UYONO 50
Mavọ Yen Orua Wẹn se Vwo Vwo Omavwerhovwẹn?—Ẹbẹre 2
Emọ ọyen okẹ ro nẹ obọ ri Jihova rhe. Ọ guọnọre nẹ emiọvwọn vwẹrote okẹ nana. Jihova vwẹ uchebro kẹ emiọvwọn rere ayen se vwo ruiruo yena. Uchebro rọyen je sa vwẹ ukẹcha vwọ kẹ emọ vwo toroba omavwerhovwẹn rẹ orua na.
1. Uchebro vọ yen Jihova vwọ kẹ emiọvwọn?
Jihova guọnọre nẹ emiọvwọn vwo ẹguọnọ rẹ emọ rayen ji nene ayen ghwọrọ ọke kugbe. Ọ guọnọre nẹ emiọvwọn sẹro rẹ emọ rayen nẹ imuoshọ ji reyọ odjekẹ ri Baibol vwo yono ayen. (Isẹ 1:8) Jihova da ta kẹ esẹ na: “Wa ghẹrẹ [emọ ovwan] vwẹ . . . uyono rẹ Ọrovwohwo.” (Se Ẹfesọs 6:4.) Oma vwerhen Jihova siẹrẹ emiọvwọn da vwẹ odjekẹ rọyen vwo yono emọ rayen ukperẹ ayen vwọ vwẹ owian na kẹ ihwo efa.
2. Uchebro vọ yen Jihova vwọ kẹ emọ?
Jihova da vuẹ emọ na: “We mu ọghọ kẹ esẹ vẹ ini rẹ ovwan.” (Se Kọlose 3:20.) Emọ de muọghọ ji kerhọ rẹ esẹ vẹ ini rayen, oma cha vwerhen Jihova kugbe esẹ vẹ ini rayen. (Isẹ 23:22-25) Jesu phi omamọ rẹ udje phiyotọ ọke rọ vwọ hẹ omotete. Dede nẹ ọ pha gbagba, ọ kerhọ rẹ ọsẹ vẹ oni rọyen ji muọghọ kẹ ayen.—Luk 2:51, 52.
3. Mavọ yen wo se vwo sikẹrẹ Ọghẹnẹ kerẹ orua?
Wọ da dia ọmiọvwọn, o muẹro nẹ wọ guọnọre nẹ emọ wẹn vwo ẹguọnọ ri Jihova kerẹ owẹ. Mavọ yen ọ sa vwọ dia ọtiọyen? Siẹrẹ wọ da yan nene iji nana: “Wọ me vwẹ [Ota rẹ Ọghẹnẹ] yono emọ wẹn, wo mi gbe ikun rayen siẹ wo de tidia vwẹ uwevwi wẹn vẹ ọke ru wọ da yan vwẹ idjerhe.” (Urhi Rivẹ 6:7) E vwo “yono” mudiaphiyọ a vwọ vwanriẹn eta na abọ buebun. Vwẹ idjerhe vuọvo na, ofori nẹ wọ vwanriẹn eta na kẹ emọ wẹn abọ buebun rere ayen sa vwọ karophiyọ. Ẹkpo ri Baibol na mudiaphiyọ nẹ wọ reyọ kuphẹn kuphẹn ro rhiephiyọ vwọ ta ota kẹ emọ wẹn kpahen Jihova. A vwọ rhuẹrẹ ọke phiyọ kudughwrẹn kudughwrẹn vwọ kẹ ẹga rẹ orua ghanre mamọ. Wo rhe vwo emọ-ọ, wọ je cha mrẹ erere wo de yono Ota rẹ Ọghẹnẹ kẹdẹ kẹdẹ.
HIẸ KODO
Roro kpahen erọnvwọn evo ri se toroba omavwerhovwẹn vẹ ẹdia rẹ ofuvwegbe rẹ orua.
4. Yono emọ wẹn vwọrẹ ẹguọnọ
Eyono rẹ emọ sa vọn vẹ egbabọse. Ukẹcha vọ yen Baibol na vwọ phia? Se Jems 1:19, 20, ovwan ta ota kpahen enọ nana:
-
Mavọ yen emiọvwọn se vwo dje ẹguọnọ phia ọke rẹ ayen vẹ emọ rayen da ta ota kuẹgbe?
-
Diesorọ emiọvwọn vwo jẹ ghwọku emọ rayen ọke rẹ ophu de mu ayen? a
5. Sẹro rẹ emọ wẹn
Wọ sa vwọ sẹro rẹ emọ wẹn, ofori nẹ wẹ vẹ ayen ta ota kpahen ehware. Ọnana sa bẹn ẹta. Hworo IVIDIO na, ovwan ta ota kpahen onọ ro nenire.
-
Diesorọ ọ vwọ bẹn emiọvwọn evo vwo nene emọ rayen ta ota kpahen ehware?
-
Idjerhe vọ yen emiọvwọn evo vwọ ta ota kpahen ehware kẹ emọ rayen?
Kirobo ra mraro rọyen, akpọ rẹ Eshu na miovwẹ phiyọ. Se 2 Timoti 3:1, 13, ovwan ta ota kpahen onọ nana:
-
Ihwo umwemwu re djunute vwẹ owọ 13 na gbe emọ ẹgua. Ọtiọyena, diesorọ ọ vwọ ghanre emiọvwọn vwo yono emọ rayen kpahen ehware kugbe oborẹ ayen sa vwọ sẹro rẹ oma rayen vwo nẹ abọ rẹ ihwo ri gbe emọ ẹgua?
