OMA vwerhen owẹ ọke rẹ ọtota na vwọ ta ota vwẹ enu umukpe. Ọnana eghene ọshare rọhẹ ukoko ovwan rọ ta ota rẹsosuọ rọyen vwẹ osikoko. Wọ vwọ riavwerhen rẹ ota na, wọ da mrẹvughe nẹ Jihova ghini yono ihwo rọyen dẹn. Wọ karophiyọ ẹgbaẹdavwọn rọyen vwẹ ọke rẹsosuọ rọ ka vwọ ta ota vwẹ Ọguan Ruvie, asaọkiephana ọ rhe dia ọwena rẹ ota re! Ẹyan obaro rọyen teyenphia ọke ro vwo kpo isikuru rẹ ekobaro nu. O krinọ na-a, ọ vẹ aye rọyen ji kpo Isikuru rẹ Ihwo ri Ghwoghwo Uvie Na. Wọ vwọ teyen abọ phiyọ ota na, wo de roro kpahen uyono sansan ro te ihwo rẹ Ọghẹnẹ obọ.

Baibol na mraro nẹ ọke cha rọ cha vwọ dianẹ ihwo rẹ Ọghẹnẹ eje “Ọrovwohwo ri yono ayen.” (Aiz. 54:13) Avwanre yerẹn vwẹ ọke yena re. Avwanre mrẹ uyono womarẹ ẹbe ukoko na, ọtiọyen ji te uyono ẹra, isikoko, eghwẹkoko, vẹ isikuru buebun ri muegbe avwanre vwọ kẹ iruo sansan vwẹ ukoko ri Jihova. Vwẹ ẹbẹre nana, a cha fuẹrẹn oborẹ uyono nana eje sa vwọ kẹ avwanre imuẹro kokoroko nẹ Uvie rẹ Ọghẹnẹ suẹn re.