1. Ono yen cha vuẹ avwanre idjerhe ro shephiyọ ra vwọ ga Ọghẹnẹ?

ẸGA buebun tare nẹ ayen yono uyota kpahen Ọghẹnẹ. Ẹkẹvuọvọ ọyena dia uyota-a, kidie iyono re fẹnẹre yen ẹga sansan yono kpahen oka rẹ ohwo Ọghẹnẹ hepha kugbe obo ra ga wan. Mavọ yen avwanre sa vwọ riẹn idjerhe ro shephiyọ rẹ avwanre vwọ ga Ọghẹnẹ? Jihova ọvo yen ohwo rọ sa vuẹ avwanre oborẹ avwanre ga wan.

2. Mavọ wo se vwo yono idjerhe ro shephiyọ wọ vwọ ga Ọghẹnẹ?

² Jihova kẹ avwanre Baibol na rere avwanre se yono idjerhe ro shephiyọ ra vwọ ga. Ọtiọyena, gbe yono Baibol na, Jihova cha vwẹ ukẹcha kẹ wẹ vwọ mrẹ erere vwo nẹ iyono rọyen rhe kiridie ọ vwẹrote we.—Aizaya 48:17.

3. Die yen Ọghẹnẹ guọnọre nẹ avwanre ru?

³ Ihwo evo tare nẹ Ọghẹnẹ rhiabọreyọ ẹga eje, ẹkẹvuọvo ọyena dia oborẹ Jesu yono avwanre-e. Ọ tare: “Ọ dia ihwo ejobi ri se vwe Ọrovwohwo, Ọrovwohwo eye se te uvie rẹ odjuvwu-u; jokpa rẹ ihwo ri ru ẹguọnọ rẹ Ọsẹ mẹ.” Ọtiọyena, ko fori nẹ avwanre yono kpahen ọhọre rẹ Ọghẹnẹ rere avwanre ji ruo. Ota nana pha ghanghanre kiridie Jesu vwẹ ihwo re rhọnvwe kerhọ rẹ Ọghẹnẹ-ẹ vwo dje iji yẹrẹ “iruimwemwu.”—Matiu 7:21-23.

4. Die yen Jesu tare kpahen eruo rẹ ọhọre rẹ Ọghẹnẹ?

⁴ Jesu si avwanre orhọ nẹ avwanre che hirharoku edavwini siẹrẹ avwanre da guọnọ ru ọhọre rẹ Ọghẹnẹ. Ọ tare: “Ovwan wan anurhoro ọhwahwa na: Kidie idjerhe  rọ hẹhẹre kugbe anurhoro hẹhẹre ọye idjerhe rẹ ughwru. Ihwo buebu yi nene idjerhe yena. Kidie idjerhe rẹ uyota na pha hwahwa phiọnphiọn, ọye ọ rẹ arhọ na; ihwo tutuno re sa guọnọ mrẹ.” (Matiu 7:13, 14) Idjerhe ọhwahwa yẹrẹ idjerhe ro shephiyọ ra vwọ ga Ọghẹnẹ na suẹn ohwo kpo arhọ rẹ bẹdẹ. Idjerhe ọhẹhẹre yẹrẹ idjerhe rọ chọre ra vwọ ga Ọghẹnẹ na suẹn ohwo kpo ughwu. Jẹ Jihova guọnọre nẹ ohwo vuọvo ghwu-u. Ọ kẹ ihwo ejobi uphẹn rẹ ayen vwo yono kpahọn.—2 Pita 3:9.

