1, 2. Idjerhe vọ yen Jesu vwọ dia osun ro vwo aghwanre?

VWẸ ẹwẹn roro nẹ ohwo rọ nabọ riẹn obo re kiẹn asan reyọ owẹ vwo kiẹn orere ọvo ro vwo erhuvwu mamọ. Wẹ vẹ ihwo efa ri nene uwe ji te orere na dẹvo-o, ọtiọyena, ota rẹ ohwo na kọyen wọ nabọ kerhọ kẹ. Ọkiọvo, ovwan se roro kpahen erọnvwọn evo rehẹ evunrẹ orere na rẹ ovwan cha mrẹ. Wọ vwọ nọ ohwo rọ vwẹ ovwan kiẹn na kpahen erọnvwọn evo, ọ da hẹrhẹ te ọke ro fori ọ ke kpahenphiyọ, vwẹ ọke buebun siẹrẹ a da ghwa mrẹ oborẹ wọ nọ kpahen na. Ọke vwọ yanran na, oma rọyen da vwerhen owẹ mamọ kpahen aghwanre rọyen, kidie ọ vuẹ wẹ obo wọ guọnọ riẹn vwẹ ọke ro fori.

² Inenikristi rẹ uyota ghwa họhọ ihwo ri kpo ikienkin tiọyena. Avwanre vwo owenvwe a vwọ riẹn kpahen orere ro me yovwin kparobọ ro vwo omamọ rẹ “uchivwo,” kọyen Uvie rẹ Ọghẹnẹ. (Hib. 11:10) Ọke rẹ Jesu vwọ hẹ otọrakpọ na, ọyen komobọ yen sun idibo rọyen, ọ da je chọn ayen uko vwọ nabọ vwo ẹruọ rẹ Uvie na. Jesu kpahenphiyọ enọ rayen je vuẹ ayen erọnvwọn eje ri shekpahen Uvie na ẹsiẹvo? Ẹjo. Ọ da ta: “Mi vwo eta buebu re me cha ta kẹ ovwan, ẹkẹvuọvo e cha sa ro ovwan vwẹ asakiephana-a.” (Jọn 16:12) Kerẹ osun ro me vwẹ aghwanre, Jesu nama vuẹ idibo rọyen eta rẹ ayen che se vwo ẹruọ rọye-en.

3, 4. (a) Mavọ yen Jesu se vwo yono ihwo re fuevun kpahen Uvie rẹ Ọghẹne? (b) Die yen a cha fuẹrẹn vwẹ uyovwinrota nana?

³ Jesu ta eta rehẹ Jọn 16:12 vwẹ ason rọ koba o ki rhi ghwu. O de ghwu nu, mavọ yen o se vwo yono ihwo re fuevun kpahen Uvie na? Ọ vwẹ imuẹro kẹ iyinkọn na: “[“Ẹwẹn,” NW] re uyota na . . . che sun ovwan vwọ riẹn uyota na ejobi.” * (Jọn 16:13) A sa vwẹ ẹwẹn ọfuanfon na vwo dje osun rọ pha dẹndẹn. Ẹwẹn ọfuanfon na yen Jesu vwo yono idibo rọyen kemu kemu rẹ ayen guọnọ riẹn kpahen Uvie rẹ Ọghẹnẹ, vwẹ ọke ro fori.

⁴ E jẹ a fuẹrẹn oborẹ ẹwẹn ọfuanfon ri Jihova vwo sun Inenikristi rẹ uyota vwọ nabọ vwo ẹruọ rẹ Uvie na. Ẹsosuọ,  a cha fuẹrẹn oborẹ avwanre vwọ riẹn ọke rẹ Uvie rẹ Ọghẹnẹ vwọ ton usuon phiyọ. E ji che djekpahen ihwo ri che sun vẹ ihwo re cha dia otọ rẹ Uvie na kugbe iphiẹrophiyọ rẹ ayen vwori. Ukuotọ rọyen, ka cha mrẹ oborẹ idibo ri Jesu vwọ nabọ vwo ẹruọ rẹ obo ro mudiaphiyọ ra vwọ vwomakpotọ kẹ usuon rẹ Uvie na.

