UYONO 49
Mavọ Yen Orua Wẹn se Vwo Vwo Omavwerhovwẹn?—Ẹbẹre 1
Ihwo re rọvwọnre guọnọre nẹ omavwerhovwẹn rẹ ayen vwori vwẹ ẹdẹ orọnvwe rayen na dia bẹdẹ. Ọ sa dia ọtiọyen. Inenikristi re rọvwọnre ikpe buebun re, re je davwẹngba vwọ reyọ uchebro ri Baibol na vwo ruiruo riẹnre nẹ ọ sa dia ọtiọyen.
1. Uchebro vọ yen Baibol na vwọ kẹ eshare?
Jihova vwẹ eshare vwo mu igbuyovwin rẹ orua. (Se Ẹfesọs 5:23.) Jihova guọnọre nẹ ọshare brorhiẹn ro che fierere kẹ orua rọyen. Baibol na da vuẹ eshare: “Wa guọnọ eya rẹ ovwan.” (Ẹfesọs 5:25) Die yen ọyena mudiaphiyọ? Ọshare ro vwo ẹguọnọ vwẹrote aye rọyen vwẹ uwevwin vẹ azagba. Ọ sẹro rọyen vwo nẹ imuoshọ je davwẹngba rọyen eje vwọ vwẹrote ọdavwẹ rẹ ugboma vẹ iroro rọyen. (1 Timoti 5:8) Ma rho kparobọ, ọ vwẹ Ota rẹ Ọghẹnẹ vwo yono evwruwevwin rọyen. (Matiu 4:4) Kerẹ udje, ọ vẹ aye rọyen nẹrhovwo ji se Baibol na kuẹgbe. Ọshare da nabọ vwẹrote aye rọyen, ọ sẹro rẹ oyerinkugbe rọyen vẹ Jihova.—Se 1 Pita 3:7.
2. Uchebro vọ yen Baibol na vwọ kẹ eya?
Baibol na tare nẹ “aye vwẹ oma kpotọ kẹ ọshare.” (Ẹfesọs 5:33) Mavọ yen o se vwo ru ọtiọyen? O se roro kpahen omamọ rẹ iruemu rẹ ọshare rọyen vẹ ẹgbaẹdavwọn rọ vwọ vwẹrote ọyen vẹ emọ na. O ji dje ọghọ phia womarẹ o vwo biẹcha orhiẹn ọshare rọyen brẹ, vwomakpotọ ta ota kẹ, ta ota esiri kpahọn, ọ da tobọ dianẹ ọ hẹ evunrẹ ukoko na-a.
3. Mavọ yen aye gbe ọshare sa vwọ bọn orọnvwe rayen gan?
Baibol na da ta kpahen ihwo re rọvwọnre: “Ayen ivẹ na ke cha dia oma ọvo.” (Matiu 19:5) Ọnana mudiaphiyọ nẹ ayen cha kẹnoma kẹ obo re cha nẹrhẹ ẹguọnọ rayen djiro. Ayen se ru ọtiọyen siẹrẹ ayen da ghwọrọ ọke kuẹgbe, rhievun ta ota kẹ ohwohwo vwọrẹ ẹguọnọ ọkieje. Jokpa ri Jihova ọvo, ohwo yẹrẹ orọnvwọn vuọvo rha ghanre vrẹ ọrivẹ raye-en. Ayen jomaotọ rere ayen wo je vwo oyerinkugbe ro je fo vẹ ohwo ọfa.
HIẸ KODO
Mrẹ odjekẹ ri Baibol re sa bọn orọnvwe wẹn gan.
4. Eshare, ovwan vwo ẹguọnọ je vwẹrote eya rẹ ovwan
Baibol na da ta: “Eshare na guọnọ eya rayen kerẹ omobọ rayen.” (Ẹfesọs 5:28, 29) Die yen ọyena mudiaphiyọ? Hworo IVIDIO na, ovwan ta ota kpahen onọ ro nenire.
-
Idjerhe vọ yen ọshare se vwo djephia nẹ o vwo ẹguọnọ rẹ aye rọyen, ọ je vwẹrote?
Se Kọlose 3:12, ovwan ta ota kpahen onọ nana:
-
Mavọ yen ọshare se vwo dje iruemu yena phia vwẹ orọnvwe rọyen?
5. Eya, ovwan vwo ẹguọnọ ji muọghọ kẹ eshare rẹ ovwan
Baibol na vuẹ eya nẹ ayen muọghọ kẹ eshare rayen tẹ ọ ga Jihova yẹrẹ ọ ga-a. Se 1 Pita 3:1, 2, ovwan ta ota kpahen enọ nana:
-
Ọ da dianẹ ọshare wẹn ga Jihova-a, o muẹro nẹ wọ guọnọ nẹ ọ ga. Ona vọ yen wo rorori nẹ ọyen cha ma wian, wo vwo ghwoghwota kẹ ọkieje gbanẹ wo vwo dje omamọ rẹ uruemu phia ji muọghọ kẹ? Kẹ, diesorọ?
