1, 2. Amono yen evo usun rẹ igbeyan rẹ Jihova?

ONO yen wọ guọnọre nẹ ọ dia ugbeyan wẹn? Ohwo wo vwo ẹguọnọ rọyen. Ohwo rẹ owẹ vẹ ọyen riẹn ruẹ kuẹgbe. Ohwo ro vwo iruemu esiri ru wọ guọnọ vwẹrokere.

² Jihova Ọghẹnẹ sane ihworakpọ evo nẹ e dia igbeyan rọyen. Kerẹ udje, Ebraham ọvo usun rẹ igbeyan rẹ Jihova. (Aizaya 41:8; Jems 2:23) Devid jẹ ugbeyan rẹ Jihova. Jihova ta kpahen Devid nẹ ọyen “ohwo rẹ ẹro teri.” (Iruo Rẹ Iyinkọn Na 13:22) Jihova je tanẹ ivun rẹ ọmraro Daniẹl “vwerherọ” gangan.—Daniẹl 9:23.

3. Diesorọ Ebraham, Devid, vẹ Daniẹl sa vwọ dia igbeyan rẹ Jihova?

³ Mavọ yen Ebraham, Devid, vẹ Daniẹl sa vwọ dia igbeyan rẹ Jihova? Jihova vuẹ Ebraham nẹ, “Wo mu ọghọ kẹ urhuru mẹ.” (Jẹnẹsis 22:18) Ihwo ri nyupho rẹ Jihova yen o vwo ruẹ ugbeyan. Ihwo rẹ ẹgborho na je sa dia igbeyan rọyen. Jihova da ta kẹ ihwo rẹ Izrẹl nẹ, “Nyo urhuru mẹ, ke me dia Ọghẹnẹ kẹ ovwan, ovwan ke dia ihwo mẹ.” (Jerimaya 7:23) Ọtiọyena, wọ da guọnọ dia ugbeyan rẹ Jihova, ofori nẹ wo nyupho rọyen.

4, 5. Idjerhe vọ yen Jihova vwọ chochọ rẹ igbeyan rọyen?

⁴ Baibol na tare nẹ Jihova guọnọ Idjerhe “ro vwo dje ẹgba rọye kpahe ihwo rẹ udu rọye fon kpahọ.” (2 Ikun Rivie 16:9) Vwẹ Une Rẹ Ejiro 32:8, Jihova ve kẹ igbeyan rọyen nẹ, “Mi dje kẹ wẹ, mi yono uwe idjerhe ru wọ cha ra; Me nẹ wẹ iroro ẹro mẹ ko te we sun.”

 ⁵ Ọvweghrẹn ọvo ro vwo ẹgba guọnọre nẹ avwanre dia igbeyan rẹ Ọghẹnẹ-ẹ. Ẹkẹvuọvo, Jihova guọnọ chochọ rẹ avwanre. (Se Une Rẹ Ejiro 55:22.) Kerẹ igbeyan rẹ Jihova, avwanre vwẹ ẹwẹn avwanre eje ga. Avwanre da tobọ hirharoku ebẹnbẹn dede, avwanre je fuevun kẹ. Kerẹ ọbuine na, avwanre ji vwo uduefiogbere. O si kpahen Jihova nẹ, “Fikiridie ọ hẹ obọrhe mẹ, mi gbi se ghwie-e.” (Une Rẹ Ejiro 16:8; 63:8) Eshu guọnọre nẹ avwanre dia igbeyan rẹ Ọghẹnẹ-ẹ, vwẹ idjerhe vọ?

