1, 2. Tivọ avwanre da sa mrẹ ochọnvwe nonẹna?

VWẸ ẹro roro nẹ wọ yan vwẹ otafe vwẹ ẹdẹ ọvo, jẹ ogiribo djuẹ. Enu na bi phiyọ, ọ nyavwaro, agbranra ra van. O rhe kri-i, osio kọ rhọ. Ku wọ guọnọ asan wọ djẹ ro. Oma vwerhen owẹ wọ rhe vwọ mrẹ asan rọ yare djẹ ro!

² Ẹdia tiọyena yen avwanre hepha nonẹna. Akpọ na rhe miovwẹn phiyọ. Wo se roro, ‘Tivọ me da sa mrẹ ochọnvwe?’ Ọbuine na de si: “Kọ cha ta kẹ Ọrovwohwo na, Egbe mẹ kugbe odjahọ mẹ; Ọghẹnẹ mẹ, wẹ me vwẹ ẹro so.” (Une Rẹ Ejiro 91:2) E, Jihova se sivwin avwanre vwo nẹ ebẹnbẹn rẹ avwanre hirharoku asaọkiephana, ọ je kẹ avwanre iphiẹrophiyọ rẹ omamọ akpeyeren vwẹ ọke rọ cha obaro na.

3. Mavọ yen avwanre sa vwọ vwẹ Jihova ru adjarhọ rẹ avwanre?

³ Mavọ yen Jihova chọn avwanre wan? Ọ chọn avwanre uko vwo yeren ghene ebẹnbẹn eje rẹ avwanre hirharoku, o vwo ẹgba nẹ kohwo kohwo rọ guọnọ wan avwanre oma. Ọ da tobọ dianẹ orọnvwọn rọ brare phia kẹ avwanre enẹna, avwanre se vwo imuẹro nẹ Jihova cha rhuẹrẹ phiyọ vwẹ ọke rọ cha obaro na. Baibol na bru avwanre uche: “Sẹro rẹ oma rẹ ovwan vwẹ evun rẹ ẹguọnọ rẹ Ọghẹnẹ.” (Jude 21) Ofori nẹ avwanre sẹro rẹ oyerinkugbe rẹ avwanre vẹ ọ rẹ Jihova rere avwanre sa vwọ mrẹ ukẹcha vwẹ ọke rẹ ebẹnbẹn. Jẹ, mavọ e se vwo ru ọnana?

4, 5. Idjerhe vọ yen Jihova vwo dje ẹguọnọ rọyen kẹ avwanre?

⁴ Rere a vwọ sẹro rẹ oyerinkugbe rẹ avwanre vẹ ọ rẹ  Jihova, ofori nẹ avwanre riẹn oborẹ ẹguọnọ rẹ Jihova vwo kpahen avwanre gan te. Roro kpahen erọnvwọn eje rẹ Jihova ru kẹ avwanre re. Ọ kẹ avwanre otọrakpọ na rọ pha yoyovwin rọ vọnre vẹ ekakọn kugbe eranvwe sansan. Ọ je kẹ avwanre emuọre re pha vwevwerhen kugbe omamọ rẹ ame rẹ avwanre da. Womarẹ Baibol na, Jihova yono avwanre odẹ rọyen kugbe iruemu iyoyovwin rọyen. Ọ rọ ma rho, o dje ẹguọnọ rọyen kẹ avwanre womarẹ o vwo ji Ọmọ rọyen Jesu ro vwo ẹguọnọ kpahen mamọ nẹ o rhi ghwu kẹ avwanre. (Jọn 3:16) Fikirẹ ughwu rọyen na, avwanre ki rhi vwo iphiẹrophiyọ kpahen obaro na.

