UYONO 07
Oka rẹ Ohwo Vọ Yen Jihova Hepha?
Wo de roro kpahen Jihova Ọghẹnẹ, die yen djẹ ruẹ ẹwẹn wẹn? Ohwo rọ pha rhuarho ro ji sherabọ kẹ wẹ, kerẹ isio re pha shesheri? Gbanẹ wo roro nẹ ọyen ohwo vẹ ẹgba kerẹ agbraran ro vwo uruemu ro si ohwo urhuru-u? Oka rẹ ohwo vọ yen Jihova ghini hepha? Baibol na vuẹ avwanre kpahen iruemu ri Jihova vẹ obo ro vwo ẹguọnọ wẹn te.
1. Diesorọ e vwo jẹ Ọghẹnẹ ẹmrẹ?
“Ọghẹnẹ, ohwo rẹ ẹwẹn.” (Jọn 4:24, NW) Jihova vwo ugboma re rhiẹromrẹ-ẹ. Ohwo rẹ ẹwẹn yen o ruẹ, ọ dia odjuvwu, asan rẹ avwanre cha sa mrẹ-ẹ.
2. Erhọ yen iruemu ri Jihova evo?
Dede nẹ e rhiẹromrẹ Jihova-a, jẹ ọyen Ohwo ro vwo iruemu re sa nẹrhẹ ihwo sikẹrẹ. Baibol na da ta: “Ọrovwohwo guọnọ ọsoso, ọ cha sa sen ihwo efuanfon rọye na-a.” (Une Rẹ Ejiro 37:28) Ọyen ohwo “ro nẹ arodọvwẹ,” ma rho vwọ kẹ ihwo re rioja. (Jems 5:11) “Ọrovwohwo na si kẹrẹ otu rẹ udu rayen vwirhiri, o mi sivwi ayen otu rẹ udu rayen ghwọre.” (Une Rẹ Ejiro 34:18) Wọ riẹnre nẹ uruemu avwanre sa nẹrhẹ oma vwerhen Jihova yẹrẹ nẹrhẹ o muomaphiyọ? O muomaphiyọ siẹrẹ ohwo de ru obo re brare. (Une Rẹ Ejiro 78:40, 41) Ẹkẹvuọvo, oma vwerhọn siẹrẹ ohwo de ru obo ri yovwirin.—Se Isẹ 27:11.
3. Mavọ yen Jihova vwo djephia nẹ o vwo ẹguọnọ rẹ avwanre?
Uruemu ri Jihova rọ ma rho kparobọ yen ẹguọnọ. Vwọrẹ uyota, “Ọghẹnẹ hẹ ẹguọnọ.” (1 Jọn 4:8) Jihova dje ẹguọnọ rọyen phia womarẹ Baibol na vẹ erọnvwọn rọ mare. (Se Iruo Rẹ Iyinkọn Na 14:17.) Kerẹ udje, roro kpahen obo rọ ma avwanre wan. Ọ kẹ avwanre ẹgba ra vwọ mrẹ ikọlọ iyoyovwin, nyo ine evwevwerhen, je ria omamọ emu. Ọ guọnọre nẹ avwanre riakpọ kuoma.
HIẸ KODO
Yono kpahen oborẹ Jihova vwo ruẹ emu rẹ igbevwunu. Wọ je mrẹ oborẹ Jihova vwo dje iruemu rọyen phia.
4. Ẹwẹn ọfuanfon na, ọyen ẹgba rẹ Ọghẹnẹ vwo ruiruo
Kirobo rẹ avwanre vwẹ abọ vwo ruiruo na, ọtiọyen Jihova reyọ ẹwẹn ọfuanfon na vwo ruiruo. Baibol na djerephia nẹ ẹwẹn ọfuanfon na dia ohwo-o, ẹkẹvuọvo, ọyen ẹgba rẹ Ọghẹnẹ reyọ vwo ruiruo. Se Luk 11:13 vẹ Iruo Rẹ Iyinkọn Na 2:17, ovwan ta ota kpahen enọ nana:
-
Ọghẹnẹ che “ku” ẹwẹn ọfuanfon rọyen vwo ku ihwo re nokpẹn rọyen. Ọtiọyena, wo rorori nẹ ẹwẹn ọfuanfon na ohwo gbanẹ ẹgba rẹ Ọghẹnẹ vwo ruiruo? Diesorọ wọ vwọ ta ọtiọyen?
