Iniọvo Eghanghanre:

Ẹguọnọ re vwo kpahen Ọghẹnẹ vẹ ihwo yen mu avwanre vwọ “yanran re yono ihwo rẹ ẹgborho na eje vwọ dia idibo” ji bru ayen phiyame. (Mt 28:​19, 20; Mak 12:​28-31) Uvi rẹ ẹguọnọ vọnre vẹ ẹgba, o mu ihwo ri “vwo omamọ ẹwẹn . . . vwọ dia idjerhe ro suẹn [ohwo] kpo arhọ ri bẹdi bẹdẹ” na.​—Iruo rẹ Iyinkọn Na 13:48.

Dẹvure, obo re se vwo yono eta ra cha ta vwẹ iruo rẹ aghwoghwo na ku afọnrhe, vẹ e vwo phi ẹbe phiyọ ada yen a tẹnroviẹ. Enẹna, avwanre wian phiyọ oborẹ ona rẹ otaẹtakuẹgbe avwanre se vwo yovwinphiyọ. Avwanre guọnọ dje ẹguọnọ kẹ ihwo efa womarẹ a vwọ ta ota kpahen obo re cha vwerhen ayen oma. Ọnana mudiaphiyọ nẹ a cha nuẹ je nabọ roro kpahen ọdavwẹ rẹ ohwo ọvuọvo vẹ obo re cha vwerhọn oma. Mavọ yen ibroshọ nana sa vwọ chọn avwanre uko vwo ru ọtiọyen?

Ibroshọ nana vwo iyono 12 ri dje iruemu ri fori nẹ e vwo, re se vwo dje ẹguọnọ phia ji yono ihwo vwọ dia idibo. E mu uyono ọvuọvo kpahen ikuegbe ri Baibol ọvo rọ kanrunumu uruemu ri Jesu yẹrẹ Inenikristi rẹ ẹgbukpe ujorin rẹsosuọ djephia vwẹ iruo rẹ aghwoghwo na. Ọ dia e vwo yono eta ra cha ta vwẹ aghwoghwo na ku afọnrhe yen ọdavwẹ rẹ avwanre-e, ẹkẹvuọvo, ọ rẹ a vwọ guọnọ idjerhe vwo dje ẹguọnọ kẹ ihwo. Dede nẹ a guọnọ iruemu 12 na vwẹ ona rẹ aghwoghwo avwanre eje, jẹ a cha ta ota kpahen evo ra ma guọnọ vwẹ usun rayen, ọke ra da cha ton otaẹtakuẹgbe phiyọ, kpo orhivwinbrura, yẹrẹ ru uyono ri Baibol.

Wọ vwọ fuẹrẹn uyono ọvuọvo na, nabọ roro kpahen oborẹ wo se vwo dje iruemu na vwọ kẹ ihwo rehẹ ekogho wo de ghwoghwo. Ru ẹguọnọ wẹn kpahen Jihova vẹ ihwo efa kodophiyọ. Ẹguọnọ yena rọ vrẹ kona kona eje na, cha chọn wẹn uko vwọ yanmu obo wọ tẹnrovi, rọ dia wo vwo yono ihwo vwọ dia idibo.

Ọ vwerhen avwanre oma a vẹ ovwan vwọ wian kuẹgbe. (Zẹf 3:9) E jẹ Jihova bruphiyọ kẹ ovwan gbidiki rẹ ovwan vwo vwo ẹguọnọ rẹ ihwo ọkeneje ji yono ayen vwọ dia idibo!