⁵ Jihova vwẹ Uvie rẹ Mesaya na vwo mu, Uvie yena ọyen usuon rọhẹ odjuvwu ro che si ojaẹriọ eje no kẹrẹkpẹ. Uvie na che ru otọrakpọ na hirhe phiyọ iparadaisi, asan rẹ ihwo eje de che yerin vwọrẹ ufuoma kugbe omavwerhovwẹn bẹdẹ. (Une Rẹ Ejiro 37:29) Idjerhe ọfa Jihova vwo dje ẹguọnọ rọyen kẹ avwanre yen ro vwo yono avwanre oborẹ avwanre se vwo yeren omamọ rẹ akpọ asaọkiephana. O durhie avwanre nẹ avwanre nẹrhovwo rhe, o ji muegbe rọ vwọ kerhọ rẹ ẹrhovwo avwanre. Jihova ghini dje ẹguọnọ rọyen kẹ avwanre ohwo ọvuọvo.

6. Mavọ yen ofori nẹ wo rhiabọreyọ ẹguọnọ rẹ Jihova wan?

⁶ Mavọ ofori nẹ wo rhiabọreyọ ẹguọnọ rẹ Jihova wan? Djephia kẹ nẹ oma vwerhen owẹ kpahen kemu kemu ro ru kẹ wẹ. Ọ da ohwo mamọ nẹ ihwo buebun nonẹna riẹn ẹse-e. Ọtiọyen ọ hepha vwẹ ọke rẹ Jesu vwọ hẹ otọrakpọ na. O vwo ọke ọvo rẹ Jesu vwo sivwin ehọnvwoti ihwe, ẹkẹvuọvo, ọvuọvo yen rhivwin rhe rhe kpẹvwẹ Jesu. (Luk 17:12-17) Avwanre guọnọ vwẹrokere ọshare yena ro rhivwin rhe kpẹvwẹ Jesu na. Avwanre guọnọ kpẹvwẹ Jihova ọkeneje.

7. Mavọ yen ẹguọnọ rẹ avwanre vwo kpahen Jihova gan te?

 ⁷ O ji fo nẹ avwanre dje ẹguọnọ rẹ avwanre kẹ Jihova. Jesu vuẹ idibo rọyen nẹ ayen vwo ẹguọnọ rẹ Jihova vẹ udu rayen ejobi, vẹ oma rayen ejobi, kugbe iroro rayen ejobi. (Se Matiu 22:37.) Die ọyena mudiaphiyọ?

8, 9. Mavọ avwanre se vwo djephia nẹ avwanre vwo ẹguọnọ rẹ Jihova?

⁸ O teri ra vwọ tanẹ avwanre vwo ẹguọnọ rẹ Jihova? Ẹjo. Uruemu avwanre yen che djephia kẹ Jihova nẹ avwanre vwo ẹguọnọ rọyen vẹ udu, iroro, kugbe oma rẹ avwanre eje. (Matiu 7:16-20) Baibol na yono avwanre phephẹn nẹ avwanre de vwo ẹguọnọ rẹ Jihova, avwanre cha yọnrọn irhi rọyen. Ọyena bẹnre? Ẹjo, Kidie irhi rẹ Jihova “ghwa họhọ-ọ.”—Se 1 Jọn 5:3.

⁹ Siẹrẹ avwanre de nyupho rẹ Jihova, avwanre che yeren akpọ rẹ omavwerhovwẹn. (Aizaya 48:17, 18) Ẹkẹvuọvo, die yen cha chọn avwanre uko sẹro rẹ oyerinkugbe rẹ avwanre vẹ ọ rẹ Jihova? E jẹ a guọnọ otọ rọyen.

10. Diesorọ o vwo fo nẹ wo yono kpahen Jihova ọkieje?

¹⁰ Mavọ wọ rhe vwọ dia ugbeyan rẹ Jihova? Womarẹ uyono rẹ Baibol wẹn, wọ rhe riẹn Jihova mamọ re, wẹ vẹ ọyen ji rhi vwo omamọ rẹ oyerinkugbe re. Oyerinkugbe nana pha kerẹ erhanre rọ la. Kirobo rẹ erhanre guọnọ irhe rọ sa vwọ la ye, ọtiọyen ofori nẹ wo rhe yono kpahen Jihova rere ugbeyan wẹn vẹ ọ rọyen sa vwọ ganphiyọ.—Isẹ 2:1-5.