5. Mavọ wo se vwo vughe ihwo re ga Ọghẹnẹ vwẹ idjerhe ro shephiyọ?

⁵ Jesu tare nẹ avwanre se vughe ihwo re ga Ọghẹnẹ vwẹ idjerhe ro shephiyọ. Avwanre se ru ọnana siẹrẹ avwanre da nabọ fuẹrẹn oborẹ ayen segbuyota vẹ oborẹ ayen ruẹ. Ọ tare: “Emamọ rayen e vwo vughe ayen.” Ọ da vwọba: “Urhe rẹ esiri, ọ mọ emamọ esiri.” (Matiu 7:16, 17) Ọ dia ọnana mudiaphiyọ nẹ ihwo re ga Ọghẹnẹ gbare-e. Ẹkẹvuọvo, idibo rẹ Ọghẹnẹ davwẹngba rẹ ayen vwo ru obo ri yovwirin ọkieje. Asaọkiephana, avwanre cha mrẹ oborẹ avwanre se vwo vughe ihwo re ga ẹga rẹ uyota na.

6, 7. Diesorọ e vwo mu iyono rẹ ẹga uyota kpahen Baibol na? Die yen udje rẹ Jesu yono avwanre?

⁶ Ofori nẹ iyono rẹ avwanre nẹ Baibol na rhe. Baibol na tare: “Ọbe ọfuanfon na ejobi rẹ Ọghẹnẹ mu ihwo vwo si na, vọnre vẹ erere kẹ uyono, ẹghwọkuo, ẹrhuẹrẹ phiyọ, kugbe eyono phiyọ ọvwata, rere ohwo rẹ Ọghẹnẹ vwọ gba, ra vwọ rhuẹrẹ kpahe kẹ iruo esiri.” (2 Timoti 3:16, 17, NW) Ọyinkọn Pọl si rhe Inenikristi: “Ọke rẹ ovwan vwọ reyọ ota rẹ Ọghẹnẹ na ru we nyo mie avwanre na, ovwan reyerọ kerẹ ota rẹ ohwo rẹ  akpọ-ọ ẹkẹvuọvo ovwan da reyọ kirobo rọ epha dẹn, ota rẹ Ọghẹnẹ.” (1 Tẹsalonaika 2:13) E mu iyono rẹ ẹga uyota kpahen Ota rẹ Ọghẹnẹ ọvo, Baibol na. Ọ dia iyono vẹ irueru rẹ ihwo rẹ akpọ-ọ.

⁷ Jesu mu iyono rọyen ejobi kpahen Ota rẹ Ọghẹnẹ. (Se Jọn 17:17.) Ọkieje yen ọ vwọ ta ota nẹ Baibol na cha. (Matiu 4:4, 7, 10) Idibo rẹ Ọghẹnẹ rẹ uyota nene udje rẹ Jesu, ayen ji mu iyono rayen ejobi kpahen Baibol na.

8. Die yen Jesu yono avwanre kpahen ẹga ra vwọ kẹ Jihova?

⁸ Avwanre ga Jihova ọvo. Une Rẹ Ejiro 83:18, NW da ta: “Wẹwẹ, rẹ odẹ wẹ dia Jihova na, Wẹ ọvo yen Me Kpenu vwẹ akpọ na ejobi.” Jesu guọnọre nẹ ihwo riẹn ohwo rẹ Ọghẹnẹ rẹ uyota na ghene hepha, o ji yono ihwo odẹ rẹ Ọghẹnẹ. (Se Jọn 17:6.) Jesu da ta: “Ọrovwohwo Ọghẹnẹ [Jihova] ọye wo shiguẹ kẹ, ọye ọvo wọ je ga.” (Matiu 4:10) Ọtiọyena, kerẹ idibo rẹ Ọghẹnẹ ofori nẹ avwanre vwẹrokere udje rẹ Jesu. Jihova ọvo yen avwanre ga, avwanre vwẹ odẹ rọyen vwọ wian, avwanre ji yono ihwo efa kpahen Ọghẹnẹ vẹ obo ro che ru kẹ avwanre.

9, 10. Idjerhe vọ yen avwanre vwo dje ẹguọnọ kẹ ohwohwo?

