1. Die wo se roro siẹrẹ wọ da nabọ yono ọbe nana nu?

ASAỌKIEPHANA, wo yono uyota rẹ Baibol buebun re, kerẹ ive rẹ arhọ rẹ bẹdẹ rẹ Ọghẹnẹ veri, ẹdia rẹ ihwo ri ghwuru hepha, kugbe iphiẹrophiyọ rẹ evrẹnushi na. (Aghwoghwo 9:5; Luk 23:43; Jọn 5:28, 29; Ẹvwọphia 21:3, 4) Ọ sa dianẹ wẹ vẹ Iseri rẹ Jihova kpo uyono kuẹgbe re, wo ji vwo imuẹro nẹ ayen ga ẹga rẹ uyota. (Jọn 13:35) Ọ sa dianẹ wẹ vẹ Jihova vwo oyerinkugbe romobọ re, wo  ji brorhiẹn nẹ wọ guọnọ ga. Ọtiọyena wo se roro, ‘die yen mi ru enẹna mi vwọ ga Ọghẹnẹ?’

2. Diesorọ ọshare rẹ Etiopia na vwọ guọnọ bromaphiyame?

² Ọtiọyen yen ọshare rẹ Etiopia rọ diarọ vwẹ ọke rẹ Jesu rorori. Ọke rẹ Jesu vwo vrẹnushi nu, odibo rọyen Filip de ghwoghwo kẹ ọshare na. Filip de dje vwọ kẹ nẹ Jesu yen Mesaya na. Oborẹ ohwo rẹ Etiopia na yonori de te ubiudu te asan rẹ ọ da ta ugege yena: “Nughe, amẹ hẹ etinẹ! Kidie rha djẹ vwẹ ame ẹreyọ?” Iruo Rẹ Iyinkọn Na 8:26-36.

3. (a) Iji vọ yen Jesu vwọ kẹ idibo rọyen? (b) Mavọ yen ofori nẹ ohwo bromaphiyame wan?

³ Baibol na djere phephẹn nẹ wọ da guọnọ ga Jihova, ofori wo vwo bromaphiyame. Jesu vuẹ idibo rọyen: “We re yono ihwo rẹ akpọ na ejobi, wa vwẹ ame kẹ ayen.” (Matiu 28:19) Jesu dje udje ọnana ro vwo bromaphiyame. E bru Jesu phiyọ ame, ọ dia a fanre ame na ku uyovwin rọye-en. (Matiu 3:16) Eriyin ọ je hepha nonẹna, omaebrophiyame rẹ Onenikristi churobọ si re vwo bru ohwo na phiyọ ame kare kare.

4. Die yen omaebrophiyame wẹn djephia vwọ kẹ ihwo efa?

⁴ Omaebrophiyame wẹn, ọyen odjephia kẹ ihwo efa nẹ wọ ghene guọnọ dia ugbeyan rẹ Ọghẹnẹ, wọ je guọnọ ga. (Une Rẹ Ejiro 40:7, 8) Ọtiọyena ku wọ sa nọ, ‘Die yen mi ru rere mi se vwo bromaphiyame?’

5. (a) Die yen orọnvwọn rẹsosuọ vwo che ru tavwen wo ki bromaphiyame? (b) Diesorọ omẹvwa rẹ Inenikristi vwọ dia obo re ghanre?

⁵ Tavwen wo ki se bromaphiyame, wo che yono kpahen Jihova vẹ Jesu. Wọ ton ọyena phiyọ re, womarẹ uyono rẹ Baibol ru wo ruẹ na. (Se Jọn 17:3.) Ẹkẹvuọvo, ọyena ọvo teri-i. Baibol na tare nẹ ofori rẹ ovwan vwọ  “von vẹ erianriẹn” rẹ ọhọre rẹ Jihova. (Kọlose 1:9) Omẹvwa rẹ Iseri rẹ Jihova cha chọn wẹ uko vwo vwo oyerinkugbe ọkpẹkpẹkpẹ vẹ Jihova. Ọnana iroro ọghanghanre ọvo rọ sorọ o vwo fo nẹ wo kpo omẹvwa na ọkieje.—Hibru 10:24, 25.