5, 6. (a) Erorochọ vọ yen Emọ-uyono ri Baibol na vwo kpahen evwomuẹ rẹ Uvie na vẹ ọke rẹ orhọ na? (b) Diesorọ erorochọ nana rha nẹrhẹ e vwo ẹwẹn ivivẹ sẹ Jesu ghini suẹn ihwo re fuevu-un?

⁵ Kirobo re yonori vwẹ Uyovwinrota 2 rẹ ọbe nana, Emọ-uyono ri Baibol na ghwọrọ ikpe buebun vwo djephia nẹ ukpe rẹ 1914 cha dia ukpe rẹ oghẹresan vwẹ orugba rẹ aroẹmrẹ ri Baibol na. Ẹkẹvuọvo, ọke yena ayen rorori nẹ ọrhire ri Kristi na tonphiyọ vwẹ 1874, ọ da rha ton usuon phiyọ 1878, Uvie na kọ cha nabọ vwẹ owọ muotọ vwẹ October 1914. Ọke rẹ orhọ na cha tonphiyọ vwo nẹ 1874 fiẹ 1914, ukuotọ rọyen ke che koko ihwo ra jẹreyọ na vwo kpo odjuvwu. Erorochọ nana nẹrhẹ e vwo ẹwẹn ivivẹ sẹ Jesu ghini suẹn ihwo re fuevun na womarẹ ẹwẹn ọfuanfon na?

⁶ Ẹjo, kakaka! Rhoma roro kpahen udje ra vwọ tonphiyọ na. Iroro vẹ enọ rẹ ihwo ri kiẹn na sa nẹrhẹ ayen vwo ẹwẹn ivivẹ kpahen ohwo ro suẹn ayen na? Ọ cha bẹn! Ọtiọyen ọ je hepha, dede nẹ ọkiọvo ihwo rẹ Ọghẹnẹ guọnọ riẹn kpahen ọhọre ri Jihova tavwen ẹwẹn ọfuanfon na ke kpọ ayen kpo uyota na, o muẹro dẹn nẹ Jesu yen ghini suẹn ayen. Ọtiọyena, ihwo ri fuevun na vwo owenvwe ra vwọ kpọ ayen vi je vwomakpotọ vwo wene iroro rayen.—Jems 4:6.

7. Ẹruọ rẹ iyono eghanghanre vọ yen idibo rẹ Ọghẹnẹ rhi vwo?

⁷ Vwẹ ikpe re kpahen 1919, idibo rẹ Ọghẹnẹ de rhi vwo ẹruọ rẹ iyono eghanghanre buebun. (Se Une Rẹ Ejiro 97:11.) Vwẹ 1925, uyovwinrota na “Birth of the Nation,” da vwomaphia vwẹ Uwevwin Orhẹrẹ na. Ọ vwẹ Baibol na vwo dje phephẹn nẹ e vwiẹ Uvie ri Mesaya na vwẹ ukpe rẹ 1914, rọ dia orugba rẹ aroẹmrẹ ro shekpahen aye rọhẹ odjuvwu ro vwiẹre, kirobo ra niyẹnrẹn rọyen vwẹ Ẹvwọphia uyovwin 12. * Uwevwin Orhẹrẹ na de ji djephia nẹ ẹvwọsuọ vẹ omukpahen rẹ idibo ri Jihova rhiẹromrẹ vwẹ ọke rẹ ofovwin yena ghwa imuẹro nẹ a djẹ Eshu nẹ odjuvwu re “vwẹ evun rẹ ophu rode, fikiridie ọ riẹnre nẹ ọke rọye pha krẹkrẹ.”—Ẹvwọ. 12:12.

8, 9. (a) Idjerhe vọ yen a sa vwọ riẹn ọghanrovwẹ rẹ Uvie rẹ Ọghẹnẹ? (b) Enọ vọ yen a cha fuẹrẹn?