⁹ Ofori nẹ avwanre vwo uvi rẹ ẹguọnọ kpahen ihwo. Jesu yono idibo rọyen nẹ ayen vwo ẹguọnọ rẹ ohwohwo. (Se Jọn 13:35.) Otoro asan rẹ avwanre nu rhe-e, ẹkuruemu rẹ orho rẹ avwanre-e, sẹ avwanre feri yẹrẹ e feri-i. E jẹ ẹguọnọ rẹ avwanre vwo kẹ ohwohwo ku avwanre kugbe kerẹ iniọvo. (Kọlose 3:14) Ọtiọyena, avwanre rhe vwobọ vwẹ ofovwin yẹrẹ hwe ihwo-o. Baibol na tare: “Vwẹ oma rẹ ọnana kọye e vwo vughe emọ rẹ Ọghẹnẹ, kugbe emọ rẹ Idẹbono: kohwo kohwo ro ru umwemwu eyẹ ro tuoma rẹ oniọvo rọye yọ dia ọmọ rẹ Ọghẹnẹ-ẹ.” Ọ da vwọba: “Avwanre guọnọ ohwohwo, ọ  dia ọtiobo rẹ Ken dia ọmọ rẹ Idẹbono ro de hwe oniọvo rọye na-a.”—1 Jọn 3:10-12; 4:20, 21.

¹⁰ Avwanre vwẹ ọke, ẹgba, vẹ ekuakua rẹ avwanre vwori vwọ vwẹ ukẹcha kẹ, je phiuduphiyọ ohwohwo awọ. (Hibru 10:24, 25) Avwanre ruẹ “emu esiri kẹ ihwo ejobi.”—Galesha 6:10.

11. Diesorọ avwanre vwo rhiabọreyọ Jesu kerẹ idjerhe ra sa wan bru Ọghẹnẹ ra?

¹¹ Ofori nẹ avwanre kerhọ rẹ Jesu kidie ọyehẹ idjerhe ra sa wan bru Ọghẹnẹ ra. Baibol na da ta: “Esivwo rha hẹ oma rẹ ohwo ọfa-a, kidie odẹ ọfa rha hẹ otọ rẹ odjuvwu re mu kẹ ihwo ro se sivwi avwanre-e.” (Iruo Rẹ Iyinkọn Na 4:12) Vwẹ Uyovwinrota 5 rẹ ẹbe nana, avwanre yonori nẹ Jihova ji Jesu rhe, rhe vwẹ arhọ rọyen tan ihworakpọ re kerhọ hirhe. (Matiu 20:28) Jihova vwẹ Jesu mu Ovie nure nẹ o sun akpọ na. Kọyensorọ, Baibol na vwọ vuẹ avwanre nẹ ohwo rọ guọnọ vwo arhọ rẹ bẹdẹ, kọ kerhọ rẹ Jesu.—Se Jọn 3:36.

12. Diesorọ avwanre vwobọ vwẹ oseghe rẹ usuo-on?

¹² Avwanre vwobọ vwẹ oseghe rẹ usuo-on. Jesu vwobọ vwẹ oseghe rẹ usuo-on. Ọke re vwo muo, ọ da vuẹ Pailet rọ dia osun rẹ Rom: “Uvie mẹ dia ọ rẹ akpọ nana-a.” (Se Jọn 18:36.) Kerẹ Jesu avwanre vwẹ oma kpotọ kẹ Uvie rẹ Ọghẹnẹ, o toro asan rẹ avwanre dia-a, ọtiọyena avwanre rhe vwobọ vwẹ oseghe rẹ usuo-on. Ẹkẹvuọvo, Baibol na vuẹ avwanre nẹ a vwẹ oma kpotọ kẹ otu ra vwẹ “ogangan rẹ isuesun kẹ,” kọyen igomẹti. (Rom 13:1) Avwanre vwẹ oma kpotọ kẹ irhi ri suẹn ẹkuotọ rẹ avwanre hepha. Ẹkẹvuọvo, urhi rayen da vwọso urhi rẹ Ọghẹnẹ, avwanre cha vwẹrokere iyinkọn na re tare: “Avwanre se mu ọghọ kẹ Ọghẹnẹ nọ ihwo rẹ akpọ.”—Iruo Rẹ Iyinkọn Na 5:29; Mak 12:17.