6. Die yen Eshu tare kpahen ihworakpọ?

⁶ Vwẹ Uyovwinrota 11, avwanre yonori nẹ Eshu vwọso Jihova, rọ vwọ tanẹ Jihova ọvwọrofian, orharhe ohwo yen o ruẹ, kiridie ọ rhọnvwe vwẹ uphẹn kẹ Adam vẹ Ivi rere ayen brorhiẹn rẹ obo ri yovwirin vẹ obo ri miovwirin komobọ-ọ. Ọbe rẹ Job yono avwanre nẹ Eshu ji gun efian nyẹ ihworakpọ eje re guọnọ dia igbeyan rẹ Ọghẹnẹ. Eshu tare nẹ ihworakpọ ga Ọghẹnẹ fikirẹ oborẹ ayen mrẹ Mie, ọ dia fikirẹ ẹguọnọ rẹ ayen vwo kpahọ-ọn. Eshu tobọ tanẹ ọ sa nẹrhẹ ihwo gbevwọso Ọghẹnẹ. E jẹ a fuẹrẹn obo re se yono mie Job vẹ oborẹ Jihova chochọ rọyen wan.

7, 8. (a) Ẹro vọ yen Jihova vwo ni Job? (b) Die yen Eshu ta kpahen Job?

⁷ Ono yen Job? Ọyen omamọ ohwo ro yerin vwẹ omarẹ ikpe 3,600 re wanre. Jihova tare nẹ vwẹ ọke yena, o vwo ohwo vuọvo rọ họherọ vwẹ otọrakpọ na-a. Job muọghọ kẹ Ọghẹnẹ, o ji vwo utuoma kpahen obo re brare. (Job 1:8) Vwọrẹ uyota, Job ghini ugbeyan rẹ Jihova.

⁸ Eshu tare nẹ Job ga Ọghẹnẹ fikirẹ urhuru. Eshu da  vuẹ Jihova nẹ, “Ọ dia owẹ re gba ogba yariẹ vẹ uwevwi rọye kugbe obo ro vwori ejobi, vwi kabọ kabọ? Wo bruba kẹ iruo rẹ abọ rọye, emu ro vwori ejobi rhi bu phihọ vwẹ otọ na. Ẹkẹvuọvo gba riẹn obọ wẹn vwẹ etinẹ na, vwo te obo ro vwori, kọ cha hanrho wẹ phia.”—Job 1:10, 11.

9. Die yen Jihova vwẹ uphẹn kẹ Eshu nẹ o ru?

⁹ Eshu tare nẹ Job ga Jihova fikirẹ erere rọ cha mrẹ vwo Mie. Eshu je tanẹ ọ sa nẹrhẹ Job dobọ rẹ ẹga rọ vwọ kẹ Jihova ji. Jihova rhọnvwe phiyọ oborẹ Eshu tare na-a, ẹkẹvuọvo, Ọ da vwẹ uphẹn kẹ Eshu rere ọ davwen Job ni sẹ Job ghini se djephia nẹ ọyen ugbeyan rẹ Ọghẹnẹ.

10. Idjerhe vọ yen Eshu vwọ davwen Job ni, die yen Job ruru?

¹⁰ Ẹsosuọ, Eshu ruro e de cho eranvwe rẹ Job evo, a da rha ghwọrọ i ri chekọ. E ji hwe idibo rẹ Job buebun. Erọnvwọn rẹ Job vwori eje da vabọ. Ukuotọ rọyen, Eshu da vwẹ odju rode vwo hwe emọ rẹ Job ihwe. Ẹkẹvuọvo, “vwẹ evun rẹ enana ejobi na, Job ru umwemwu-u eyẹ mu ota bare Ọrovwohwo-o.” Ọ fuevun kẹ Jihova.—Job 1:12-19, 22.

11. (a) Ọdavwini ọfa vọ yen Eshu vwọ kẹ Job? (b) Die yen Job ruru?

¹¹ Eshu je dobọ ji-i. Ọ da ta kẹ Ọghẹnẹ nẹ, “Gba riẹn obọ wẹn phia nana nana, vwo te ibeku vẹ ivwo rọye, kọ cha hanrhe owẹ phia.” Ọtiọyena, Eshu da vwẹ era vwo mu Job. (Job 2:5, 7) Job je fuevun kẹ Jihova. Job da ta: “Rhiri bẹsiẹ mi vwo ghwu mi se ku ase mẹ fia-a.”—Job 27:5.