⁸ Mavọ yen Uvie na ghanre te? Ukpe rẹ 1928 yen Uwevwin Orhẹrẹ na vwo tu kanrunumuo nẹ Uvie na ghanre vrẹ usivwin rẹ ihworakpọ womarẹ ọtanhirhe na. Vwọrẹ uyota, womarẹ Uvie ri Mesaya na yen Jihova che vwo ru odẹ rọyen fon, titi usuon rọyen ji ru ọhọre rọyen kpahen ihworakpọ.

⁹ Amono yen che nene Jesu sun vwẹ Uvie na? Ihwo vọ  yen Uvie na che sun? Owian vọ yen idibo ri Jesu che vwobọ vwọ?

10. Ẹruọ vọ yen ihwo rẹ Ọghẹnẹ vwo kpahen ihwo 144,000 vwẹ ọke grongron re?

¹⁰ Ikpe buebun tavwen a ke mrẹ 1914, Inenikristi rẹ uyota riẹnre nẹ ihwo 144,000 yen che nene Jesu sun vwẹ odjuvwu. * Emọ-uyono ri Baibol na riẹnre nẹ ukeri nana ghini 144,000, ayen ji vwo imuẹro nẹ a ton ekoko rayen phiyọ vwẹ ẹgbukpe ujorin rẹsosuọ.

11. Mavọ yen ihwo re cha dia ọpha ri Kristi na vwo vwo ẹruọ rẹ owian rẹ ayen che ru ọke rẹ ayen je vwọ hẹ otọrakpọ na?

¹¹ Owian vọ yen ihwo re cha dia ọpha ri Kristi na che ru vwẹ ọke rẹ ayen je vwọ hẹ otọrakpọ na? Ayen riẹnre nẹ Jesu kanrunumu iruo rẹ aghwoghwo na ro churobọ si ọke rẹ orhọ na. (Mat. 9:37; Jọn 4:35) Kirobo ra mrẹre vwẹ Uyovwinrota 2, Emọ-uyono ri Baibol na rorori nẹ ọke rẹ orhọ na che gron te ẹgbukpe 40, ekoko rẹ ihwo ra jẹreyọ na kọyen che kuophiyọ. Ẹkẹvuọvo, ọ vwọ dianẹ owian na vrẹ ẹgbukpe 40 na, kọyen a guọnọ ẹruọ kpokpọ. Nonẹna, avwanre riẹnre nẹ ọke rẹ orhọ na tonphiyọ vwẹ 1914 rọ dia ọke ra cha vwọ sane irosu na vwo nẹ ego na, kọyen Inenikristi ra jẹreyọ vwo nẹ Inenikristi rẹ efian. Ọnana yen ọke ra vwọ tẹnrovi ekoko rẹ ihwo ra jẹreyọ na ri chekọ vwẹ otọrakpọ na!

12, 13. Idjerhe vọ yen itẹ rẹ Jesu kperi kpahen ikọpha ihwe na vẹ ikpahọ na vwo rugba vwẹ ẹdẹ rẹ oba na?

¹² Vwo nẹ 1919 yanran, ọyen Kristi vwọ vwẹ ukẹcha kẹ odibo rọ fuevun na rere ayen vwọ tẹnrovi iruo aghwoghwo na. Ọ vwẹ iruo nana kẹ ayen vwẹ ẹgbukpe ujorin rẹsosuọ. (Mat. 28:19, 20) Ọ je ta ota kpahen iruemu ra guọnọ mie ihwo ra jẹreyọ na re sa chọn ayen uko vwo ruiruo nana. Vwẹ idjerhe vọ? Vwevunrẹ itẹ rẹ ikọpha ihwe na, o djerephia nẹ ihwo ra jẹreyọ na da guọnọ vwobọ vwẹ irueru rẹ orọnvwe vwẹ ọke rẹ Kristi de che kuomakugbe “ọpha” rọ dia ihwo 144,000 na, kẹ ayen cha rhẹrẹ ji gbẹrophiyotọ. (Ẹvwọ. 21:2) Vwevunrẹ itẹ rẹ ikpahọ na, Jesu yonori nẹ ihwo ra  jẹreyọ na cha nabọ frẹkotọ ruiruo rẹ aghwoghwo na rọ vwọ kẹ ayen na.—Mat. 25:1-30.

