyen. Avwanre se phi oshọ kparobọ kerẹ Ananayas siẹrẹ e de vwo imuẹro nẹ Jesu yen vwẹrote iruo rẹ aghwoghwo na, e de dje erorokẹ vwọ kẹ ihwo, ji nẹ ihwo ri muoshọ kerẹ ihwo re sa dia iniọvo rẹ avwanre.​—Mt 9:36.

13, 14. Die yen wo se yono vwo nẹ udje ri Sọl, ọ da dianẹ wo yono Baibol na jẹ wo ji rhi bromaphiyame-e?

¹³ Sọl vwẹ obo ro yonori vwo ruiruo kpakpata. E vwo sivwon nu, ọ da vwomakpahotọ nẹ e bro ọyen phiyame, ghwe vwo nẹ ọke yena yanran, ọkieje kọyen ọ vwọ vwomaba idibo rehẹ Damaskọs na. Ẹkẹvuọvo, oborẹ o ruru vrẹ ọtiọyen. “Ugege yena ko ghwoghwo kpahan Jesu vwevunrẹ sinagọg sansan, nẹ ohwo nana yen Ọmọ rẹ Ọghẹnẹ na.”​—Iru 9:20.

¹⁴ Ọ da dianẹ wo yono Baibol na jẹ wo ji rhi bromaphiyame-e, wo se ru kerẹ  Sọl wọ vwọ jowọ kpakpata vwọ reyọ obo wo yono vwo ruiruo ji bromaphiyame? Vwọrẹ uyota, Sọl komobọ rhiẹromrẹ igbevwunu ri Jesu ruru, o muẹro nẹ ọnana muro vwo ru ewene ro fori. Ẹkẹvuọvo, ihwo efa ji rhiẹromrẹ igbevwunu ri Jesu ruru. Kerẹ udje, ihwo ri Farisi mrẹ Jesu ọke ro vwo sivwin ọshare ọvo rẹ obọ rọyen sida, ihwo ri Ju buebun je riẹn nẹ Jesu kpare Lazarọs vwo nẹ ughwu. Dedena, buebun rayen davwerhọ-ọn, ayen tobọ vwọso Jesu. (Mk 3:​1-6; Jọ 12:​9, 10) Vwọ fẹnẹ ayen, Sọl kurhẹriẹ. Die yen mu Sọl vwo kurhẹriẹ ọke rẹ ihwo efa vwọ vwẹ abọ fa erhọn? Kidie o vwo oshọẹdjẹ rẹ Ọghẹnẹ vwọ vrẹ ihworakpọ, o ji vwo ọdavwaro okokodo kpahen arodọnvwẹ ri Kristi dje kẹ. (Fil 3:8) Wo de ji ru ọtiọyen, wọ cha vwẹ uphẹn kẹ emu vuọvo nẹ ọ da wẹ obọ ji wo vwo jẹ aghwoghwo na e vwobọ vwọ ji muwan vwọ kẹ omaebrophiyame-e.

15, 16. Die yen Sọl ruru vwẹ sinagọg na, kẹ die yen ihwo ri Ju na ru kpahọn?

¹⁵ Wọ sa vwẹ ẹwẹn roro uguegue, ivun emiovwo kugbe obo ro gbe otu na unu te ọke ayen vwọ mrẹ Sọl ro ghwoghwo kpahen Jesu vwẹ sinagọg na? Ayen da nọ: “Ọ dia ọshare nana yen kpokpo ihwo ri se odẹ nana vwẹ Jerusalẹm?” (Iru 9:21) Ọke ro vwo dje obo ri muro vwo wene ẹwẹn kpahen Jesu, Sọl da “nabọ dje phephẹn nẹ ọnana yen Kristi na.” (Iru 9:22) Ẹkẹvuọvo, ọ dia ihwo eje yen vwo imuẹro kpahen ota ra nabọ dje phephẹ-ẹn. O che se wene iroro rẹ ihwo ri muomaphiyọ ẹkuruemu rẹ asan rẹ ayen nurhe yẹrẹ ihwo re kparoma re guọnọ wene-e. Dedena, oma rhọ Sọ-ọl.