6. Mavọ yen ofori nẹ wọ riẹn Baibol na te tavwen wo ki se bromaphiyame?

⁶ Vwọrẹ uyota, Jihova rhẹro rọyen mie we nẹ, wọ riẹn emu eje rehẹ Baibol na tavwen wo ki bromaphiyame-e. Ọ tare nẹ ohwo Etiopia na riẹn emu eje rehẹ Baibol tavwen o ki bromaphiyame-e. (Iruo Rẹ Iyinkọn Na 8:30, 31) Avwanre che yono kpahen Ọghẹnẹ bẹdẹ bẹdẹ. (Aghwoghwo 3:11) Ẹkẹvuọvo, tavwen wo ki se bromaphiyame, ofori wo vwo yono, ji rhiabọreyọ iyono kiriguo rehẹ Baibol na.—Hibru 5:12.

7. Ukẹcha vọ yen uyono rẹ Baibol wẹn kẹ wẹ re?

⁷ Baibol na tare: “Ọ dia esegbuyota-a yọ epha bẹnbẹn re vwo ru obo ri je” Ọghẹnẹ. (Hibru 11:6) Ọtiọyena ofori wo vwo vwo esegbuyota tavwen wo ki se bromaphiyame. Baibol na vuẹ avwanre nẹ ihwo evo vwẹ orere rẹ Kọrẹnt awanre nyo oborẹ idibo rẹ Jesu yonori, ayen “de segbuyota ayen da reyọ ame.” (Iruo Rẹ Iyinkọn Na 18:8) Eriyin na, uyono rẹ Baibol na chọn wẹ uko vwo vwo esegbuyota kpahen ive rẹ Ọghẹnẹ kugbe ẹgba rẹ izobo rẹ ọtanhirhe rẹ Jesu ro se sivwin avwanre vwo nẹ umwemwu vẹ ughwu.—Joshua 23:14; Iruo Rẹ Iyinkọn Na 4:12; 2 Timoti 3:16, 17.

8. Die yen che mu we vwọ vuẹ ihwo efa kpahen oborẹ wo yonori?

⁸ Ru wo vwo yono Baibol na kpobarophiyọ na, je mrẹ obo rọ vwẹ ukẹcha kẹ wẹ vwẹ akpeyeren na, esegbuyota wẹn kọ ganphiyọ. Ọnana cha nẹrhẹ wọ vuẹ ihwo efa  kpahen oborẹ wo yono na. (Jerimaya 20:9; 2 Kọrẹnt 4:13) Ẹkẹvuọvo ono yen wọ cha vuẹ?

9, 10. (a) Amono yen ihwo rẹsosuọ ru wo che ghwoghwo kẹ? (b) Die yen ofori nẹ wo ru siẹrẹ wọ da guọnọ nene ukoko na kpo aghwoghwo?

⁹ Wọ sa guọnọ vuẹ ihwo rẹ orua, igbeyan, ihwo wẹ vẹ ayen dia asan ọvo, yẹrẹ ihwo rẹ iruo wẹn kpahen oborẹ wo yono na. Ọyena yoma, ẹkẹvuọvo ruo vẹ ẹwẹn esiri kugbe ẹguọnọ. Ọke da yan obaro, wẹ vẹ ihwo rẹ ukoko na ki se rhe kpo aghwoghwo kuẹgbe. Ọke wo de muegbe re, wọ sa vuẹ ohwo ro yono owẹ Baibol na nẹ wọ guọnọ nene ukoko na kpo aghwoghwo. Ohwo na de no nẹ wo muegbe re, wo ji yeren akpọ wẹn nene iyono rẹ Baibol na, wẹ vẹ ọyen ki che bru ekpako ivẹ ra vwẹ ukoko na.

¹⁰ Die yen cha phia vwẹ echidiotọ yena? Wẹ vẹ ekpako na cha ta ota kugbe rere ayen vwo vwo imuẹro sẹ wo vwo ẹruọ, ji se iyono kiriguo rehẹ Baibol na gbuyota, sẹ wo ruẹ nene oborẹ Baibol na tare vwẹ akpeyeren wẹn rẹ kẹdẹ kẹdẹ, kugbe sẹ wọ ghene guọnọ dia Oseri rẹ Jihova. Karophiyọ nẹ ekpako na yen vwẹrote ihwo eje rehẹ ukoko na, ji tobọ te owẹ, ọtiọyena wo jẹ oshọ wọ vwọ ta ota kẹ ayen mu we-e. (Iruo Rẹ Iyinkọn Na 20:28; 1 Pita 5:2, 3) Echidiotọ na de kuphiyọ nu, ekpako na che ju we riẹn sẹ wo muwan wo vwo nene ukoko na kpo aghwoghwo.

