1, 2. Enọ vọ yen ihwo nọ ọkieje?

IMITETE nọ enọ mamọ. Wọ da nabọ dje emu fiotọ kẹ ayen nu, ayen me je nọ wẹ onọ ọfa. Wọ da kpahenphiyọ onọ yena nu, ayen je cha rhoma nọ wẹ ọfa, kerẹ ‘Diesorọ?’

² Ọ dia imitete ọvo yen nọ enọ-ọ, imiragua je nọ enọ. Avwanre eje nọ enọ kpahen obo ra cha re, obo ra cha dẹ yẹrẹ obo re che ku phiyọ. Avwanre je sa nọ enọ kpahen akpeyeren vẹ oborẹ obaro na cha dia. Siẹrẹ avwanre rha mrẹ ẹkpahọnphiyọ ro fiotọ-ọ, ọ sa nẹrhẹ a dobọ rẹ enọ ẹnọ ji.

3. Diesorọ ihwo buebun wo roro nẹ ayen cha sa mrẹ ẹkpahọnphiyọ kẹ enọ rẹ ayen nọ-ọ?

³ Baibol na sa kpahenphiyọ enọ eghanghanre rẹ avwanre nọ? Ihwo evo se roro ọtiọyen, ẹkẹvuọvo ayen niro nẹ ayen che se vwo ẹruọ rẹ Baibol na-a. Ayen se roro nẹ ilori rẹ ẹga ọvo yen sa kpahenphiyọ enọ na. Efa rhọnvwa nọ-ọ, kidie oma vo ayen. Die wo rorori?

4, 5. Enọ eghanghanre vọ yen kpokpo owẹ ẹwẹn? Diesorọ o vwo fo nẹ wọ guọnọ ẹkpahọnphiyọ rayen?

⁴ Ọ sa dianẹ wọ guọnọ riẹn ẹkpahọnphiyọ rẹ enọ kerẹ; Diesorọ Ọghẹnẹ vwọ ma vwẹ? Die yen cha phia kẹ vwẹ siẹrẹ mi de ghwu? Oka ohwo vọ yen Ọghẹnẹ hepha? Jesu, rọ dia Oyono rode na da ta: “Nọ, ka kẹ wẹ, guọnọ ku wọ mrẹ; hworo ẹchẹ ke rhie kẹ wẹ.” (Matiu 7:7) Guọnọ omamọ ẹkpahọnphiyọ ru wọ sa vwẹroso, wo jẹ ọ bẹn wẹ-ẹn.

 ⁵ Siẹrẹ wọ da “guọnọ” ẹkpahọnphiyọ rẹ enọ na ọkeneje, wọ cha mrẹ ayen vwẹ Baibol na. (Isẹ 2:1-5) Wo se vwo ẹruọ rẹ ẹkpahọnphiyọ na. E cha nẹrhẹ wo yeren akpọ rẹ omavwerhovwẹn asaọkiephana, ji vwo uvi rẹ iphiẹrophiyọ kpahen obaro na. E jẹ a ta ota kpahen onọ ọvo ro kpokpo ihwo buebun ẹwẹn.

6. Diesorọ ihwo evo vwo roro nẹ Ọghẹnẹ davwerhọn rẹ ojaẹriọ raye-en?

⁶ Ihwo buebun roro nẹ Ọghẹnẹ davwerhọn rẹ avwanre-e. Ayen niro nẹ Ọghẹnẹ da ghene davwerhọn rẹ avwanre, mane akpọ na rha dia enẹ-ẹ. Kasan kasan ọyen a da mrẹ ifovwin, utuoma kugbe omaemuophiyọ. Ihworakpọ muọga, ayen rioja, ji ghwẹ. Ọtiọyena, ihwo evo ki roro, ‘Ọ da dianẹ Ọghẹnẹ davwerhọn rẹ avwanre, diesorọ o rhe phi oba phiyọ ojaẹriọ nana eje-e?’

7. (a) Idjerhe vọ yen ilori ẹga vwo yono ihwo nẹ Ọghẹnẹ ohwo vẹ ọkon? (b) Diesorọ o vwo mu avwanre ẹro nẹ ọ dia Ọghẹnẹ yen so erọnvwọn ebrabra re phia na-a?

