1, 2. Diesorọ wo vwo roro nẹ ẹrhovwo ọyen okẹ rẹ oghẹresan, diesorọ o vwo fo nẹ avwanre riẹn oborẹ Baibol yonori kpahen ẹrhovwo?

OTỌRAKPỌ na pha hahavwen siẹrẹ a da reyọ vwọ vwavwen idjuvwu na. Ọke rẹ Jihova de ni akpọ na, ihwo eje rehẹ ẹkuotọ na ejobi pha kerẹ umuku rẹ ame ro sun nẹ ikoroba. (Une Rẹ Ejiro 115:15; Aizaya 40:15) Dede nẹ avwanre pha hahavwen siẹrẹ a da vwẹ avwanre vwọ vwavwen idjuvwu na, Une Rẹ Ejiro 145:18, 19 tare: “Ọrovwohwo si kẹrẹ otu ri sere ejobi, ayen ejobi ri sere vwẹ uyota, O ruẹ ẹguọnọ rẹ otu re djẹ oshọ rọye gba, ọye ọvo ri nyo oviẹ rayen, o mi sivwi ayen.” Ọnana uvi rẹ uphẹn! Jihova rọ dia Ọmemama ro me vwo ẹgba na guọnọ sikẹre avwanre, ọ je guọnọ kerhọ rẹ avwanre. E, ẹrhovwo ọyen uphẹn, okẹ rẹ oghẹresan rẹ Jihova vwọ kẹ avwanre ohwo ọvuọvo.

² Jihova cha kerhọ rẹ avwanre siẹrẹ avwanre da nẹrhovwo vwẹ idjerhe ro shephiyọ. Mavọ yen avwanre se vwo ru ọtiọyen? E jẹ avwanre mrẹ oborẹ Baibol na tare kpahen ẹrhovwo.

3. Diesorọ wọ vwọ nẹrhovwo rhe Jihova?

³ Jihova guọnọre nẹ wọ nẹrhovwo rhe, yẹrẹ ta ota kẹ. Mavọ yen avwanre ru riẹn ọtiọyen? Biko se Filipae 4:6, 7. Roro kpahen edurhie yena. Osun rẹ akpọ vẹ idjuvwu vwo ọdavwẹ kpahen owẹ, ọ je guọnọ nẹ wọ vuẹ kpahen obo ru wo roro vẹ ebẹnbẹn wẹn.

4. Mavọ yen ẹrhovwo ra nẹ rhe Jihova ọkieje sa nẹrhẹ ugbeyan wẹn vẹ ọ rọyen ganphiyọ?

⁴ Ẹrhovwo nẹrhẹ oyerinkugbe rẹ avwanre vẹ ọ rẹ Jihova  ganphiyọ. Siẹrẹ igbeyan da ta ota kẹ ohwohwo kpahen iroro vẹ ọdavwẹ rayen kọke kọke, ugbeyan na kọ ganphiyọ. Ọtiọyen ẹrhovwo ra nẹ rhe Jihova je hepha. Womarẹ Baibol na, Jihova vuẹ wẹ iroro rọyen, ọ je vuẹ wẹ obo ro che ru vwẹ obaro na. Wọ sa vuẹ obo rehẹ ẹwẹn wẹn womarẹ wọ vwọ ta ota kẹ ọkieje. Ru wo vwo ruẹ ọnana, ugbeyan wẹn vẹ ọ rẹ Jihova kọ cha ganphiyọ.—Jems 4:8.

5. Mavọ yen avwanre ru riẹn nẹ ọ dia ẹrhovwo eje yen Jihova kerhọ kẹ-ẹ?

⁵ Ẹrhovwo eje yen Jihova kerhọ kẹ? Ẹjo. Vwẹ ọke rẹ ọmraro Aizaya, Jihova vuẹ ihwo rẹ Izrẹl: “Ọ da dianẹ wọ nẹ ẹrhovwo buebu dede, Me kerhọ-ọn; abọ wẹn vọnre vẹ ọbara.” (Aizaya 1:15) Ọtiọyena, siẹrẹ avwanre rhe gbẹrophiyotọ-ọ, avwanre se ru erọnvwọn re cha nẹrhẹ avwanre sherabọ kẹ Jihova, ọnana kọ cha nẹrhẹ Jihova ku erhọn kufia kẹ ẹrhovwo rẹ avwanre.