11. Mavọ yen iyono rẹ Baibol che djobọte we wan?

¹¹ Ru wo vwo yono Baibol na, wọ cha riẹn erọnvwọn ri che te we ubiudu. Vwo oniso rẹ oborẹ oma ru idibo rẹ Jesu ivẹ, ọke rẹ Jesu vwọ nabọ dje kpahen aroẹmrẹ rẹ Baibol na kẹ ayen. Ayen da ta: “Udu rhe kpokpo avwanre  nanaye rọ vwọ ta ota kẹ avwanre vwẹ obo idjerhe-e, ro vwo rhie ẹbe efuanfon na kẹ avwanre?”—Luk 24:32.

12, 13. (a) Die yen sa phia vwọ kẹ ẹguọnọ rẹ avwanre vwo kpahen Ọghẹnẹ? (b) Mavọ yen avwanre sa vwọ sẹro rẹ oyerinkugbe rẹ avwanre vẹ ọ rẹ Jihova?

¹² Kirobo rẹ oma ru idibo rẹ Jesu ọke rẹ ayen vwo vwo ẹruọ rẹ Baibol na, ọ sa dianẹ ọtiọyen oma ru we ọke wọ vwọ ton ẹruọ rẹ Baibol na e vwo phiyọ. Ọnana vwẹ ukẹcha kẹ wẹ vwọ riẹn Jihova, ji vwo ẹguọnọ kpahọn. Wọ guọnọre nẹ ẹguọnọ nana djiro-o.—Matiu 24:12.

¹³ Siẹrẹ wọ da rhe dia ugbeyan rẹ Ọghẹnẹ re, gba wian gangan wọ sa vwọ sẹro rẹ oyerinkugbe yena. Yono kpahen Jihova vẹ Jesu ọkieje, roro kpahen obo ru wo yono vẹ obo wọ sa vwọ reyọ obo ru wo yono na vwo ruiruo vwẹ akpeyeren. (Jọn 17:3) Siẹrẹ wo de se yẹrẹ yono Baibol na, nọ oma wẹn: ‘Die yen ọnana yono uwe kpahen Jihova Ọghẹnẹ?  Diesorọ o vwo fo nẹ mi vwo ẹguọnọ rẹ Jihova vẹ ubiudu mẹ kugbe oma mẹ eje?’—1 Timoti 4:15.

14. Mavọ yen ẹrhovwo sa nẹrhẹ ẹguọnọ rẹ avwanre vwọ kẹ Jihova ganphiyọ?

¹⁴ Siẹrẹ wo de vwo omamọ rẹ ugbeyan wọ ta ota kẹ ọkieje, ọnana nẹrhẹ oyerinkugbe rẹ ovwan ganphiyọ. Vwẹ idjerhe vuọvo na, siẹrẹ avwanre da ta ota rhe Jihova kẹdẹ kẹdẹ womarẹ ẹrhovwo, ẹguọnọ rẹ avwanre vwo kpahọn kọ ganphiyọ. (Se 1 Tẹsalonaika 5:17.) Ẹrhovwo ọyen okẹ ọghanghanre ro nẹ obọ rẹ Ọsẹ avwanre rọhẹ odjuvwu rhe. E jẹ avwanre ta ota kẹ vwo nẹ ubiudu rẹ avwanre rhe ọkieje. (Une Rẹ Ejiro 62:8) E jẹ avwanre vwanriẹn ẹrhovwo rẹ avwanre vwo nẹ afọnrhe cha-a, ukperẹ ọtiọyen, e jẹ avwanre se oborẹ avwanre nẹrhovwo kpahen na gboja. Siẹrẹ avwanre de yono Baibol na je nẹrhovwo vwo nẹ ubiudu cha ọkieje, avwanre ke sa sẹro rẹ oyerinkugbe rẹ avwanre vẹ ọ rẹ Jihova.