11. Diesorọ ọ vwọ dia obo re ghanre avwanre vwo ru ewene evo tavwen avwanre ki se nene ukoko na kpo aghwoghwo?

¹¹ Ekpako na sa vuẹ wẹ nẹ ofori wo vwo ru ewene evo tavwen wo ki se muwan wo vwo nene ukoko na kpo aghwoghwo. Diesorọ ọ vwọ ghanre wo vwo ru ewene tiọyena? Kidie Jihova yen kẹ avwanre owian ra vwọ vuẹ ihwo efa kpahọn, ọtiọyena ofori avwanre vwo yeren  akpọ avwanre vwẹ idjerhe ro bru ọghọ phiyọ oma.—1 Kọrẹnt 6:9, 10; Galesha 5:19-21.

12. Diesorọ ihwo eje vwo kurhẹriẹ?

¹² Orọnvwọn ọfa je herọ ru wo che ru tavwen wo ki se bromaphiyame. Ọyinkọn Pita tare: “Ovwan gbe kurhẹriẹ rere ovwan wene idjerhe rẹ ovwan, rere e phoro imwemwu rẹ ovwan nu, rere omamọ rẹ eyere rẹ ufuoma vwo nẹ obọ rẹ Jihova bru ovwan rhe.” (Iruo Rẹ Iyinkọn Na 3:19, NW) Die yen o mudiaphiyọ e vwo kurhẹriẹ? Ọyen e vwo djephia nẹ oruchọ rẹ avwanre na da avwanre mamọ. Kerẹ udje, wo de yeren akpọ rẹ ọfanrhiẹn, ofori nẹ wo kurhẹriẹ. Ọ da tobọ dianẹ wọ davwẹngba vwẹ akpeyeren wẹn eje wo vwo ru obo ri yovwirin dede, o ji fo nẹ wo kurhẹriẹ, kidie avwanre eje irumwemwu, ọtiọyena, ofori avwanre yare Ọghẹnẹ nẹ o vwo ghovwo avwanre.—Rom 3:23; 5:1.

13. Die yen o mudiaphiyọ e vwo “wene idjerhe”?

¹³ Re vwo djephia nẹ oruchọ na da avwanre mamọ, ọyena ọvo teri? Ẹjo. Pita tare nẹ o ji fo nẹ wo “wene idjerhe” wẹn. Kọyen wo che siobọ nu umiovwo ru wo ruẹ jovwo na, wo mi rhe ru obo ri yovwirin. Kerẹ udje, vwẹ ẹwẹn roro nẹ wo kpo asan ọvo obọ rẹsosuọ. Wọ vwọ yan te asan ọvo, ku wọ rhe mrẹvughe nẹ idjerhe ọchọchọ yen wọ wan na. Die yen wo che ru? Aphro herọ-ọ, wo che mudia, kuoma rhẹriẹ, wene idjerhe wẹn kpo idjerhe rọ gbare. Eriyin ọ je hepha, wo vwo yono Baibol na, wọ sa mrẹ ẹdia evo vwẹ akpeyeren wẹn re guọnọ ewene. Vwo owenvwe wo vwo “wene idjerhe” wẹn, kọyen wo vwo ru ewene vwẹ akpeyeren wẹn rere wo rhe ruẹ obo ri yovwirin.

14. Mavọ yen wọ vwẹ omakpahotọ kẹ Ọghẹnẹ wan?

¹⁴ Owọẹjẹ ọghanghanre ọfa ofori nẹ wọ jẹ tavwen wo ki bromaphiyame yen wọ vwọ vwẹ omakpahotọ kẹ Jihova. Ọke wọ vwọ vwẹ omakpahotọ kẹ Jihova, wo ve kẹ vwẹ ẹrhovwo nẹ ọyen ọvo wọ cha ga, ọhọre rọyen yen cha dia obo re ma ghanre kẹ wẹ vwẹ akpeyeren wẹn.—Urhi Rivẹ 6:15.

15, 16. Die yen mu ohwo vwọ vwẹ omakpahotọ kẹ Ọghẹnẹ?