13. Die yen avwanre ghwoghwo kpahen Uvie rẹ Ọghẹnẹ?

 ¹³ Avwanre vwo imuẹro nẹ Uvie rẹ Ọghẹnẹ ọvo yen se phi oba phiyọ ebẹnbẹn rẹ akpọ na. Jesu tare nẹ e che ghwoghwo “iyẹnrẹ esiri” rẹ Uvie na vwẹ akpọneje. (Se Matiu 24:14.) Igomẹti ohworakpọ vuọvo herọ ro che se ru oborẹ Uvie rẹ Ọghẹnẹ che ru kẹ avwanre-e. (Une Rẹ Ejiro 146:3) Jesu yono avwanre nẹ a nẹrhovwo kẹ Uvie rẹ Ọghẹnẹ: “Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.” (Matiu 6:10) Baibol na vuẹ avwanre nẹ Uvie rẹ Ọghẹnẹ cha guọghọ igomẹti rẹ ihworakpọ eje, ọ rọyen ọvo kọ yen che “mudia bẹdẹ.”—Daniẹl 2:44.

14. Ihwo vọ wo rorori nẹ e ga Ọghẹnẹ vwẹ idjerhe ro shephiyọ?

¹⁴ Wo vwo yono ẹkpo nana eje nu na, gba nọ oma wẹn: ‘Ihwo vọ yen muẹ iyono rayen kpahen Baibol na? Ihwo vọ yen vuẹ ihwo efa kpahen odẹ rẹ Ọghẹnẹ? Ihwo vọ yen dje uvi rẹ ẹguọnọ kẹ ohwohwo, ji vwo esegbuyota nẹ Ọghẹnẹ ji Jesu rhe rhi sivwin avwanre? Ihwo vọ yen vwobọ vwẹ oseghe rẹ usuo-on? Ihwo vọ yen ghwoghwo nẹ Uvie rẹ Ọghẹnẹ ọvo yen se phi oba phiyọ ebẹnbẹn rẹ akpọ na?’ Iseri rẹ Jihova ọvo.—Aizaya 43:10-12.

15. Die yen ofori nẹ avwanre ru, avwanre da guọnọ nẹ Ọghẹnẹ rhiabọreyọ ẹga rẹ avwanre?

¹⁵ A je guọnọ orọnvwọn ọfa vrẹ e di vwo segbuyota nẹ Ọghẹnẹ herọ. Emekashe rẹ Idẹbono dede ji segbuyota nẹ Ọghẹnẹ herọ, ẹkẹvuọvo, ayen kerhọ rọye-en. (Jems 2:19) Avwanre da guọnọ nẹ Ọghẹnẹ rhiabọreyọ ẹga rẹ avwanre, avwanre ki segbuyota nẹ Ọghẹnẹ herọ, ji ru oborẹ ọ tare nẹ avwanre ru.

16. Diesorọ avwanre vwọ kẹnoma kẹ ẹga rẹ efian?

 ¹⁶ Avwanre da guọnọ nẹ Ọghẹnẹ rhiabọreyọ ẹga rẹ avwanre, avwanre ke kẹnoma kẹ ẹga rẹ efian. Ọmraro Aizaya de si: “Yan nẹ uherevie rọye, ru oma wẹn fon.” (Aizaya 52:11; 2 Kọrẹnt 6:17) Ọna yen sorọ o vwo fo nẹ avwanre kẹnoma kẹ kemu kemu ro churobọ si ẹga rẹ efian.

17, 18. Die yen “Babilọn Rode,” diesorọ ọ vwọ dia emu okpakpa re vwo vrẹn no?

