1. Die yen ọhọre Ọghẹnẹ vwọ kẹ ihworakpọ?

ỌHỌRE Ọghẹnẹ vwọ kẹ ihworakpọ vwerhen oma mamọ. Jihova ma ọshare vẹ aye rẹsosuọ, Adam vẹ Ivi, rere ayen vwọ dia ogba rọ pha yoyovwin. Ọghẹnẹ guọnọre nẹ ayen vwiẹ emọ, ru akpọneje phiyọ iparadaisi, ji vwẹrote eranvwe na.—Jẹnẹsis 1:28; 2:8, 9, 15; ni Eta rẹ Odjefiotọ 6.

2. (a) Mavọ yen avwanre ru riẹn nẹ Ọghẹnẹ che ru ọhọre rọyen gba? (b)  Die yen Baibol na ta kpahen akpeyeren rẹ bẹdẹ?

² Wo rorori nẹ avwanre ghini se yerin vwẹ iparadaisi? Jihova da ta: “Me ta nure, mi ji se ruo gba.” (Aizaya 46:9-11; 55:11) Vwọrẹ uyota, Ọghẹnẹ che ru obo ro veri, o vwo emu vuọvo rọ cha dobọ rọyen ji-i. Jihova tare nẹ, o vwo oboresorọ ọ vwọ ma otọrakpọ na, “ọ vwẹ ozighi ma-a,” kọyen ọ marọ kufia-a. (Aizaya 45:18) Ọ guọnọre nẹ ihwo dia otọrakpọ na eje. Oka rẹ ihwo vọ yen Ọghẹnẹ guọnọre nẹ e dia otọrakpọ na, mavọ yen ayen cha dia kri te? Baibol na da ta: “Ọvwata [yẹrẹ ohwo ro nyẹme] cha re ughwẹ rẹ otọ na, kọ dia enu rọyen bẹdẹ.”—Une Rẹ Ejiro 37:29; Ẹvwọphia 21:3, 4.

3. Ọ vwọ dianẹ ihworakpọ muọga, ji ghwẹ na, onọ vọ yen wọ sa nọ?

³ Ihwo muọga, ji ghwẹ nonẹna. Vwẹ asan buebun, ihwo họnra, ji hwe ohwohwo. O muẹro nẹ ọnana dia ọhọre rẹ Ọghẹnẹ-ẹ. Die yen phiare? Baibol na ọvo yen sa vuẹ avwanre.

4, 5. (a) Ono yen ta ota kẹ Ivi womarẹ ọrọdekọ vwẹ ogba rẹ Idẹn? (b) Mavọ yen ohwo rẹ uyota sa vwọ dia oji?

⁴ Baibol na vuẹ avwanre nẹ, Ọghẹnẹ vwo ọvweghwrẹn ọvo, odẹ rọyen, “Idẹbono kugbe Ukọ..” Eshu ta ota kẹ Ivi vwẹ ogba rẹ Idẹn womarẹ ọrọdekọ. (Ẹvwọphia 12:9; Jẹnẹsis 3:1) Eshu ruro rere ọ vwọ họhọ nẹ ọrọdekọ na yen ta ota.—Ni Eta rẹ Odjefiotọ 7.

⁵ Ọghẹnẹ yen ma Idẹbono rọ dia Eshu na? Ẹjo! Amakashe ọvo rọhẹ odjuvwu ọke rẹ Ọghẹnẹ vwọ ma akpọ na vwọ kẹ Adam vẹ Ivi, ọyen hirhe oma phiyọ Idẹbono. (Job 38:4, 7) Mavọ ọ sa vwọ dia ọtiọyen? Mavọ yen ohwo rẹ uyota sa vwọ dia oji? E vwiẹrẹ kerẹ oji-i. Ẹkẹvuọvo, o de vwo urhurusivwe kpahen obo re dia ọrọye-en, o de ji roro kpahọn ọkeneje, urhurusivwe ọbrabra rọyen na kọ cha ganphiyọ. Uphẹn de rhiephiyọ kẹ, ko che cho orọnvwọn na. Ọtiọyena, kọ cha rhe dia oji.—Se Jems 1:13-15; ni Eta rẹ Odjefiotọ 8.