¹⁶ Ẹgbukpe erha wan nure, jẹ ihwo ri Ju rehẹ Damaskọs je vwọso Sọl. Ukuotọ rọyen, kẹ ayen guọnọ teyọn hwe. (Iru 9:23; 2Kọ 11:​32, 33; Ga 1:​13-18) Ọke ri Sọl vwọ riẹn kpahen iroroẹjẹ rayen na, o de dje uruemu aghwanre phia ro vwo vrẹn nẹ orere na womarẹ ọ vwọ rhọnvwe nẹ e mu ọyen phiyọ obere rere a lọrọ ọyen wan asan ọvo ro rhiephiyọ vwẹ igbẹhẹ rẹ orere na won otọ. Luk djisẹ rẹ ihwo re vwẹ ukẹcha vwọ kẹ Sọl vwẹ ason yena kerẹ “idibo [ri Sọl].” (Iru 9:25) Ọ họhọre nẹ eta yena djerephia nẹ ihwo evo re kerhọ kẹ ota ri Sọl vwẹ Damaskọs rhiabọreyọ ovuẹ ro ghwoghwori, ayen da dia idibo ri Kristi.

17. (a) Idjerhe vọ yen ihwo vwo rhiabọreyọ uyota ri Baibol na? (b) Die yen ofori nẹ avwanre ru ọkieje, kẹ diesorọ?

¹⁷ Ọke rẹsosuọ wo tu vwọ vuẹ ihwo rẹ orua wẹn, igbeyan kugbe ihwo efa erọnvwọn iyoyovwin rẹ wo yono na, ọ sa dianẹ wo rhẹro rọyen nẹ kohwo kohwo che rhiabọreyọ uyota ri Baibol na kidie wọ nabọ dje phephẹn. Ọ sa dianẹ ọtiọyen ihwo evo ruru, ẹkẹvuọvo buebun rayen ru ọtiọye-en. Vwọrẹ uyota, ọkiọvo ihwo rẹ orua wẹn evo nene uwe yerin kerẹ ivwighrẹn. (Mt 10:​32-38) Ẹkẹvuọvo, wo de ruẹ yovwẹnphiyọ kpahen ona wo vwo dje Baibol na phephẹn je sẹro rẹ omamọ rẹ uruemu rẹ Onenikristi, ọkiọvo ihwo re vwọso wẹ dede se rhi wene iruemu rayen.​—Iru 17:2; 1Pi 2:12; 3:​1, 2, 7. 

18, 19. (a) Die yen nuro rhe ọke ri Banabas vwọ chochọn ri Sọl? (b) Mavọ yen a sa vwọ vwẹrokere Banabas kugbe Sọl?

 ¹⁸ Ọke ri Sọl vwọ ro Jerusalẹm, o mu idibo na ẹro nẹ Sọl rhe dia odibo re-e. Eriyina, Banabas da chochọn ri Sọl, iyinkọn na de rhiabọreyọ, ọ vẹ ayen da dia vwẹ ọmọke evo. (Iru 9:​26-28) Sọl ọvwaghwanre, dedena oma rẹ iyẹnrẹn esiri na vorọ-ọ. (Ro 1:16) Ọ nabọ fiudugberi ghwoghwo iyẹnrẹn esiri na vwẹ Jerusalẹm, rọ dia asan ro de mukpahen idibo ri Jesu Kristi mamọ. O ghini gbe ihwo ri Ju re dia Jerusalẹm unu rẹ ayen vwọ mrẹvughe nẹ onini rayen rẹ ayen rorori nẹ o che si Inenikristi nẹ Jerusalẹm rhe dia Onenikristi re. Ọtiọyena, kẹ ayen guọnọ teyọn hwe. Baibol na da ta: “Ọke rẹ iniọvo na vwọ riẹn kpahen ọnana, ayen da reyọ [Sọl] rhe Sizaria, ayen de jo kpo Tasọs.” (Iru 9:30) Sọl vwomakpotọ nene odjekẹ ri Jesu kirobo rẹ ukoko na tare. Sọl vẹ ukoko na mrẹ erere.

