UYONO 11
Ayen Si Kpahen Jesu
Wọ mrẹ ihwo rehẹ evunrẹ uhoho na?— Matiu, Mak, Luk, Jọn, Pita, Jems, Jud kugbe Pọl. Ihwo nana eje diarọ ọke ri Jesu vwọ hẹ akpọ, ayen si kpahen Jesu. E jẹ e yono kpahen ayen.
Die wọ riẹn kpahen ihwo nana?
Erha usun rẹ eshare nana nene Jesu ruiruo raghwoghwo na kerẹ iyinkọn rọyen. Wọ riẹn edẹ rayen?— Matiu, Jọn kugbe Pita. Ọyinkọn Matiu vẹ ọyinkọn Jọn nabọ vughe Jesu, ayen si ikuegbe rẹ akpeyeren ri Jesu phiyotọ. Ọyinkọn Jọn ji si ọbe ọvo re se Ẹvwọphia kugbe ileta erha re diẹ Jọn Rẹsosuọ, Jọn Rivẹ kugbe Jọn Rerha. Ọyinkọn Pita si ileta ivẹ vwevunrẹ Baibol na. Eyehẹ Pita Rẹsosuọ kugbe Pita Rivẹ.
Vwevunrẹ ileta rivẹ ro siri, Pita de si kpahen ọke ri Jihova vwọ tota kpahen Jesu vwo nẹ odjuvwu rhe, rọvwọ ta nẹ: ‘Ọnana ọmọ mẹ. Mi vwo ẹguọnọ kpahọn, oma rọyen je vwerhen ovwẹ.’
Ihwo ri chekọ rehẹ evunrẹ uhoho na ji yono avwanre kpahen Jesu vwevunrẹ ẹbe rẹ ayen siri. Mak ọyen ọvo usun rayen. Ọ sa dianẹ ọ herọ ọke revwo mwu Jesu, o rhiẹromrẹ erọnvwọn eje re phiare. Luk ji si kpahen Jesu. Luk ọyen idọktọ, ọ sa dianẹ Jesu ghwu nu ọ ke rhe dia Onene-ri-Kristi.
Ihwo-ivẹ efa rẹ wọ mrẹ vwẹ uhoho na ri ji vwobọ vwẹ isiesi ri Baibol na, eyen iniọvo ri Jesu. Wọ riẹn edẹ rayen?— Jems vẹ Jud. Ayen se Jesu gbuyota ẹsosuọ-ọ. Ayen tobọ roro nẹ uyovwin rọyen gbare-e. Ukuko na, ayen de se Jesu gbuyota, kẹ ayen rhi dia Inene-ri-Kristi.
Ohwo ro chekọ wọ mrẹ vwẹ uhoho na ro ji si vwẹ Baibol na ọyen Pọl. Tavwen ọ ke rhe dia Onene-ri-Kristi, a riẹnrẹ phiyẹ Sọl. O vwo utuoma kpahen Inene-ri-Kristi mamọ. Wọ riẹn obo ri mwu Pọl vwọ dia Onene-ri-Kristi?— Ẹdẹ ọvo, Pọl vwo kpẹ asan, o de nyo upho ọvo ro nẹ obodjuvwu rhẹ. Ọyen upho ri Jesu! Ọ da nọ Pọl: ‘Diesorọ wo vwo mwẹ kpahen idibo mẹ?’ Ọyena wọ wan nu, Pọl de kurhẹriẹ rhe dia Onene-ri-Kristi. Pọl si ẹbe 14 vwevunrẹ Baibol na, vwo nẹ ọbe ri Rom re te Hibru.
Avwanre se Baibol na kẹdẹ kẹdẹ, ọ diẹ ọtiọyen?— Avwanre che yono erọnvwọn buebun kpahen Jesu siẹrẹ e de se Baibol na kọke kọke. Wọ guọnọ riẹn erọnvwọn efa kpahen Jesu?—