12. Idjerhe vọ yen Job vwo djephia nẹ Eshu ọvwọrofian?

¹² Job riẹn emu vuọvo kpahen oborẹ Eshu tare-e, yẹrẹ oboresorọ rọ vwọ rioja-a. O rorori nẹ Jihova yen so ojaẹriọ  rọyen. (Job 6:4; 16:11-14) Dedena, ọ fuevun kẹ Jihova. Aphro herọ-ọ, ọ dia fikirẹ urhuru yen Job vwọ ga Jihova-a. Job rhe dia ugbeyan rẹ Ọghẹnẹ kiridie o vwo ẹguọnọ rọyen. Oborẹ Eshu ta kpahen Job eje efian!

13. Die yen nẹ obuko rẹ evun-ẹfuọn rẹ Job rhe?

¹³ Dede nẹ Job riẹn obo re phiare vwẹ odjuvwu-u, ọ fuevun kẹ Ọghẹnẹ, o de dje Eshu phiyọ ọvwuvunmwemwu. Jihova hwosa kẹ Job fikirẹ evun-ẹfuọn rọyen.—Job 42:12-17.

14, 15. Die yen Eshu tare kpahen ihwo ejobi?

¹⁴ Wo se yono uyono ọghanghanre vwo nẹ obo re phia kẹ Job. Nonẹna, Eshu je ta kpahen avwanre nẹ avwanre ga Jihova fikirẹ erere avwanre cha mrẹ Mie. Vwẹ Job 2:4, Eshu da ta: “Obo rẹ ohwo vwori ejobi ọ vwọ hwa osa rẹ urhuarhọ rọye.” Ọtiọyena, ihwo ejobi yen Eshu tare nẹ e ga Jihova fikirẹ erere ayen cha mrẹ mie, ọ dia Job ọvo-o. Ikpe ujorin buebun rẹ Job vwo ghwu nu, Eshu ji yinvwaro kpahen Jihova, ji muẹ kpahen idibo rọyen. Kerẹ udje, vwẹ Isẹ 27:11, avwanre de se: “Ghwanre, ọmọ mẹ, rere udu mẹ vwọ ghọghọ, rere me mrẹ ota kpahe kẹ ohwo rọ vwo ovwẹ jehwẹ.”

¹⁵ Wọ sa jẹ ojẹ wo vwo nyupho rẹ Jihova, je dia ugbeyan rọyen rọ fuevun rere wo vwo djephia nẹ Eshu ọvwọrofian. Ọ da tobọ dianẹ ọ guọnọ ewene evo vwẹ akpeyeren wẹn wọ sa vwọ dia ugbeyan rẹ Ọghẹnẹ, ọyena yen orhiẹn ro me yovwin kparobọ wo se bru. Orhiẹn-ebro nana pha ghanghanre. Eshu tare nẹ siẹrẹ wo de hirharoku ebẹnbẹn, wọ cha fuevun kẹ Jihova-a. Ọ davwan rọ vwọ phiẹn avwanre rere avwanre vwo jẹ evun-ẹfuọn kẹ Ọghẹnẹ. Vwẹ idjerhe vọ?

16. (a) Ena vọ yen Eshu vwo ruiruo rere avwanre vwo jẹ Jihova ẹga? (b) Idjerhe vọ yen Idẹbono je vwọ guọnọ dobọ wẹn ji wo vwo jẹ Jihova ẹga?