6. Diesorọ esegbuyota vwọ dia obo re ghanre mamọ? Mavọ wo vwo djephia nẹ wo vwo esegbuyota?

 ⁶ Avwanre da guọnọ nẹ Jihova kerhọ rẹ ẹrhovwo rẹ avwanre, kẹ avwanre se gbuyota. (Mak 11:24) Ọyinkọn Pọl da ta: “Ọ dia esegbuyota-a yọ epha bẹnbẹn re vwo ru obo ri je. Kidie ohwo kohwo rọ tanẹ ọye si kẹre Ọghẹnẹ mi segbuyota nẹ ọ herọ nẹ ọye re hwa osa kẹ ayen otu re guọnerọ.” (Hibru 11:6) Ẹkẹvuọvo, a ghwa vwọ tanẹ e vwo esegbuyota teri-i. Ofori nẹ avwanre dje esegbuyota rẹ avwanre phia womarẹ a vwọ kerhọ kẹ Jihova kẹdẹ kẹdẹ.—Se Jems 2:26.

7. (a) Diesorọ avwanre vwo muomaphiyọ ọghọ, je vwomakpotọ siẹrẹ avwanre da nẹrhovwo rhe Jihova? (b) Mavọ yen avwanre se vwo djephia nẹ ẹrhovwo rẹ avwanre ọ rẹ uyota?

⁷ Ofori nẹ avwanre muomaphiyọ ọghọ, je vwomakpotọ siẹrẹ avwanre da nẹrhovwo rhe Jihova. Diesorọ? Avwanre da guọnọ ta ota kẹ ovie yẹrẹ iprẹsidẹnti, avwanre che ru ọtiọyen vwẹ idjerhe rẹ ọghọ. Jihova yen Ọghẹnẹ ro me vwo ẹgba, o rhe fo nẹ avwanre muomaphiyọ ọghọ, je vwomakpotọ siẹrẹ avwanre da ta ota kẹ? (Jẹnẹsis 17:1; Une Rẹ Ejiro 138:6) O ji fo nẹ ẹrhovwo avwanre dia ọ rẹ uyota, ro ji nẹ ubiudu avwanre rhe, ọ dia ra vwọ vwanriẹn ota vuọvo abọ buebu-un.—Matiu 6:7, 8.

8. Siẹrẹ avwanre da nẹrhovwo kpahen orọnvwọn, die ọfa yen ofori nẹ avwanre ru?

⁸ Ukuotọ rọyen, avwanre da nẹrhovwo kpahen orọnvwọn ọvo, ofori avwanre vwọ davwẹngba wian kpahen obo ra nẹrhovwo kpahen na. Kerẹ udje, siẹrẹ avwanre da nẹrhovwo rhe Jihova kpahen ọdavwẹ rẹ kẹdẹ kẹdẹ avwanre, o rhe fo nẹ avwanre dia evwiẹrẹ-ẹ, avwanre ji roro nẹ Jihova cha kẹ avwanre obo rẹ avwanre guọnọre eje siẹrẹ avwanre rha wia-an. E jẹ avwanre wian gan, rere avwanre rhiabọreyọ kowian kowian rẹ avwanre se ru. (Matiu 6:11;  2 Tẹsalonaika 3:10) Yẹrẹ avwanre da nẹrhovwo rhe Jihova nẹ ọ vwẹ ukẹcha kẹ avwanre vwọ dobọ rẹ orọnvwọn ọvo rẹ avwanre ruẹ chọ ji, avwanre ke kẹnoma kẹ kẹdia kẹdia rọ sa dia ọdavwini kẹ avwanre. (Kọlose 3:5) Asaọkiephana, e jẹ avwanre fuẹrẹn enọ evo ra nọ kpahen ẹrhovwo.

9. Ono yen avwanre nẹrhovwo rhe? Die yen Jọn 14:6 yono avwanre kpahen ẹrhovwo?

⁹ Ono yen avwanre nẹrhovwo rhe? Jesu yono idibo rọyen nẹ ayen nẹrhovwo rhe “Ọsẹ rẹ avwanre rọ hẹ obo odjuvwu.” (Matiu 6:9) Ọ je ta: “Mẹvwẹ hẹ idjerhe na, kugbe uyota na, kugbe arhọ na; ohwo ọvuọvo se bru Ọsẹ na rhe-e, ẹkẹvuọvo yẹ oma mẹ.” (Jọn 14:6) Ọtiọyena, avwanre nẹrhovwo rhe Jihova ọvo womarẹ Jesu. Die yen o mudiaphiyọ ra vwọ nẹrhovwo womarẹ Jesu? Rere Jihova vwọ kerhọ ẹrhovwo rẹ avwanre, ofori nẹ avwanre muọghọ kẹ iruo rẹ oghẹresan rẹ Jihova vwọ kẹ Jesu. Kirobo rẹ avwanre yonori jovwo, Jesu rhe akpọ rhi sivwin avwanre vwo nẹ umwemwu kugbe ughwu. (Jọn 3:16; Rom 5:12) Jihova vwẹ Jesu vwo mu Orherẹn Rode kugbe Oguẹdjọ.—Jọn 5:22; Hibru 6:20.

