UYONO 26
Diesorọ Umwemwu vẹ Ojaẹriọ Vwọ Vọn Asan Eje?
“Diesorọ?” ọyen onọ ra nọ mamọ ọke rẹ ebẹnbẹn da vwomaphia. Ọ vwerhoma nẹ Baibol na vwo ẹkpahọnphiyọ vwọ kẹ onọ yena!
1. Die yen Eshu ruru rere umwemwu vwọ dia otọrakpọ na?
Eshu rọ dia Idẹbono na vwọso Ọghẹnẹ. Eshu guọnọ sun ihwo efa, ọtiọyena ọ da riẹriẹ Adam vẹ Ivi vwọ vwomaba vwo gbevwọso Ọghẹnẹ. Eshu ru ọnana womarẹ o vwo gun efian kẹ Ivi. (Jẹnẹsis 3:1-5) Ọ nẹrhẹ o roro nẹ Jihova si emu erhuvwu ọvo nu vwọ kẹ. Ọ tare nẹ ihworakpọ se vwo omavwerhovwẹn siẹrẹ ayen rha kerhọ rẹ Ọghẹnẹ-ẹ. Eshu gun efian rẹsosuọ womarẹ ọ vwọ vuẹ Ivi nẹ o che ghwu-u. Eriyina, Baibol na da tanẹ Eshu “ọ vwọnrọn ofian o ruẹ ọye hẹ ọsẹ rẹ ofian.”—Jọn 8:44.
2. Orhiẹn vọ yen Adam vẹ Ivi bruru?
Jihova bruba kẹ Adam vẹ Ivi. Ọ tare nẹ ayen sa re komamọ komamọ rẹ urhe rọhẹ ogba na eje jokpa rẹ ọvo. (Jẹnẹsis 2:15-17) Ẹkẹvuọvo, ayen de brorhiẹn ayen vwọ re emamọ rẹ urhe na ghene. Ivi “da reyọ omamọ rọye ọ da riọ.” Ọke vwọ yanran na, Adam “da je re.” (Jẹnẹsis 3:6) Ayen ihwo ivẹ churhi rẹ Ọghẹnẹ. Ọ vwọ dianẹ Adam vẹ Ivi pha gbagba, ofori nẹ ayen ru obo ri shephiyọ. Ayen vwọ vwẹ arogba vwọ churhi rẹ Ọghẹnẹ na, ayen de ru umwemwu je sen usuon rọyen. Orhiẹn yena ghwa ojaẹriọ rhe.—Jẹnẹsis 3:16-19.
3. Mavọ yen orhiẹn rẹ Adam vẹ Ivi vwo djobọte avwanre?
Ọke rẹ Adam vẹ Ivi vwo ru umwemwu, ayen de rhi hirhephiyọ ihwo ri jẹgba, emọ rayen da je riuku ri jẹgba na. Vwọ kpahen Adam, Baibol na da ta: “Kirobo rẹ umwemwu wan oma rẹ ohwo ọvo rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi.”—Rom 5:12.
Erọnvwọn sansan yen nẹrhẹ avwanre rioja. Ọke evo, orharhe rẹ orhiẹn rẹ avwanre brẹ yen so ojaẹriọ na. Vwẹ ọke efa, kẹ orharhe rẹ orhiẹn rẹ ihwo efa brẹ. Avwanre je rioja ọke evo kidie avwanre hẹ asan ro je fo vwẹ ọke ro fori-i.—Se Aghwoghwo 9:11.
HIẸ KODO
Roro kpahen oboresorọ a cha sa tanẹ Ọghẹnẹ yen so umwemwu vẹ ojaẹriọ rọhẹ akpọ na nonẹna-a kugbe oborẹ oma ruo a da rioja.
4. Ohwo rọ so ojaẹriọ rẹ avwanre
Ihwo buebun rorori nẹ Ọghẹnẹ yen sun akpọ na. Ọyena uyota? Hworo IVIDIO na.
Se Jems 1:13 kugbe 1 Jọn 5:19, ovwan ta ota kpahen onọ nana:
-
Ọghẹnẹ yen so umwemwu vẹ ojaẹriọ?
5. Roro kpahen obo ri nẹ obuko rẹ usuon rẹ Eshu rhe
Se Jẹnẹsis 3:1-6, ovwan ta ota kpahen enọ nana:
-
Efian vọ yen Eshu gunrun?—Ni awọ 4 vẹ 5.