 ¹⁶ Idjerhe sansan yen Eshu reyọ vwọ wian rere o vwo miovwo oyerinkugbe rẹ avwanre vẹ ọ rẹ Ọghẹnẹ. Ọ vwọ sua “kerẹ okpohrokpo rọ guan, rọ guọnọ obo rọ rọ.” (1 Pita 5:8) Wo jẹ o gbevwunu siẹrẹ ihwo rẹ orua, igbeyan wẹn yẹrẹ ihwo efa da davwẹngba ayen vwọ dobọ wẹn ji nẹ vwo yono Baibol na-a yẹrẹ ru obo ri yovwiri-in. Wo se no nẹ ayen vwọso owẹ. * (Jọn 15:19, 20) Eshu ji djoma rọyen phiyọ “amakashe rẹ urhukpe.” Ọtiọyena, ọ sa vwẹ ona phiẹn avwanre vwo jẹ upho rẹ Jihova enyo. (2 Kọrẹnt 11:14) Ona ọfa rẹ Eshu vwo ruiruo rere avwanre vwo jẹ Jihova ẹga, ọyen rọ vwọ nẹrhẹ avwanre roro nẹ avwanre fo ihwo re sa ga Jihova-a.—Isẹ 24:10.

17. Diesorọ avwanre vwọ kerhọ rẹ Jihova?

¹⁷ Avwanre da kerhọ rẹ Jihova, jẹ avwanre djephia nẹ Eshu ọvwọrofian. Die yen cha chọn avwanre uko vwọ kerhọ? Baibol na da ta: “Wọ me vwẹ udu wẹn ejobi, vẹ ẹnwẹn wẹn ejobi, kugbe ogangan wẹn ejobi, guọnọ Ọrovwohwo Ọghẹnẹ wẹn.” (Urhi Rivẹ 6:5) Avwanre kerhọ rẹ Jihova kiridie avwanre vwo ẹguọnọ rọyen. Ẹguọnọ avwanre kpahen Jihova vwọ ganphiyọ na, o che mu avwanre vwo ru erọnvwọn ejobi rọ guọnọ mie avwanre.  Ọyinkọn Jọn de si: “Ọnana hẹ ẹguọnọ rẹ Ọghẹnẹ na nẹ, avwanre yọnrọn irhi rọye. Yẹ irhi rọye na ghwa họhọ-ọ.”—1 Jọn 5:3.

18, 19. (a) Die yen erọnvwọn evo rẹ Jihova tare nẹ e chọre? (b) Mavọ avwanre ru riẹn nẹ oborẹ udu avwanre gbare yen Jihova nọ mie avwanre?

¹⁸ Ẹkẹvuọvo, die yen erọnvwọn evo rẹ Jihova vuẹ avwanre nẹ e chọre? E djunute evo vwẹ ekpeti na “ Vwo Utuoma Kpahen Obo ri Tu Jihova Oma.” Ẹsosuọ wo se roro nẹ evo usun rẹ erọnvwọn nana ghwa bra-a. Ẹkẹvuọvo, wọ da nabọ se Baibol na nẹ owọ kpo owọ, ji roro kpahen oborẹ wo seri, wo che vwo ẹruọ rẹ aghwanre rọ herọ ra vwọ kerhọ kẹ irhi rẹ Jihova. Wọ je sa rhe mrẹ nẹ ofori wo vwo ru ewene evo vwẹ akpeyeren wẹn. Dede nẹ ọ sa bẹn ọkiọvo e vwo ru ewene tiọyena, jẹ wọ cha mrẹ ufuoma vẹ omavwerhovwẹn rọ herọ ra vwọ dia ugbeyan rẹ  Ọghẹnẹ. (Aizaya 48:17, 18) Mavọ avwanre ru riẹn nẹ e se ru ewene tiọyena?

