ẸBẸRE 2
Aghwoghwo rẹ Uvie Na—E Ghwoghwo Iyẹnrẹn Esiri na Vwo Nene Akpọeje
WO MUEGBE vwọ kẹ iruo rẹ aghwoghwo na vwẹ ẹdẹ wo jẹ iruo ẹra. Ku wo ruẹ kẹmẹkẹmẹ, jẹ oma je rhọ wẹ. Ovwerhẹn rẹ urhiọke vwerhan mamọ! Ẹkẹvuọvo wọ da nẹrhovwo kpahọn, ji brorhiẹn wo vwo kpo aghwoghwo na. Oniọvo aye rọ kpakore yen wẹ vẹ ọyen gba yan, uruemu esiri vẹ akoechiro rọyen te we ẹwẹn mamọ. Wo vwo ghwoghwo ovuẹ rẹ Uvie na vwo nẹ uwevwin kpo uwevwin, wọ da ghwa karophiyọ nẹ iniọvo wẹn rẹ akpọeje ji ghwoghwo ovuẹ na, oka rẹ ẹbe vuọvo yen ovwan vwo ruiruo na, uyono vuọvo yen a vwọ kẹ avwanre eje. Wo vwo te uwevwin ẹdẹ yena, ku vwọ rhoma vwẹ ẹgba. Oma vwerhen ovwẹ mamọ kidie wo chidia uwevwi-in!
Nonẹna, aghwoghwo na yen iruo rọ ma kenu vwẹ iruo rẹ Uvie na. Jesu tarọ jovwo nẹ e che ruiruo na nene akpọneje vwevunrẹ ọke rẹ oba na. (Mat. 24:14) Mavọ yen aroẹmrẹ rọyen na rugba wan? Vwẹ ẹbẹre nana, avwanre cha ta ota kpahen ihwo, ena kugbe ekuakua re vwo ruiruo aghwoghwo na, re vwẹ ukẹcha kẹ iduduru rẹ ihwo vwọ riẹn nẹ Uvie rẹ Ọghẹnẹ ghini obọdẹn rẹ usuon.
E REHẸ ẸBẸRE NANA
UYOVWINROTA 6
Ihwo ri Ghwoghwo Ota—Ighwoghwota re Vwẹ Oma Rayen Vwọ Kpahotọ
Die yen nẹrhẹ Jesu vwo imuẹro nẹ o che vwo ighwoghwota re cha vwomakpahotọ vwẹ ẹdẹ re koba na? Mavọ wo se vwo djephia nẹ wọ guọnọ Uvie na ẹsosuọ?
UYOVWINROTA 7
Ena re Vwo Ruiruo Aghwoghwo Na—A Vwẹ Ena Sansan Vwo Ghwoghwo Ota kẹ Ihwo
Yono kpahen ena sansan rẹ ihwo rẹ Ọghẹnẹ vwo ghwoghwo iyẹnrẹn esiri na kẹ ihwo buebun tavwen oba na ke rhe.
UYOVWINROTA 8
Ekuakua re Vwo Ruiruo Aghwoghwo Na—A Teyen Ẹbe Vwọ kẹ Iruo re Ruẹ Vwẹ Akpọneje
Mavọ yen iruo rẹ efanfan na vwo djephia nẹ Ovie na vwẹ ukẹcha kẹ avwanre? Mavọ yen ẹbe rẹ avwanre vwọ nẹrhẹ Uvie na nabọ muwẹro?
UYOVWINROTA 9
Erere rẹ Iruo Aghwoghwo Na—“Idju na . . . Ghwo te Orhọ Nure”
Jesu yono idibo rọyen iyono eghanghanre ivẹ kpahen orhọ rẹ ihworakpọ na. Mavọ yen iyono yena djobọte avwanre wan?