10. A guọnọ ẹdia rẹ oghẹresan siẹrẹ avwanre da nẹrhovwo? Dje kpahọn.

¹⁰ Ofori e vwo shiguẹ, chidia yẹrẹ mudia siẹrẹ a da nẹrhovwo? Jihova vuẹ avwanre nẹ e shiguẹ, chidia yẹrẹ mudia siẹrẹ avwanre da nẹrhovwo-o. Baibol na yono avwanre nẹ avwanre sa nẹrhovwo rhe Jihova vwẹ kẹdia kẹdia rẹ avwanre de muomaphiyọ ọghọ. (1 Ikun Rivie 17:16; Nehemaya 8:6; Daniẹl 6:10; Mak 11:25) Obo re ma ghanre kẹ Jihova ọyen avwanre vwọ ta ota kẹ vẹ ẹwẹn esiri, ọ dia ẹdia rẹ avwanre hepha da nẹrhovwo na-a. Avwanre sa nẹrhovwo phia yẹrẹ nẹrhovwo phiyọ evun  vwẹ kasan kasan yẹrẹ kọke kọke vwẹ ẹdẹ yẹrẹ ason. Ọke rẹ avwanre da nẹrhovwo rhe Jihova, avwanre se vwo imuẹro nẹ ọ kerhọ avwanre ọ da tobọ dianẹ ohwo vuọvo nyo avwanre-e.—Nehemaya 2:1-6.

11. Erọnvwọn vọ yen avwanre sa nọ mie Jihova?

¹¹ Die yen avwanre sa nẹrhovwo kpahen? Avwanre sa nẹrhovwo kpahen kemu kemu rẹ Jihova rhọnvwe phiyọ. Baibol na da ta: “Avwanre da nọ ekpẹn rẹ emu ro shephihọ ọhọre rọye ko nyo kẹ avwanre.” (1 Jọn 5:14) Avwanre sa nẹrhovwo kpahen ọdavwẹ romobọ? E. Avwanre nẹrhovwo rhe Jihova kerẹ asan a da mrẹ nẹ avwanre ta ota kẹ ugbeyan. Avwanre sa vuẹ Jihova kemu kemu rọhẹ ẹwẹn rẹ avwanre. (Une Rẹ Ejiro 62:8) Avwanre sa nẹrhovwo rhe nẹ ọ kẹ avwanre ẹwẹn ọfuanfon rọyen rere ọ chọn avwanre uko vwo ru obo ri yovwirin. (Luk 11:13) Avwanre sa nokpẹn rẹ aghwanre mie Jihova re vwo brorhiẹn rọ gbare, je vuẹ nẹ ọ kẹ avwanre ẹgba re vwo yerin ghene ebẹnbẹn. (Jems 1:5) Ofori nẹ avwanre yare Jihova vwọ kẹ evwoghovwo rẹ umwemwu rẹ avwanre. (Ẹfesọs 1:3, 7) O ji fo nẹ avwanre nẹrhovwo kẹ ihwo efa, orua avwanre kugbe iniọvo rehẹ ukoko na.—Iruo Rẹ Iyinkọn Na 12:5; Kọlose 4:12.