¹⁹ Oborẹ udu avwanre gbare yen Jihova nọ mie avwanre. (Urhi Rivẹ 30:11-14) Kerẹ uvi rẹ Ugbeyan, Ọ nabọ riẹn avwanre fiotọ. Ọ je riẹn asan rẹ avwanre da gan vẹ asan avwanre da vwiẹrẹ. (Une Rẹ Ejiro 103:14) Ọyinkọn Pọl de phiuduphiyọ avwanre awọ nẹ, “Ọghẹnẹ ohwo rẹ uyota, ọ sa rhọvwe nẹ a davwe owẹ ni vrẹn obo rẹ udu wẹn gbare-e, ẹkẹvuọvo vwẹ evun rẹ ọdavwini na ọ je gbẹn idjerhe wọ vwọ djẹ vabọ, rere wo vwo se chiro.” (1 Kọrẹnt 10:13) Avwanre se fiudugberi nẹ Jihova cha kẹ avwanre ẹgba ra guọnọre re vwo ru obo ri yovwirin ọkieje. Ọ cha kẹ wẹ “ọrho rọ basa-an na” vwo chirakon rẹ ebẹnbẹn. (2 Kọrẹnt 4:7) Kiridie nẹ Jihova kẹ Pọl oka ẹgba ọtiọyena, ko se si nẹ, “Mi se ru emu ejobi vwi Kristi rọ kẹ vwẹ ogangan.”—Filipae 4:13.

20. Iruemu vọ yen avwanre vwẹrokere, diesorọ?

²⁰ Avwanre da guọnọ dia igbeyan rẹ Jihova, ọ ghwa dia oborẹ ọ tare nẹ ọ chọre ọvo yen avwanre kẹnoma kẹ-ẹ, e ji che ru erọnvwọn efa. (Rom 12:9) Igbeyan rẹ Ọghẹnẹ vwo ẹguọnọ rẹ oborẹ Ọghẹnẹ vwo ẹguọnọ rọyen. E djunute ayen vwẹ Une Rẹ Ejiro 15:1-5. (Se.) Igbeyan rẹ Ọghẹnẹ vwẹrokere iruemu rọyen, ayen ji dje iruemu nana phia; “Ẹguọnọ, aghọghọ, ufuoma, ako echiro, ufuefu, uyoyovwi, esegbuyota, dẹndẹn, oma echiro.”—Galesha 5:22, 23.

21. Mavọ yen wo se vwo dje iruemu rẹ Ọghẹnẹ vwo ẹguọnọ rayen phia?

²¹ Mavọ yen wo se vwo dje iruemu iyoyovwin yena phia? Ofori nẹ wo yono kpahen obo rẹ Jihova vwo ẹguọnọ rọyen womarẹ uyono rẹ Baibol rẹ ọkieje. (Aizaya 30:20, 21) Wo vwo ruẹ ọyena, ẹguọnọ wẹn kpahen Jihova kọ cha ganphiyọ, ọyena ko che mu we vwọ kerhọ rọyen.

22. Die yen che no rhe siẹrẹ avwanre da kerhọ rẹ Jihova?

²² A sa vwẹ ewene wo che ru vwẹ akpeyeren vwo dje e vwo kuẹ ewun rẹ awanre nẹ, e mi rhe ku ọkpokpọ phiyọ. Baibol na tare nẹ “siobọ nẹ ohwo rẹ awanre na” rere vwo “ku ohwo ọkpokpọ na phihọ.” (Kọlose 3:9, 10) Dede nẹ ọ cha ghwa lọhọ-ọ, avwanre de ru ewene tiọyena, je kerhọ kẹ Jihova, o veri nẹ ọ cha ghara avwanre “ughwẹ rode.” (Une Rẹ Ejiro 19:11) Kerhọ rẹ Jihova rere wo dje Eshu phiyọ ọvwọrofian. Ga Jihova, ọ dia fikirẹ erere rẹ wọ cha mrẹ vwẹ obaro-o, ẹkẹvuọvo ga fikirẹ ẹguọnọ ru wo vwo kpahọn. Ọke yena, ku wọ sa dia uvi rẹ ugbeyan rẹ Ọghẹnẹ!