6. Mavọ yen amakashe ọvo rhe vwọ dia ọvweghrẹn rẹ Ọghẹnẹ?

⁶ Ọna yen obo re phia kẹ amakashe yena. Ọke rẹ Jihova vwọ ma Adam vẹ Ivi nu, kọ vuẹ ayen nẹ, ayen vwiẹ emọ rere ayen “vọn akpọ na.” (Jẹnẹsis 1:27, 28) Ọ sa dianẹ amakashe yena rorori nẹ, ‘ofori ihworakpọ vwọ ga, ukperẹ Jihova!’ Kidie nẹ o roro kpahọn ọkeneje, ko rhi vwo urhurusivwe kpahen obo re dia ọ rẹ Jihova. Amakashe yena guọnọre nẹ ihworakpọ ga ọyen. Ọ da phiẹn Ivi womarẹ efian ro gun vwọ kẹ. (Se Jẹnẹsis 3:1-5.) Ọtiọyena, ọ da rhe dia Eshu, Idẹbono na, rọ dia ọvweghrẹn rẹ Ọghẹnẹ.

7. (a) Diesorọ Adam vẹ Ivi vwo ghwu? (b) Diesorọ avwanre vwọ ghwa, ji ghwẹ?

⁷ Adam vẹ Ivi nyẹme rẹ Ọghẹnẹ-ẹ, ayen da re omamọ  na. (Jẹnẹsis 2:17; 3:6) Ayen ru umwemwu vwọso Jihova, ọke vwọ yan obaro, ayen de ghwu kirobo rẹ Jihova vuẹ ayen jovwo. (Jẹnẹsis 3:17-19) Emọ rayen jẹ irumwemwu, kọyensorọ ayen vwo ghwẹ. (Se Rom 5:12.) Rere e se vwo vwo ẹruọ rẹ oboresorọ emọ rẹ Adam vẹ Ivi je vwọ dia irumwemwu, gbe roro kpahen udje rẹ umuko re vwo ruẹ ibrẹdi. Umuko na da miẹghẹn, die yen cha phia kẹ ibrẹdi eje ra vwẹ umuko yena ru? Ayen ji che vwo oka rẹ ẹmiẹghẹn yena. Ọke rẹ Adam vwo jẹ ẹme rẹ Ọghẹnẹ enyo, ọ da rhe dia orumwemwu. Kidie avwanre eje emọ rẹ Adam, avwanre jẹ irumwemwu, yẹrẹ avwanre vwo oka rẹ “ẹmiẹghẹn” kirobo rẹ Adam vwori. Kidie nẹ avwanre irumwemwu na, avwanre ke ghwa, ji ghwẹ.—Rom 3:23; ni Eta rẹ Odjefiotọ 9.

8, 9. (a) Die yen Idẹbono guọnọre nẹ Adam vẹ Ivi vwo imuẹro kpahen? (b) Diesorọ Jihova rha ghwọrọ ihwo ri gbevwọsuọ na ugege yena-a?

⁸ Idẹbono yen ton ẹvwọsua rẹ usuon rẹ Jihova phiyọ, ọke rọ vwọ phiẹn Adam vẹ Ivi vwo ru umwemwu. Ọ guọnọre nẹ ayen vwo imuẹro nẹ Jihova orharhe osun rọ phiẹn ayen, ohwo rọ guọnọ erhuvwu raye-en. Eshu ko dje nẹ ihworakpọ sa dia ababọ rẹ usuon rẹ Ọghẹnẹ, kọyen Adam vẹ Ivi se brorhiẹn rẹ obo re brare vẹ obo ri yovwirin komobọ rayen. Die yen Jihova che ru? Ihwo evo rorori nẹ, mane Ọghẹnẹ ghwọrọ otu ri gbevwọsuọ na ugege yena. Ọyena sa kpahenphiyọ ẹvwọsuọ rẹ Idẹbono? Ẹjo.