12. Die yen ofori nẹ ọ dia obo re ma ghanre vwẹ ẹrhovwo rẹ avwanre?

¹² Die yen ofori nẹ ọ dia obo re ma ghanre vwẹ ẹrhovwo rẹ avwanre? Jihova kugbe ọhọre rọyen. Avwanre kpẹvwẹ nẹ ubiudu rhe fikirẹ erọnvwọn ro ru kẹ avwanre. (1 Ikun Rivie 29:10-13) Avwanre riẹn ọnana kidie, ọke rẹ Jesu vwọ rhe otọrakpọ na, oyono idibo rọyen oborẹ ayen nẹrhovwo wan. (Se Matiu 6:9-13.) Ọ tare nẹ ayen ka nẹrhovwo kpahen eruo fuan rẹ odẹ Ọghẹnẹ. Ọ da rha tanẹ avwanre nẹrhovwo nẹ Uvie rẹ Ọghẹnẹ rhe, rere e ru ọhọre rẹ Ọghẹnẹ vwẹ otọrakpọ na. Jesu tare nẹ avwanre  da nẹrhovwo kpahen erọnvwọn nana re pha ghanghanre mamọ nu, ka sa nẹrhovwo kpahen ọdavwẹ romobọ rẹ avwanre. Siẹrẹ avwanre de phi Jihova vẹ eruo rẹ ọhọre rọyen phiyọ obaro rẹ ẹrhovwo rẹ avwanre, jẹ avwanre dje obo re ma ghanre kẹ avwanre phia.

13. Mavọ yen ẹrhovwo rẹ avwanre gron te?

¹³ Mavọ yen ẹrhovwo rẹ avwanre gron te? Baibol na vuẹ avwanre-e. Ẹdia rẹ avwanre hepha ọyen che djephia sẹ ẹrhovwo rẹ avwanre gron yẹrẹ ọ krẹ. Kerẹ udje, avwanre  sa nẹrhovwo krẹn tavwen avwanre ki re emu, ẹkẹvuọvo ẹrhovwo na se gron siẹrẹ avwanre de jiri Jihova yẹrẹ da ta ọdavwẹ rẹ avwanre kẹ. (1 Samuẹl 1:12, 15) Avwanre guọnọ nẹrhovwo ogrongron rere ihwo efa vwo jiri avwanre kirobo rẹ ihwo evo ruru vwẹ ọke rẹ Jesu-u. (Luk 20:46, 47) Ẹrhovwo tiọyena vwerhen Jihova oma-a. Obo re ma ghanre kẹ Jihova, ọyen ẹrhovwo na vwo nẹ ubiudu avwanre rhe.

14. Bro abọ yen avwanre nẹrhovwo, die yen ọnana yono avwanre kpahen Jihova?

¹⁴ Bro abọ yen avwanre nẹrhovwo? Jihova durhie avwanre nẹ avwanre nẹrhovwo rhe kọke kọke. Baibol na vuẹ avwanre nẹ “wa rẹ,” “wo gbe ẹdẹ rẹ ẹrhovwo-o,” “nẹ ẹrhovwo kẹdẹ kẹdẹ.” (Matiu 26:41; Rom 12:12; 1 Tẹsalonaika 5:17) Jihova muegbe rọ vwọ kerhọ rẹ avwanre kọke kọke. Avwanre sa kpẹvwẹ kẹdẹ kẹdẹ fikirẹ ẹguọnọ kugbe  ẹse rọyen. Avwanre sa nokpẹn rẹ odjekẹ, ẹgba kugbe uchebro rọyen. Siẹrẹ avwanre da vwẹ ẹro rọ ghanre vwo ni uphẹn rẹ ẹrhovwo, avwanre cha reyọ kuphẹn kuphẹn vwọ nẹrhovwo rhe Jihova.

15. Diesorọ avwanre vwo ru “isẹ” vwẹ oba rẹ ẹrhovwo?

¹⁵ Diesorọ avwanre vwo ru “isẹ” vwẹ oba rẹ ẹrhovwo? Ota na “isẹ” mudiaphiyọ nẹ “omuẹro” yẹrẹ “e jẹ ọ dia ọtiọyen.” Ọyena idjerhe rẹ avwanre vwo djephia nẹ oborẹ avwanre tare vwevunrẹ ẹrhovwo na mu avwanre ẹro. (Une Rẹ Ejiro 41:13) Baibol na yono avwanre nẹ ofori e vwo ru “isẹ” phiyọ evun yẹrẹ a ta phia vwẹ oba rẹ ẹrhovwo rẹ azagba, re vwo djephia nẹ avwanre rhọnvwe phiyọ ẹrhovwo na.—1 Ikun Rivie 16:36; 1 Kọrẹnt 14:16.

16. Jihova ghene kpahanphiyọ rẹ ẹrhovwo avwanre? Dje kpahọn.

¹⁶ Jihova ghene kpahanphiyọ ẹrhovwo? E. Baibol na sere ohwo ro “nyo ẹrhovwo.” (Une Rẹ Ejiro 65:2) Jihova nyo, je kpahanphiyọ ẹrhovwo rẹ iduduru rẹ ihwo, idjerhe sansan yen o vwo ru ọtiọyen.