¹⁷ Die yen ẹga rẹ efian? Ẹga ejobi ri yono nẹ a ga Ọghẹnẹ vwẹ idjerhe rọ fẹnẹ oborẹ Baibol na yonori, yen ẹga rẹ efian. Baibol na se ẹga rẹ efian ejobi nẹ “Babilọn Rode.” (Ẹvwọphia 17:5) Diesorọ? Ghwe vwo nẹ ọke rẹ Oghwe rẹ Noa vwọ wan nu, ọyen buebun rẹ iyono ẹga rẹ efian vwọ tonphiyọ vwẹ Babilọn. Iyono efian yena da rhe hrabọ ro akpọneje. Kerẹ udje, Ihwo rẹ Babilọn ga eghẹnẹ erha ri kuomakugbe dia ọvo. Nonẹna, buebun rẹ ẹga ji yono nẹ Ọghẹnẹ ọyen eghẹnẹ erha ri kuomakugbe dia ọvo, ẹkẹvuọvo, Baibol na yonori nẹ Ọghẹnẹ uyota vuọvo yen herọ, Jihova, nẹ Jesu Ọmọ rọyen. (Jọn 17:3) Ihwo rẹ Babilọn ji segbuyota nẹ ẹbẹre ọvo rẹ ohwo yerẹn vwẹ asan ọfa siẹrẹ o de ghwu nu, nẹ ọ je rioja vwẹ ẹtẹrhe rẹ erhanre. Ọyena dia uyota-a.—Ni Eta rẹ Odjefiotọ 14, 17, vẹ 18.

¹⁸ Ọghẹnẹ tarọ phiyotọ nẹ kẹrẹkpẹ, ọ cha ghwọrọ ẹga rẹ efian eje. (Ẹvwọphia 18:8) Wo vwo ẹruọ oboresorọ ọ vwọ dia emu rẹ okpakpa a vwọ kẹnoma kẹ ẹga rẹ efian? Jihova Ọghẹnẹ guọnọre nẹ wo ru ọtiọyen bẹsiẹ ọke ke rhe vrẹ.—Ẹvwọphia 18:4.

19. Idjerhe vọ yen Jihova cha vwọ vwẹrote we siẹrẹ wo de brorhiẹn wọ vwọ ga?

¹⁹ Ọke wo de brorhiẹn wo vwo vrẹn nu ẹga rẹ efian  rere wọ ga Jihova, ihwo rẹ orua wẹn evo yẹrẹ igbeyan se jẹ ẹruọ rẹ orhiẹn ru vwo bruru na evwo, ayen mi rhi mu kpahen owẹ. Ẹkẹvuọvo, Jihova cha vwẹrote we. Ku wọ dia ẹbẹre ọvo rẹ iduduru ihwo rehẹ evunrẹ orua rẹ akpọeje ri vwo ẹguọnọ rẹ ohwohwo, wo mi ji vwo iphiẹrophiyọ wọ vwọ dia bẹdẹ vwẹ akpọ kpokpọ rẹ Ọghẹnẹ. (Mak 10:28-30) Ọkiọvo, evo usun rẹ igbeyan vẹ ihwo rẹ orua ri gbevwọso owẹ fikirẹ orhiẹn-ebro wọ vwọ ga Jihova, sa rhoma rhe jẹ ojẹ ayen vwo yono Baibol na.

20. Diesorọ ọ vwọ dia obo re ghanre wọ vwọ ga Ọghẹnẹ vwẹ idjerhe ro shephiyọ?

²⁰ Kẹrẹkpẹ, Ọghẹnẹ che si umiovwo no, Uvie rọyen ko che sun akpọneje. (2 Pita 3:9, 13) Ọke yena cha vwerhen oma mamọ! Ihwo ejobi ke ga Jihova vwẹ idjerhe rọ rhọnvwe phiyọ. Ọtiọyena, ọyen obo re ghanre mamọ wọ vwọ jẹ ojẹ asaọkiephana vwọ ga Ọghẹnẹ vwẹ idjerhe ro shephiyọ.