⁷ Ilori ẹga nẹrhẹ ihwo roro nẹ Ọghẹnẹ ohwo vẹ ọkon. Emu ọbrabra da phia, kẹ ayen tanẹ, ọyen ọhọre rẹ Ọghẹnẹ, ọyen obo rọ guọnọre. Womarẹ eta yena, kẹ ayen tanẹ Ọghẹnẹ yen so emu ọbrabra na. Ẹkẹvuọvo, Baibol na tare nẹ Ọghẹnẹ cha sa so obo re brare-e. Jems 1:13 vuẹ avwanre nẹ, Ọghẹnẹ vwẹ obo re brare vwọ davwan ohwo nẹ-ẹ. Ọ tare nẹ, “Ọke rẹ ọdavwini de te we oma, wọ ta nẹ, Ọghẹnẹ re davwẹ ovwẹ ni-i, kiridie a sa vwẹ umwemwu davwẹ Ọghẹnẹ nẹ-ẹ, yẹ okpuyovwin rọyen davwe ohwo ọvuọvo nẹ-ẹ.” Ọnana mudiaphiyọ nẹ, dede nẹ Ọghẹnẹ je  rhe dobọ rẹ erọnvwọn ebrabra re phia ji-i, jẹ ọ dia ọyen yen so aye-en. (Se Job 34:10-12.) Jẹ e dje udje rọyen.

8, 9. Diesorọ o vwo je fo ra vwọ hanrhe Ọghẹnẹ fikirẹ ebẹnbẹn avwanre? Dje udje rọyen.

⁸ Vwẹ ẹro roro eghene ọshare ọvo rọ vẹ ọsẹ rọyen gba dia uwevwin. Ọsẹ na vwo ẹguọnọ kpahọn mamọ, ko ji yono obo ro se vwo brorhiẹn ro yovwirin. Ẹdẹ ọvo vwo te, ọmọ na de gbevwọso ọsẹ na, ọ da kua nẹ uwevwin na. Ko ru erọnvwọn ebrabra vwẹ asan rọ kua ra na, kọ rhe ro okpetu. Wọ sa tanẹ ọsẹ na yen so okpetu kẹ ọmọ na kidie ọ vwẹ uphẹn kẹ nẹ ọ yanran? Ẹjo! (Luk 15:11-13) Kerẹ ọsẹ yena, Ọghẹnẹ da ihworakpọ ji ọke rẹ ayen vwo gbevwọsuọ, ji ru obo re brare-e. Siẹrẹ obo re brare da phia, avwanre karophiyọ nẹ ọ dia Ọghẹnẹ yen sorọ-ọ. Ọtiọyena, o rhe fo nẹ a hanrhọ-ọn.

⁹ O vwo oboresorọ Ọghẹnẹ je rhe dobọ rẹ erọnvwọn ebrabra re phia ji-i. Wo che yono oborẹ Baibol na ta kpahọn vwẹ Uyovwinrota 11. Vwo imuẹro nẹ Ọghẹnẹ vwo ẹguọnọ kpahen avwanre, ọ dia ọyen so ebẹnbẹn rẹ avwanre-e. Vwọrẹ uyota, Ọyen ọvo yen se phi oba phiyọ ebẹnbẹn na eje.—Aizaya 33:2.

10. Diesorọ o vwo mu avwanre ẹro nẹ Ọghẹnẹ che si umiovwo na eje no?

¹⁰ Ọghẹnẹ ọyen ohwo ọfuanfon. (Aizaya 6:3) O ru obo re brare-e. Ọtiọyena, a sa vwẹrosuọ. Ọ dia ọtiọyen ihworakpọ hepha-a. Ayen ru obo re brare ọkiọvo. Ohwo rọ ma fuevun vwẹ usuon rẹ ihworakpọ dede tobọ vwo ẹgba ro se vwo si umiovwo nẹ akpọ na-a. Ẹkẹvuọvo, Ọghẹnẹ yen me vwo ẹgba. O vwo ẹgba vẹ owenvwe ro vwo si umiovwo rẹ ihworakpọ soro vwo  no. O che si umiovwo na ejobi no bẹdẹ.—Se Une Rẹ Ejiro 37:9-11.