Jihova vwẹ ẹwẹn ọfuanfon na vwo ru emu igbevwunu. Se Une Rẹ Ejiro 33:6 kugbe 2 Pita 1:20, 21, ovwan ta ota kpahen onọ nana:
-
Erhọ yen idjerhe evo rẹ Jihova vwọ reyọ ẹwẹn ọfuanfon rọyen vwo ruiruo?
5. Jihova vwo omamọ rẹ iruemu
Mosis, ọyen odibo rẹ Ọghẹnẹ rọ fuevun, jẹ ọ je guọnọ riẹn Ọmemama rọyen phiyọ. Ọtiọyena, Mosis da ta kẹ: “Dje idjerhe wẹn kẹ vwẹ rere me vwọ riẹn wẹ.” (Eyanno 33:13) Jihova de dje iruemu rọyen evo vwọ kẹ. Se Eyanno 34:4-6, ovwan ta ota kpahen enọ nana:
-
Iruemu ri Jihova vọ yen o dje kẹ Mosis?
-
Iruemu ri Jihova vọ yen me je we?
6. Jihova vwo ẹguọnọ rẹ ihwo
Ihwo ri Hibru re dia idibo rẹ Ọghẹnẹ, ka dia eviẹn vwẹ Ijipt jovwo. Mavọ yen ojaẹriọ rayen da Jihova te? Hworo UHWORO na ovwan nene, yẹrẹ se Eyanno 3:1-10. Ovwan ta ota kpahen enọ ri nenire.
-
Die yen ikuegbe nana yono uwe kpahen oborẹ oma ru Jihova siẹrẹ ihworakpọ da rioja?—Ni awọ 7 vẹ 8.
-
Wo rorori nẹ Jihova ghene guọnọ vwẹ ukẹcha kẹ ihwo, o ji vwo ẹgba ro vwo ruo? Diesorọ?
7. Emama dje iruemu ri Jihova phia
Jihova dje iruemu rọyen phia womarẹ obo rọ mare. Hworo IVIDIO na. Gbe se Rom 1:20, ovwan ta ota kpahen onọ ro nenire.
-
Iruemu ri Jihova vọ yen wọ mrẹ vwẹ erọnvwọn rọ mare?
IHWO EVO TA: “Ọghẹnẹ dia ohwo-o, ẹgba rọhẹ asan eje yen o ruẹ.”
-
Die wo rorori?
-
Diesorọ wo vwo roro ọtiọyen?
ỌDJẸKOKO
Jihova, ọyen ohwo rẹ Ẹwẹn ra mrẹ-ẹ ro vwo omamọ iruemu, ma rho kẹ ẹguọnọ.
Ẹrhomafuẹrẹn
-
Diesorọ e vwo jẹ Jihova ẹmrẹ?
-
Die yen ẹwẹn ọfuanfon na?
-
Erhọ yen evo usun rẹ iruemu ri Jihova?
HIẸ GUỌNỌ
Wọ vwọ riẹn Jihova phiyọ, yono kpahen iruemu ẹne kiriguo ri rhere.
“Oka Ohwo Vọ Yen Ọghẹnẹ Hepha?” (Uwevwin Orhẹrẹ Ukeri 1 2019)
Fuẹrẹn erọnvwọn evo ri djerephia nẹ Jihova hẹ asan eje-e.
“Ọghẹnẹ Hẹ Asan Eje Vwẹ Ọke Vuọvo?” (Uyovwinrota rọhẹ jw.org)
Mrẹ oboresorọ Baibol na vwọ vwẹ ẹwẹn ọfuanfon na vwo dje obọ rẹ Ọghẹnẹ.
Ọshare ọvo ro rhuẹro mrẹrẹ bẹnbẹn ro vwo vwo imuẹro nẹ Ọghẹnẹ davwerhọn rọyen. Mrẹ obo ri wene ẹwẹn rọyen.
“Mi Rhi no nẹ Me sa Vwẹ Ukẹcha kẹ Ihwo Efa Enẹna Re” (Uwevwin Orhẹrẹ ri October 1, 2015)
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