¹⁹ Noso nẹ Banabas ọyen jowọ rọ vwọ vwẹ ukẹcha kẹ Sọl. O muẹro nẹ oka rẹ ukẹcha nana toroba omamọ rẹ oyerinkugbe rọ rhe dia vwẹ uvwre rẹ idibo ri Jihova nana ri vwo oruru na. Kerẹ Banabas, wo vwo owenvwe wọ vwọ vwẹ ukẹcha kẹ ihwo kpokpọ rehẹ ukoko na, womarẹ wo vwo nene ayen wian vwẹ iruo rẹ aghwoghwo na je chọn ayen uko ayen sa vwọ yanphiaro vwẹ ẹga ri Jihova? Wọ cha mrẹ erere siẹrẹ wo de ru ọtiọyen. Ọ da dianẹ wẹwẹ oghwoghwota kpokpọ, wo rhiabọreyọ ukẹcha ra vwọ kẹ wẹ kerẹ Sọl? Wo de nene ighwoghwota ri tedje wian, ọ cha nẹrhẹ ena ru wo vwo ruiruo vwẹ aghwoghwo na yovwinphiyọ, aghọghọ ru wọ cha mrẹ che bunphiyọ, ọ je cha nẹrhẹ wo vwo oyerinkugbe rọ kpẹkpẹre rọ je cha dia bẹdẹ.

20, 21. Mavọ yen idibo rẹ Ọghẹnẹ rẹ ọke awanre vẹ ọke avwanre na vwọ nabọ reyọ “ọke rẹ ufuoma” na vwo ruiruo vọnvọn?

²⁰ Ọke ri Sọl vwo kurhẹriẹ ji vrẹn nẹ Damaskọs gbẹrhẹnẹdẹ nu “ikoko na eje rehẹ Judia, Galili kugbe Sameria da ro ọke rẹ ufuoma.” (Iru 9:31) Mavọ yen idibo na vwọ reyọ ọke ro shephiyọ nana vwo ruiruo? (2Ti 4:2) Ikuegbe na tare nẹ a da “bọn ayen gan.” Iyinkọn na vẹ iniọvo efa ri ji tedje da bọn esegbuyota rẹ idibo na gan, ji mu usiokọ rẹ ukoko na rẹ ayen vwọ “yan vwẹ oshọẹdjẹ ri Jihova kugbe uchebro rẹ ẹwẹn ọfuanfon na.” Kerẹ udje, Pita reyọ ọke yena vwọ bọn idibo rehẹ Lida rọhẹ Otọ Ọriẹriẹriẹ ri Sharọn gan. Ẹgbaẹdavwọn rọyen nẹrhẹ ihwo buebun re dia ekogho na “se Ọrovwori na gbuyota.” (Iru 9:​32-35) Idibo na vwẹ uphẹn kẹ erọnvwọn efa nẹ i muẹ ẹwẹn rayen reyọ-ọ, ukperẹ ọtiọyen ayen davwẹngba vwọ vwẹrote ohwohwo ji ghwoghwo iyẹnrẹn esiri na. Ukuotọ rọyen, ukoko na ko “buẹnphiyọ.”

²¹ Vwẹ omarẹ oba rẹ ẹgbukpe ujorin uje, Iseri ri Jihova vwẹ ẹkuotọ buebun da ro “ọke rẹ ufuoma.” Isuon ri shenyẹ ihwo rẹ Ọghẹnẹ vwẹ ikpe buebun rhire na de rhi toba. E ji siẹ obọẹdajo rẹ iruo rẹ aghwoghwo na kpotọ yẹrẹ  no kakare. Iseri ri Jihova buebun reyọ uphẹn nana vwo ghwoghwo ota vwẹ azagba, omamọ rẹ iyẹnrẹn nuro rhe.