¹³ Vwẹ omarẹ ẹgbukpe ujorin ọvo rhire na, ihwo ra jẹreyọ na nabọ rhẹrẹ ji gbẹrophiyotọ. Aphro herọ-ọ, e che bruba kẹ ayen fikirẹ ẹrhẹrẹ rayen. Ẹkẹvuọvo, ichekotọ rẹ ihwo ri che nene Jesu sun ọvo yen e che koko vwẹ ọke rẹ orhọ na?

14, 15. Erhọ yen ẹko ẹne re djunute vwẹ ọbe re se The Finished Mystery?

¹⁴ O krire rẹ ihwo buebun ri fuevun vwọ guọnọ riẹn kpahen “urogho rẹ ihwo buebu” re djunute vwẹ Ẹvwọphia 7:9-14. Kọyensorọ tavwen Kristi ke rhe nabọ djekpahen ẹko nana, eta buebun ra ta kpahen ẹko na fẹnẹre dibi dibi vwo nẹ ẹruọ ọlọlọhọ rọ je dia phephẹn rẹ avwanre vwori ji vwo ẹguọnọ kpahen nonẹna.

¹⁵ Vwẹ 1917, ọbe re se The Finished Mystery tare nẹ “ẹko rẹ ihwo ivẹ yen che kpo odjuvwu, kugbe ẹko rẹ ihwo ivẹ yen cha vwẹ akpọ na vwọ riuku.” Amono yen cha dia evunrẹ ẹko ẹne nana? Ẹko rẹsosuọ yen ihwo 144,000 ri che nene Jesu sun. Ọrivẹ ke rha hẹ otu gbidigbidi na. Ọke yena, ayen rorori nẹ otu gbidigbidi na yen Inenikristi ri di kpo ẹga rẹ efian. Ayen vwo esegbuyota otete, kọyensorọ ayen rha sa yọnrega-an. Ọtiọyena, a cha kẹ ayen ẹdia otete vwẹ odjuvwu. Ayen ji roro nẹ ẹko rerha yen “ihwo awanre ri muwan,” re cha dia otọrakpọ na, ihwo kerẹ Ebraham, Mosis, vẹ efa; enana ki che sun ẹko rẹne, rọ dia ihwo rehẹ akpọ na nonẹna.

16. Ẹruọ rẹ iyono vọ yen a rhe mrẹ vwẹ ukpe rẹ 1923 vẹ 1932?

¹⁶ Mavọ yen ẹwẹn ọfuanfon na vwọ chọn Inenikristi uko vwo vwo ẹruọ rẹ uyono nana nonẹna? Ememerha yen urhukpẹ rẹ uyota na vwo lo phia. Vwo nẹ ukpe rẹ 1923 rhe, ọyen Uwevwin Orhẹrẹ na vwọ ta ota kpahen ẹko rẹ ihwo ri vwo iphiẹrophiyọ rẹ odjuvwu-u, re cha vwẹ akpọ na vwọ riuku vwẹ otọ rẹ usuon ri Kristi na. Vwẹ 1932, Uwevwin Orhẹrẹ na da rha ta ota kpahen Jonadab (Jehonadab), ro bicha Jehu rọ dia Ovie rẹ Izrẹl rẹ Jihova reyọ vwo mu, Jonadab vwẹ ukẹcha kẹ vwọ họnre so ẹga rẹ efian. (2 Ivie 10:15-17) Uwevwin Orhẹrẹ na tare nẹ o vwo ẹko rẹ ihwo vwẹ ọke rẹ avwanre na re pha kerẹ Jonadab, Jihova cha vwẹ ukẹcha kẹ ẹko nana “vwọ wanvrẹ ofovwin rẹ Amagidọn,” ayen ke cha dia otọrakpọ na.