⁹ Ọtiọyena, Jihova rha ghwọrọ irumwemwu na ugege yena-a. Ukperẹ ọtiọyen, ọ da vwẹ uphẹn kẹ ihworakpọ nẹ ayen sun omobọ rayen. Ọnana che djephia nẹ Eshu ọvwọrefian, nẹ Jihova yen riẹn obo ri me yovwin vwọ kẹ ihworakpọ. E che yono evuẹ efa kpahọn  vwẹ Uyovwinrota 11 rẹ ọbe nana. Ẹkẹvuọvo, mavọ wo ni orhiẹn rẹ Adam vẹ Ivi bruru na? Orhiẹn ayen bruru rẹ ayen vwọ kerhọ rẹ Eshu ukperẹ Ọghẹnẹ na, gbare? Jihova yen kẹ Adam vẹ Ivi kemu kemu rẹ ayen vwori. Ọ kẹ ayen arhọ ọgbagba, ogba oyoyovwin rẹ ayen dia, kugbe  owian rọ kẹ ayen omavwerhovwẹn. Jẹ Eshu ru erhuvwu vuọvo kẹ aye-en. Ọ da dia owẹ, die wo che ru?

10. Orhiẹn ọghanghanre vọ yen avwanre ohwo vuọvo che bru?

¹⁰ Nonẹna, avwanre ohwo vuọvo ji vwo oka rẹ orhiẹn ọtiọyen rẹ avwanre che bru, re mu arhọ rẹ avwanre kpahen. Avwanre sa jẹ ojẹ ra vwọ kerhọ rẹ Jihova kerẹ Osun rẹ avwanre, rere avwanre dje Eshu phiyọ ọvwọrefian. Yẹrẹ avwanre sa jẹ Eshu kerẹ osun rẹ avwanre. (Une Rẹ Ejiro 73:28; se Isẹ 27:11.) Ihwo re kerhọ rẹ Jihova nonẹna bunru-un. Vwọrẹ uyota, ọ dia Ọghẹnẹ yen sun akpọ na-a. Ọ rha dia Ọghẹnẹ yen suo-on, kẹ ono yen suon?

11, 12. (a) Die yen avwanre yono nẹ ọdavwini rẹ Eshu davwen Jesu ni? (b) Ẹkpo rẹ Baibol vọ yen djerephia nẹ Eshu yen suẹn akpọ na?

¹¹ Jesu riẹn ohwo ro suẹn akpọ na. Vwẹ ẹdẹ ọvo, Eshu da “vwẹ uvie rẹ akpọ na ejobi vwọ nẹ, kugbe urinrin rọyen ejobi.” Eshu da ta kẹ Jesu nẹ, “Enana ejobi ke dia e wẹn, ọ da dianẹ wo diguẹ kẹ vwẹ re wọ da ga vwẹ.” (Matiu 4:8, 9; Luk 4:5, 6) Gba nọ oma wẹn, ‘ọ rha dia Eshu yen vwo usuon rẹ akpọ na-a, ọ sa vuẹ Jesu nẹ ọ cha vwẹ ayen kẹ?’ Ẹjo. Eshu yen vwo usuon na eje.

¹² Ọkiọvo wo roro: ‘Mavọ ọ vwọ dianẹ Eshu yen suẹn akpọ na? Ọ dia Jihova Ọghẹnẹ ro me vwo ẹgba na, yen ma akpọ ma odjuvwu?’ (Ẹvwọphia 4:11) E, Ọyen ma ayen, ẹkẹvuọvo, Jesu djere phephẹn nẹ Eshu yen “osun rẹ akpọ nana.” (Jọn 12:31; 14:30; 16:11) Ọyinkọn Pọl se Eshu nẹ ọ yehẹ “[“ọghẹnẹ,” NW] rẹ akpọ nana.” (2 Kọrẹnt 4:3, 4) Ọyinkọn Jọn de ji si nẹ, “akpọ na ejobi hẹ obọ rẹ ogangan rẹ ohwo umwemwu na.”—1 Jọn 5:19.