11. Ẹro vọ yen Ọghẹnẹ vwo ni ojaẹriọ wẹn?

¹¹ Ẹro vọ yen Ọghẹnẹ vwo ni obo re phia vwẹ akpọ na vẹ obo re phia kẹ wẹ? Baibol na yonori nẹ Ọghẹnẹ “guọnọ ọsoso.” (Une Rẹ Ejiro 37:28) Ọtiọyena, ọ davwerhọn rẹ obo ri yovwirin vẹ obo re brare. O vwo utuoma kpahen ojaẹriọ rẹ ihworakpọ. Baibol na tare nẹ “ọ da da vwẹ udu rọyen” ọke rẹ umiovwo vwọ vọn akpọ na vwẹ ọke awanre. (Jẹnẹsis 6:5, 6) Ọghẹnẹ ji rhi wene-e. (Malakae 3:6) Baibol na tare nẹ Ọghẹnẹ davwerhọn wẹn.—Se 1 Pita 5:7.

12, 13. (a) Diesorọ avwanre vwo vwo ẹguọnọ vẹ ọdavwẹ rẹ ihwo efa, ẹro vọ wo vwo nẹ ojaẹriọ rọhẹ akpọ na? (b) Diesorọ o vwo mu avwanre ẹro nẹ Ọghẹnẹ che si oshenyẹ vẹ ojaẹriọ ejobi no?

¹² Baibol na je tanẹ Ọghẹnẹ ma ohworakpọ họhọ oma rọyen. (Jẹnẹsis 1:26) Ọnana mudiaphiyọ nẹ Ọghẹnẹ ma avwanre vẹ iruemu iyoyovwin. Ọ da da wẹ siẹrẹ wọ da mrẹ ihwo re rioja, gba riẹn nẹ Ọghẹnẹ yen ọ ma da! Mavọ yen avwanre ru riẹn?

¹³ Baibol na yono avwanre nẹ “Ọghẹnẹ hẹ ẹguọnọ.” (1 Jọn 4:8) Ẹguọnọ yen mu Ọghẹnẹ vwo ru kemu kemu ro ruẹ. Ọtiọyena, avwanre dje ẹguọnọ kẹ ihwo kidie Ọghẹnẹ hẹ ẹguọnọ. Di roro: Wo de vwo ẹgba wo vwo si oshenyẹ vẹ ojaẹriọ ejobi nẹ akpọ na, wo che ruo? E, wo che ruo, kidie wo vwo ẹguọnọ rẹ ihwo. Kẹ Ọghẹnẹ vwo? O vwo ẹgba na, o ji vwo ẹguọnọ kpahen avwanre, o che si oshenyẹ vẹ ojaẹriọ ejobi no. Vwo imuẹro nẹ Ọghẹnẹ che ru orugba rẹ ive na eje re djunute vwẹ ọtonphiyọ rẹ ọbe nana. Ẹkẹvuọvo, wọ ke sa vwẹroso ive nana, ofori nẹ wọ nabọ vughe Ọghẹnẹ.

14. Die yen odẹ rẹ Ọghẹnẹ, mavọ avwanre ru riẹn nẹ ọ guọnọre nẹ e se odẹ na?

¹⁴ Wọ da guọnọ dia ugbeyan rẹ ohwo, die yen orọnvwọn ẹsosuọ wọ cha vuẹ? Odẹ wẹn. Ọghẹnẹ vwo odẹ? Ẹga buebun yonori nẹ odẹ rọyen Ọghẹnẹ yẹrẹ Ọrovwori, ẹkẹvuọvo enana dia oderhi rọye-en. Enana edova, kirobo rẹ “ovie” vẹ “iprẹsidẹnti” je dia edova. Ọghẹnẹ vuẹ avwanre nẹ odẹ rọyen Jihova. Une Rẹ Ejiro 83:18 (NW) da ta: “Jẹ ihwo riẹn nẹ wẹwẹ, rẹ odẹ wẹ dia Jihova na, Wẹ ọvo yen Me Kpenu vwẹ akpọ na ejobi.” Ihwo ri si Baibol na, si odẹ rẹ Ọghẹnẹ phiyọ abọ uriorin buebun. Jihova guọnọre nẹ wọ riẹn odẹ rọyen, ji se ọkeneje. O se odẹ na kẹ wẹ rere wọ sa vwọ dia ugbeyan rọyen.