15, 16. Ẹro vọ wo vwo ni iruo rẹ aghwoghwo na?

¹⁵ Avwanre da guọnọ sẹro rẹ oyerinkugbe rẹ avwanre vẹ ọ rẹ Jihova, ofori nẹ avwanre vuẹ ihwo efa kpahen esegbuyota rẹ avwanre. Ra vwọ vuẹ ihwo efa kpahen Jihova ọyen uphẹn rode. (Luk 1:74) Ọnana iruo rẹ Jesu vwọ kẹ Inenikristi rẹ uyota eje. Ofori nẹ avwanre ohwo ọvuọvo ghwoghwo iyẹnrẹn esiri rẹ Uvie rẹ Ọghẹnẹ. Wo ghwoghwo re?—Matiu 24:14; 28:19, 20.

¹⁶ Ọyinkọn Pọl ni iruo rẹ aghwoghwo na ghanghanre, kọyensorọ o vwo se nẹ “efe.” (2 Kọrẹnt 4:7) Ra vwọ vuẹ ihwo efa kpahen Jihova vẹ ọhọre rọyen, ọyen iruo rọ ma ghanre ru wo se ru. Ọnana idjerhe ọvo wọ vwọ ga Jihova, ẹro ọghanghanre yen o vwo ni obo ru wo ruẹ kẹ na. (Hibru 6:10) Aghwoghwo je sa dia erere kẹ wẹ vẹ  ihwo ri kerhọ kẹ wẹ kiridie wọ vwẹ ukẹcha kẹ oma wẹn vẹ ihwo efa vwo sikẹre Jihova rere arhọ rẹ bẹdẹ vwo te ovwan obọ. (Se 1 Kọrẹnt 15:58.) O vwo iruo ọfa rọ sa kẹ wẹ omavwerhovwẹn vrẹ ọnana?

17. Diesorọ iruo rẹ aghwoghwo na vwọ guọnọ okpakpa?

¹⁷ Iruo rẹ aghwoghwo na guọnọ okpakpa. Ofori nẹ avwanre “ghwoghwo ota na, kpata kpata.” (2 Timoti 4:2) Ofori nẹ ihwo riẹn kpahen Uvie rẹ Ọghẹnẹ. Baibol na tare: “Ẹdẹ rode rẹ Ọrovwohwo na si kẹri re ọ kẹrire ọ cha vẹ okpakpa.” Oba na “che krinọ-ọ.” (Zẹfanaya 1:14; Habakọk 2:3) O rhe che kri-i, Jihova cha ghwọrọ eyeren rẹ Eshu rọ pha miomiovwin na. Tavwen ọnana ke phia, ofori nẹ e si ihwo orhọ rere ayen sa vwọ jẹ ojẹ rẹ ayen vwọ ga Jihova.

18. Diesorọ o vwo fo nẹ avwanre vẹ Inenikristi efa ga Jihova kugbe?

¹⁸ Jihova guọnọre nẹ avwanre vẹ Inenikristi rẹ uyota efa ga ọyen. Baibol na da ta: “E gbe jẹ avwanre roro obo re jeje ohwohwo oma vwẹ ẹguọnọ kugbe iruo esiri, e jẹn avwanre ghwẹ oma koko, a rha hẹrhiẹ oma kirobo rẹ otu evo ruẹ-ẹ, ẹkẹvuọvo e bru ohwohwo uche, ma rho kẹ ọke nana rẹ ovwan vwọ mrẹ nẹ Ẹdẹ na si kẹre re.” (Hibru 10:24, 25) Ofori avwanre vwọ davwẹngba vwo kpo emẹvwa na eje. Emẹvwa na kẹ avwanre uphẹn rẹ avwanre vwọ bọn ohwohwo gan.