13. Diesorọ a vwọ guọnọ akpọ kpokpọ?

¹³ Akpọ na miovwẹn phiyọ kẹdẹ kẹdẹ. A mrẹ ifovwin, umiovwo, ophiẹnvwe kugbe ozighi vwẹ asan eje. O vwo oborẹ ihworakpọ davwen te-e, ayen che se si ebẹnbẹn rẹ akpọ na no-o. Ẹkẹvuọvo, Ọghẹnẹ cha ghwọrọ akpọ rẹ Eshu na vwẹ ofovwin rẹ Amagidọn, kọ cha vwẹ akpọ kpokpọ rẹ ọvwata vwo wene.—Ẹvwọphia 16:14-16; ni Eta rẹ Odjefiotọ 10.

14. Ono yen Ọghẹnẹ vwo mu Ovie rẹ Uvie Rọyen? Die yen Baibol na ta kpahen Jesu?

¹⁴ Jihova vwẹ Jesu Kristi vwo mu Ovie rẹ Uvie Rọyen rọhẹ odjuvwu. Ikpe buebun re wanre, Baibol na tare nẹ Jesu che sun kerẹ “Ọmọ rẹ ovie rẹ Ufuoma,” usuon rọyen che vwoba-a. (Aizaya 9:6, 7) Jesu vuẹ idibo rọyen nẹ ayen nẹrhovwo kpahen usuon nana: “Jẹn Uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.” (Matiu 6:10) Vwẹ Uyovwinrota 8 rẹ ọbe nana, avwanre che yono kpahen oborẹ Uvie rẹ Ọghẹnẹ cha reyọ ẹdia rẹ usuon akpọ na. (Se Daniẹl 2:44.) Uvie na ko che ru akpọ na phiyọ iparadaisi.—Ni Eta rẹ Odjefiotọ 11.

15. Die yen “akpọ kpokpọ” na?

¹⁵ Baibol na veri nẹ, “avwanre hẹrhẹ idjuvwu ekpokpọ kugbe akpọ rẹ ọvwata cha dia.” (2 Pita 3:13; Aizaya 65:17) Ọkiọvo, siẹrẹ Baibol na da ta ota kpahen “akpọ na,” o mudiaphiyọ ihworakpọ ri yeren vwẹ akpọ na. (Jẹnẹsis 11:1) Ọtiọyena, “akpọ kpokpọ” rẹ ọvwata na mudiaphiyọ ihwo re kerhọ rẹ Ọghẹnẹ, re je mrẹ ebruphiyọ rọyen.

16. Okẹ ọghanghanre vọ yen Ọghẹnẹ cha vwọ kẹ ihwo ri che yerin vwẹ akpọ kpokpọ rọyen na, die yen e che ru rere okẹ nana ki se te avwanre obọ?

 ¹⁶ Jesu veri nẹ, a cha vwẹ “arhọ ri bẹdẹ” kẹ ihwo ri che yerin vwẹ akpọ kpokpọ na. (Mak 10:30) Die yen avwanre che ru rere okẹ nana se vwo te avwanre obọ? Biko se Jọn 3:16 vẹ 17:3, wọ mrẹ ẹkpahọnphiyọ na. E jẹ a fuẹrẹn oborẹ Baibol na dje oborẹ akpeyeren cha dia vwevunrẹ Iparadaisi vwẹ otọrakpọ na.

17, 18. Mavọ avwanre ru riẹn nẹ ufuoma vẹ ofuvwegbe cha dia akpọneje?

¹⁷ Umwemwu, ofovwin vẹ ozighi rha cha dia-a. Irumwemwu gbe cha dia otọrakpọ na ọfa-a. (Une Rẹ Ejiro 37:10, 11) Ọghẹnẹ cha “nẹrhẹ ofovwi fue re te oba rẹ akpọ na.” (Une Rẹ Ejiro 46:9; Aizaya 2:4) Akpọ na kọ cha vọn vẹ ihwo ri vwo ẹguọnọ rẹ Ọghẹnẹ ri ji nyupho rọyen. Ufuoma kọ cha dia bẹdẹ bẹdẹ.—Une Rẹ Ejiro 72:7.

