UYONO 11
Obo Wọ Sa Vwọ Mrẹ Erere Vọnvọn Vwo nẹ Isese ri Baibol
Oshọ wọ vwọ tuẹn owian rode ọvo phiyọ mu we jovwore? Ọkiọvo ọ sa vwọ lọhọ kẹ wẹ emerha, wọ da ghare owian na phiyọ ẹko itete wo se vwo ruo ememerha. Ọtiọyen ọ je hepha vwọ kẹ isese ri Baibol. Wọ sa nọ, ‘Mavọ me sa vwọ tuọnphiyọ?’ Vwẹ uyono nana, a cha ta ota kpahen owọẹjẹ elọlọhọ evo re sa chọn wẹ uko vwọ riavwerhen rẹ isese vẹ eyono ri Baibol na.
1. Diesorọ o vwo fo nẹ e se Baibol na ọkieje?
Ohwo ro se Baibol na yẹrẹ “urhi rẹ Ọrovwohwo” na ọkieje che phikparobọ, oma je cha vwerhọn. (Se Une Rẹ Ejiro 1:1-3.) Wọ vwọ tuọnphiyọ, davwẹngba rere wo se Baibol na ibrẹro evo kẹdẹ kẹdẹ. Wo de se Baibol na kẹdẹ kẹdẹ, wọ cha nabọ riavwerhen rẹ isese na.
2. Die yen cha chọn wẹ uko vwọ mrẹ erere vwo nẹ isese ri Baibol wẹn?
A sa vwọ mrẹ erere vọnvọn vwo nẹ isese ri Baibol na rhe, ofori nẹ a dobọji rere e roro kpahen obo re se na. Ofori nẹ e se ji “roro” kpahọn. (Une Rẹ Ejiro 119:97) Wo de se Baibol na, nọ oma wẹn: ‘Die yen ẹkpo ri Baibol nana yono uvwe kpahen Jihova? Mavọ me sa vwọ reyọ vwo ruiruo? Mavọ me sa vwọ reyọ awọreta nana vwọ chọn ihwo efa uko?’
3. Mavọ wọ sa vwọ rhuẹrẹ ọke phiyotọ vwọ kẹ isese ri Baibol?
Ọ bẹn kẹ wẹ wọ vwọ rhuẹrẹ ọke phiyotọ vwọ kẹ isese ri Baibol? Ọ bẹn kẹ ihwo buebun. Davwẹngba, wo “kuẹ ọke fia-a.” (Ẹfesọs 5:16) Wo se ru ọnana siẹrẹ wọ da sanẹ ọke ọvo kiriguo phiyotọ wo vwo se Baibol na kẹdẹ kẹdẹ. Ihwo evo se Baibol na vwẹ edegburhiọke. Efa se vwẹ oghẹruvo, ọkiọvo vwẹ ọke rẹ omaerovwon rayen. Efa ji se vwẹ ovwọnvwọn tavwen ayen ki sherhẹn. Ọke vọ yen me shephiyọ kẹ wẹ?
HIẸ KODO
Yono kpahen obo wo se vwo ru isese ri Baibol wẹn yovwinphiyọ. Yono obo wọ sa vwọ nabọ muegbe je riavwerhen rẹ uyono ri Baibol wẹn.
Kirobo rẹ ohwo se yono oma phiyọ obo rọ vwọ riavwerhen rẹ emu kpokpọ ye, e ji se yono oma phiyọ obo ra sa vwọ riavwerhen rẹ isese ri Baibol na
4. Yono obo wọ sa vwọ riavwerhen rẹ isese ri Baibol
Ọ ghwa lọhọ ra vwọ tuẹn isese ri Baibol phiyọ-ọ. Ẹkẹvuọvo, wo se yono obo ra riavwerhen rẹ isese ri Baibol kirobo rẹ ohwo se yono obo ra riavwerhen rẹ emu kpokpọ. Se 1 Pita 2:2, ovwan ta ota kpahen onọ nana:
-
Wo rorori nẹ wo de se Baibol na kẹdẹ kẹdẹ, wọ cha riavwerhen rọyen ji vwo owenvwe wo vwo se kpobarophiyọ?
Hworo IVIDIO na wọ mrẹ oborẹ ihwo evo vwọ riavwerhen rẹ isese ri Baibol rayen. Ovwan ta ota kpahen enọ ri nenire.
-
Vwevunrẹ ividio na, ọrhọ yen egbabọse evo rẹ ighene na phikparobọ?
-
Die yen chọn ayen uko vwo muomaphiyọ isese ri Baibol ri kẹdẹ kẹdẹ?
-
Die yen ayen ruru rere ayen sa vwọ riavwerhen rẹ isese ri Baibol rayen phiyọ?