-
Idjerhe vọ yen Eshu vwọ tanẹ Jihova si emu erhuvwu nẹ vwọ kẹ ihworakpọ?
-
Kirobo rẹ Eshu tare, ihworakpọ guọnọ Usuon ri Jihova ayen ki se vwo omavwerhovwẹn?
Se Aghwoghwo 8:9, ovwan ta ota kpahen onọ nana:
-
Kidie nẹ ọ dia Jihova yen sun akpọ na-a, die kọyen phia?
-
Adam vẹ Ivi pha gbagba, Iparadiasi yen ayen je dia. Ẹkẹvuọvo, ayen kerhọ rẹ Eshu, ọtiọyena ayen da vwọso Jihova
-
Fikirẹ ẹvwọsuọ yena umwemwu, ojaẹriọ vẹ ughwu da rhe dia evunrẹ akpọ na
-
Jihova che si umwemwu, ojaẹriọ kugbe ughwu no. Vwẹ obaro na, ihworakpọ cha dia gbagba je dia evunrẹ Iparadaisi
6. Jihova vwo oniso rẹ ojaẹriọ rẹ avwanre
Jihova vwo oniso rẹ ojaẹriọ rẹ avwanre? Roro kpahen oborẹ Ovie Devid vẹ ọyinkọn Pita siri. Se Une Rẹ Ejiro 31:7 kugbe 1 Pita 5:7, ovwan ta ota kpahen onọ nana:
-
Mavọ yen oma ru we wọ vwọ mrẹvughe nẹ Jihova vwo oniso rẹ ojaẹriọ rẹ avwanre?
7. Ọghẹnẹ che phioba phiyọ ojaẹriọ rẹ ihworakpọ eje
Se Aizaya 65:17 kugbe Ẹvwọphia 21:3, 4, ovwan ta ota kpahen onọ nana:
-
Diesorọ oma vwọ vwerhen avwanre nẹ Jihova che si omiamiavwe rẹ erharhe rẹ erọnvwọn so kẹ ihworakpọ vwo no?
Wọ riẹnre jovwo?
Eshu miovwo odẹ ri Jihova ọke ro vwo gun efian rẹsosuọ. Kọyen, o miovwo omamọ rẹ odẹ ro vwori kerẹ Osun ro vwo ẹguọnọ ro ji brorhiẹn ọsoso. Ọke rẹ Jihova de si ojaẹriọ rẹ ihworakpọ no vwẹ obaro na, o che ru odẹ rọyen fon. Vwẹ idjerhe yena, ko che djephia nẹ usuon rọyen yen me yovwin. Orufon rẹ odẹ rẹ Ọghẹnẹ yen obo re ma ghanre vwẹ akpọ vẹ odjuvwu.—Matiu 6:9, 10.
IHWO EVO TA: “Ojaẹriọ ọyen ẹbẹre ọvo rẹ ọhọre rẹ Ọghẹnẹ vwọ kẹ avwanre.”
-
Die yen wo cha ta?
ỌDJẸKOKO
Eshu rọ dia Idẹbono na vẹ ihworakpọ rẹsosuọ yen so umwemwu rọhẹ akpọ na. Jihova vwo oniso rẹ ojaẹriọ rẹ avwanre, o ji che siono kẹrẹkpẹ.
Ẹrhomafuẹrẹn
-
Efian vọ yen Eshu gun vwọ kẹ Ivi?
-
Mavọ yen ẹvwọsuọ rẹ Adam vẹ Ivi na vwo djobọte avwanre?
-
Mavọ yen avwanre vwọ riẹn nẹ Jihova vwo oniso rẹ ojaẹriọ avwanre?
HIẸ GUỌNỌ
Mrẹ oborẹ umwemwu mudiaphiyọ vwẹ Baibol na.
Se kpobarophiyọ kpahen onọ rẹ Eshu nọre vwẹ ogba rẹ Idẹn.
“Diesorọ Ọghẹnẹ Vwọ Vwẹ Uphẹn kẹ Ojaẹriọ?” (Uwevwin Orhẹrẹ ri January 1, 2014)
Fuẹrẹn ẹkpahọnphiyọ ọvwevwerhen vwọ kẹ onọ ọgangan ọvo.
Mrẹ oborẹ ọshare ọvo yono kpahen ojaẹriọ re gba riariẹ phiyọ.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