Wọ riẹnre jovwo?
Iseri ri Jihova teyen ẹbe sansan re sa chọn emiọvwọn uko vwo yono emọ rayen kpahen ehware vẹ oborẹ ayen sa vwọ sẹro rayen nẹ abọ rẹ ihwo re guọnọ gbe ayen ẹgua. Kerẹ udje, ni:
-
Sẹro rẹ Emọ Wẹn (ividio)
-
“Yono Emọ Wẹn Kpahen Ehware” (Awake! Ukeri 5 2016)
6. Muọghọ kẹ ọsẹ vẹ oni wẹn
Emọ vẹ ighene se muọghọ kẹ esẹ vẹ ini rayen womarẹ oborẹ ayen ta ota kẹ ayen wan. Hworo IVIDIO na, ovwan ta ota kpahen onọ ro nenire.
-
Diesorọ ọ vwọ ghanre eghene vwọ ta ota vwẹ idjerhe rẹ ọghọ vwọ kẹ ọsẹ vẹ oni rọyen?
-
Mavọ yen eghene sa vwọ ta ota kẹ ọsẹ vẹ oni rọyen vwẹ idjerhe ro vwo djephia nẹ o muọghọ kẹ ayen?
Se Isẹ 1:8, ovwan ta ota kpahen onọ nana:
-
Die yen ofori nẹ eghene ru ọke rẹ ọsẹ vẹ oni rọyen da vwẹ odjekẹ vwọ kẹ?
7. Ga Jihova kerẹ orua
Erua rẹ Iseri ri Jihova vwẹ ọke rẹ ayen vwọ ga Ọghẹnẹ kuẹgbe kudughwrẹn kudughwrẹn. Mavọ yen e ru ẹga rẹ orua na wan? Hworo IVIDIO na, ovwan ta ota kpahen onọ ro nenire.
-
Mavọ yen orua se vwo vwo ọrhuẹrẹphiyotọ rẹ Ẹga Orua rẹ ọkieje?
-
Die yen emiọvwọn se ru rere ẹga rẹ orua rayen sa vwọ vwerhoma?—Ni uhoho rọhẹ ọtonphiyọ rẹ uyono nana.
-
Diesorọ ọ sa vwọ bẹn re vwo ru uyono kugbe?
Vwẹ Izrẹl rẹ awanre, Jihova guọnọre nẹ erua fuẹrẹn Baibol na kugbe ọkieje. Se Urhi Rivẹ 6:6, 7, ovwan ta ota kpahen onọ nana:
-
Mavọ yen wọ sa vwọ reyọ odjekẹ nana vwo ruiruo?
Iroroẹjẹ kpahen ẹga rẹ orua:
-
Muegbe vwọ kẹ uyono.
-
Ovwan se ẹkpo ri Baibol ọvo rẹ orua na cha riavwerhen rọyen je ta ota kpahọn.
-
Imitete dahẹ uwevwin na, danlodu yẹrẹ printi rẹ iruo vwọ kẹ emọ rọhẹ jw.org.
-
Ighene dahẹ uwevwin na, ovwan fuẹrẹn iyovwinreta ri shekpahen ighene vwẹ jw.org.
-
Wẹ vẹ emọ wẹn ru udje rẹ ikuegbe ri Baibol ọvo.
-
Ovwan ni ividio ọvo vwẹ jw.org je ta ota kpahọn.
IHWO EVO TA: “Baibol na gan nọ vwọ kẹ imitete.”
-
Die yen wọ cha ta?
ỌDJẸKOKO
Jihova guọnọre nẹ emiọvwọn vwo ẹguọnọ rẹ emọ rayen, yono ayen je sẹro rayen; emọ muọghọ je kerhọ rẹ esẹ vẹ ini rayen; orua na je ga Jihova kugbe.
Ẹrhomafuẹrẹn
-
Mavọ yen emiọvwọn se vwo yono je sẹro rẹ emọ rayen?
-
Mavọ yen emọ se vwo muọghọ kẹ esẹ vẹ ini rayen?
-
Erere vọ yen che norhe siẹrẹ orua de vwo ọke rẹ ayen vwo ru ẹga orua kudughwrẹn kudughwrẹn?
HIẸ GUỌNỌ
Die yen che muegbe rẹ emọ wẹn vwo yerin te ẹdia rẹ omiragua?
Yono kpahen uchebro rẹ Baibol na vwọ kẹ ihwo re vwẹrote esẹ vẹ ini re ghwore.
“Die Yen Baibol na Ta Kpahen Ẹroevwote rẹ Esẹ vẹ Ini re Ghwore?” (Uyovwinrota rọhẹ jw.org)
Mrẹ oborẹ ọshare ọvo rọ riẹn obo ra vwẹrote emọ-ọ vwọ dia ọsẹ ro phikparobọ ukuko na.
Mrẹ oborẹ esẹ sa vwọ bọn oyerinkugbe rayen vẹ emeshare rayen gan.
“Mavọ Yen Esẹ se Vwo Sikẹrẹ Emeshare Rayen?” (Uwevwin Orhẹrẹ ri November 1, 2011)
a Vwẹ Baibol na, “ẹghwọ kuo” churobọ si odjekẹ, ọkpọvi kugbe ukẹcha. O vwo ọke vuọvo ro vwo mudiaphiyọ ekan yẹrẹ uruemu ọko-on.—Isẹ 4:1.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