¹⁵ Wo de ve kẹ Jihova nẹ ọyen ọvo yen wọ cha ga, ọ họhọ ive ru wo ve kẹ ohwo ru wo vwo ẹguọnọ kpahen nẹ wẹ vẹ ọyen cha dia bẹdẹ. Vwẹ ẹro roro aye gbẹ ọshare re kọn phiyọ ohwohwo. Ọshare na vwo vughe aye na phiyọ ye, ko che rhi vwo ẹguọnọ rọyen te ẹdia rọ da rọvwọn. Dede nẹ orhiẹn nana ghwa lọhọ-ọ, ọshare na muegbe ro vwo rhiabọreyọ oghwa na kidie o vwo ẹguọnọ rẹ aye na.

¹⁶ Wo vwo yono kpahen Jihova na, wo che rhi vwo ẹguọnọ rọyen te asan rẹ wọ da davwẹngba wẹn eje vwọ ga. Ọnana kọyen che mu we vwo ve ive vwẹ ẹrhovwo nẹ wọ cha ga Jihova. Baibol na tare nẹ kohwo kohwo rọ guọnọ nene Jesu kọ “sen omobọ rọye.” (Mak 8:34) Die yen ọyena mudiaphiyọ? Ọ mudiaphiyọ nẹ ẹmienyo rẹ Jihova yen wọ cha wọ kobaro vwẹ akpeyeren wẹn. Oborẹ Jihova guọnọ mie we ghanre vrẹ ọdavwẹ romobọ wẹn.—Se 1 Pita 4:2.

17. Diesorọ ihwo evo rhọnvwe vwẹ omakpahotọ kẹ Jihova-a?

¹⁷ Ihwo evo rhọnvwe vwẹ omakpahotọ kẹ Jihova-a, kidie ayen djẹ oshọ nẹ ayen che se yerin mu ive raye-en. Ayen guọnọ ku Jihova phiyotọ-ọ, yẹrẹ ayen se roro nẹ  ayen rha vwẹ omakpahotọ kẹ-ẹ, Jihova rha cha vwẹ ayen vwo gun ẹdjọ-ọ.

18. Die yen cha chọn wẹ uko vwọ vrabọ rẹ oshọ nẹ wo che ku Jihova phiyotọ?

¹⁸ Ẹguọnọ ru wo vwo kpahen Jihova yen cha chọn wẹ uko vwọ vrabọ rẹ oshọ nẹ wo che kuophiyotọ. Kidie nẹ wo vwo ẹguọnọ rọyen, wọ cha davwẹngba wẹn wọ vwọ sẹro rẹ ive wẹn vwọ kẹ. (Aghwoghwo 5:4; Kọlose 1:10) Wo rhe che roro nẹ ọ pha bẹnbẹn re vwo ru ọhọre rẹ Jihova-a. Ọyinkọn Jọn de si: “Kidie ọnana hẹ ẹguọnọ rẹ Ọghẹnẹ na nẹ, avwanre yọnrọn irhi rọye. Yẹ irhi rọye na ghwa họhọ-ọ.”—1 Jọn 5:3.

19. Diesorọ o vwo fo nẹ wọ djẹ oshọ wọ vwọ vwẹ omakpahotọ kẹ Jihova-a?

¹⁹ Wọ cha dia ohwo ọgbagba tavwen wọ ke vwẹ omakpahotọ kẹ Jihova-a. Oborẹ udu avwanre gbare yen Jihova nọ mie avwanre. (Une Rẹ Ejiro 103:14) Ọ cha vwẹ ukẹcha kẹ wẹ vwo ru obo ri yovwirin. (Aizaya 41:10) Vwẹ udu wẹn ejobi vwọ vwẹroso Jihova, “kọ cha kpọ idjerhe wẹn ejobi vi.”—Isẹ 3:5, 6.

20. Wọ da vwẹ omakpahotọ kẹ Jihova nu, owọẹjẹ ọfa vọ yen vwọ kpahọn?

²⁰ Wo rorori nẹ wo muegbe wọ vwọ vwẹ omakpahotọ kẹ Jihova re? Wọ da vwẹ omakpahotọ kẹ Jihova nu, kọyen wo muegbe vwọ kẹ owọẹjẹ rọ vwọ kpahọn re. Ofori wo vwo bromaphiyame.

21, 22. Mavọ yen wọ sa vwọ “vwẹ unu rhọvwe” esegbuyota wẹn vwẹ azagba?

