UYONO 16
Die Yen Jesu Ruru Ọke rọ Vwọ hẹ Otọrakpọ Na?
Ẹro rẹ ọmọboba ro vwo ọchuko-o, ọmraro ro vwo aghwanre yẹrẹ ọshare ro ghwẹ yen ihwo buebun vwo ni Jesu. Ẹkẹvuọvo, e se yono emu efa kpahọn siẹrẹ a da fuẹrẹn akpeyeren rọyen ọke rọ vwọ hẹ otọrakpọ na? Vwẹ uyono nana, a cha fuẹrẹn erọnvwọn evo re ma ghanre ri Jesu ruru kugbe obo re sa vwọ chọn wẹ uko.
1. Ọrhọ yen owian rọ ma ghanre rẹ Jesu ruru?
Owian rọ ma ghanre kẹ Jesu ọyen o vwo “gbe ikun esiri rẹ uvie rẹ Ọghẹnẹ.” (Se Luk 4:43.) O ghwoghwori nẹ Ọghẹnẹ cha vwẹ uvie yẹrẹ usuon ọvo vwo mu ro che si ebẹnbẹn rẹ ihworakpọ vwo no. a Ẹgbukpe erha gbẹ ubro yen Jesu vwo ghwoghwo ovuẹ nana.—Matiu 9:35.
2. Diesorọ Jesu vwo ru igbevwunu?
Baibol na djisẹ rẹ “iruo ride vẹ igbunu rẹ eka buebu ro ruru [womarẹ Jesu].” (Iruo Rẹ Iyinkọn Na 2:22) Womarẹ ẹgba rẹ Ọghẹnẹ, Jesu se vwo ogangan ro vwo sun aruọke, ghẹrẹ ihwo buebun, sivwin ihwo re muọga, ọ tobọ rhọvwọn ihwo ri ghwuru. (Matiu 8:23-27; 14:15-21; Mak 6:56; Luk 7:11-17) Igbevwunu rẹ Jesu ruru nẹrhẹ a riẹn nẹ Ọghẹnẹ yen jiro rhe. O ji djephia nẹ Jihova vwo ogangan ro vwo si ebẹnbẹn avwanre eje no.
3. Die yen e se yono vwo nẹ oborẹ Jesu yerẹn akpọ rọyen wan?
Jesu kerhọ ri Jihova vwẹ ẹdia eje. (Se Jọn 8:29.) Dede nẹ a vwọsuọ, Jesu fuevun ru ọhọre rẹ Ọsẹ rọyen re te ọke ro vwo ghwu. O djerephia nẹ ihworakpọ sa ga Ọghẹnẹ, vwẹ ẹdia ọgangan dede. Ọtiọyena, Jesu phi omamọ rẹ udje phiyotọ rere “[avwanre] vwo no ru, rere ovwan vwẹ ẹro kere.”—1 Pita 2:21.
HIẸ KODO
Yono kpahen oborẹ Jesu ghwoghwo iyẹnrẹn esiri na wan kugbe igbevwunu ro ruru.
4. Jesu ghwoghwo iyẹnrẹn esiri
Jesu yan iroko buebun vwẹ idjerhe rọ vọnre vẹ ekpẹn, ro vwo ghwoghwo iyẹnrẹn esiri na vwọ kẹ kohwo kohwo. Se Luk 8:1, ovwan ta ota kpahen enọ nana:
-
Ihwo ri siomakoko re kerhọ vwọ kẹ Jesu ọvo yen o ghwoghwota vwọ kẹ?
-
Mavọ yen Jesu davwẹngba te ọ sa vwọ mrẹ ihwo?
Ọghẹnẹ tarọphiyotọ nẹ Mesaya na che ghwoghwo iyẹnrẹn esiri na. Se Aizaya 61:1, 2, ovwan ta ota kpahen enọ nana:
-
Mavọ yen Jesu vwo ru orugba rẹ aroẹmrẹ nana?
-
Wo rorori nẹ ihwo guọnọ nyo iyẹnrẹn esiri na nonẹna?
5. Jesu yono uyota eghanghanre
Vwọba iruo aghwoghwo rẹ iyẹnrẹn esiri ro shekpahen Uvie rẹ Ọghẹnẹ, Jesu ji yono iyono eghanghanre. Roro kpahen idje evo vwo nẹ Ota ri Jesu vwẹ enu Ugbenu na. Se Matiu 6:14, 34 kugbe 7:12, ovwan ta ota kpahen enọ nana:
-
Uchebro vọ yen Jesu vwọ phia vwẹ awọreta nana?