¹⁸ Idibo rẹ Jihova cha dia vwọrẹ ofuvwegbe. Vwẹ ọke awanre, ihwo rẹ Izrẹl da kerhọ rẹ Ọghẹnẹ, kẹ ayen dia vwọrẹ ofuvwegbe kidie Ọghẹnẹ vwẹrote ayen. (Livitikọs 25:18, 19) Vwẹ Iparadaisi, oshọ rẹ ohwo yẹrẹ emu vuọvo che mu avwanre-e. Avwanre ki che yeren akpọ rẹ ofuvwegbe ọkieje!—Se Aizaya 32:18; Maika 4:4.

19. Diesorọ o vwo mu avwanre ẹro nẹ emu cha vọn asan eje vwẹ akpọ kpokpọ na?

¹⁹ Emu cha vọn asan eje. “E jẹn ọka buebun dia otọ na; vwẹ enu rẹ igbenu na etiyin i de kpogho.” (Une Rẹ Ejiro 72:16) Jihova “Ọghẹnẹ rẹ avwanre, o bruphiyọ kẹ avwanre nure,” ọtiọyena “akpọ na che yovwin emu buebun.”—Une Rẹ Ejiro 67:6.

20. Mavọ avwanre ru riẹn nẹ otọrakpọ na eje che hirhie phiyọ iparadaisi?

²⁰ Akpọ na ejobi cha dia iparadaisi. Ihwo che vwo  iwevwin vẹ ogba iyoyovwin. (Se Aizaya 65:21-24; Ẹvwọphia 11:18.) Akpọ na ejobi cha dia yoyovwin kerẹ oborẹ ogba rẹ Idẹn pha jovwo. Jihova cha kẹ avwanre oborẹ avwanre guọnọre eje. Baibol na da ta kpahọn nẹ, “Wọwẹ ri rhie obọ wẹn, wọwẹ re vwẹ obo rẹ kohwo kohwo ọkpokpọ guọnọre kẹ.”—Une Rẹ Ejiro 145:16.

21. Mavọ avwanre ru riẹn nẹ ihworakpọ vẹ eranvwe che yerin kugbe?

²¹ Ihworakpọ vẹ eranvwe che yerin kugbe. Eranvwe gbe cha wan ihworakpọ oma-a. Omotete dede cha djoshọ rẹ eranvwe re djoma-a.—Se Aizaya 11:6-9; 65:25.

22. Die yen Jesu che ru kẹ ihwo re muọga?

²² Ega che no. Ọke rẹ Jesu vwọ hẹ akpọ, o sivwin ihwo buebun. (Matiu 9:35; Mak 1:40-42; Jọn 5:5-9) Ẹkẹvuọvo, kerẹ Ovie rẹ Uvie rẹ Ọghẹnẹ, Jesu che sivwin ihworakpọ eje. O gbi vwo ohwo ọvuọvo rọ tanẹ, “Me muọga-a.”—Aizaya 33:24; 35:5, 6.

23. Die yen Ọghẹnẹ che ru kẹ ihwo ri ghwuru?

²³ Ihwo ri ghwuru che vrẹnushi. Ọghẹnẹ veri nẹ iduduru rẹ ihwo ri ghwuru na che vrẹnushi rhe. “Evrẹnushi herọ kẹ ihwo, te ihwo ọsoso te i ri jẹ ọsoso ẹdia.”—Se Jọn 5:28, 29; Iruo Rẹ Iyinkọn Na 24:15.

24. Mavọ wo rorori nẹ akpeyeren cha dia vwevunrẹ Iparadaisi?

²⁴ Avwanre eje vwo ojẹ rẹ avwanre cha jẹ. Ọ sa dia ojẹ re vwo yono kpahen Jihova, je ga yẹrẹ ru obo ri je avwanre. Avwanre da jẹ ojẹ ra vwọ ga Jihova, ebruphiyọ gbidiki che te avwanre obọ vwẹ ọke rọ cha obaro na. Ọshare ọvo vwọ vuẹ Jesu nẹ ọ karophiyọ ọyen o de ghwu, Jesu da vuẹ nẹ, “Me vẹ owẹ dia vwẹ Iparadaisi.” (Luk 23:43) E jẹ avwanre yono kpahen Jesu kpobarophiyọ, rere a mrẹ obo o che ru orugba rẹ ive Ọghẹnẹ wan.