15. Die yen odẹ na Jihova mudiaphiyọ?

¹⁵ O vwo oborẹ odẹ rẹ Ọghẹnẹ rọ dia Jihova na mudiaphiyọ. O mudiaphiyọ nẹ Ọghẹnẹ se ru ọhọre vẹ ive rọyen eje gba. O vwo emu vuọvo rọ sa da obọ rọyen ji-i. Ọyen ọvo yen a sa vwẹ odẹ na vwo se. *

16, 17. Die yen otọ rẹ (a) “Ọrovwoẹgba”? (b) “Ovie rẹ oge ejobi”? (c) ‘Ọmemama’?

 ¹⁶ Karophiyọ oborẹ Une Rẹ Ejiro 83:18 (NW) ta kpahen Jihova: “Wẹ ọvo yen Me Kpenu.” Ẹvwọphia 15:3 da ta: “Iruo wẹn pha rhuarho igbunu, E Ọrovwohwo Ọghẹnẹ Ọrovwoẹgba. Ọsoso kugbe uyota hẹ idjerhe wẹn, E Ovie rẹ oge ejobi.” Die yen odova na “Ọrovwoẹgba” mudiaphiyọ? O mudiaphiyọ nẹ, te akpọ te odjuvwu, Jihova yen me vwo ẹgba. Odova na “Ovie rẹ oge ejobi” mudiaphiyọ nẹ, Ọghẹnẹ herọ nẹ  awanre rhe. Une Rẹ Ejiro 90:2 tare nẹ, nẹ rhirin re duvwu rhirin ọyen Ọghẹnẹ vwọ herọ. Ota yena gbe ohwo unu!

¹⁷ Jihova ọvo yen Ọmemama na. Ẹvwọphia 4:11 da ta: “Wọwẹ hẹ ohwo ro fori, Ọrovwavwanre kugbe Ọghẹnẹ, rọ reyọ urinrin kugbe ọghọ kugbe ogangan, kidie wọwẹ re mama emu ejobi, ọhọre wẹn ayen vwọ herọ kọyen a vwọ mama ayen.” Emekashe rehẹ odjuvwu, isio ra mrẹ vwẹ obenu na, irhe re mọ emamọ kugbe iyerin rehẹ evunrẹ urhie na, Jihova yen ma ayen eje!

18. Diesorọ ihwo evo vwo roro nẹ ayen cha sa dia igbeyan rẹ Ọghẹnẹ-ẹ? Die yen Baibol na yonori?

¹⁸ Siẹrẹ ihwo evo de se kpahen iruemu iyoyovwin rẹ Jihova, oshọ ko mu ayen, kẹ ayen roro nẹ, ‘Ọghẹnẹ vwo ẹgba mamọ, ohwo rode o ruẹ, o ki ji sherabọ kẹ ihworakpọ, kọ ghene sa davwerhọn mẹ?’ Ọghẹnẹ guọnọre nẹ avwanre vwo oka rẹ iroro nana? Ẹjo. Jihova guọnọ dia ugbeyan rẹ avwanre. Baibol na tare nẹ Ọghẹnẹ “sheri kẹ avwanre ohwo ọvuọvo-o.” (Iruo Rẹ Iyinkọn Na 17:27) Ọghẹnẹ guọnọre nẹ wo sikẹrẹ, o ji ve nẹ, o che “si kẹre owẹ.”—Jems 4:8.

19. (a) Mavọ wọ sa vwọ dia ugbeyan rẹ Ọghẹnẹ? (b) Iruemu rẹ Jihova vọ yen me je we?