17. (a) Vwẹ ukpe rẹ 1935, urhukpẹ rẹ uyota na vọ yen lo phiyọ? (b) Mavọ yen ẹruọ kpokpọ re vwo kpahen otu gbidigbidi na djobọte Inenikristi rẹ uyota wan? (Ni ekpeti na “ Ayen ‘de Rhi Ku Ẹwẹn Totọ’.”)

¹⁷ Vwẹ ukpe rẹ 1935, urhukpẹ rẹ uyota na de lo phiyọ. Vwẹ ọghwẹkoko re ruru vwẹ Washington, D.C., e de dje nẹ otu gbidigbidi na yen ihwo re cha dia otọrakpọ na, enana yen igodẹ rẹ Jesu ta ota kpahen vwẹ itẹ rẹ igodẹ na vẹ  ẹvwe na. (Mat. 25:33-40) Otu gbidigbidi na cha dia usun rẹ “igodẹ efa” rẹ Jesu tare nẹ, “Me je cha reyọ ayen rhe.” (Jọn 10:16) Ọke rẹ J. F. Rutherford vwọ nọ otu na: “Ihwo ri vwo iphiẹrophiyọ ayen vwọ vwẹ otọrakpọ na vwọ riuku se vrẹn mudia?” ihwo ri vrẹnri yen me bun! Ọ da ta: “Nighe! Otu gbidigbidi na!” Ọnana da nẹrhẹ ihwo buebun vwo ẹruọ rẹ iphiẹrophiyọ rẹ ayen vwo kpahen obaro na.

18. Mavọ yen idibo ri Jesu vwọ nabọ tẹnrovi iruo aghwoghwo na, die kọyen nẹ obuko rọyen rhe?

¹⁸ Rhanvwẹ ọke yena rhire na yen Kristi vwọ chọn idibo rọyen uko vwọ nabọ tẹnrovi ekoko rẹ otu gbidigbidi na re cha wanvrẹ ukpokpogho rode na. Ọke rẹsosuọ, kọ ghwa họhọ nẹ ihwo na che se bu-un. Oniọvo Rutherford tobọ ta: “Ọ họhọre nẹ ‘otu gbidigbidi’ na che ghwe bu-un.” Vwọrẹ uyota, avwanre rhe mrẹ oborẹ Jihova ku ebruphiyọ rọyen ku orhọ na re! Womarẹ odjekẹ ri Jesu vẹ ẹwẹn ọfuanfon na, ihwo ra jẹreyọ na vẹ “igodẹ efa” na da rhe dia “ekru rẹ igodẹ ọvo” re je ga kuẹgbe vwẹ otọ rẹ “osuigegede ọvuọvo,” kirobo rẹ Jesu tare.

19. Mavọ yen avwanre se vwo vwobọ vwẹ ebuon rẹ otu gbidigbidi na?

¹⁹ Ihwo buebun ri fuevun cha dia bẹdẹ vwevunrẹ otọrakpọ na, vwẹ otọ rẹ usuon ri Jesu vẹ ihwo 144,000 na. Ọ rha dia emu rẹ omavwerhovwẹn re vwo roro kpahen oborẹ Kristi chọn idibo rẹ Ọghẹnẹ uko vwọ riẹn iphiẹrophiyọ rọhẹ Baibol na kpahen obaro na? Ọyena ghini uphẹn rode ra vwọ vuẹ ihwo efa kpahen iphiẹrophiyọ nana! E je muomaphiyọ iruo nana te asan rẹ ẹgba avwanre teri rere otu gbidigbidi na se vwo bunphiyọ, ayen vwo jiri odẹ ri Jihova vẹ ukperi ọgangan!—Se Luk 10:2.