Eshare vẹ eya se bru omamọ rẹ orhiẹn kugbe. Ẹkẹvuọvo, o vwo ọke evo rẹ aye cha vwọ rhọvwenphiyọ orhiẹn rẹ ọshare rọye-en. Ọ sa ta ẹwẹn rọyen phia dẹndẹn vwẹ idjerhe ọghọ, jẹ ofori nẹ ọ karophiyọ nẹ ọshare na yen Jihova kẹre oghwa ro vwo brorhiẹn rẹ obo ri yovwirin kẹ orua na. Ofori nẹ aye na davwẹngba vwo bicha orhiẹn rẹ ọshare rọyen. Ọyena che toroba omavwerhovwẹn rẹ orua na. Se 1 Pita 3:3-5, ovwan ta ota kpahen onọ nana:
-
Mavọ yen oma ru Jihova siẹrẹ aye de muọghọ kẹ ọshare rọyen?
6. Wo se phi ebẹnbẹn rehẹ orọnvwe wẹn kparobọ
O vwo orọnvwe vuọvo rọ gbare-e. Ọtiọyena, ofori nẹ eya gbe eshare wiankugbe vwo phi ebẹnbẹn kparobọ. Hworo IVIDIO na, ovwan ta ota kpahen onọ ro nenire.
-
Vwevunrẹ ividio na, erhọ yen erọnvwọn evo ri djerephia nẹ aye gbe ọshare na ra riẹn yerẹ-ẹn?
-
Die yen ayen ruru vwọ bọn orọnvwe rayen gan?
Se 1 Kọrẹnt 10:24 kugbe Kọlose 3:13. Wo de se ẹkpo ri Baibol ọvuọvo nu, ovwan ta ota kpahen onọ nana:
-
Die yen cha phia siẹrẹ a da vwẹ uchebro na vwọ bọn orọnvwe gan?
Baibol na tare nẹ e muọghọ kẹ ohwohwo. Ọghọ tiọyena churobọ si a vwọ nabọ vwẹrote ohwo vwẹ idjerhe ro shephiyọ. Se Rom 12:10, ovwan ta ota kpahen enọ nana:
-
Ono yen che sivwin ọghọ emuo, ọshare gbanẹ aye? Kẹ, diesorọ yẹrẹ diesorọ o vwo jẹ dia ọtiọyen?
IHWO EVO TA: “Mẹ vẹ ọrivẹ rẹ orọnvwe mẹ ra kpẹkpẹ kerẹ obo ri jovwo-o.”
-
Mavọ yen wo se vwo djephia nẹ Baibol na sa vwẹ ukẹcha phia?
ỌDJẸKOKO
Aye gbe ọshare se vwo omavwerhovwẹn siẹrẹ ayen de vwo ẹguọnọ rẹ ohwohwo, muọghọ kẹ ohwohwo, je yan nene odjekẹ ri Baibol.
Ẹrhomafuẹrẹn
-
Mavọ yen ọshare se vwo toroba omavwerhovwẹn vwẹ orọnvwe rọyen?
-
Mavọ yen aye se vwo toroba omavwerhovwẹn vwẹ orọnvwe rọyen?
-
Ọ da dianẹ wọ rọvwọnre, odjekẹ ri Baibol vọ yen sa bọn orọnvwe wẹn gan?
HIẸ GUỌNỌ
Yono kpahen erọnvwọn evo re sa nẹrhẹ orua wẹn vwo omavwerhovwẹn.
Ni uhworo rẹ ividio ro djunute ebruphiyọ rọ herọ siẹrẹ wọ da vwẹ uchebro ri Jihova vwo ruiruo vwẹ orọnvwe wẹn.
Mrẹ obo ro mudiaphiyọ ra vwọ vwomakpotọ kẹ ọshare kerẹ ọgbuyovwin rẹ orua.
“Diesorọ Eya Vwọ Vwomakpotọ Vwọ kẹ Igbuyovwin?” (Uwevwin Orhẹrẹ ri May 15, 2010)
Mavọ yen aye gbe ọshare ọvo re rọvwọnre vwo phi ebẹnbẹn rayen kparobọ—ji te orọnvwe ẹfan rayen?
Womarẹ Ukẹcha ri Jihova Avwanre Rhoma Bọn Orọnvwe Avwanre Gan (5:14)
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