17. Mavọ yen Jihova reyọ emekashe vẹ idibo rọyen rehẹ otọrakpọ vwọ kpahanphiyọ ẹrhovwo rẹ avwanre?

¹⁷ Jihova reyọ emekashe vẹ idibo rọyen rehẹ otọrakpọ vwọ kpahanphiyọ ẹrhovwo rẹ avwanre. (Hibru 1:13, 14) O vwo udje rẹ ihwo buebun re nẹrhovwo kẹ ukẹcha rere ayen vwo vwo ẹruọ rẹ Baibol na, o kriri-i Oseri rẹ Jihova ọvo de ghwe bru ayen rha. Baibol na jẹ avwanre riẹn nẹ emekashe na vwobọ vwẹ aghwoghwo rẹ “iyẹnrẹ esiri” na vwẹ otọrakpọ na. (Se Ẹvwọphia 14:6.) Kpobarophiyọ, buebun avwanre nẹrhovwo kpahen obẹnbẹn ọvo, ukuotọ rọyen oniọvo ọvo da vwẹ ukẹcha kẹ avwanre.—Isẹ 12:25; Jems 2:16.

18. Mavọ yen Jihova reyọ ẹwẹn ọfuanfon rọyen kugbe Baibol na vwọ kpahanphiyọ ẹrhovwo rẹ avwanre?

 ¹⁸ Jihova reyọ ẹwẹn ọfuanfon rọyen vwọ kpahanphiyọ ẹrhovwo rẹ avwanre. Avwanre da nẹrhovwo vwọ kẹ ukẹcha re vwo yerin ghene obẹnbẹn ọvo, ọ sa reyọ ẹwẹn ọfuanfon rọyen vwọ kẹ avwanre odjekẹ kugbe ẹgba. (2 Kọrẹnt 4:7) Jihova je reyọ Baibol na vwọ kpahanphiyọ ẹrhovwo rẹ avwanre, je chọn avwanre uko vwo brorhiẹn rẹ aghwanre. Siẹrẹ avwanre de se Baibol na, avwanre sa mrẹ ẹkpo rẹ Baibol re sa chọn avwanre uko. Jihova je sa nẹrhẹ oniọvo ọvo kpahenphiyọ onọ vwevunrẹ uyono rọ sa chọn avwanre uko yẹrẹ ọkpako ọvo se nene avwanre se ẹkpo rẹ Baibol ọvo kugbe.—Galesha 6:1.

19. Diesorọ ọ vwọ họhọ nẹ ọkiọvo Jihova kpahanphiyọ ẹrhovwo rẹ avwanre-e?

¹⁹ Ọkiọvo, avwanre se roro, ‘diesorọ Jihova ji rhi kpahenphiyọ ẹrhovwo mẹ-ẹ?’ Karophiyọ nẹ ọ riẹn ọke vẹ idjerhe ro shephiyọ rọ vwọ kpahenphiyọ ẹrhovwo rẹ avwanre. Ọ riẹn oborẹ avwanre ghene guọnọ. Rere avwanre vwo djephia nẹ avwanre vwo imuẹro rẹ oborẹ avwanre nẹ kpahen, ji djephia nẹ avwanre ghini vwo esegbuyota kpahen Jihova, kẹ ofori nẹ avwanre nẹrhovwo rhe ọkieje. (Luk 11:5-10) Ọkiọvo, Jihova kpahanphiyọ ẹrhovwo rẹ avwanre vwẹ idjerhe avwanre rhẹro rọye-en. Kerẹ udje, avwanre sa nẹrhovwo kpahen obẹnbẹn ọvo rẹ avwanre hepha, ukperẹ Ọghẹnẹ vwo sio no, ọ sa kẹ avwanre ẹgba rẹ avwanre guọnọre re vwo yerin ghene obẹnbẹn na.—Se Filipae 4:13.

20. Diesorọ avwanre vwọ nẹrhovwo rhe Jihova ọkeneje?

²⁰ Uphẹn rode yen te avwanre obọ ra vwọ nẹrhovwo rhe Jihova! Avwanre se vwo imuẹro nẹ ọ kerhọ rẹ avwanre. (Une Rẹ Ejiro 145:18) Kọke kọke rẹ avwanre da nẹrhovwo rhe Jihova vwo nẹ udu avwanre rhe, oyerinkugbe rẹ avwanre vẹ ọ rọyen kọ ganphiyọ.