20. Die yen ukoko rẹ Eshu churobọ si, kẹ mavọ yen ọnana vwo shekpahen omaevwokpotọ rẹ Inenikristi?

²⁰ Erianriẹn rẹ idibo rẹ Ọghẹnẹ vwo kpahen Uvie na vwọ ganphiyọ na, ofori nẹ ayen je nabọ riẹn oborẹ omaevwokpotọ vwọ kẹ usuon rẹ Uvie na mudiaphiyọ. Uwevwin Orhẹrẹ rẹ 1922 vwọ ta ota kpahen ẹdia nana, ọ da tanẹ ukoko ri Jihova vẹ ọ rẹ Eshu yen herọ nonẹna, ọ rẹ Eshu churobọ si ekiẹchuọ, ẹga vẹ oseghe usuon rẹ akpọ nana. Ihwo re vwomakpotọ kẹ Uvie rẹ Ọghẹnẹ vwẹ otọ rẹ usuon ri Jesu cha kẹnoma kẹ korọnvwọn korọnvwọn ro churobọ si ukoko rẹ Eshu. (2 Kọr. 6:17) Die yen ọyena mudiaphiyọ?

21. (a) Idjerhe vọ yen odibo rọ fuevun na vwo si avwanre orhọ kpahen ekiẹchuọ ride re? (b) Vwẹ 1963, die yen Uwevwin Orhẹrẹ na nabọ djekpahen “Babilọn rode” na?

²¹ Ọke buebun yen odibo rọ fuevun na vwọ vuẹ avwanre kpahen orukuruku rọhẹ ekiẹchuọ ride, ko ji si idibo rẹ Ọghẹnẹ orhọ kpahen ẹvwọtua rẹ ekuakua rẹ akpeyeren. (Mat. 6:24) Ọtiọyen yen ẹbe rẹ ukoko na je tẹnrovi ẹbẹre rẹ ẹga rẹ ukoko rẹ Eshu. Vwẹ 1963, Uwevwin Orhẹrẹ na nabọ dje nẹ “Babilọn rode” mudiaphiyọ okugbe rẹ ẹga rẹ efian eje, ọ ghwa dia Inenikristi rẹ efian ọvo-o. Kirobo re che yono  vwẹ Uyovwinrota 10 rẹ ọbe nana, a vwẹ ukẹcha kẹ ihwo rẹ Ọghẹnẹ rehẹ ẹkuotọ na eje vwo “vrẹn no rhe,” ayen de ru oma rayen fon vwo nẹ irueru rẹ ẹga rẹ efian eje.—Ẹvwọ. 18:2, 4.

22. Vwẹ Ofovwin Akpọeje I, mavọ yen idibo rẹ Ọghẹnẹ buebun vwo ẹruọ rẹ uchebro rọhẹ Rom 13:1 wan?

²² Kẹ, ẹbẹre rẹ oseghe usuon rẹ ukoko rẹ Eshu vwo? Ofori nẹ Inenikristi rẹ uyota vwobọ vwẹ ofovwin vẹ oseghe rẹ akpọ na? Vwẹ Ofovwin Akpọeje I, Emọ-uyono ri Baibol na riẹnre nẹ ofori nẹ Inenikristi hwe ohwo-o. (Mat. 26:52) Jẹ, vwọ kẹ ihwo buebun, uchebro rọhẹ Rom 13:1 rọ tare nẹ e muọghọ kẹ “ogangan rẹ isuesun” na mudiaphiyọ a vwọ vwomaba isodje, ku iwun rẹ isodje phiyọ, yẹrẹ mu ekuakua rẹ ofovwin; ẹkẹvuọvo, a da vuẹ ayen nẹ ayen sa ivwighrẹn, kẹ ayen sa odju.

23, 24. Vwẹ Ofovwin Akpọeje II, mavọ yen avwanre vwo ẹruọ rẹ uchebro rọhẹ Rom 13:1 wan, kẹ odjekẹ ọfa vọ yen Inenikristi rẹ uyota vwori?