¹⁹ Mavọ wọ sa vwọ dia ugbeyan rẹ Ọghẹnẹ? Jesu tare nẹ: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.” (Jọn 17:3) Yono kpahen Jihova vẹ Jesu ọkeneje, ku wọ cha nabọ riẹn ayen. Ọke yena, ku wo se vwo arhọ rẹ bẹdẹ. Kerẹ udje, avwanre yonori jovwo nẹ “Ọghẹnẹ hẹ ẹguọnọ.” (1 Jọn 4:16) Jihova ji vwo iruemu iyoyovwin efa. Baibol na tare nẹ Jihova ọyen “Ọghẹnẹ rọ ria ehrọre vẹ arodọnvwẹ, ọ fobọ muophu-u, ọ vẹ ẹguọnọ vẹ uyota.” (Eyanno 34:6) Jihova “Ohwo esiri vẹ evwoghovwo.” (Une Rẹ Ejiro 86:5) Ọghẹnẹ ohwo rọ fuevun, ro ji vwo edirin. (2 Pita 3:9; Ẹvwọphia 15:4) Wo vwo se Baibol na, wo che yono kpahen iruemu iyoyovwin efa rẹ Jihova vwori.

20-22. (a) Mavọ avwanre se vwo sikẹre Ọghẹnẹ, jẹ a sa mrẹ-ẹ? (b) Die wo che ru siẹrẹ ihwo evo da vuẹ wẹ nẹ wọ dobọ rẹ uyono rẹ Baibol na ji?

²⁰ Mavọ wo se vwo sikẹre Ọghẹnẹ, jẹ wọ sa mrẹ-ẹ?  (Jọn 1:18; 4:24; 1 Timoti 1:17) Wo de se kpahen Jihova vwevunrẹ Baibol na, ku wọ cha nabọ vughe kerẹ Ohwo rọ herọ dẹn. (Une Rẹ Ejiro 27:4; Rom 1:20) Wo vwo yono kpahen Jihova na, ẹguọnọ wẹn kpahọn kọ cha ganphiyọ, ku wo ji sikẹrẹ kpẹkpẹkpẹ.

²¹ Ku wọ cha riẹn nẹ Jihova ọyen Ọsẹ rẹ avwanre. (Matiu 6:9) Ọyen kẹ avwanre arhọ, ọ je guọnọ nẹ avwanre yeren omamọ akpọ, kirobo rẹ ọsẹ ro vwo ẹguọnọ rẹ emọ rọyen ji ruẹ kẹ ayen. (Une Rẹ Ejiro 36:9) Baibol na yonori nẹ wọ sa dia ugbeyan rẹ Ọghẹnẹ. (Jems 2:23) Di roro, Jihova rọ dia Ọmemama rẹ akpọ vẹ odjuvwu guọnọre nẹ wọ dia ugbeyan rọyen!

²² Ihwo evo sa vuẹ wẹ nẹ wọ dobọ rẹ uyono rẹ Baibol na ji. Oshọ se mu ayen nẹ wo che wene ẹga wẹn. Ẹkẹvuọvo, wo jẹ ohwo vuọvo dobọ rẹ ugbeyan wẹn vẹ ọ rẹ Jihova jẹ-ẹ. Ọyehẹ Ugbeyan ro me yovwin ru wo se vwo.

23, 24. (a) Diesorọ o vwo fo nẹ wọ nọ enọ ọkeneje? (b) Die yen e che yono vwẹ uyovwinrota rọ vwọ kpahen ọnana?

²³ Wo vwo yono Baibol na, wo che ghwe se vwo ẹruọ rẹ erọnvwọn evo-o. Wo jẹ oma vo wẹ wọ vwọ nọ enọ yẹrẹ guọnọ ukẹcha-a. Jesu tare nẹ, avwanre vwomakpotọ kerẹ imitete. (Matiu 18:2-4) Kirobo avwanre riẹnre, imitete nọ enọ mamọ. Ọghẹnẹ guọnọre nẹ wọ mrẹ ẹkpahọnphiyọ rẹ enọ wẹn. Ọtiọyena, nabọ fuẹrẹn Baibol na, rere wo vwo vwo imuẹro nẹ obo vwo yono na ghini uyota.—Se Iruo Rẹ Iyinkọn Na 17:11.

²⁴ Re vwo yono Baibol na ọyen idjerhe ro me yovwin ra vwọ riẹn Jihova. Vwẹ uyovwinrota rọ vwọ kpahen ọnana, e che yono oboresorọ Baibol na vwọ fẹnẹ ẹbe efa.