-
Wo rorori nẹ uchebro yena je sa chọn avwanre uko nonẹna?
6. Jesu ru igbevwunu
Jihova kẹ Jesu ẹgba o se vwo ru igbevwunu buebun. Wọ sa vwọ mrẹ udje ọvo, se Mak 5:25-34 yẹrẹ hworo IVIDIO na. Ovwan ta ota kpahen enọ ri nenire.
-
Vwevunrẹ ividio na, imuẹro vọ yen rhe aye rọ muọga na?
-
Die yen vwerhen owẹ oma kpahen igbevwunu nana?
Se Jọn 5:36, ovwan ta ota kpahen onọ nana:
-
Die yen igbevwunu rẹ Jesu ruru “se oseri” kpahen yẹrẹ djephia kpahọn?
Wọ riẹnre jovwo?
Ọbe ri Matiu, Mak, Luk kugbe Jọn yen a da mrẹ erọnvwọn buebun rẹ avwanre riẹn kpahen Jesu. Isiẹbe vuọvo nana ta eta sansan re fẹnẹre kpahen Jesu. Ọtiọyena, e de se ẹbe ẹne rẹ Ikuegbe rẹ Akpeyeren ri Jesu na, ka cha nabọ riẹn oka rẹ akpọ ro yerin.
-
MATIU
yen ke si Ikuegbe rẹ Akpeyeren ri Jesu phiyotọ. Ọ kanrunumu iyono ri Jesu, ma rho kẹ iyono ri Jesu ri shekpahen Uvie rẹ Ọghẹnẹ.
-
MAK
yen si Ikuegbe rẹ Akpeyeren ri Jesu rọ ma krẹn. O djunute erọnvwọn iyoyovwin buebun re phiare.
-
LUK
nabọ tẹnrovi ẹrhovwo vẹ oborẹ Jesu nene eya yerin wan.
-
JỌN
djekpahen oka rẹ ohwo rẹ Jesu hepha womarẹ o vwo djunute otaẹtakugbe rọ vwomaphia vwẹ uvwre ri Jesu vẹ igbeyan re ma kẹrẹ vẹ ihwo efa.
IHWO EVO TA: “Jesu ọyen ohwo esiri, ẹkẹvuọvo ọ dia ọyehẹ Mesaya na-a.”
-
Die yen wo rorori?
ỌDJẸKOKO
Jesu ghwoghwo kpahen Uvie rẹ Ọghẹnẹ, o ru igbevwunu, o ji nyupho ri Jihova ọkieje.
Ẹrhomafuẹrẹn
-
Ọrhọ yen owian rọ ma ghanre rẹ Jesu ruru ọke ro vwọ hẹ otọrakpọ na?
-
Die yen igbevwunu rẹ Jesu ruru djephia?
-
Iyono eghanghanre vọ yen Jesu yonori?
HIẸ GUỌNỌ
Uyovwinrota vọ yen Jesu ma ta ota kpahen?
“Uvie rẹ Ọghẹnẹ—Die Yen O Mudiaphiyọ Vwọ kẹ Jesu?” (Uwevwin Orhẹrẹ rẹ October 1, 2014)
Yono kpahen oboresorọ o vwo mu avwanre ẹro nẹ igbevwunu rẹ Jesu ruru ghene phia.
“Igbevwunu ri Jesu—Die Yen Wo se Yono Norhe?” (Uwevwin Orhẹrẹ ri July 15, 2004)
Se kpahen oborẹ udje rẹ omaevwoze ri Jesu vwọ nẹrhẹ ọshare ọvo wene akpeyeren rọyen.
“Ọdavwẹ Mẹ Ọvo Yen Me Vwọ Kobaro Vwẹ Akpeyeren Mẹ” (Uwevwin Orhẹrẹ rẹ October 1, 2014)
Mrẹ erọnvwọn eghanghanre ri Jesu ruru vwo nene oborẹ ayen phia kpahen ohwohwo wan.
“Main Events of Jesus’ Earthly Life” (New World Translation of the Holy Scriptures, Appendix A7)
a A cha nabọ fuẹrẹn Uvie rẹ Ọghẹnẹ vwẹ uyono 31-33
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
