UYONO 57
Wo de Rhe Ru Umwemwu Ọgangan Vwo?
Dede nẹ wo vwo ẹguọnọ ri Jihova mamọ wọ je davwẹngba vwọ kẹnoma kẹ obo ri miovwo ivun, jẹ wo se ru chọ ọke evo. Jẹ, imwemwu evo gan nẹ evo. (1 Kọrẹnt 6:9, 10) Wo de ru umwemwu ọgangan, karophiyọ nẹ Jihova ji sen wẹ kare kare-e; ọ je guọnọ vwo ghovwo uwe je chọn wẹ uko.
1. Die yen ofori nẹ wo ru wọ sa vwọ mrẹ evwoghovwo ri Jihova?
Ihwo ri vwo ẹguọnọ ri Jihova muomaphiyọ gangan ayen da mrẹvughe nẹ ayen ru umwemwu ọgangan. Ẹkẹvuọvo, ayen mrẹ uchebro vwo nẹ ive ri Jihova nana: “Ọ da dianẹ imwemwu wẹn họhọ isene, e cha họhọ ẹton rẹ ogegede.” (Aizaya 1:18) E de kurhẹriẹ nẹ otọ ubiudu rhe, Jihova che vwo ghovwo avwanre. Mavọ yen e kuẹrhẹriẹ wan? Avwanre viẹ idiekpọvwẹ kpahen oborẹ avwanre ruru, dobọ rọyen jẹ, je yare evwoghovwo ri Jihova. Ọtiọyena, kẹ avwanre davwẹngba vwo wene iroro vẹ iruemu echọchọ ri sun avwanre kpo umwemwu na ji yeren akpọ nene iwan ri Jihova.—Se Aizaya 55:6, 7.
2. Mavọ yen Jihova vwọ reyọ ekpako na vwọ chọn avwanre uko ọke re de ru umwemwu?
E de ru umwemwu ọgangan, Jihova tare nẹ e “se ekpako rẹ [ukoko na].” (Se Jems 5:14, 15.) Eshare nana vwo ẹguọnọ ri Jihova vẹ igodẹ na. Ayen muwan rẹ ayen vwọ chọn avwanre uko vwọ rhuẹrẹ oyerinkugbe avwanre vẹ Jihova phiyọ.—Galesha 6:1.
Mavọ yen ekpako na vwọ chọn avwanre uko ọke re de ru umwemwu? Ekpako ivẹ yẹrẹ erha cha vwẹ Baibol na vwọ kpọ avwanre vi. Ayen je cha vwẹ iroroẹjẹ vẹ uchebro re sa chọn avwanre uko vwọ kẹnoma kẹ umwemwu yena obọfa. A sa vwọ sẹro rẹ erọnvwọn evo avwanre ruẹ vwẹ ukoko na vwo nẹ imuoshọ, ekpako na si kohwo kohwo ro ru umwemwu ọgangan rọ rhọnvwe kurhẹriẹ-ẹ nẹ ukoko na.
HIẸ KODO
Vwo ọdavwaro, wo ji yono kokodo kpahen ukẹcha rẹ Jihova vwọ kẹ avwanre ọke re de ru umwemwu ọgangan.
3. A da fan imwemwu ka sa rhoma sikẹrẹ Ọghẹnẹ
Koka koka rẹ umwemwu rẹ avwanre ruru da Jihova, ọtiọyena ofori nẹ a fan imwemwu na vwọ kẹ. Se Une Rẹ Ejiro 32:1-5, ovwan ta ota kpahen onọ nana:
-
Diesorọ o vwo fo nẹ a ta umwemwu avwanre kẹ Jihova ukperẹ a vwọ djahọn?
Vwọ vrẹ a vwọ fan umwemwu rẹ avwanre kẹ Jihova, a cha mrẹ urovwoma siẹrẹ a da guọnọ ukẹcha rẹ ekpako na. Hworo IVIDIO na, ovwan ta ota kpahen onọ ro nenire.
-
Vwevunrẹ ividio na, mavọ yen ekpako na vwọ chọn Canon uko vwo rhivwin bru Jihova rhe?
Ofori nẹ e rhievun ta uyota na eje kẹ ekpako na; ayen sa chọn avwanre uko. Se Jems 5:16, ovwan ta ota kpahen onọ nana:
-
Diesorọ ọ cha vwọ lọhọ ekpako na vwọ chọn avwanre uko siẹrẹ a da ta uyota kẹ ayen?