²³ Ọke rẹ Ofovwin Akpọeje II ghwa vwọ tonphiyọ vwẹ 1939, Uwevwin Orhẹrẹ na da nabọ djefiotọ nẹ a ka ẹbẹre vuọvo vwẹ irueru rẹ akpọ na-a. O ji dje nẹ Inenikristi vwobọ vwẹ ifovwin vẹ oseghe rẹ akpọ nana-a. Ọnana ghini odjekẹ ro fo aruọke! Ọ nẹrhẹ Inenikristi vrabọ rẹ abe rẹ ọbara vwẹ ọke rẹ ofovwin na. Ghwe vwo nẹ ukpe rẹ 1929, ẹbe rẹ avwanre da nabọ dje nẹ ogangan rẹ isuesun rọhẹ Rom 13:1 dia isuesun rẹ akpọ na-a, ẹkẹvuọvo ọ ri Jihova vẹ Jesu. Ọtiọyena, a je guọnọ odjekẹ ọfa.

 ²⁴ Vwẹ 1962, ẹwẹn ọfuanfon na da vwẹ ukẹcha kẹ idibo ri Jesu vwọ kpọ iroro rayen vi, ọke ra vwọ teyen iyovwinreta sansan re nabọ djekpahen Rom 13:1-7 vwẹ Uwevwin Orhẹrẹ ri November 15 vẹ ọ ri December 1. Ukuotọ rọyen, idibo rẹ Ọghẹnẹ de rhi vwo ẹruọ rẹ obo ro mudiaphiyọ ra vwọ vwomakpotọ kẹ ihwo ri suẹn kirobo rẹ Jesu djerephia, rọ vwọ ta: “Vwẹ ẹkẹn ri Siza kẹ Siza, vwẹ ẹkẹn rẹ Ọghẹnẹ kẹ Ọghẹnẹ.” (Luk 20:25) Enẹna, Inenikristi rẹ uyota rhe riẹnre nẹ ogangan rẹ isuesun na mudiaphiyọ usuon rẹ akpọ na ro fori nẹ Inenikristi muọghọ kẹ. Ẹkẹvuọvo, o vwo asan rẹ ọghọemuo tiọyena bare. Ihwo ri suẹn da guọnọ nẹ avwanre churhi rẹ Ọghẹnẹ, ka cha kpahen kirobo rẹ iyinkọn na tare: “Avwanre se mu ọghọ kẹ Ọghẹnẹ nọ ihwo rẹ akpọ.” (Iruo 5:29) Vwẹ Uyovwinrota 13 vẹ 14 e che yono kpahen oborẹ idibo rẹ Ọghẹnẹ vwo jẹ ẹbẹre vuọvo rẹ akpọ na ẹka.

25. Diesorọ oma vwọ vwerhen owẹ kpahen idjerhe rẹ ẹwẹn ọfuanfon na vwọ chọn avwanre uko vwo vwo ẹruọ rẹ Uvie rẹ Ọghẹnẹ?

²⁵ Roro kpahen oborẹ idibo ri Jesu yono kpahen Uvie na re, vwẹ omarẹ ẹgbukpe ujorin re wanre na. Avwanre yono kpahen ọke ra vwọ vwẹ Uvie na vwo mu kugbe ọghanrovwẹ rọyen re. Avwanre je nabọ rhi vwo ẹruọ rẹ iphiẹrophiyọ ivẹ re herọ vwọ kẹ ihwo ri fuevun, kọyen iphiẹrophiyọ rẹ odjuvwu vẹ ọ rẹ otọrakpọ na. E ji yono obo re se vwo dje omaevwokpotọ rẹ avwanre vwọ kẹ usuon rẹ Uvie na, ji muọghọ ro fori kẹ ihwo ri suẹn. Nọ oma wẹn, ‘Me cha riẹn iyono nana eje ọ da dianẹ Jesu rha vwẹ ukẹcha kẹ odibo rọ fuevun na vwo vwo ẹruọ rayen ji yono aye-en?’ Ọnana ebruphiyọ rode re vwo vwo Jesu Kristi vẹ ẹwẹn ọfuanfon na ro sun avwanre!