19. Die yen sa chọn avwanre uko vwo vwo ẹguọnọ rẹ iniọvo rehẹ ukoko na?

¹⁹ Wo de kpo emẹvwa ọkeneje, wọ cha mrẹ igbeyan re cha chọn wẹ uko vwọ ga Jihova. Wọ cha mrẹ iniọvo rẹ eya vẹ eshare re pha kerẹ owẹ re davwẹngba rẹ ayen vwọ ga Jihova. Kerẹ owẹ, ayen gbare-e, ayen ji ruẹ chọ. Siẹrẹ ayen de ru we chọ, muegbe wo vwo ghovwo ayen. (Se Kọlose 3:13.) Ọkeneje tẹnrovi omamọ rẹ iruemu rẹ iniọvo wẹn, wo de ru ọtiọyen, ọ cha chọn wẹ uko vwo vwo ẹguọnọ kpahen ayen ji sikẹre Jihova kpẹkpẹkpẹ.

20, 21. Die yen “uvi rẹ arhọ na”?

²⁰ Jihova guọnọre nẹ igbeyan rọyen eje yeren akpọ ro me yovwin. Baibol na yono avwanre nẹ akpọ rẹ avwanre che yerin ọke rọ cha obaro na cha fẹnẹ ọ rẹ avwanre yeren asaọkiephana.

²¹ Vwẹ ọke rọ cha obaro na, avwanre cha dia bẹdẹ, ọ dia ikpe 70 yẹrẹ 80 ọfa-a. Avwanre cha re avwerhen “arhọ ri bẹdẹ” vwọrẹ omakpokpọ, ufuoma kugbe omavwerhovwẹn vwẹ iparadaisi. Ọyena yen Baibol na seri nẹ “uvi rẹ arhọ na.” Jihova veri nẹ ọ cha kẹ avwanre uvi rẹ arhọ nana, ẹkẹvuọvo avwanre cha davwẹngba avwanre eje asaọkiephana rere avwanre sa vwọ “yọnrọn” uvi arhọ na.—1 Timoti 6:12, 19.

22. (a) Mavọ yen avwanre sa vwọ “yọnrọn arhọ na rọ dia uvi rẹ arhọ na”? (b) Diesorọ avwanre che se vwo arhọ rẹ bẹdẹ na komobọ-ọ?

²² Mavọ yen avwanre sa vwọ “yọnrọn arhọ na rọ dia uvi rẹ arhọ na”? Ofori avwanre vwo “ru emu esiri” ji “fe efe rẹ uruemu esiri.” (1 Timoti 6:18) Ọnana mudiaphiyọ nẹ avwanre ru nene oborẹ avwanre yono vwẹ Baibol na. E che se vwo arhọ rẹ bẹdẹ na womarẹ ẹgbaẹdavwọn romobọ-ọ. Avwanre cha sa hwosa re vwo vwo arhọ rẹ bẹdẹ na-a. Ọnana okẹ ro nẹ obọ rẹ Jihova rhe vwọ kẹ idibo rọyen re fuevun, ọnana odjephia rẹ “ẹserọphẹ” rọyen. (Rom 5:15) Ọsẹ rẹ avwanre rọhẹ odjuvwu ghene guọnọ kẹ idibo rọyen re fuevun okẹ nana.

23. Diesorọ o vwo fo nẹ wọ jẹ ojẹ rọ gbare asaọkiephana?

²³ Nọ oma wẹn, ‘Me ga Ọghẹnẹ vwẹ idjerhe rọ rhọnvwe phiyọ?’ Wọ da riẹn nẹ ofori wo vwo ru ewene evo, ruo asaọkiephana. Siẹrẹ avwanre da vwẹroso Jihova, je nyupho rọyen, ọ cha dia adjarhọ rẹ avwanre. Ọ cha  sẹro rẹ idibo rọyen ri fuevun vwẹ ẹdẹ re koba rẹ eyeren rẹ Eshu nana. Jihova cha nẹrhẹ avwanre dia vwẹ Iparadaisi bẹdẹ kirobo ro veri. E, wo se vwo uvi rẹ arhọ na siẹrẹ wọ da jẹ ojẹ rọ gbare asaọkiephana!