Fan imwemwu wẹn, ta uyota kẹ ekpako na, wo ji rhiabọreyọ ukẹcha ri Jihova
4. Jihova gbe arodọnvwẹ vwọ kẹ irumwemwu
Ohwo ro ru umwemwu ọgangan ra rhọnvwe nene iwan ri Jihova-a, ke sio nẹ ukoko na, e rhe che nene ru kugbe siẹrẹ e de ruẹ irueru akpọẹriọ yẹrẹ ehẹhaa. Se 1 Kọrẹnt 5:6, 11, ovwan ta ota kpahen onọ nana:
-
Kirobo rẹ iphuephu nẹrhẹ ibrẹdi phuẹ, mavọ yen e vwo nene ihwo re rhọnvwe kurhẹriẹẹ ruẹ kuẹgbe se vwo miovwo ukoko na?
Ekpako vwẹrokere arodọnvwẹ ri Jihova gbe vwọ kẹ irumwemwu re gbaree womarẹ ayen vwọ vwẹ ukẹcha vwọ kẹ ihwo re si vwo nẹ ukoko na. Dede nẹ ọ miavwa ohwo re vwo si ohwo nẹ ukoko na, buebun rayen rhoma rhivwin rhe kidie nẹ ọghwọku yena cha ayen uko vwọ mrẹvughe nẹ oborẹ ayen ruru na chọre.—Une Rẹ Ejiro 141:5.
Mavọ yen idjerhe ri Jihova nene irumwemwu yerẹn wan vwo djephia nẹ ọyen ohwo ro brorhiẹn rẹ abavo, ro gbe arodọnvwẹ ji dje ẹguọnọ phia?
5. Jihova vwo ghovwo avwanre e de kurhẹriẹ
Jesu vwẹ udje ọvo vwọ chọn avwanre uko vwọ riẹn oborẹ oma ru Jihova ọke rẹ ohwo ọvo de kurhẹriẹ. Se Luk 15:1-7, ovwan ta ota kpahen onọ nana:
-
Die yen ọnana yono uwe kpahen Jihova?
Se Izikiẹl 33:11, ovwan ta ota kpahen onọ nana:
-
Die yen e che ru vwo djephia nẹ e kurhẹriẹ re?
Kerẹ osuigodẹ, Jihova nabọ vwẹrote igodẹ rọyen
IHWO EVO TA: “Oshọ mu vwe nẹ me da vuẹ ekpako na kpahen umwemwu mẹ, e che si vwe nẹ ukoko na.”
-
Die yen wọ cha vuẹ ohwo ro vwo oka rẹ ẹwẹn tiọyen?
ỌDJẸKOKO
E de ru umwemwu ọgangan, viẹ idiekpọvwẹ kpahọn ji brorhiẹn a vwọ kẹnoma kẹ obo re chọre, Jihova che vwo ghovwo avwanre.
Ẹrhomafuẹrẹn
-
Diesorọ ọ vwọ ghanre a vwọ fan imwemwu avwanre vwọ kẹ Jihova?
-
Die yen ofori nẹ e ru a sa vwọ mrẹ evwoghovwo?
-
E de ru umwemwu ọgangan, diesorọ a vwọ guọnọ ukẹcha rẹ ekpako na?
HIẸ GUỌNỌ
Mrẹ oborẹ ọshare ọvo vwọ mrẹ arodọnvwẹ ri Jihova re djisẹ rọyen vwẹ Aizaya 1:18.
Idjerhe vọ yen ekpako na vwọ davwẹngba vwọ vwẹ ukẹcha kẹ ihwo ri ru umwemwu ọgangan?
“Obo re se Vwo Dje Ẹguọnọ Kugbe Arodọnvwẹ kẹ Irumwemwu” (Uwevwin Orhẹrẹ rẹ August 2024)
Mrẹ idjerhe re vwo dje ẹguọnọ vẹ arodọnvwẹ vwọ kẹ irumwemwu ri kurhẹriẹẹ.
“Ukẹcha ra sa Vwọ kẹ Ihwo re Si Nẹ Ukoko Na” (Uwevwin Orhẹrẹ rẹ August 2024)
Vwẹ ikuegbe rẹ “Ofori nẹ Mi Rhivwin Bru Jihova Rhe,” mrẹ oborẹ ọshare ọvo ro bo nẹ ukoko na vwọ mrẹ nẹ Jihova yen si ọyen rhivwin rhe.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