²¹ E jẹ ọkpako rọ vwẹrote echidiotọ rẹ ekpako ukoko wẹn riẹn nẹ wọ vwẹ omakpahotọ kẹ Jihova nure, nẹ wọ je guọnọ bromaphiyame. Kọ cha vuẹ ekpako evo nẹ  ayen vwẹ iyono rẹ Baibol kiriguo vwọ fuẹrẹn owẹ. Ayen da rhọnvwe nẹ wo muegbe re, ayen cha vuẹ wẹ nẹ wo se bromaphiyame vwẹ osikoko yẹrẹ ọghwẹkoko rẹ Iseri rẹ Jihova rẹ ovwan cha ra. Vwevunrẹ osikoko na, a cha ta ota rọ cha nabọ dje fiotọ oborẹ omaebrophiyame mudiaphiyọ. Ohwo rọ ta ota na kọ cha nọ ihwo ri guọnọ bromaphiyame na enọ ivẹ. Womarẹ enọ  nana ru wọ cha kpahenphiyọ na, wo che djephia nẹ wọ “vwẹ unu rhọvwe” esegbuyota wẹn vwẹ azagba.—Rom 10:10.

²² Ọke yena re, ke che bru we phiyọ ame. E che bru we phiyọ ame kare kare. Ebrophiyame na che dje kẹ ihwo  ejobi nẹ wọ vwẹ omakpahotọ kẹ Jihova re, nẹ asaọkiephana wẹ ọvo usun rẹ Iseri rẹ Jihova.

23. Die yen o mudiaphiyọ e vwo bromaphiyame “vwẹ odẹ rẹ Ọsẹ vẹ ọ rẹ Ọmọ kugbe [“ẹwẹn ọfuanfon,” NW]”?

²³ Jesu vuẹ idibo rọyen nẹ e che bru ayen phiyọ ame “vwẹ odẹ rẹ Ọsẹ vẹ ọ rẹ Ọmọ kugbe [“ẹwẹn ọfuanfon,” NW].” (Se Matiu 28:19.) Die ọyena mudiaphiyọ? O mudiaphiyọ nẹ wo vwo ọmrẹvughe rẹ ogangan rẹ usuon rẹ Jihova kugbe ẹdia rẹ Jesu hepha vwẹ ọrhuẹrẹphiyotọ rọyen, kugbe oborẹ Ọghẹnẹ reyọ ẹwẹn ọfuanfon rọyen vwo ru ọhọre rọyen gba.—Une Rẹ Ejiro 83:18; Matiu 28:18; Galesha 5:22, 23; 2  Pita 1:21.

24, 25. (a) Die yen omaebrophiyame mudiaphiyọ? (b) Die yen avwanre cha ta ota kpahen vwẹ uyovwinrota rọ koba?

²⁴ Omaebrophiyame mudiaphiyọ orọnvwọn rọ pha ghanghanre. E de bru we phiyọ ame, o mudiaphiyọ nẹ wo chukoku oka rẹ akpọ ru wo yeren jovwo. Ra vwọ kpare owẹ nẹ ame na, mudiaphiyọ nẹ wọ cha ton akpeyeren kpokpọ phiyọ wo vwo ru ọhọre rẹ Ọghẹnẹ. Ọyena odjephia nẹ wọ cha ga Jihova vwo nẹ ọke yena yanran. Karophiyọ nẹ wọ vwẹ omakpahotọ kẹ ohworakpọ, ukoko yẹrẹ iruo vuọvo-o. Jihova wọ vwẹ omakpahotọ kẹ.

²⁵ Omaẹkpahotọ wẹn cha chọn wẹ uko vwo vwo omamọ rẹ oyerinkugbe vẹ Jihova. (Une Rẹ Ejiro 25:14) Ọ dia oghwe mudiaphiyọ nẹ ohwo che vwo usivwin kidie nẹ o bromaphiyame re-e. Ọyinkọn Pọl de si: “Ovwan gba vwẹ oshọ vẹ ophariẹ vwọ wian owian rẹ esivwo rẹ ovwan phia.” (Filipae 2:12) Omaebrophiyame ọyen ọtonphiyọ. Ẹkẹvuọvo, mavọ wọ sa vwọ sẹro rẹ oyerinkugbe wẹn vẹ ọ rẹ Jihova? Uyovwinrota rọ koba vwẹ ọbe nana cha kpahen phiyọ onọ yena.