Obo re sa chọn wẹ uko vwọ tuọnphiyọ:
-
Sanẹ efanfan ri Baibol rọ gbare ra vwẹ ejajẹ rẹ ọke nana vwo si. Davwen New World Translation ọ da herọ vwẹ ejajẹ wẹn.
-
Tuẹn isese na phiyọ vẹ ẹkpo ri Baibol ri me je we. Vwọ kẹ iroroẹjẹ evo, ni ekpeti na “Tuẹn Isese ri Baibol Phiyọ.”
-
Jokaphiyọ asan ru wo se te re. Reyọ ekpeti rẹ “Riẹn Asan Wo Se Baibol Wẹn Te Re” rọhẹ ọbe nana vwo ruiruo.
-
Reyọ aplikeshọni ri JW Library® na vwo ruiruo. Womarẹ aplikeshọni na, wọ sa vwẹ ifonu yẹrẹ ikọmputa wẹn vwo se je kerhọ rẹ isese ri Baibol na vwẹ kasan kasan.
-
Reyọ Apẹndisi rọhẹ New World Translation na vwo ruiruo. O vwo imapu, ekpeti vẹ odjefiotọ re sa nẹrhẹ wọ nabọ riavwerhen rẹ isese ri Baibol wẹn.
5. Muegbe vwọ kẹ uyono ri Baibol wẹn
Se Une Rẹ Ejiro 119:34, ovwan ta ota kpahen onọ nana:
-
Diesorọ o vwo fo nẹ wọ nẹrhovwo tavwen wọ ke tuẹn isese ri Baibol phiyọ yẹrẹ wo ki muegbe vwọ kẹ uyono ri Baibol wẹn?
Mavọ wọ sa vwọ mrẹ erere vọnvọn vwo nẹ uyono ri Baibol wẹn? Wo de muegbe rẹ uyono ọvo vwevunrẹ ọbe nana, davwen owọẹjẹ nana ni:
-
Se ẹkoreta re tuẹn uyono na phiyọ.
-
Se ẹkpo ri Baibol na ọvuọvo wọ davwẹngba vwọ riẹn obo ri vwo churobọ si obo rehẹ ọbe na.
-
Jokaphiyọ eta re kpahenphiyọ onọ ọvuọvo; ọnana cha chọn wẹ uko ọke rẹ wẹ vẹ ohwo ro yono uwe da fuẹrẹn ọbe na.
Wọ riẹnre jovwo?
Iseri ri Jihova reyọ efanfan ri Baibol sansan vwo ruiruo re. Ẹkẹvuọvo, New World Translation of the Holy Scriptures nabọ je avwanre dẹn kidie ọ gbare, o fiotọ, a je reyọ odẹ rẹ Ọghẹnẹ vwo ruiruo vwọ.—Ni uyovwinrota nana rọhẹ jw.org “Iseri ri Jihova Vwo Baibol Romobọ Rayen?”
IHWO EVO TA: “E vwo yono Baibol na okpowian. Mi vwo ọke yẹrẹ ẹgba mi vwo ruo-o.”
-
Die wo rorori?
ỌDJẸKOKO
Wọ sa vwọ mrẹ erere vọnvọn vwo nẹ Baibol na rhe, rhuẹrẹ ọke phiyotọ wo vwo se, yare ẹruọ mie Jihova, wo ji muegbe vwọ kẹ uyono ri Baibol wẹn.
Ẹrhomafuẹrẹn
-
Die yen cha nẹrhẹ wọ mrẹ erere vọnvọn vwo nẹ Baibol na rhe?
-
Ọke vọ yen wọ sa rhuẹrẹphiyotọ vwọ kẹ isese vẹ eyono ri Baibol na?
-
Diesorọ o vwo fo nẹ wo muegbe phiyotọ vwọ kẹ uyono ri Baibol wẹn?
HIẸ GUỌNỌ
Rhoma fuẹrẹn iroroẹjẹ evo re sa chọn wẹ uko vwọ mrẹ erere vọnvọn vwo nẹ isese ri Baibol wẹn.
“Obo ra sa Vwọ Mrẹ Erere Vwo nẹ Isese rẹ Baibol Na” (Uwevwin Orhẹrẹ Ukeri 1 2017)
Yono idjerhe erha re se vwo se Baibol na.
“Mavọ Yen Baibol na sa Vwọ Vwẹ Ukẹcha kẹ Vwẹ?—Ẹbẹre 1: Se Baibol Wẹn” (Uyovwinrota rọhẹ jw.org)
Mrẹ obo ra sa vwọ riavwerhen rẹ isese ri Baibol.
Mrẹ ukẹcha vwo mie ihwo ri se Baibol na vwẹ ọke grongron re
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