22. Mavọ wọ sa vwọ reyọ ugbomọphẹ rẹ wo vwori vwo ruiruo?

²² Wọ nabọ reyọ ugbomọphẹ wo vwori vwo ruiruo? Ọ da dianẹ ẹkuotọ ro vwo ugbomọphẹ ẹga yen wọ hepha, Eshu cha reyọ ẹvwọtua rẹ ekuakua rẹ akpeyeren vwọ riẹriẹ owẹ ukperẹ wọ vwọ ga Jihova. (Mt 13:22) Wo jẹ emu vuọvo muẹ ẹwẹn wẹn reyọ-ọ. Nabọ reyọ uphẹn rẹ ọke rẹ ufuoma ru wo vwori asaọkiephana vwo ruiruo vọnvọn. Reyọ uphẹn nana vwo soseri ro fiotọ, wọ me je vwọ bọn ukoko na gan. Karophiyọ nẹ ẹdia wẹn se wene siẹvuọvo.

23, 24. (a) Die yen avwanre yono vwo nẹ obo re phia kẹ Tabita rhe? (b) Die yen orhiẹn-ebro avwanre?

²³ Roro kpahen obo re phia kẹ odibo ọvo re se Tabita yẹrẹ Dọkas. Jọpa rọ dia orere rọ kẹrẹ Lida yen ọ diare. Oniọvo aye nana rọ fuevun na reyọ ọke vẹ ekuakua rọyen vwo ruiruo vwẹ idjerhe aghwanre, kidie “iruo esiri ro ruru kugbe okẹ rẹ arodọnvwẹ” rọ vwọ kẹ ihwo bunru mamọ. Kpregede na, o de shero ọga ji ghwu. c Ughwu rọyen na so omaemuophiyọ rode kẹ idibo na vwẹ Jọpa, ma rho kẹ eyauku ro ru emuesiri kẹ. Ọke ri Pita vwọ ro uwevwin re mu orivwin rọyen phiyọ, Pita de ru emu rẹ igbevwunu rẹ oghẹresan vwẹ uvwre iyinkọn ri Jesu Kristi. Pita da nẹrhovwo, ọ da kpare Tabita nẹ ughwu! Wọ sa vwẹ ẹwẹn roro aghọghọ rẹ eyauku vẹ idibo ichekọ na vwori ọke ri Pita vwo se ayen ro uvun na ji dje Tabita rọ kpare nẹ ughwu na kẹ ayen? Aphro herọ-ọ nẹ obo re phiare na muegbe rayen hẹrhẹ edavwini re cha vwẹ obaro na! O muẹro nẹ, “ihwo ejobi rehẹ Jọpa da rhe riẹn kpahọn, ihwo buebun de se Ọrovwori na gbuyota” fikirẹ igbevwunu na.​—Iru 9:​36-42.

²⁴ Avwanre yono erọnvwọn eghanghanre ivẹ vwo nẹ obo re phia kẹ Tabita na. (1) Akpeyeren pha krẹnkrẹn. Ọyen obo re ghanre mamọ re vwo vwo omamọ odẹ vẹ Ọghẹnẹ ra vwọ herọ yerẹn na! (Agh 7:1) (2) Iphiẹrophiyọ rẹ evrẹnushi na muẹro. Jihova vwo oniso rẹ emu esiri ri Tabita ruru, ọ da hwosa kẹ. Ọ da dianẹ avwanre ghwuru tavwen Amagidọn ke rhe, Jihova cha karophiyọ owian ọgangan rẹ avwanre wianre je kpare avwanre nẹ ushi. (Hib 6:10) Tẹ ọ dianẹ avwanre  chirakon rẹ “ọke ro shephiyọ-ọ” yẹrẹ riavwerhen rẹ “ọke rẹ ufuoma” enẹna, e jẹ avwanre muomaphiyọ iruo re vwo soseri ro fiotọ kpahen Kristi.​—2Ti 4:2.